ວັນທີ 6/8, ໃນຂອບເຂດກອງປະຊຸມລັດຖະມົນຕີການຕ່າງປະເທດອາຊຽນ AMM 48 ແລະ ບັນດາກອງປະຊຸມທີ່ກ່ຽວຂ້ອງຢູ່ກົວລາລຳເປີ ປະເທດມາເລເຊຍ, ໄດ້ໄຂເວທີປາໄສພາກພື້ນອາຊຽນ(ARF) ຄັ້ງທີ 22. ເວທີປາໄສໄດ້ປຶກສາຫາລືບັນດາບັນຫາທີ່ພົ້ນເດັ່ນຂອງພາກພື້ນ, ໃນນັ້ນມີບັນຫາທະເລຕາເັວນອອກ. ກົງກັນຂ້າມກັບບັນດາການກະທຳຫຼົບຫຼີກຂອງປັກກິງທີ່ວ່າ ARF ບໍ່ແມ່ນບ່ອນທີ່ແທດເໝາະເພື່ອປຶກສາຫາລືກ່ຽວກັບທະເລຕາເວັນອອກ, ບັນຫານີ້ພັດກາຍເປັນເນື້ອໃນຈຸດສຸມ ທີ່ໄດ້ນຳມາປຶກສາຫາລືຫຼາຍກ່ວາໝູ່ຊຶ່ງບໍ່ພຽງແຕ່ຢູ່ໃນບັນດາວາລະກອງປະຊຸມ, ການພົບປະຕ່າງໆຢ່າງເປັນທາງການເທົ່ານັ້ນ, ຫາກຍັງຖືກນຳມາປຶກສາຫາລືທີ່ບັນດາການພົບປະຢູ່ນອກກອງປະຊຸມອີກດ້ວຍ. ເປັນໜ້າສົນໃຈແມ່ນ ອາຊຽນໄດ້ມີສຽງເວົ້າລວມທີ່ແຂງແຮງກ່ຽວກັບບັນຫານີ້.
ກອງປະຊຸມ SOM ASEAN |
ARF ໄດ້ຮັບການດຳເນີນເປັນຄັ້ງທຳອິດໃນເດືອນ 7/1994 ຢູ່ປາງກອກ, ປະເທດໄທ, ດ້ວຍຈຸດໝາຍໃນເບື້ອງຕົ້ນແມ່ນຮັກສາການສົນທະນາ ແລະ ແລກປ່ຽນຄຳເຫັນກ່ຽວກັບບັນດາບັນຫາໃນຂົງເຂດການເມືອງ-ການປ້ອງກັນຄວາມສະຫງົບ, ສ້າງຄວາມໄວ້ເນື້ອເຊື່ອໃຈ ແລະ ການທູດຢູ່ພາກພື້ນອາຊີ-ປາຊີຟິກ. ມາຮອດປະຈຸບັນ, ARF ມີ 27 ປະເທດເຂົ້າຮ່ວມ ຊຶ່ງລວມທັງ 10 ປະເທດອາຊຽນ, 10 ປະເທດຄູ່ເຈລະຈາຂອງອາຊຽນ ແລະ 7 ປະເທດອື່ນ. ດ້ວຍຂອບຂະໜາດ ແລະ ການເຂົ້າຮ່ວມທີ່ມີຄວາມຮັບຜິດຊອບຂອງບັນດາປະເທດສະມາຊິກ, ໃນຊຸມປີທີ່ຜ່ານມາ, ARF ໄດ້ປະກອບສ່ວນສຳຄັນເຂົ້າໃນການສ້າງສະພາບແວດລ້ອມແຫ່ງຄວາມໝັ້ນຄົງໃນພາກພື້ນ.
ທະເລຕາເວັນອອກແມ່ນບັນຫາທີ່ຮ້ອນເຮັ່ງຢູ່ ARF 22
ໄລຍະມໍ່ໆມານີ້, ພ້ອມກັບບັນດາສິ່ງທ້າທາຍອື່ນທີ່ມີຕໍ່ຄວາມໝັ້ນຄົງໃນພາກພື້ນ, ບັນດາການຂັດແຍ້ງກ່ຽວກັບອະທິປະໄຕຢູ່ ທະເລຕາເວັນອອກໄດ້ ແລະ ພວມກາຍເປັນເນື້ອໃນຈຸດສຸມຂອງບັນດາເວທີປາໄສກ່ຽວກັບຄວາມໝັ້ນຄົງທັງຢູ່ພາຍໃນ ແລະ ນອກພາກພື້ນ. ແລະ ເພື່ອຊອກຫາທິດກ້າວເດີນອັນຖືກຕ້ອງເພື່ອແກ້ໄຂບັນຫາ ທະເລຕາເວັນອອກນັ້ນ, ກໍບໍ່ອາດປະຕິເສດຕໍ່ການສົ່ງຜົນສະທ້ອນຂອງ ARF ໄດ້.
ຜູ້ຄົນທັງຫຼາຍຍັງຈືດີວ່າ ໃນເວທີປາໄສ ARF ຄັ້ງທີ 21 ຢູ່ມຽນມາປີ 2014, ARF ໄດ້ຮັບຮອງເອົາຖະແຫຼງການຮ່ວມກ່ຽວກັບບັນຫາ ທະເລຕາເວັນອອກ, ໃນນັ້ນສະແດງຄວາມວິຕົກກັງວົນຢ່າງເລິກເຊິ່ງຕໍ່ໜ້າບັນດາການກະທຳຂອງຈີນ ທີ່ເຮັດໃຫ້ເພີ່ມທະວີຄວາມເຄັ່ງຕຶງໃນພາກພື້ນ. ສິ່ງທີ່ເປັນໜ້າໃສ່ໃຈ ແມ່ນແຕ່ລະປະເທດອາຊຽນ ກໍລ້ວນແຕ່ມີທັດສະນະສະເພາະຂອງຕົນກ່ຽວກັບບັນຫາທະເລຕາເວັນອອກ, ດັ່ງນັ້ນ ເລື່ອງບັນດາປະເທດສະມາຊິກທັງໝົດ, ນັບທັງບັນດາປະເທດທີີ່ມີການຂັດແຍ້ງ ແລະ ບັນດາປະເທດບໍ່ມີການຂັດແຍ້ງ ໄດ້ເປັນເອກະພາບກັນ ອອກຖະແຫຼງການຮ່ວມເຊັ່ນນັ້ນ ແມ່ນມີຄວາມໝາຍສຳຄັນທີ່ສຸດ, ສະແດງໃຫ້ເຫັນຄວາມສາມັກຄີພາຍໃນກຸ່ມອາຊຽນ. ສ່ວນຢູ່ເວທີປາໄສ ARF ປີນີ້, ໃນສະພາວະທີ່ຈີນຍູ້ແຮງການກໍ່ສ້າງ, ຖົມດິນເປັນເກາະ, ກໍ່ສ້າງລານບິນຢູ່ເກາະບາງແຫ່ງທີ່ຂຶ້ນກັບໝູ່ເກາະເຈືອງຊາຂອງຫວຽດນາມນັ້ນ, ບັນຫາທະເລຕາເວັນອອກຍິ່ງໄດ້ຮັບຄວາມເອົາໃຈໃສ່ຈາກບັນດາປະເທດສະມາຊິກ ARF.
ອາຊຽນເຫັນດີເຫັນພ້ອມກ່ຽວກັບການແກ້ໄຂການແຍ້ງຢູ່ທະເລຕາເວັນອອກ
ບັນຫາທະເລຕາເວັນອອກ ຊ້ຳບໍໜຳຍັງຮ້ອນເຮັ່ງນັບແຕ່ຈຸດເວລາຍັງບໍ່ທັນໄຂເວທີປາໄສ. ກ່ອນທີ່ມາຮ່ວມກອງປະຊຸມ, ທ່ານລັດຖະມົນຕີການຕ່າງປະເທດຈີນ ຫວາງອີ ໄດ້ກ່າວເຕືອນວ່າ ການນຳບັນຫາທະເລຕາເວັນອອກມາປຶກສາຫາລືຢູ່ ເວທີປາໄສອາຊຽນ ແມ່ນສິ່ງທີ່ໄຮ້ຄຸນປະໂຫຍດ ແລະ ເຮັດໃຫ້ເພີ່ມທະວີຄວາມເຄັ່ງຕຶງຂຶ້ນ. ບັນຫາທະເລຕາເວັນອອກຄວນຍົກອອກຢູ່ພຽງແຕ່ການເຈລະຈາ 2 ຝ່າຍເທົ່ານັ້ນ. ແຕ່ໃນບົດກ່າວປາໄສໄຂກອງປະຊຸມລັດຖະມົນຕີການຕ່າງປະເທດອາຊຽນ AMM 48 ເມື່ອວັນທີ 4/8, ທ່ານນາຍົກລັດຖະມົນຕີປະເທດເຈົ້າພາບມາເລເຊຍ NaJib Razak ໄດ້ຢືນຢັນເຖິງຫຼາຍບັນຫາໃຫຍ່ຂອງສາກົນ, ໃນນັ້ນ, ມີການທວງເອົາອະທິປະໄຕເຂດນ້ຳແດນດິນແຊກຊ້ອນກັນທີ່ສັບສົນທີ່ສຸດ ຊຶ່ງແຕ່ລະປະເທດບໍ່ສາມາດແກ້ໄຂໂດຍຕ່າງຫາກໄດ້. ຮ່າງຖະແຫຼງການຂອງບັນດາລັດຖະມົນຕີການຕ່າງປະເທດອາຊຽນຍັງເນັ້ນໜັກເຖິງຄວາມສຳຄັນຂອງການເພີີ່ມທະວີຄວາມສາມັກຄີພາຍໃນກຸ່ມ, ເປັນຕົ້ນແມ່ນໃນການແກ້ໄຂບັນດາບັນຫາທີ່ກ່ຽວຂ້ອງເຖິງສັນຕິພາບ, ສະຖຽນລະພາບ, ຄວາມໝັ້ນຄົງໃນພາກພື້ນ, ພິເສດແມ່ນຕ້ອງແກ້ໄຂການຂັດແຍ້ງກັນດ້ວຍມາດຕະການໂດຍສັນຕິວິທີ ບົນພື້ນຖານເຄົາລົບກົດໝາຍສາກົນ. ຄຳຢືນຢັນຂອງທ່ານນາຍົກລັດຖະມົນຕີປະເທດເຈົ້າພາບມາເລເຊຍ NaJib Razak ພ້ອມກັບຮ່າງຖະແຫຼງການຮ່ວມຂອງບັນດາລັດຖະມົນຕີການຕ່າງປະເທດອາຊຽນໄດ້ສະແດງໃຫ້ເຫັນວ່າ ປະເທດເຈົ້າພາບມາເລເຊຍເວົ້າສະເພາະ ແລະ ອາຊຽນເວົ້າລວມ ບໍ່ຍອມຮັບຕໍ່ຄຳຮຽກຮ້ອງຂອງຈີນທີ່ວ່າ AMM 48 ບໍ່ໄດ້ປຶກສາຫາລືກ່ຽວກັບບັນຫາທະເລຕາເວັນອອກ. ຄວາມເປັນເອກະພາບກັນນີ້ ໄດ້ຮັບການຕີລາຄາວ່າ ແມ່ນບາດກ້າວເດີນຕໍ່ໄປ ສະແດງໃຫ້ເຫັນຄວາມຜູກພັນກັນຢ່າງແໜ້ນແຟ້ນ ແລະ ມີສຽງເວົ້າລວມໃນບັນດາປະເທດອາຊຽນ. ຕາມວົງການນັກສັງເກດການແລ້ວ, ຄວາມຜູກພັນກັນຄືດັ່ງກ່າວ ແມ່ນກຳລັງໜູນເພື່ອສ້າງກຳລັງແຮງລວມໝູ່, ຜ່ານຜ່າສິ່ງທ້າທາຍຮ່ວມ.
ຈີນສືບຕໍ່ຫຼົບຫຼີກວິວັດທະນາການກ້າວໄປເຖິງ COC
ໃນຕົວຈິງ, ຄວາມສາມັກຄີ ເປັນຈິດໜຶ່ງໃຈດຽວຂອງອາຊຽນ ເຄີຍເຮັດໃຫ້ຈີນມີຄວາມວິຕົກກັງວົນ. ສິ່ງນີ້ໄດ້ຮັບການຢັ້ງຢືນເມື່ອເດືອນ 5/2015 ຂະນະທີ່ກອງປະຊຸມສຸດຍອດອາຊຽນ ຄັ້ງທີ 26 ອອກຖະແຫຼງການໂດຍຊີ້ແຈ້ງກ່ຽວກັບຄວາມວິຕົກກັງວົນຕໍ່ສະພາບການຢູ່ທະເລຕາເວັນອອກນັ້ນ, ຈີນໄດ້ມີປະຕິກິລີຍາໃນທັນທີ່. ປະເທດນີ້ເດັດດຽວຄັດຄ້ານອັນທີ່ເອີ້ນວ່າ “ຄວາມມານະພະຍາຍາມຂອງບັນດາປະເທດທີ່ແນໃສ່ກໍ່ຄວາມເສຍຫາຍຕໍ່ການພົວພັນລະຫວ່າງປັກກິງກັບອາຊຽນ”. ຫຼືວ່າ ໃນມໍ່ໆມານີ້, ກ່ອນທີ່ດຳເນີນກອງປະຊຸມລັດຖະມົນຕີການຕ່າງປະເທດອາຊຽນ, ທ່ານລັດຖະມົນຕີຊ່ວຍວ່າການກະຊວງການຕ່າງປະເທດຈີນ ຫຼຽວເຈີນເຢີນ ຖະແຫຼງວ່າ ກອງປະຊຸມບໍ່ຄວນປຶກສາຫາລືບັນຫາທະເລຕາເວັນອອກ. ແຕ່ເຖິງຢ່າງໃດກໍດີ, ຕໍ່ໜ້າຄວາມສາມັກຄີ ເປັນຈິດໜຶ່ງໃຈດຽວຂອງອາຊຽນໃນກອງປະຊຸມຄັ້ງນີ້ ກໍຄືປະສົບກັບການຕຳໜິຕິຕຽນຢ່າງຮຸນແຮງຈາກບັນດາຄູ່ຮ່ວມມືພາຍນອກ, ກ່ອນທີ່ດຳເນີນເວທີປາໄສ ARF, ຈີນໄດ້ຖະແຫຼງວ່າ ປະເທດນີ້ໄດ້ຢຸດການກໍ່ສ້າງ, ຖົມດິນເປັນເກາະຢູ່ທະເລຕາເວັນອອກ. ພ້ອມກັນນັ້ນ, ປັກກິງຍັງຢືນຢັນ ເຫັນດີເປັນເອກະສັນກັບອາຊຽນຊຸກຍູ້ວິວັດທະນາການກ້າວໄປເຖິງປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ COC .
ແຕ່ດົນນານມາແລ້ວ, ປັກກິງໄດ້ຊອກຫາທຸກວິທີທາງເພື່ອຫຼົບຫຼີກ ແລະ ເຮັດໃຫ້ວິວັດທະນາການກ້າວໄປເຖິງ COC ຊັກຊ້າລົງ ໃນຂະນະທີ່ຈີນພະຍາຍາມຍູ້ແຮງການປະກົດຕົວຂອງເຂົາເຈົ້າຢູ່ທະເລຕາເວັນອອກ. ຖະແຫຼງການຂອງຈີນ ພ້ອມກັບການເຫັນດີສ້າງຕັ້ງສາຍໂທລະສັບດ່ວນບົນທະເລລະຫວ່າງອາຊຽນ ແລະ ຈີນນັ້ນ, ດ້ານໜຶ່ງ ທັງປາດຖະໜາອາດຊ່ວຍແກ້ໄຂຄວາມເຄັ່ງຕຶງຢູ່ທະເລຕາເວັນອອກ, ທັງເຮັດໃຫ້ຫາງສຽງມີຄວາມລະແວງສົງໄສ. ເພາະສະນັ້ນ, ເວທີປາໄສ ARF ຄັ້ງທີ 22 ພວມຄອຍຖ້າບັນດາສັນຍານທີ່ຕັ້ງໜ້າໃໝ່.