(ກອງປະຊຸມຂັ້ນສູງເຂດສາມຫຼ່ຽມພັດທະນາ
ກຳປູເຈຍ - ລາວ - ຫວຽດນາມ ຄັ້ງທີ 8)
(vovworld) - ກອງປະຊຸມຂັ້ນສູງເຂດສາມຫຼ່ຽມພັດທະນາ ກຳປູເຈຍ - ລາວ - ຫວຽດນາມ ຄັ້ງທີ 8 ໄຂຂຶ້ນໃນວັນທີ 25/11 ຢູ່ນະຄອນຫຼວງວຽງຈັນ, ແຫ່ງ ສປປ ລາວ. ທ່ານນາຍົກລັດຖະມົນຕີຫວຽດນາມ ຫງວຽນເຕິ໋ນຢຸງ ໄດ້ນຳໜ້າຄະນະຜູ້ແທນຂັ້ນສູງຫວຽດນາມເຂົ້າຮ່ວມກອງປະຊຸມ, ເພື່ອແນ ໃສ່ປັບປຸງ ແລະ ພັດທະນາສາຍພົວພັນມິດຕະພາບທີ່ເປັນມູນເຊື້ອກັບລາວ ແລະ ກຳປູເຈຍ ກວ່າອີກ, ກໍ່ຄືເພີ່ມທະວີການສົມທົບກັນລະຫວ່າງສາມປະເທດໃນການຜັນຂະຫຍາຍບັນດາລາຍການຮ່ວມມືປ້ອງກັນຊາດ, ປ້ອງກັນຄວາມສະຫງົບ ແລະ ພັດທະນາເສດຖະກິດ, ສັງຄົມໃນເຂດສາມຫຼ່ຽມພັດທະນາ.
ກອງປະຊຸມຂັ້ນສູງເຂດສາມຫຼ່ຽມພັດທະນາ ກຳປູເຈຍ - ລາວ - ຫວຽດນາມ ຄັ້ງທີ 8 ດຳເນີນໄປໃນລະຫວ່າງວັນທີ 25 – 26/11, ເພື່ອແນໃສ່ສຳຫຼວດ, ກວດກາການປະຕິບັດແຜນກຳນົດພັດທະນາເສດຖະກິດ - ສັງຄົມໃນເຂດສາມຫຼ່ຽມພັດທະນາ ກຳປູເຈຍ - ລາວ - ຫວຽດນາມ ເຖິງປີ 2020 ແລະ ບົດບັນທຶກຊ່ວຍຈຳກ່ຽວກັບກົນໄກບຸລິມະສິດພິເສດໃຫ້ເຂດສາມຫຼ່ຽມພັດທະນາ ກຳປູເຈຍ - ລາວ - ຫວຽດນາມ. ກອງປະຊຸມກໍ່ຕີລາຄາກ່ຽວກັບເລື່ອງຜັນຂະຫຍາຍບັນດາລາຍການພັດທະນາເສດຖະກິດສັງຄົມຢູ່ພາກພື້ນນີ້ ກໍ່ຄືວາງອອກບັນດາທິດທາງຮ່ວມມືໃນໄລຍະໃໝ່.
ກົນໄກຮ່ວມມືສຳຄັນຂອງສາມປະເທດຫວຽດນາມ - ລາວ - ກຳປູເຈຍ
ເຂດສາມຫຼ່ຽມພັດທະນາ ກຳປູເຈຍ - ລາວ - ຫວຽດນາມ ໄດ້ຮັບການສ້າງຕັ້ງຂຶ້ນຈາກຂໍ້ລິເລີ່ມຂອງທ່ານນາຍົກລັດຖະມົນຕີກຳປູເຈຍ ຮຸນແຊນ, ເມື່ອປີ 1999 ດ້ວຍການສະໜັບສະໜູນຂອງທ່ານນາຍົກລັດຖະມົນຕີລາວ ແລະ ນາຍົກລັດຖະມົນຕີຫວຽດນາມ. ອາດຢືນຢັນໄດ້ວ່າ, ມາຮອດປະຈຸບັນ, ການຮ່ວມມີໃນເຂດສາມຫຼ່ຽມພັດທະນາ ກຳປູເຈຍ - ລາວ - ຫວຽດນາມ ແມ່ນກົນໄກຮ່ວມມືທີ່ສຳຄັນ, ຊ່ວຍຮັກສາສະຖຽນລະພາບ, ຄວາມໝັ້ນຄົງດ້ານການເມືອງ, ຄວາມປອດໄພໃນສັງຄົມຢູ່ເຂດຊາຍແດນສາມປະເທດ. ໄລຍະຜ່ານມາ, ການຮ່ວມມືຢູ່ເຂດນີ້ໄດ້ຮັບຜົນງານທີ່ຕັ້ງໜ້າຫຼາຍຢ່າງໃນການກໍ່ສ້າງ ແລະ ພັດທະນາເສດຖະກິດສັງຄົມ. ລະດັບເຕີບໂຕ GDP ສະເລ່ຍຂອງ 3 ປະເທດໃນເຂດສາມຫຼ່ຽມພັດທະນາ ບັນລຸປະມານ 10%/ປີ; GDP ສະເລ່ຍໃສ່ຫົວຄົນໃນປີ 2013 ບັນລຸ 1.340 USD.
ຫວຽດນາມຖືເປັນສຳຄັນການຮ່ວມມືໃນເຂດສາມຫຼ່ຽມພັດທະນາ
ສະເພາະຫວຽດນາມ, ບັນດາແຂວງໃນເຂດສາມຫຼ່ຽມພັດທະນາ ໄດ້ ແລະ ພວມສຸມໃສ່ເພີ່ມທະວີການພົວພັນກັບບັນດາແຂວງພາກໃຕ້ຂອງລາວ ແລະ ບັນດາແຂວງທາງທິດຕາເວັນອອກສ່ຽງເໜືອກຳປູເຈຍ ໃຫ້ນັບມື້ນັບເລິກເຊິ່ງ. ບໍ່ພຽງແຕ່ຍູ້ແຮງການເຄື່ອນໄຫວພົບປະແລກປ່ຽນມິດຕະ ພາບເທົ່ານັ້ນ, ບັນດາທ້ອງຖີ່ນຍັງເປີດກວ້າງການພົວພັນດ້ານການຄ້າ, ພິເສດແມ່ນຍົກສູງປະສິດທິຜົນການເຄື່ອນໄຫວຢູ່ບັນດາດ່ານສາກົນກັບລາວ ແລະ ກຳປູເຈຍ, ຜ່ານການປະຕິຮູບລະບຽບການດ້ານການຄ້າໃຫ້ງ່າຍດາຍ… ທີ່ເວທີປາໃສຄູ່ຮ່ວມມືພັດທະນາເຂດສາມຫຼ່ຽມພັດທະນາ, ເຊິ່ງຈັດຂຶ້ນຢູ່ນະຄອນບວນມາທວດ, ຕາມຂໍ້ລິເລີ່ມຂອງຫວຽດນາມ ເມື່ອເດືອນ 4/2014. ທ່ານຮອງນາຍົກລັດຖະມົນຕີ ຫງວຽນຊວນຝຸກ, ຊີ້ແຈ້ງວ່າ:
“ສຸມໃສ່ພັດທະນາພື້ນຖານໂຄງລ່າງ, ບັນດາເຂດເສດຖະກິດດ່ານຊາຍແດນ, ເຂດການຄ້າ, ຕະຫຼາດຊາຍແດນ, ສ້າງເງື່ອນໄຂສະດວກທີ່ສຸດເພື່ອຂົນສົ່ງຄົນ ແລະ ສິນຄ້າ, ເອົາໃຈໃສ່ກວ່າອີກເຖິງການພັດທະນາແຫຼ່ງຊັບພະຍາກອນມະນຸດ, ພິເສດແມ່ນບຳລຸງສ້າງວິຊາຊີບໃຫ້ແກ່ປະຊາຊົນ. ບັນດາແຂວງຄວນຜັນຂະຫຍາຍແຜນສັງລວມເຊິ່ງນາຍົກລັດ ຖະມົນຕີ 3 ປະເທດໄດ້ຮັບຮອງເອົາຢ່າງມີປະສິດທິຜົນ. ແຜນກຳນົດຂອງແຕ່ລະທ້ອງຖີ່ນຕ້ອງຕິດພັນກັບແຜນກຳນົດຂອງເຂດ ນັບທັງເຂດສາມຫຼ່ຽມພັດທະນາ. ພັດທະນາເສດຖະກິດຕ້ອງຕິດພັນກັບການປົກປັກຮັກສາສິ່ງແວດລ້ອມຊີວະພາບ, ຂຸດຄົ້ນຊັບພະຍາກອນຢ່າງເໝາະສົມ“.
ເອົາໃຈໃສ່ຊຸກຍູ້ການຮ່ວມມືພັດທະນາຂອງເຂດສາມຫຼ່ຽມພັດທະນາ, ນອກຈາກຕັ້ງໜ້າເຂົ້າຮ່ວມບັນດາຂໍ້ຕົກລົງທີ່ໄດ້ຮັບການລົງນາມແລ້ວນັ້ນ, ສາມປະເທດກໍ່ໄດ້ປັບປຸງກົນໄກຢ່າງບໍ່ຢຸດຢັ້ງ, ຈັດແບ່ງແຫຼ່ງກຳລັງລົງທຶນຢ່າງເໝາະສົມ, ພ້ອມທັງເພີ່ມທະວີການຕິດຕາມກວດກາຂອງບັນດາກະຊວງ, ຂະແໜງການ, ທ້ອງຖີ່ນຕ່າງໆ, ນັບທັງວິສາຫະກິດໃນການປະຕິບັດຂໍ້ຕົກລົງນີ້ຢ່າງມີປະສິດທິຜົນ. ກ່ຽວກັບຝ່າຍຫວຽດນາມ, ທ່ານຮອງຫົວໜ້າກຳມາທິການການຕ່າງປະເທດສະພາແຫ່ງຊາດ ຫງວຽນແມ້ງຕ໋ຽນ, ຢືນຢັນວ່າ:
“ປະຕິບັດແຜນນະໂຍບາຍປ່ຽນໃໝ່ ແລະ ຍົກສູງປະສິດທິຜົນການເຄື່ອນໄຫວຂອງສະພາແຫ່ງຊາດ. ສະພາແຫ່ງຊາດຫວຽດນາມ ມີແຜນນະໂຍບາຍເພີ່ມທະວີການຕິດຕາມກວດກາບັນດາມະຕິຂອງສະພາແຫ່ງຊາດເຊິ່ງໄດ້ຮັບການຮັບຮອງເອົາ, ໃນນັ້ນມີມະຕິທີ່ກ່ຽວຂ້ອງເຖິງເຂດສາມຫຼ່ຽມພັດທະນາ. ສະພາແຫ່ງຊາດຫວຽດນາມ, ດ້ວຍບົດບາດຂອງຕົນ ໄດ້ນຳໜ້າ, ເພີ່ມທະວີຂໍ້ສະເໜີສົມທົບກັນລະຫວ່າງສາມກຳມາທິການ ເພື່ອເຮັດແນວໃດນຳແຜນນະໂຍບາຍ, ນະໂຍບາຍເຖິງປະຊາຊົນໃນເຂດສາມຫຼ່ຽມພັດທະນາ. “
ຕັດສິນໃຈກໍ່ສ້າງເຂດສາມຫຼ່ຽມພັດທະນາຢູ່ເຂດຊາຍແດນສາມປະເທດ ແມ່ນໜຶ່ງໃນບັນດາໜ້າທີ່ບຸລິມາສິດອັນດັບໜຶ່ງຂອງຫວຽດນາມ ເວົ້າສະເພາະ ແລະ 3 ປະເທດເວົ້າລວມ. ຍ້ອນເຫດນັ້ນ, ເຂົ້າຮ່ວມ ກອງປະຊຸມຂັ້ນສູງເຂດສາມຫຼ່ຽມພັດທະນາ ກຳປູເຈຍ - ລາວ - ຫວຽດນາມ ຄັ້ງນີ້, ນາຍົກລັດຖະມົນຕີ ຫງວຽນເຕິ໋ນຢຸງ, ພ້ອມກັບນາຍົກລັດຖະມົນຕີ ຮຸນແຊນ ແລະ ນາຍົກລັດຖະມົນຕີລາວ ທອງສິງທຳມະວົງ ຈະສຸມໃສ່ຕີລາຄາບັນດາກົນໄກນະໂຍບາຍບຸລິມາສິດພິເສດໃຫ້ແກ່ ເຂດສາມຫຼ່ຽມພັດທະນາ, ປັບປຸງ ແລະ ພັດທະນາສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານກັບລາວ, ພ້ອມທັງປັບປຸງສາຍພົວພັນຮ່ວມມືຮອບດ້ານກັບກຳປູເຈຍໃນຕໍ່ໜ້າ.