(vovworld) - ທີ່ກອງປະຊຸມສົ່ງເສີມການລົງທຶນເຂດ ໄຕງວຽນ ປີ 2017, ທີ່ດຳເນີນໃນວັນທີ 11/03, ທ່ານນາຍົກລັດຖະມົນຕີ ຫງວຽນຊວນຟຸກ ພ້ອມກັບບັນດາການນຳຫຼາຍກະຊວງ, ຂະແໜງການ ລ້ວນແຕ່ຢືນຢັນວ່າ ຈະສ້າງທຸກເງື່ອນໄຂສະດວກເພື່ອໃຫ້ເຂດ ໄຕງວຽນ, ເສີມຂະຫຍາຍທຸກຄວາມສາມາດບົ່ມຊ້ອນ, ທ່າແຮງ, ແມ່ນພື້ນຖານພັດທະນາຂອງພາກກາງ, ທິດຕາເວັນອອກທາງພາກໃຕ້ ແລະ ທັງທິດຕາເວັນຕົກຂອງພາກໃຕ້. ໃນຂະນະນັ້ນ, ຜູ້ຕາງໜ້າບັນດານັກລົງທຶນກໍ່ໃຫ້ຄຳໝັ້ນສັນຍາວ່າ ຈະຮ່ວມເດີນທາງພ້ອມກັບອຳນາດການປົກຄອງ, ປະຊາຊົນບັນດາແຂວງເຂດ ໄຕງວຽນ ໃນພາລະກິດແຫ່ງການພັດທະນາ.
ໃນໄລຍະຜ່ານມາ, ບັນດາແຂວງໃນເຂດ ໄຕງວຽນ ໄດ້ຕັ້ງໜ້າຍູ້ແຮງສົ່ງເສີມການລົງທຶນ, ຂຸດຄົ້ນບັນດາຄວາມສາມາດບົ່ມຊ້ອນ, ທ່າແຮງຂອງເຂດ. ໄລຍະ 2011 – 2015, ຍອດເງິນລົງທຶນພັດທະນາບັນລຸເກືອບ 266 ຕື້ດົ່ງ, ຄິດສະເລ່ຍແຕ່ລະປີເພີ່ມຂຶ້ນ 11,33%. ອັດຕາເງິນລົງທຶນພາກເອກະຊົນເພີ່ມຂຶ້ນແຕ່ 53,4% ຂຶ້ນ 69,28%. ມາຮອດປະຈຸບັນ, ມີ 140 ໂຄງການລົງທຶນໂດຍກົງຈາກຕ່າງປະເທດ (FDI), ດ້ວຍຍອດເງິນລົງທຶນເກືອບ 800 ລ້ານ USD. ໄລຍະ 2016 – 2020, ຄາດວ່າແຫຼ່ງເງິນລົງທຶນຂອງທົ່ວສັງຄົມເຂົ້າເຂດ ໄຕງວຽນ ບັນລຸກວ່າ 230.000 ຕື້ດົ່ງ.
ສ້າງກົນໄກລົງທຶນຢ່າງສະດວກສະບາຍ,ສະໜອງແຫຼ່ງທຶນຢ່າງພຽງພໍເພື່ອທຳການຜະລິດດຳເນີນທຸລະກິດ
ທ່ານລັດຖະມົນຕີກະຊວງແຜນການ ແລະ ການລົງທຶນ ຫງວຽນຈິ໋ຢຸງ ຖືວ່າ, ຖ້າຫາກຄືກ່ອນນີ້, ບັນຫາຮັບປະກັນສະຖຽນລະພາບຂອງເຂດ ໄຕງວຽນ ຖືກຕັ້ງຢູ່ແຖວໜ້າເພື່ອພັດທະນາ, ປະຈຸບັນຕ້ອງປ່ຽນແປງທັດສະນະດັ່ງກ່າວ, ປະຈຸບັນພວມແມ່ນຈຸດເວລາທີ່ເໝາະສົມເພື່ອເຕື້ອງເຖິງທັດສະນະ “ພັດທະນາເພື່ອຮັບປະກັນສະຖຽນລະພາບ”. ກະຊວງແຜນການ ແລະ ການລົງທຶນຈະຮ່ວມເດີນທາງພ້ອມກັບບັນດາແຂວງ ເຂດໄຕງວຽນ ໃນການປະຕິບັດທັດສະນະດັ່ງກ່າວໃຫ້ປະກົດຜົນເປັນຈິງ.
“ກະຊວງແຜນການ ແລະ ການລົງທຶນໃຫ້ຄຳໝັ້ນສັນຍາຍູ້ແຮງບົດບາດເປັນເສນາທິການຊ່ວຍລັດຖະບານກໍ່ສ້າງ ພັດທະນາບຸກທະລຸໃນການປະຕິຮູບສະພາບແວດລ້ອມແຫ່ງການລົງທຶນດຳເນີນທຸລະກິດ, ປ່ຽນໃໝ່ວິທີໜູນຊ່ວຍວິສາຫະກິດກວ່າອີກ. ພ້ອມກັນນັ້ນ, ທາງກະຊວງຈະພ້ອມກັບບັນດາກະຊວງ, ຂະແໜງການໜູນຊ່ວຍ, ສົມທົບກັບບັນດາແຂວງເຂດໄຕງວຽນ ໃນການສ້າງນະໂຍບາຍພິເສດສະເພາະ, ໂຄສະນາຂໍ້ມູນຂ່າວສານກ່ຽວກັບສະພາບແວດລ້ອມແຫ່ງການລົງທຶນ, ແກ້ໄຂບັນດາຄວາມຫຍຸ້ງຍາກ, ຂໍ້ຕິດຂັດ ເພື່ອແນໃສ່ເສີມຂະຫຍາຍການຮ່ວມສຳພັນເຂດ ແລະ ລະດົມການນຳໃຊ້ທຸກແຫຼ່ງກຳລັງໃຫ້ເປັນຢ່າງດີ ເພື່ອໃຫ້ເຂດ ໄຕງວຽນ ພັດທະນາຢ່າງວ່ອງໄວ ແລະ ໝັ້ນຄົງ”.
ກ່ຽວກັບການຮັບປະກັນແຫຼ່ງທຶນໃຫ້ແກ່ການເຄື່ອນໄຫວຜະລິດດຳເນີນທຸລະກິດ, ຜູ້ວ່າການທະນາຄານແຫ່ງລັດ ເລມິງຮືງ ໃຫ້ຮູ້ວ່າ, ທະນາຄານແຫ່ງລັດ ໃຫ້ຄຳໝັ້ນສັນຍາ ສືບຕໍ່ສົມທົບກັບບັນດາກະຊວງ, ຂະແໜງການ, ທ້ອງຖິ່ນຕ່າງໆ ເພື່ອປັບປຸງກົນໄກນະໂຍບາຍສິນເຊື່ອໃຫ້ເໝາະສົມກັບການກຳນົດທິດພັດທະນາເສດຖະກິດສັງຄົມຂອງເຂດ ໄຕງວຽນ ແລະ ຊີ້ນຳລະບົບທະນາຄານໃນບໍລິເວນແຂວງ ຈັດຕັ້ງຜັນຂະຫຍາຍບັນດາແຜນນະໂຍບາຍ, ນະໂຍບາຍສິນເຊື່ອຂອງທະນາຄານໃຫ້ໄດ້ຮັບຜົນ, ປະກອບສ່ວນນຳບັນດາແຜນນະໂຍບາຍ, ນະໂຍບາຍໃຫຍ່ຂອງພັກ, ລັດ ສຳລັບເຂດ ໄຕງວຽນ ໃຫ້ປະກົດຜົນເປັນຈິງ. ຕາມນັ້ນແລ້ວ, ບາງເນື້ອໃນຈຸດສຸມທະນາຄານແຫ່ງລັດຈະຊີ້ນຳລະບົບບັນດາອົງການສິນເຊື່ອ ສຸມໃສ່ຜັນຂະຫຍາຍໃນໄລຍະຈະມາເຖິງຢ່າງຂ້ຽວຂາດ ແລະ ແຮງກວ່າ.
“ພວກຂ້າພະເຈົ້າຈະຊີ້ນຳບັນດາອົງການສິນເຊື່ອນຍູ້ແຮງການລະດົມທຶນຢູ່ກັບທີ ແລະ ສົ່ງທຶນເຖິງເຂດ ໄຕງວຽນ, ຮັບປະກັນຕອບສະໜອງຄວາມຕ້ອງການແຫຼ່ງທຶນຢ່າງພຽງພໍໃຫ້ເຂດ. ລະບົບທະນາຄານຈະຕິດຕາມແຜນຜັງພັດທະນາເຂດ ແລະ ແຕ່ລະທ້ອງຖິ່ນຢ່າງໃກ້ຊິດ ເພື່ອເປັນເຈົ້າການສຳຜັດ ແລະ ສ້າງເງື່ອນໄຂໃຫ້ວິສາຫະກິດ, ປະຊາຊົນກູ້ຢືມທຶນ ເພື່ອລົງທຶນເຂົ້າບັນດາຂົງເຂດທີ່ມີຄວາມສາມາດບົ່ມຊ້ອນ, ທ່າແຮງຂອງເຂດ. ເພື່ອຫັນຄວາມຕັດສິນໃຈ ແລະ ຈິດໃຈຮ່ວມເດີນທາງພ້ອມກັບ ໄຕງວຽນ ຂອງບັນດາທະນາການເປັນລະອຽດ, ທີ່ກອງປະຊຸມ, ບັນດາອົງການສິນເຊື່ອໄດ້ໃຫ້ຄຳໝັ້ນສັນຍາອຸປະຖຳເງິນກວ່າ 29.000 ຕື້ດົ່ງໃຫ້ 36 ໂຄງການພັດທະນາເສດຖະກິດສັງຄົມຂອງເຂດ”.
ສ້າງຄວາມສະດວກໃຫ້ການລົງທຶນຕ່າງປະເທດ
ດຶງດູດເງິນລົງທຶນໂດຍກົງຈາກຕ່າງປະເທດຢູ່ເຂດ ໄຕງວຽນ ບໍ່ຫຼາຍປານໃດ, ສ່ວນຫຼາຍແມ່ນຍັງບໍ່ທັນສຳຜັດ, ດຶງດູດຄູ່ຮ່ວມມືຍຸດທະສາດໄດ້. ໄລ່ມາຮອດປະຈຸບັນ, ການດຶງດູດເງິນລົງທຶນຈາກຕ່າງປະເທດຢູ່ເຂດນີ້ກວມພຽງ 0,65% ກ່ຽວກັບຈຳນວນໂຄງການ, 0,25% ກ່ຽວກັບທຶນຈົດທະບຽນໃນຈຳນວນເງິນລົງທຶນຕ່າງປະເທດເຂົ້າຫວຽດນາມ. ສະເໜີແນະບາງມາດຕະການແກ້ໄຂສຳລັບເຂດ ໄຕງວຽນ, ທ່ານລັດຖະມົນຕີ ຫງວຽນຈິ໋ຢຸງ ເນັ້ນໜັກເຖິງເລື່ອງຕ້ອງປ່ຽນໃໝ່ແບບວິທີສົ່ງເສີມການລົງທຶນ, ຕ້ອງຊອກຮູ້ວ່ານັກລົງທຶນຕ້ອງການຫຍັງ. ໃນຂະນະນັ້ນ, ເພື່ອສ້າງຄວາມສະດວກໃຫ້ບັນດານັກລົງທຶນມີຄວາມອຸນອຽນໃຈທຳມາຫາກິນຢ່າງຍາວນານຢູ່ ໄຕງວຽນ ແລະ ຫວຽດນາມ, ທ່ານນາຍົກລັດຖະມົນຕີ ຫງວຽນຊວນຟຸກ ຊີ້ແຈ້ງວ່າ, ຫວຽດນາມ ສືບຕໍ່ຮັກສາເສດຖະກິດມະຫາພາກເປັນປົກກະຕິ, ຮັກສາລາຄາເງິນດົ່ງ. ລັດຖະບານກໍ່ໃຫ້ຄຳໝັ້ນສັນຍາຮັບປະກັນບັນດາກົນໄກສະດວກໃຫ້ບັນດານັກລົງທຶນ.
“ປົກປັກຮັກສາສິດຊັບສິນ, ສິດທິມະນຸດ, ສິດຂອງພົນລະເມືອງຕາມລັດຖະທຳມະນູນ ແລະ ກົດໝາຍໄດ້ກຳນົດ. ລັດຖະບານກໍ່ຈະສືບຕໍ່ປັບປຸງສະພາບແວດລ້ອມແຫ່ງການລົງທຶນ, ດຳເນີນທຸລະກິດໃຫ້ດີກວ່າອີກ, ນຳຫວຽດນາມ ເຂົ້າ top ນຳໜ້າອາຊຽນ”.
ສ່ວນບັນດານັກລົງທຶນ, ທ່ານ Shinya Ezima, ຮອງປະທານອົງການຮ່ວມມືສາກົນຍີ່ປຸ່ນ (JICA), ເຊິ່ງແມ່ນອົງການທີ່ມີຈຳນວນໂຄງການລົງທຶນນີ້ເຂດ ໄຕງວຽນ ໃນຫຼາຍປີຜ່ານມາ ສະແດງຄວາມເຊື່ອໝັ້ນວ່າ, ໄຕງວຽນ ຍັງມີຄວາມສາມາດບົ່ມຊ້ອນຢ່າງໃຫຍ່ຫຼວງ ແລະ ກະທົບເຖິງຄວາມສາມາດບົ່ມຊ້ອນພັດທະນາຂອງບັນດາປະເທດຢູ່ເຂດຊາຍແດນ. JICA ຈະສືບຕໍ່ລົງທຶນຢູ່ເຂດ ໄຕງວຽນ ໃນໄລຍະຈະມາເຖິງ.
“JICA ຈະສືບຕໍ່ໜູນຊ່ວຍເຂດ ໄຕງວຽນ ພ້ອມກັບລັດຖະບານຫວຽດນາມ ແລະ ບັນດາຄູ່ຮ່ວມມືພັດທະນາໃນທົ່ວໂລກ. ເລີ່ມແຕ່ທ້າຍເດືອນນີ້, JICA ຈະດຳເນີນການເກັບຂໍ້ມູນຈາກ 5 ແຂວງເຂດ ໄຕງວຽນ. ໂຄງການຈະເກັບບັນດາຂໍ້ມູນພື້ນຖານກ່ຽວກັບການນຳໃຊ້ນ້ຳ, ລະບົບເຂື່ອນໄຟຟ້ານ້ຳຕົກໃນປະຈຸບັນຢູ່ເຂດເພື່ອໃຫ້ JICA ກຳນົດຢ່າງຈະແຈ້ງຄວາມຕ້ອງການດ້ານພື້ນຖານໂຄງລ່າງທີ່ຕ້ອງການເພີ່ມເຕີ່ມໃຫ້ເຂດ ແນໃສ່ສະກັດກັ້ນບັນດາການກະທົບຈາກການປ່ຽນແປງຂອງດິນຟ້າອາກາດ”.
ໄຕງວຽນ ສຸສົນໃຫ້ກາຍເປັນເຂດພູພຽງທີ່ອຸດົມສົມບູນທາງດ້ານກະວິກຳ, ມີຫຼາຍຮູບຫຼາຍສີດ້ານຊີວະພາບ, ມີຄວາມເຮັ່ງມີດ້ານວັດທະນະທຳ. ນີ້ແມ່ນວິໄສທັດເຊິ່ງທ່ານນາຍົກລັດຖະມົນຕີໄດ້ວາງອອກ ໃຫ້ເຂດນີ້. ບັນດາຄຳໝັ້ນສັນຍາທີ່ໄດ້ຍົກອອກມາທີ່ກອງປະຊຸມສົ່ງເສີມການລົງທຶນເຂດ ໄຕງວຽນ ຈະປະກອບສ່ວນຫັນບັນດາຄາດໝາຍເຊິ່ງທ່ານນາຍົກລັດຖະມົນຕີໄດ້ວາງອອກໃຫ້ປະກົດຜົນເປັນຈິງສ່ວນໃດສ່ວນໜຶ່ງ, ນຳ ໄຕງວຽນ ພັດທະນາຢ່າງວ່ອງໄວ ແລະ ໝັ້ນຄົງ, ກາຍເປັນເຂດເສດຖະກິດຈຸດສຸມ.