(vovworld) - ໂດຍໄດ້ຮັບຄຳເຊີນຂອງທ່ານນາງປະທານສະພາແຫ່ງຊາດ ສສ ຫວຽດນາມ ຫງວຽນທິກີມເງິນ, ຄະນະຜູ້ແທນສະພາສູງ ສະຫະພັນ ສະວິດ ໂດຍທ່ານປະທານ Ivo Bischofberger ນຳໜ້າ ເລີ່ມຕົ້ນການຢ້ຽມຢາມ ຫວຽດນາມ ຢ່າງເປັນທາງການໃນວັນທີ 28/03. ເລື່ອງການນຳສູງສຸດຂອງສະພາສູງ ສະວິດ ເລືອກເຟັ້ນ ຫວຽດນາມ ເປັນປະເທດທຳອິດມາຢ້ຽມຢາມນັບແຕ່ເມື່ອຮັບດຳລົງຕຳແໜ່ງໃນເດືອນ 11 / 2016 ເປັນການສະແດງໃຫ້ເຫັນຄວາມຖືເປັນສຳຄັນຂອງຝ່າຍ ສະວິດ ແລະ ທ່ານປະທານ Ivo Bischofberger ໃນນາມສ່ວນຕົວ ໃນການຊຸກຍູ້ການພົວພັນຮ່ວມມືກັບ ຫວຽດນາມ. ການຢ້ຽມຢາມຈະປະກອບສ່ວນເປີດແງ່ຫວັງການຮ່ວມມືໃໝ່ລະຫວ່າງ 2 ປະເທດໃນເວທີປາໄສລັດຖະສະພາ ກໍ່ຄືໃນຂົງເຂດການສຶກສາ ແລະ ການຄ້າ.
(ພາບປະກອບ)
ໃນການຢ້ຽມຢາມ ຫວຽດນາມ ແຕ່ວັນທີ 28 – 31/03, ທ່ານປະທານ Ivo Bischofberger ຈະພົບປະເຈລະຈາກັບທ່ານນາງປະທານສະພາແຫ່ງຊາດ ຫວຽດນາມ ຫງວຽນທິກີມເງິນ, ເຂົ້າຢ້ຽມຂ່ຳນັບທ່ານປະທານປະເທດ ຫວຽດນາມ ເຈີ່ນດ້າຍກວາງ. ຄາດຄະເນວ່າ ທ່ານປະທານ Ivo Bischofberger ຈະມີການພົບປະກັບການນຳກະຊວງອຸດສາຫະກຳ ແລະ ການຄ້າ, ກະຊວງສຶກສາ ແລະ ບຳລຸງສ້າງ ຫວຽດນາມ.
ການຮ່ວມມືມີປະສິດທິຜົນໃນຫລາຍຂົງເຂດ
ກ່ອນນີ້ 46 ປີ, ຫວຽດນາມ - ສະວິດ ໄດ້ສ້າງຕັ້ງການພົວພັນທາງການທູດ (11/10/1971). ໃນຊຸມປີຜ່ານມາ, ການພົວພັນ 2 ຝ່າຍ ສະວິດ - ຫວຽດນາມ ພັດທະນາຢ່າງແຮງ ແລະ ການຮ່ວມມືມີປະສິດທິຜົນໃນຫລາຍຂົງເຂດ.
ບົນເສັ້ນທາງພັດທະນາ ແລະ ເຊື່ອມໂຍງເຂົ້າກັບສາກົນ, ຫວຽດນາມ ຍາມໃດກໍ່ໄດ້ຮັບການສະໜັບສະໜູນ, ຊ່ວຍເຫຼືອຈາກ ສະວິດ ຢ່າງມີປະສິດທິຜົນ, ພິເສດ ແມ່ນໃນບັນດາຂົງເຂດເພີ່ມທະວີກຳລັງຄວາມສາມາດຂອງລະບອບລະບຽບການຮັບໃຊ້ກິດຈະການປະຕິຮູບດ້ານບໍລິຫານ, ພັດທະນາກະສິກຳ, ລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ປັບປຸງການບໍລິການດ້ານສາທາລະນະສຸກ…ກໍ່ຄືປະກອບສ່ວນຊ່ວຍ ຫວຽດນາມ ສຳເລັດບັນດາເປົ້າໝາຍພັດທະນາສະຫັດສະວັດຂອງສະຫະປະຊາຊາດ.
ການພົວພັນຮ່ວມມືດ້ານການຄ້າລະຫວ່າງ 2 ປະເທດໃນຊຸມປີມໍ່ໆມານີ້ ໄດ້ມີບັນດາບາດກ້າວພັດທະນາກະໂດດຂັ້ນ. ສະວິດ ແມ່ນຄູ່ຮ່ວມມືເສດຖະກິດສຳຄັນຂອງ ຫວຽດນາມ ຢູ່ ເອີລົບ. ປະເທດນີ້ ໄດ້ສະຫງວນໃຫ້ ຫວຽດນາມ ຂໍ້ກຳນົດບຸລິມະສິດກ່ຽວກັບດ້ານການຄ້າຫລາຍສະບັບຄື: ກົດລະບຽບນິຕິກຳສຳຄັນໃນການຄ້າສາກົນທັນສະໄໝ (MFM), ລະບົບບຸລິມະສິດພາສີອາກອນທົ່ວໄປ (GSP). 2 ປະເທດພວມຕັ້ງໜ້າຊຸກຍູ້ການພົວພັນດ້ານການຄ້າ 2 ຝ່າຍ. ສັນຍາການຄ້າເສລີ (FTA) ລະຫວ່າງ ຫວຽດນາມ ແລະ ກຸ່ມການຄ້າເສລີ ເອີລົບ (EFTA ລວມມີ: ສະວິດ, ນອກແວ, ໄອແລນ, ເລກເຕນສເຕນ) ເລີ່ມຕົ້ນດຳເນີນການເຈລະຈາແຕ່ເດືອນ 5/2012 ແລະ ຜ່ານວາລະເຈລະຈາ 14 ຄັ້ງ. ສະວິດ ວາງເປົ້າໝາຍຈະລົງນາມໃນສັນຍາການຄ້າເສລີນີ້ ໂດຍໄວ. ໃນຂະນະນັ້ນ, ການແລກປ່ຽນການຄ້າ 2 ຝ່າຍກໍມີບັນດາຄວາມຄືບໜ້າອັນຕັ້ງໜ້າ. ໃນ 7 ເດືອນຕົ້ນປີ 2016, ວົງເງິນການຄ້າ 2 ສົ້ນບັນລຸ 731 ລ້ານ USD ( ເພີ່ມຂຶ້ນ 85% ເມື່ອທຽບໃສ່ໄລຍະດຽວກັນຂອງປີ 2015). ປະຈຸບັນ, ສະວິດມີກ່ວາ 100 ໂຄງການລົງທຶນຢູ່ຫວຽດນາມໃນບັນດາຂົງເຂດຄື ອຸດສາຫະກຳປຸງແຕ່ງ, ພະລັງງານດ້ວຍຍອດເງິນລົງທຶນກວ່າ 2 ຕື້ USD. ການລົງທຶນຂອງສະວິດ ຕົ້ນຕໍແມ່ນສຸມໃສ່ບັນດາຂະແໜງ ອຸດສາຫະກຳປຸງແຕ່ງ, ຜະລິດ, ສະໜອງໄຟຟ້າ, ອາຍແກັສ, ນ້ຳປະປາ…. ຫວຽດນາມ ກໍແມ່ນໜຶ່ງໃນຈຳນວນ 8 ປະເທດຊຶ່ງສະວິດໃຫ້ບຸລິມະສິດຊ່ວຍເຫຼືອພັດທະນາຂະນະທີ່ສະວິດໝັ້ນໝາຍຊ່ວຍເຫຼືອ 90 ລ້ານ USD ໃຫ້ແກ່ຫວຽດນາມໃນໄລຍະ 2016-2020.
ການຮ່ວມມືທາງດ້ານການສຶກສາ ແລະ ບຳລຸງສ້າງກໍແມ່ນຈຸດທີ່ພົ້ນເດັ່ນໃນການພົວພັນລະຫວ່າງ 2 ປະເທດດ້ວຍເລື່ອງສະວິດໜູນຊ່ວຍຫວຽດນາມປະຕິບັດບັນດາໂຄງການໃນຂົງເຂດການສຶກສາກ່ຽວກັບສິ່ງແວດລ້ອມ, ຄຸ້ມຄອງ ແລະ ບຳລຸງສ້າງລະດັບປະລິນຍາໂທ, ປະລິນຍາເອກລົງເລິກຂະແໜງການເງິນ, ທະນາຄານ, ບໍລິຫານທຸລະກິດ. 2 ປະເທດໄດ້ລົງນາມໃນບົດບັນທຶກຊ່ວຍຈຳກ່ຽວກັບການຮ່ວມມືທາງດ້ານການສຶກສາ-ບຳລຸງສ້າງໃນການຢ້ຽມຢາມສະວິດຂອງອະດີດປະທານປະເທດຫວຽດນາມ ຫງວຽນມິນຈຽດ ເມຶ່ອປີ 2010.
ໃນຂະນະນັ້ນ, ການພົວພັນຮ່ວມມືທາງດ້ານລັດຖະສະພາລະຫວ່າງຫວຽດນາມ-ສະວິດພວມພັດທະນາຢ່າງຕັ້ງໜ້າ. ປີ 2014, ອະດີດປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ໄດ້ໄປຢ້ຽມຢາມສະວິດ ແລະ ໃນມໍ່ໆມານີ້ແມ່ນການຢ້ຽມຢາມສະວິດຂອງທ່ານນາງຮອງປະທານສະພາແຫ່ງຊາດຫວຽດນາມ ຕ່ອງທິຟ້ອງເມື່ອເດືອນ 10/2016. ໃນການຢ້ຽມຢາມນີ້, ສະພາແຫ່ງຊາດຫວຽດນາມ ແລະ ສະວິດໄດ້ເຫັນດີເປັນເອກະສັນເພີ່ມທະວີການແບ່ງປັນບົດຮຽນ, ທາບທາມລະຫວ່າງ ສະພາແຫ່ງຊາດ ແລະ ສະພາສູງຂອງ 2 ປະເທດ ກໍຄືຢືນຢັນເພີ່ມທະວີການສົມທົບກັນລະຫວ່າງ 2 ຝ່າຍໃນບັນດາເວທີປາໄສສາກົນ. ມາຮອດປະຈຸບັນ, ຫວຽດນາມ ແລະ ສະວິດກໍໄດ້ສ້າງຕັ້ງກຸ່ມ ສ.ສ.ຊ ມິດຕະພາບ 2 ຝ່າຍ.
ແງ່ຫວັງຮ່ວມມືໃໝ່
ການຢ້ຽມຢາມຫວຽດນາມຂອງທ່ານປະທານສະພາແຫ່ງລັດສະວິດ Ivo Bischofberger ໃນຄັ້ງນີ້ ຖືກດຳເນີນໃນສະພາບການພົວພັນມິດຕະພາບ ແລະ ການຮ່ວມມືຫຼາຍດ້ານລະຫວ່າງຫວຽດນາມ ແລະ ສະວິດໃນໄລຍະທີ່ຜ່ານມາ ພັດທະນາຢ່າງດີງາມ. ການຢ້ຽມຢາມແມ່ນສືບຕໍ່ແລກປ່ຽນຄະນະຜູ້ແທນຂັ້ນສູງລະຫວ່າງ 2 ປະເທດ, 2 ອົງການນິຕິບັນຍັດ ແນໃສ່ປັບປຸງ ແລະ ພັດທະນາການພົວພັນມິດຕະພາບ ແລະ ການຮ່ວມມືຫຼາຍດ້ານລະຫວ່າງ 2 ປະເທດເວົ້າລວມ ແລະ ລະຫວ່າງ 2 ສະພາແຫ່ງຊາດຂອງ 2 ປະເທດເວົ້າສະເພາະ.
ການຢ້ຽມຢາມຂອງທ່ານປະທານສະພາແຫ່ງລັດສະວິດ Ivo Bischofberger ໃນຄັ້ງນີ້ແມ່ນການຢ້ຽມຢາມຫວຽດນາມຄັ້ງທຳອິດຂອງປະທານສະພາແຫ່ງລັດສະວິດ ນັບຕັ້ງແຕ່ປີ 1999 ເປັນຕົ້ນມາ. ປາດຖະໜາວ່າ ດ້ວຍພື້ນຖານອັນດີງາມຂອງການພົວພັນ 2 ຝ່າຍ, ການຢ້ຽມຢາມຈະເປີດຫຼາຍກາລະໂອກາດຮ່ວມມືໃໝ່ລະຫວ່າງ 2 ປະເທດ, ປະກອບສ່ວນຢືນຢັນຫວຽດນາມແມ່ນໜຶ່ງໃນ 2 ຄູ່ຮ່ວມມືທີ່ສຳຄັນທີ່ສຸດຂອງສະວິດໃນພາກພື້ນອາຊີຕາເວັນອອກສ່ຽງໃຕ້./.