(vovworld) - ທ່ານນາງປະທານສະພາແຫ່ງຊາດ ຫວຽດນາມ ຫງວຽນທິກິມເງິນ ພວມມີການຢ້ຽມຢາມລາຊະອານາຈັກ ຊູແອັດ ຢ່າງເປັນທາງການ, ນີ້ກໍ່ແມ່ນປະເທດທຳອິດໃນການຢ້ຽມຢາມ 3 ປະເທດຄື: ຊູແອັດ, ຮູງກາຣີ ແລະ ສ. ເຊັກໂກ ແຕ່ວັນທີ 6 -14/4. ການຢ້ຽມຢາມຄັ້ງນີ້ເພື່ອແນໃສ່ປັບປຸງ ແລະ ເພີ່ມທະວີການພົວພັນມິດຕະພາບ, ການຮ່ວມມືທີ່ເປັນມູນເຊື້ອ, ການພົວພັນຮ່ວມມືລະຫວ່າງສະພາແຫ່ງຊາດ ຫວຽດນາມ ແລະ ອົງການນິຕິບັນຍັດຂອງປະເທດຕ່າງໆ, ຊຸກຍູ້ສະພາແຫ່ງຊາດ 3 ປະເທດສະໜັບສະໜູນການລົງນາມ, ໃຫ້ສັດຕະຍາບັນສັນຍາການຄ້າເສລີ ຫວຽດນາມ - ອີຢູ (EVFTA) ຢ່າງເປັນທາງການ. ບົດຂຽນຂອງນັກຂ່າວ ເລຕ໋ວຽດ.
ບັນດາປະເທດເຊິ່ງທ່ານນາງປະທານສະພາແຫ່ງຊາດ ຫງວຽນທິກິມເງິນ ໄປຢ້ຽມຢາມໃນຄັ້ງນີ້ລ້ວນແຕ່ມີການພົວພັນຮ່ວມມືອັນດີງາມ ແລະ ມີປະສິດທິຜົນກັບ ຫວຽດນາມ. ຊູແອັດ, ຮູງກາຣີ ແມ່ນ 2 ປະເທດເອີລົບ ທີ່ ຫວຽດນາມ ມີການພົວພັນຮ່ວມມືມິດຕະພາບທີ່ເປັນມູນເຊື້ອ. ສ່ວນການພົວພັນຮ່ວມມືລະຫວ່າງ ຫວຽດນາມ ແລະ ສາທາລະນະລັດ ເຊັກໂກ ໃນໄລຍະມໍ່ໆມານີ້ກໍ່ມີບາດກ້າວພັດທະນາຢ່າງແຮງໃນທຸກໆຂົງເຂດ.
ພາບປະກອບ
|
ຮັດແໜ້ນນ້ຳໃຈມິດຕະພາບ, ການຮ່ວມມືທີ່ເປັນມູນເຊື້ອ
ໃນການປະຕິບັດງານຄັ້ງທຳອິດເຖິງບັນດາປະເທດ ເອີລົບ ໃນຖານະຕຳແໜ່ງເປັນປະທານສະພາແຫ່ງຊາດ, ປະເທດທຳອິດທີ່ທ່ານນາງປະທານສະພາແຫ່ງຊາດ ຫງວຽນທິກິມເງິນ ໄປຢ້ຽມຢາມ ແມ່ນຊູແອັດ. ຊູແອັດ ແມ່ນປະເທດຝ່າຍຕາເວັນຕົກທຳອິດທີ່ໄດ້ຮັບຮອງ ແລະ ສ້າງຕັ້ງການພົວພັນທາງການທູດກັບ ຫວຽດນາມ ນັບແຕ່ປີ 1969. ມາຮອດປະຈຸບັນ, ການພົວພັນທາງດ້ານເສດຖະກິດ, ການຄ້າ, ການລົງທຶນລະຫວ່າງ 2 ປະເທດມີການເຕີບໂຕຢ່າງຕໍ່ເນື່ອງ, ວົງເງິນການຄ້າ 2 ຝ່າຍໃນປີ 2015 ບັນລຸເກືອບ 1,2 ຕື້ USD, ປີ 2016 ບັນລຸກ່ວາ 1,2 ຕື້ USD. ຊູແອັດ ຢືນອັນດັບທີ 43/116 ປະເທດ ແລະ ເຂດແຄ້ວນທີ່ມີການລົງທຶນເຂົ້າ ຫວຽດນາມ. ຫຼາຍກຸ່ມບໍລິສັດໃຫຍ່ຂອງຊູແອັດ ມີໜ້າ ຢູ່ ຫວຽດນາມຢ່າງວ່ອງໄວຄື: Ericsson, ABB, IKEA, Electrolux…
ຖັດຈາກ ຊູແອດ, ທ່ານນາງປະທານສະພາແຫ່ງຊາດ ຫງວຽນທິກິມເງິນ ແລະ ຄະນະຜູ້ແທນຂັ້ນສູງ ສະພາແຫ່ງຊາດ ຫວຽດນາມ ຈະໄປຢ້ຽມຢາມປະເທດ ຮູງກາຣີ. ໃນພາລະກິດແຫ່ງການປົກປັກຮັກສາ ແລະ ສ້າງສາປະເທດຊາດ, ຫວຽດນາມ ໄດ້ຮັບການສະໜັບສະໜູນ ແລະ ການຊ່ວຍເຫຼືອອັນລ້ຳຄ່າຂອງລັດ ແລະ ປະຊາຊົນ ຮູງກາຣີ. ໃນຫຼາຍປີຜ່ານມາ, ມີພະນັກງານ, ນັກວິສາວະກອນ ຫວຽດນາມ ນັບພັນຄົນໄດ້ຮັບການບຳລຸງສ້າງຢູ່ຮູງກາຣີ ແລະ ຫຼາຍຄົນພວມດຳລົງຕຳແໜ່ງສຳຄັນໃນກົງຈັກລັດ. ນີ້ແມ່ນຊັບສົນບັດອັນລ້ຳຄ່າຂອງນ້ຳໃຈມິດຕະພາບ ຫວຽດນາມ - ຮູງກາຣີ. ການພົວພັນດ້ານເສດຖະກິດ, ການຄ້າ ແລະ ການລົງທຶນລະຫວ່າງ 2 ປະເທດໄດ້ຮັບການພັດທະນາຢ່າງມີປະສິດທິຜົນ. ວົງເງິນການຄ້າ 2 ສົ້ນປີ 2015 ແມ່ນ 195 USD, ປີ 2016 ບັນລຸ 200 ລ້ານ USD. ຮູງກາຣີ ມີ 15 ໂຄງການດ້ວຍຈຳນວນທຶນກ່ວາ 50 ລ້ານ USD, ຢືນອັນດັບທີ 55/116 ປະເທດລົງທຶນເຂົ້າ ຫວຽດນາມ. ຮູງກາຣີ ກໍ່ໄດ້ລົງທຶນກໍ່ສ້າງໂຮງໝໍໂລກມະເຮັງຄໍໜຽງ ເກີນເທີ, ຊ່ວຍໃຫ້ປະຊາຊົນຢູ່ເຂດທົ່ງພຽງແມ່ນ້ຳຂອງທາງພາກໃຕ້ ຫວຽດນາມ ບໍ່ໄດ້ໄປກວດ, ປິ່ນປົວພະຍາດຢູ່ໄກ. ນີ້ແມ່ນກິດຈະກຳທີ່ໄດ້ສ້າງເປັນຂີດໝາຍອັນດີງາມໃນການພົວພັນລະຫວ່າງ 2 ປະເທດໃນທົດສະວັດຜ່ານມາ.
ການພົວພັນຮ່ວມມື, ການລົງທຶນໃນບັນດາຂົງເຂດຄື ວັດທະນະທຳ, ການທ່ອງທ່ຽວ, ການສຶກສາ, ບຳລຸງສ້າງ, ສາທາລະນະສຸກ, ວິທະຍາສາດ, ສິ່ງແວດລ້ອມໄດ້ຮັບການຮັກສາ ແລະ ພັດທະນາ. 2 ປະເທດໄດ້ຈັດຕັ້ງບັນດາສັບປະດາວັດທະນະທຳ ຫວຽດນາມ - ຮູງກາຣີ ເປັນປະຈຳເພື່ອເພີ່ມທະວີຄວາມເຂົ້າອົກເຂົ້າໃຈເຊິ່ງກັນ ແລະ ກັນນັບທັງທາງດ້ານວັດທະນະທຳ, ສັງຄົມ. ປະຊາຄົມຊາວ ຫວຽດນາມ ຢູ່ ຮູງກາຣີ ມີປະມານ 4000 ຄົນ ແລະ ຝ່າຍ ຮູງກາຣີ ໄດ້ສ້າງເງື່ອນໄຂໃຫ້ດຳລົງຊີວິດຢ່າງມີສະຖຽນລະພາບ, ເຊື່ອມໂຍງເຂົ້າກັບສັງຄົມປະເທດປະຈຳຖິ່ນເປັນຢ່າງດີ.
ສາທາລະນະລັດ ເຊັກໂກ ແມ່ນປະເທດສຸດທ້າຍໃນການຢ້ຽມຢາມຂອງທ່ານນາງປະທານສະພາແຫ່ງຊາດ ຫງວຽນທິກິມເງິນ ແລະ ຄະນະຜູ້ແທນຂັ້ນສູງສະພາແຫ່ງຊາດ ຫວຽດນາມ. ສາທາລະນະລັດ ເຊັກໂກ ແມ່ນປະເທດ ເອີລົບ ຕາເວັນອອກ ທຳອິດທີ່ສະໜອງ ODA ໃຫ້ແກ່ ຫວຽດນາມ. ວົງເງິນການຄ້າ 2 ສົ້ນປີ 2016 ບັນລຸ 249 ລ້ານ USD. ສ. ເຊັກໂກ ມີ 34 ໂຄງການຍັງມີຜົນສັກສິດຢູ່ດ້ວຍຍອດຈຳນວນເງິນລົງທຶນເກືອບ 90 ລ້ານ USD, ຢືນອັນດັບທີ 45/116 ປະເທດ ແລະ ເຂດແຄ້ວນລົງທຶນເຂົ້າ ຫວຽດນາມ.
ຍ້ອນການພັດທະນາກະໂດດຂັ້ນຂອງການພົວພັນ ຫວຽດນາມ - ສ. ເຊັກໂກ ນັ້ນ, ນັບແຕ່ເດືອນ 7/2013, ລັດຖະບານ ສ. ເຊັກໂກ ໄດ້ຮັບຮອງປະຊາຄົມຊາວ ຫວຽດນາມ ແມ່ນຊົນເຜົ່າທີ 14 ຂອງປະເທດນີ້ຢ່າງເປັນທາງການ. ນີ້ແມ່ນຂໍ້ຕົກລົງທີ່ມີຄວາມໝາຍສຳຄັນ, ສ້າງເງື່ອນໄຂໃຫ້ຊາວ ຫວຽດນາມ ຢູ່ເຊັກໂກ ໄດ້ຮັບຄວາມສະເໝີພາບກັບບັນດາຊົນເຜົ່າອື່ນໆທີ່ດຳລົງຊີວິດໃນເຂດດິນແດນ ສ.ເຊັກໂກ, ໄດ້ຮັບການອະນຸລັກຮັກສາວັດທະນະທຳ, ພາສາ, ຕົວໜັງສືຂອງຊົນເຜົ່າຕົນ.
ຊຸກຍູ້ການຮ່ວມມືຫຼາຍດ້ານລະຫວ່າງ ຫວຽດນາມ ກັບ ຊູແອັດ, ຮູງກາຣີ ແລະ ສ. ເຊັກໂກ
ດ້ວຍບັນດາຜົນງານທີ່ບັນລຸໄດ້ໃນການພົວພັນ 2 ຝ່າຍຂອງ ຫວຽດນາມ ກັບລາຊະອານາຈັກ ຊູແອັດ, ຮູງກາຣີ ແລະ ສ. ເຊັກໂກ ໃນຫຼາຍທົດສະວັດທີ່ຜ່ານມາ, ການຢ້ຽມຢາມຂອງ ທ່ານນາງປະທານສະພາແຫ່ງຊາດ ຫວຽດນາມ ຫງວຽນທິກິມເງິນ ແລະ ຄະນະຜູ້ແທນຂັ້ນສູງສະພາແຫ່ງຊາດ ຫວຽດນາມ ຈະສືບຕໍ່ປັບປຸງ ແລະ ເພີ່ມທະວີການພົວພັນມິດຕະພາບ, ການຮ່ວມມືທີ່ເປັນມູນເຊື້ອກ່ວາອີກ; ເພີ່ມທະວີການພົວພັນຮ່ວມມືລະຫວ່າງສະພາແຫ່ງຊາດ ຫວຽດນາມ ແລະ ອົງການນິຕິບັນຍັດຂອງບັນດາປະເທດນີ້. ການຢ້ຽມຢາມກໍ່ຈະຊຸກຍູ້ສະພາແຫ່ງຊາດ 3 ປະເທດສະໜັບສະໜູນການລົງນາມ, ໃຫ້ສັດຕະຍາບັນສັນຍາການຄ້າເສລີ ຫວຽດນາມ - ອີຢູ (EVFTA) ຢ່າງເປັນທາງການ…