ລະບຽບວິໄນແມ່ນປັດໄຈສຳຄັນ, ຮັບປະກັນໃຫ້ແກ່ການຄົງຕົວ, ເຕື່ອນໄຫວ ແລະ ພັດທະນາຂອງພັກກອມມູນິດຫວຽດນາມໃນໄລຍະທາງແຫ່ງການພັດທະນາເປັນເວລາກວ່າ 80 ປີທີ່ຜ່ານມາ. ໃນກິດຈະການປ່ຽນແປງໃໝ່ ແລະ ສ້າງສາປະເທດຊາດ, ຂະນະທີ່ ພັກກອມມູນິດຫວຽດນາມປ່ຽນແປງໃໝ່ເອງ, ປັບປຸງເອງ, ເພີ່ມທະວີລະບຽບວິໄນພາຍໃນພັກເພື່ອຮັບປະກັນການກໍ່ສ້າງພັກໃຫ້ປອດໃສ, ໝັ້ນຄົງເຂັ້ມແຂງທາງດ້ານການເມືອງ, ແນວຄິດ ແລະ ການຈັດຕັ້ງນັ້ນ, ບັນຫານີ້ ນັບມື້ນັບໄດ້ຮັບຖືເປັນສຳຄັນ ແລະ ເພີ່ມທະວີ.
ພົນໂທ ຫງວຽນວັນຣິງ ປະທານສະມາຄົມຜູ້ປະສົບເຄາະຮ້າຍຈາກສານພິດສີສົ້ມ ດີໂອຊິນຫວຽດນາມ |
ລະບຽບວິໄນຂອງພັກແມ່ນ ລະບຽບວິໄນໂດຍອີງໃສ່ນ້ຳໃຈຖານສະຫາຍອ້າຍນ້ອງ, ລະບຽບວິໄນຂອງບັນດາຜູ້ຮ່ວມອຸດົມການ, ສະໝັກໃຈເປັນສະມາຊິກພັກ, ພ້ອມແລ້ວເສຍສະຫຼະທຸກສິ່ງທຸກຢ່າງເພື່ອຜົນປະໂຫຍດຂອງຊົນຊັ້ນກຳມະກອນ ແລະ ຂອງຊາດ. ສະມາຊິກພັກທຸກໆຄົນ ແລະ ອົງການຈັດຕັ້ງພັກຮ່ວມສຳພັນນຳກັນຕາມລະບຽບວິໄນຮ່ວມໂດຍອີງໃສ່ຫຼັກການລວມສູນປະຊາທິປະໄຕ, ເປັນເອກະພາບຢ່າງແໜ້ນແຟ້ນທາງດ້ານການເມືອງ, ແນວຄິດ ແລະ ການຈັດຕັ້ງ ຊຶ່ງຖືກສະແດງໃຫ້ເຫັນແບບລວມສູນຜ່ານບັນດາຂໍ້ມາດຕາຂອງກົດລະບຽບພັກ. ລະບຽບວິໄນພັກແມ່ນເລີ່ມມາຈາກເຈດຈຳນົງຂອງທົ່ວພັກ ແນໃສ່ຮັບປະກັນ ຄວາມເປັນເອກະພາບ, ລັກສະນະລວມສູນຢ່າງສູງໃນພັກ. ພ້ອມກັນນັ້ນ ກໍເພື່ອເສີມຂະຫຍາຍປະຊຳທິປະໄຕ, ລັກສະນະຕັ້ງໜ້າ ແລະ ຫົວຄິດປະດິດສ້າງຂອງສະມາຊິກພັກ ແລະ ອົງການຈັດຕັ້ງພັກທັງໝົດ.
ປັບປຸງ ແລະ ເພີ່ມທະວີລະບຽບວິໄນພັກແມ່ນໜ້າທີ່ປະຕິບັດເປັນປະຈຳ
ລະບຽບວິໄນພັກບໍ່ພຽງແຕ່ຕ້ອງການມີຄວາມຕື່ນຕົວເທົ່ານັ້ນ, ຫາກຍັງມີລັກສະນະບັງຄັບປະຕິບັດ. ສຳລັບສະມາຊິກພັກທຸກໆຄົນ, ເວລາໃດ ແລະ ຢູ່ໃສ ກໍຕ້ອງຢູ່ໃຕ້ການແບ່ງງານ, ຄຸ້ມຄອງຂອງ ອົງການຈັດຕັ້ງພັກ, ຕ້ອງກະທຳຕາມຂອບເຂດລະບຽບວິໄນຂອງອົງການຈັດຕັ້ງ. ປັບປຸງ ແລະ ເພີ່ມທະວີລະບຽບວິໄນພັກແມ່ນໜ້າທີ່ປະຕິບັດເປັນປະຈຳຂອງ ສະມາຊິກພັກທຸກໆຄົນ ແລະ ທຸກໆອົງການຈັດຕັ້ງພັັກ. ເພີ່ມທະວີລະບຽບວິໄນພັກແມ່ນເພື່ອຍົກສູງຈິດໃຈຄວາມຮັບຜິດຊອບ, ຈິດໃຈການຈັດຕັ້ງ, ຈິດໃຈປະຕິບັດຄຳສັ່ງ, ມະຕິຂອງຖັນແຖວພະນັກງານ, ສະມາຊິກພັກ. ພົນໂທ ຫງວຽນວັນຣິງ ປະທານສະມາຄົມຜູ້ປະສົບເຄາະຮ້າຍຈາກສານພິດສີສົ້ມ ດີໂອຊິນຫວຽດນາມຖືວ່າ :
“ສຳລັບລະບຽບວິໄນຂອງພັກ, ສະມາຊິກພັກທຸກໆຄົນຕ້ອງປະຕິບັດ, ບໍ່ຍົກເວັ້ນບໍ່ວ່າຜູ້ໃດທີ່ດຳລົງຕຳແໜ່ງຫຍັງໃນພັກ, ຈາກຜູ້ນຳສູງສຸດຕະຫຼອດຮອດສະມາຊິກພັກຄົນທຳມະດາ ຕ່າງກໍຕ້ອງປະຕິບັດ. ດັ່ງນັ້ນ ຄວາມເປັນແບບຢ່າງຂອງຜູ້ນຳສູງສຸດຂອງອົງການຈັດຕັ້ງພັກແມ່ນສຳຄັນທີ່ສຸດເພື່ອໃຫ້ ສະມາຊິກພັກທຸກໆຄົນ ແລະ ມະຫາຊົນປະຕິບັດຕາມ ”
ເພື່ອຮັບປະກັນ ລະບຽບວິໄນຢ່າງໜັກແໜ້ນ, ມີຄວາມຕື່ນຕົວ ແມ່ນຕ້ອງເປີດກ້ວາງ, ເພີ່ມທະວີປະຊາທິປະໄຕພາຍໃນພັກ. 2 ດ້ານປະຊາທິປະໄຕ ແລະ ລະບຽບວິໄນໃນພັກຍາມໃດກໍຕ້ອງໄປຄຽງຄູ່ນຳກັນ. ມີການເປີດກ້ວາງ ແລະ ເພີ່ມທະວີປະຊາທິປະໄຕພາຍໃນພັກນັ້ນ, ຈຶ່ງສາມາດຮັບປະກັນ ລະບຽບວິໄນ ແລະ ເມື່ອສາມາດຮັບປະກັນລະບຽບວິໄນ ຈຶ່ງສາມາດເພີີ່ມທະວີປະຊາທິປະໄຕໄດ້.
ເຊີດຊູຈິດໃຈຄວາມຮັບຜິດຊອບຂອງຜູ້ເປັນຫົວໜ້າ
ມະຕິກອງປະຊຸມຄັ້ງທີ 4 ຂອງສູນກາງພັກກອມມູນິດຫວຽດນາມຊຸດທີ 12 ໄດ້ຊີ້ໃຫ້ເຫັນ 27 ປະກົດການຫຍໍ້ທໍ້ທີ່ກ່ຽວຂ້ອງການເສື່ອມເສຍດ້ານແນວຄິດ, ຄຸນສົມບັດ, ມີການຜັນແປເອງໃນພະນັກງານ ສະມາຊິກພັກຈຳນວນໜຶ່ງ. ນີ້ແມ່ນບັນຫາສຳຄັນທີ່ສຸດຊຶ່ງກ່ຽວຂ້ອງເຖິງການຄົງຕົວຂອງພັກ, ເຮັດໃຫ້ການນຳພາຂອງ ພັກກອມມູນິດຫວຽດນາມຖືກອ່ອນແອລົງ. ມະຕິໄດ້ຊີ້ອອກຫຼາຍມາດຕະການແກ້ໄຂເພື່ອຕໍ່ສູ້ຕ້ານບັນດາປະກົດການຫຍໍ້ທໍ້ທີ່ກ່ຽວຂ້ອງການເສື່ອມເສຍດ້ານແນວຄິດ, ຄຸນສົມບັດ, ການຜັນແປເອງ, ເພີ່ມທະວີລະບຽບວິໄນພາຍໃນພັກ, ຈາກນັ້ນຈຶ່ງເພີ່ມທະວີກຳລັງແຮງນຳພາຂອງຂອງພັກ. ພົນໂທ ຫງວຽນວັນຣິງ ປະທານສະມາຄົມຜູ້ປະສົບເຄາະຮ້າຍຈາກສານພິດສີສົ້ມ ດີໂອຊິນຫວຽດນາມຖືວ່າ ສະມາຊິກພັກກອມມູນິດຫວຽດນາມທຸກໆຄົນ ຕຈ່າງກໍຕ້ອງມີແຜນການດຳເນີນງານເພື່ອປະຕິບັດມະຕິສະບັບນີ້ເປັນຢ່າງດີ. ພົນໂທ ຫງວຽນວັນຣິງ ປະທານສະມາຄົມຜູ້ປະສົບເຄາະຮ້າຍຈາກສານພິດສີສົ້ມ ດີໂອຊິນຫວຽດນາມເນັ້ນໜັກວ່່າ :
“ ກ່ອນອື່ນໝົດ, ຕ້ອງເສີມຂະຫຍາຍຫຼັກການປະຊາທິປະໄຕຂອງພັກ, ຕ້ອງເສີມຂະຫຍາຍໝູ່ຄະນະນຳພາ ແລະ ສ່ວນບຸກຄົນຮັບຜິດຊອບ, ຕ້ອງຍົກສູງລັກສະນະຕໍ່ສູ້ຂອງ ສະມາຊິກພັກ, ພິເສດການຮ່ວມດຳເນີນຊີວິດຢູ່ໜ່ວຍພັກຂັ້ນຮາກຖານ, ເປັນຂົວເຊື່ອມຕໍ່ລະຫວ່າງພັກ ແລະ ປະຊາຊົນເພື່ອຍົກສູງຄຸນນະພາບການດຳເນີນຊີວິດໃນໜ່ວຍພັກ, ຄຸ້ມຄອງ ສະມາຊິກພັກ ”
ລະບຽບວິໄນແມ່ນກຳລັງແຮງຂອງພັກ, ສະມາຊິກພັກຈົ່ງຮັກພັກດີກັບພັກເພາະມີ ລະບຽບວິໄນ. ເມື່ອບັນດາອົງການຈັດຕັ້ງພັກມີຄວາມເຂັ້ມແຂງ, ທົ່ວພັກຈຶ່ງແຂງແຮງ. ເພີ່ມທະວີ ລະບຽບວິໄນຂອງພັກກໍຄືກົດໝາຍຂອງລັດ ແມ່ນຄວາມຮັບຜິດຊອບ ແລະ ພັນທະຂອງ ສະມາຊິກພັກແຕ່ລະຄົນໃນທຸກໆໄລຍະພັດທະນາຂອງ ພັກກອມມູນິດຫວຽດນາມ.