(vovworld) - ກອງປະຊຸມເຈລະຈາຄັ້ງທຳອິດ ທີ່ຫາກໍ່ດຳເນີນຢູ່ ຮ່າໂນ້ຍ ແລະ ຫຼາຍທ້ອງຖີ່ນໃນທົ່ວປະເທດ ເພື່ອເຫັນດີເປັນເອກະພາບ ສະເໜີ 500 ຄົນເຂົ້າບັນຊີລາຍຊື່ສະມາຊິກສະພາແຫ່ງຊາດ (ສສຊ) ຊຸດທີ 14. ຜ່ານກອງປະຊຸມເຈລະຈາຄັ້ງທຳອິດ, ມີຫຼາຍຄວາມເຫັນຖືວ່າ. ການສ້າງໂຄງປະກອບ ສສຊ ແມ່ນມີຄວາມຈຳເປັນ, ແຕ່ຄຸນນະພາບຈຶ່ງແມ່ນສິ່ງສຳຄັນ. ຍ້ອນເຫດນັ້ນ, ຈຳເປັນຕ້ອງ ເລືອກເຟັ້ນບັນດາຜູ້ທີ່ມີມາດຕະຖານຢ່າງພຽງພໍເຂົ້າຮ່ວມສະພາແຫ່ງຊາດ.
(ພາບປະກອບ)
ວຽກງານເຈລະຈາ, ເລືອກເຟັ້ນ, ສະເໜີຜູ້ສະໝັກເລືອກຕັ້ງແມ່ນໜ້າທີ່ແຖວໜ້າ, ມີຄວາມໝາຍສຳຄັນພິເສດ ເພື່ອຈັດຕັ້ງການເລືອກຕັ້ງ ປະຊາທິປະໄຕ, ສະເໝີພາບ, ຖືກຕ້ອງຕາມກົດໝາຍໃຫ້ສຳເລັດຜົນ. ຜ່ານການເຈລະຈາ, ຄຳເຫັນສ່ວນຫຼາຍໄດ້ສະເໜີເພີ່ມຈຳນວນ ສສຊ ສະເພາະກິດຕື່ມອີກ, ເພາະວ່າ ສສຊ ສະເພາະກິດຈະມີເງື່ອນໄຂ, ເວລາ ເພື່ອເອົາໃຈໃສ່ເຖິງວຽກງານຂອງຕົນ. ເຮັດໄດ້ຄືແນວນັ້ນ, ສະພາແຫ່ງຊາດຈຶ່ງປະຕິບັດບົດບາດໜ້າທີ່ສ້າງກົດໝາຍເປັນຢ່າງດີ ແລະ ຕົກລົງບັນດາບັນຫາສຳຄັນຂອງປະເທດຊາດໄດ້.
ເພີ່ມຈຳນວນ ສສຊ ສະເພາະກິດ
ຕາມທ່ານ ເລຈ່ວຽນ, ອະດີດຮອງປະທານຄະນະກຳມະການສູນກາງແນວໂຮມປະເທດຊາດ ຫວຽດນາມແລ້ວ, ບໍ່ຈຳເປັນຕ້ອງເລືອກເຟັ້ນ ສສຊ ແມ່ນຜູ້ທີ່ເປັນຫົວໜ້າອົງການບໍລິຫານ, ຫາກພຽງແຕ່ແມ່ນຜູ້ທີ່ເປັນຕົວແທນໃຫ້ອົງການນັ້ນແຕ່ມີມາດຕະຖານຢ່າງຄົບຖ້ວນ. ໃນບົດລາຍງານຂອງຄະນະປະຈຳສະພາແຫ່ງຊາດ ໄດ້ເຕື້ອງເຖິງເລື່ອງ ເພີ່ມຈຳນວນ ສສຊ ສະເພາະກິດຕື່ມອີກ ແລະ ຫຼຸດຜ່ອນ ສສຊ ຢູ່ອົງການບໍລິຫານລົງ. ທ່ານ ເລຈ່ວຽນເນັ້ນໜັກວ່າ,
“ຕາມຂ້າພະເຈົ້າແລ້ວ ແມ່ນຕ້ອງຫຼຸດຈຳນວນ ສສຊ ໃນອົງການບໍລິຫານລົງຫຼາຍ, ກ່ອນນີ້ພວກເຮົາເລືອກເຟັ້ນ ສສຊ ແມ່ນຜູ້ທີ່ເປັນຫົວໜ້າ, ແຕ່ວ່າຜູ້ທີ່ເປັນຫົວໜ້າຍັງຮັບຜິດຊອບວຽກງານຫຼາຍຢ່າງຈະບໍ່ສາມາດເຮັດຫຼ້ອນໜ້າທີ່ຂອງ ສສຊ ໄດ້. ໃນຂະນະນັ້ນ, ມີຜູ້ອື່ນໆຫຼາຍຄົນພັດມີມາດຕະຖານ, ເງື່ອນໄຂຢ່າງຄົບຖ້ວນເພື່ອຮັບຜິດຊອບໜ້າທີ່ຂອງ ສສຊ“.
ທ່ານ ຫງວຽນວັນຄາ, ຮອງປະທານຄະນະກຳມະການນສູນກາງແນວໂຮມປະເທດຊາດ ຫວຽດນາມ, ຖືວ່າ: ຄາດຄະເນວ່າ, ອາຍຸການນີ້, ບັນດາອົງການທີ່ມີສິດອຳນາດກໍ່ພະຍາຍາມຫຼຸດຜ່ອນຈຳນວນ ສສຊ ໃນບັນດາອົງການບໍລິຫານທ້ອງຖີ່ນລົງ:
“ຕາມຂ້າພະເຈົ້າແລ້ວ, ໃນສະພາບທີ່ສະພາແຫ່ງຊາດຂອງພວກເຮົາບໍ່ທັນເຄື່ອນໄຫວສະເພາະກິດ 100%, ເລື່ອງເຂົ້າຮ່ວມຂອງບັນດາສະມາຊິກລັດຖະບານ, ການນຳບາງກະຊວງ, ຂະແໜງການໃນສະພາແຫ່ງຊາດແມ່ນຈຳເປັນທີ່ສຸດ, ມັນຊ່ວຍໃຫ້ສະພາແຫ່ງຊາດປະຕິບັດບົດບາດນິຕິບັນຍັດເປັນຢ່າງດີ ແລະ ຕົກລົງບັນດາບັນຫາສຳຄັນຂອງປະເທດຊາດ. ຂ້າພະເຈົ້າໄດ້ຮູ້ແລ້ວວ່າຈຳນວນ ສສຊ ໃນກຸ່ມອົງການບໍລິຫານຈະຫຼຸດລົງຫຼາຍຢູ່ທ້ອງຖີ່ນຕ່າງໆ. ຕາມນັ້ນແລ້ວ, ຈຳນວນ ສສຊ ທີ່ເປັນປະທານຄະນະກຳມະການປະຊາຊົນ, ຫົວໜ້າພະແນກຕ່າງໆໃນສະພາແຫ່ງຊາດຊຸດນີ້ຈະບໍ່ມີຫຼາຍ“.
ຍົກສູງຄຸນນະພາບ ສສຊ
ເພື່ອຍົກສູງຄຸນນະພາບ, ປະສິດທິຜົນການເຄື່ອນໄຫວຂອງສະພາແຫ່ງຊາດກວ່າອີກ, ຄຸນນະພາບການເຄື່ອນໄຫວຂອງ ສສຊ ຈະມີບົດບາດຕັດສິນ. ມີຫຼາຍຄວາມເຫັນຖືວ່າ, ພ້ອມກັບບັນດາມາດຕະຖານຂອງ ສສຊ ເຊິ່ງໄດ້ລະບຸໄວ້ໃນກົດໝາຍວ່າດ້ວຍສະພາແຫ່ງຊາດແລ້ວ, ຕໍ່ໜ້າຄວາມຮຽກຮ້ອງທີ່ນັບມື້ນັບສູງຂອງປະຊາຊົນ, ຂອງພາລະກິດປ່ຽນໃໝ່ ແລະ ການເຊື່ອມໂຍງນັ້ນ, ການເລືອກຕັ້ງ ສສຊ ຊຸດທີ 14 ຕ້ອງເລືອກເຟັ້ນບັນດາຜູ້ທີ່ສົມກັບບົດບາດເປັນຕົວແທນຂອງປະຊາຊົນ. ທ່ານ ບູ່ຍວັນຊ່ວຽນ, ຮອງຫົວໜ້າຄະນະ ສສຊ ແຂວງ ທ໋າຍບິ່ງ ຍົກຄວາມເຫັນວ່າ:
“ປະຈຸບັນ, ຄຳຮຽກຮ້ອງຂອງລັດຖະທຳມະນູນສະບັບໃໝ່, ຂອງພາລະກິດແຫ່ງການປ່ຽນໃໝ່, ຂອງສິດປະຊາທິປະໄຕຂອງປະຊາຊົນ, ປົກປ້ອງສິດປະຊາທິປະໄຕຂອງປະຊາຊົນແມ່ນສຳຄັນທີ່ສຸດ. ປະຈຸບັນ, ກົດໝາຍ, ນະໂຍບາຍທັງໝົດທີ່ຍົກອອກມາລ້ວນແຕ່ເພື່ອປະຊາຊົນ. ດັ່ງນັ້ນ, ສສຊ ກໍ່ຕ້ອງມີຄວາມຮູ້ກ່ຽວກັບດ້ານກົດໝາຍ, ນະໂຍບາຍ ແລະ ພິເສດແມ່ນລັດຖະທຳມະນູນ ເພື່ອເຮັດບໍ່ວ່າວຽກງານໃດ ກໍຄືຕັດສິນບັນດາບັນຫາສຳຄັນ, ການຕິດຕາມກວດກາ, ການສ້າງກົດໝາຍກໍ່ຕ້ອງອີງໃສ່ລັດຖະທຳມະນູນ ເພື່ອຮັກສາຂໍ້ກຳນົດຂອງລັດຖະທຳມະນູນ, ຫຼີກລ້ຽງບໍ່ໃຫ້ລະເມີດລັດຖະທຳມະນູນ, ລ່ວງລຳ້ເຖິງສິດເສລີປະຊາທິປະໄຕຂອງພົນລະເມືອງ”
ທ່ານ ຫງວຽນກວກເທືອກ, ອະດີດ ສສຊ ຫວຽດນາມ ຊຸດ 8, 9, 10 ຖືວ່າ: ເພື່ອປັບປຸງ ແລະ ເພີ່ມທະວີຄວາມໄວ້ເນື້ອເຊື່ອໃຈ, ຄວາມມຸ່ງມາດປາດຖະໜາຂອງ ປະຊາຊົນຕໍ່ ສສຊ, ຜູ້ຕາງໜ້າຂອງປະຊາຊົນຕ້ອງຢືດໝັ້ນຕໍ່ສູ້ປົກປ້ອງເພື່ອສິດ ແລະ ຜົນປະໂຫຍດອັນເປັນທຳຂອງປະຊາຊົນ:
“ຖ້າຫາກຜູ້ສະໝັກຮັບເລືອກຕັ້ງ ສສຊ ເປັນພະນັກງານພັກ, ລັດ ແມ່ນຕ້ອງສະແດງໃຫ້ເຫັນເຈດຈຳນົງຂອງຜູ້ຕາງໜ້າໃຫ້ປະຊາຊົນກ່ວາອີກ, ມີເຈດຈຳນົງ, ມີຄວາມອົງອາດກະຫານ, ຕໍ່ສູ້ເພື່ອປົກປ້ອງສິດ, ຜົນປະໂຫຍດອັນເປັນທຳຂອງປະຊາຊົນ, ຂອງປະເທດຊາດ. ເວົ້າລວມແລ້ວ, ເປັນຜູ້ຕາງໜ້າໃຫ້ແກ່ປະຊາຊົນແມ່ນຕ້ອງປອດໄສ, ຄຽງຄູ່ກັນນັ້ນແມ່ນຕ້ອງມີຄວາມອົງອາດກະຫານ ແລະ ເພື່ອປະຊາຊົນ”
ດ້ວຍບັນດາຜົນງານທີ່ບັນລຸໄດ້ໃນອາຍຸການຂອງສະພາແຫ່ງຊາດຊຸດທີ 13, ຜູ້ມີສິດເລືອກຕັ້ງ ແລະ ປະຊາຊົນທົ່ວປະເທດເຊື່ອໝັ້ນ ແລະ ມີຄວາມມຸ່ງມາດປາດຖະໜາວ່າ, ການເລືອກຕັ້ງສະພາແຫ່ງຊາດຊຸດທີ 14 ຈະເລືອກເຟັ້ນບັນດາ ສສຊ ຜູ້ດີເດັ່ນ, ມີຄຸນນະທາດ, ຮັບຟັງຄຳເຫັນຂອງຜູ້ມີສິດເລືອກຕັ້ງ ແລະ ເປັນຂົວເຊື່ອມຕໍ່ລະຫວ່າງຜູ້ມີສິດເລືອກຕັ້ງ ກັບພັກ ແລະ ລັດຢ່າງແທດຈິງ.