ເສດຖະກິດ ຈີນ ຫລຸດຜ່ອນຄາດໝາຍການເຕີບໂຕປີ 2017
Van -
(vovworld) - ລັດຖະບານແຫ່ງ ສປ ຈີນ ສະເໜີຫລຸດຜ່ອນຄາດໝາຍການເຕີບໂຕປີ 2017 ໃນສະພາວະພື້ນຖານເສດຖະກິດໃຫຍ່ອັນດັບທີ 2 ໃນໂລກ ພວມຊຸກຍູ້ການປະຕິຮູບ ເພື່ອແກ້ໄຂຄວາມຫຍຸ້ງຍາກຢູ່ພາຍໃນປະເທດ. ຕາມວົງການການນຳ ຈີນ ແລ້ວ, ຄາດໝາຍນີ້ ແມ່ນແທ້ຈິງ, ຈະຊ່ວຍກຳນົດທິດ ແລະ ເຮັດໃຫ້ຄວາມຫວັງທີ່ໄດ້ວາງອອກໃຫ້ປະກົດຜົນເປັນຈິງ.
ເສດຖະກິດ ຈີນ ຫລຸດຜ່ອນຄາດໝາຍການເຕີບໂຕປີ 2017
ກ່າວຄຳເຫັນທີ່ພິທີໄຂກອງປະຊຸມປະຈຳປີສະພາຜູ້ແທນປະຊາຊົນແຫ່ງຊາດ ຈີນ ໃນວັນທີ 05/03, ທ່ານນາຍົກລັດຖະມົນຕີປະເທດນີ້ ຫຼີເຄີຊຽງ ໃຫ້ຮູ້ວ່າ: ຈີນ ບັນລຸຄາດໝາຍການເຕີບໂຕຍອດຜະລິດຕະພັນພາຍໃນປະເທດ (GDP) ຢູ່ໃນລະດັບ 6,5% ໃນປີ 2017, ຊຶ່ງແມ່ນຕົວເລກຄາດໝາຍທີ່ຕ່ຳສຸດຂອງ ຈີນ ໃນຮອບ 25 ປີມານີ້. ເຖິງຢ່າງໃດກໍ່ຕາມ, ລະດັບການເຕີບໂຕນີ້ ແມ່ນພຽງພໍ ເພື່ອບັນລຸເປົ້າໝາຍ ຊຶ່ງພັກກອມມູນິດ ຈີນ ວາງອອກ ແມ່ນເພີ່ມຂອບຂະໜາດພື້ນຖານເສດຖະກິດຂອງປະເທດຂຶ້ນທົບ 2 ເທົ່າໃນປີ 2020 ເມື່ອທຽບໃສ່ລະດັບຂອງປີ 2010. ປີ 2016, ຈີນ ບັນລຸໄດ້ລະດັບການເຕີບໂຕ 6,7% ຊຶ່ງແມ່ນລະດັບຕ່ຳສຸດນັບແຕ່ປີ 2010 ເປັນຕົ້ນມາ.
ເປົ້າໝາຍຕົວຈິງ
ເລື່ອງຫລຸດຜ່ອນຄາດໝາຍການເຕີບໂຕເສດຖະກິດ ໄດ້ຖືກຍົກອອກມາໃນສະພາວະ ຈີນ ພວມມານະພະຍາຍາມຫັນປ່ຽນຈາກການເຕີບໂຕໄວໂດຍອີງໃສ່ການສົ່ງອອກ ແລະ ການລົງທຶນ ມາເປັນຮູບແບບເຕີບໂຕໝັ້ນຄົງໂດຍອີງໃສ່ການໃຊ້ສອຍ. ເຖິງຢ່າງໃດກໍ່ຕາມ, ວິວັດການຫັນປ່ຽນດັ່ງກ່າວ ພວມດຳເນີນໄປຢ່າງສັບສົນ ເພາະເຮັດໃຫ້ການເຕີບໂຕຊັກຊ້າລົງ ແລະ ເຮັດໃຫ້ສະກຸນເງິນຢວນອ່ອນຕົວລົງ, ພ້ອມທັງກໍ່ໃຫ້ເກີດຄວາມວິຕົກກັງວົນຕໍ່ໄພອັນຕະລາຍ “ຟອງສະບູ” ອະສັງຫາລິມະຊັບ ແລະ ວິກິດການໜີ້ເສຍ. ທ່ານນາຍົກລັດຖະມົນຕີ ຈີນ ຫຼີເຄີຊຽງ ກໍ່ຍອມຮັບວ່າ ຍ້ອນບັນດາການຜັນແປຢູ່ພາຍໃນປະເທດ ແລະ ຕ່າງປະເທດເຮັດໃຫ້ ຈີນ ຕ້ອງປະເຊີນໜ້າກັບສະພາບການສັບສົນກ່ວາ ແລະ ຫຍຸ້ງຍາກກ່ວາ. ທ່ານ ຫຼີເຄີຊຽງ ເນັ້ນໜັກວ່າ ການເຕີບໂຕເສດຖະກິດໂລກຍັງຄົງຊັກຊ້າ ໃນຂະນະທີ່ລັດທິປົກປ້ອງ ແລະ ທ່າອ່ຽງໄປຝືນກັບການຫັນເປັນໂລກາພິວັດພວມເພີ່ມຂຶ້ນ. ຢູ່ພາຍໃນປະເທດ, ໃນໄລຍະຜ່ານມາ ຍ້ອນ ປັກກີງ ມີບັນດາການກະທຳ ເພື່ອຫລຸດລາຄາເຮືອນຢູ່ລົງ, ຄວບຄຸມການເຕີບໂຕສິນເຊື່ອ ແລະ ຫລຸດຜ່ອນການລົງທຶນສາທາລະນະ ດັ່ງນັ້ນ ເຮັດໃຫ້ການເຕີບໂຕເສດຖະກິດ ຈີນ ໃນປີນີ້ ຈະຕ້ອງອີງໃສ່ການໃຊ້ສອຍຢູ່ພາຍໃນປະເທດ ແລະ ການລົງທຶນຈາກພາກເອກະຊົນຫລາຍກ່ວາ. ກໍ່ຄືປີ 2016, ຈີນ ບໍ່ວາງຄາດໝາຍສົ່ງອອກໃຫ້ປີ 2017. ສິ່ງດັ່ງກ່າວ ສະແດງໃຫ້ເຫັນສະພາບຂາດຄວາມສະຫງົບໝັ້ນທ່ຽງໃນສະພາບການເຕີບໂຕທົ່ວໂລກ.
ທ່ານນາຍົກລັດຖະມົນຕີປະເທດນີ້ ຫຼີເຄີຊຽງ ກ່າວຄຳເຫັນທີ່
ພິທີໄຂກອງປະຊຸມປະຈຳປີສະພາຜູ້ແທນປະຊາຊົນແຫ່ງຊາດ ຈີນ
ໃນສະພາບການນັ້ນ, ບັນດາຜູ້ຊ່ຽວຊານດ້ານເສດຖະກິດຖືວ່າ ຄາດໝາຍການເຕີບໂຕເສດຖະກິດ 6,5% ໃນປີ 2017 ໂດຍລັດຖະບານຈີນວາງອອກ ແມ່ນຕົວເລກຄາດໝາຍທີ່ສົມເຫດສົມຜົນ. ທ່ານນາຍົກລັດຖະມົນຕີຈີນ ຫຼີເຄີຊຽງ ຍັງຖືວ່າ ຄາດໝາຍການເຕີບໂຕໃນປີນີ້ ແມ່ນສອດຄ່ອງກັບກົດເກນດ້ານເສດຖະກິດ ແລະ ສະພາບຕົວຈິງພາວະວິໄສ, ມີຜົນປະໂຫຍດຕໍ່ການກຳນົດທິດ, ສ້າງຄວາມເປັນປົກກະຕິ ແລະ ດັດປັບໂຄງປະກອບ, ພ້ອມກັນນັ້ນ ກໍສາມາດເຊື່ອມຕໍ່ກັບເປົ້າໝາຍການກໍ່ສ້າງສັງຄົມທີ່ອຸດົມຮັ່ງມີຮອບດ້ານ; ຈຸດໝາຍການເຕີບໂຕເປັນປົກກະຕິແມ່ນເພື່ອສ້າງວຽກເຮັດງານທຳ, ນຳຜົນປະໂຫຍດມາສູ່ການດຳລົງຊີວິດໃຫ້ແກ່ປະຊາຊົນ.
ວິທີການແກ້ໄຂຈຸດສຸມ.
ເພື່ອປະຕິບັດ ຄາດໝາຍການເຕີບໂຕເສດຖະກິດ 6,5% ໃນປີ 2017, ລັດຖະບານຈີນຈະສືບຕໍ່ປະຕິບັດນະໂຍບາຍປີງົບປະມານຢ່າງເປັນເຈົ້າການ ແລະ ຈະຫຼຸດຜ່ອນພາສີອາກອນປະມານ 350 ຕື້ຢວນ, ເທົ່າກັບປະມານ 51 ຕື້ USD ໃຫ້ແກ່ບັນດາວິສາຫະກິດ. ນອກຈາກນັ້ນ, ຈີນຈະສືບຕໍ່ເດີນຕາມນະໂຍບາຍເງິນຕາແບບລະມັດລະວັງ ແລະ ເປັນກາງ. ຕາມທ່ານນາຍົກລັດຖະມົນຕີຈີນ ຫຼີເຄີຊຽງແລ້ວ, ໃນຈຸດເວລາປະຈຸບັນ, ຄວາມສ່ຽງລະບົບໃນຂະແໜງການເງິນຂອງຈີນພວມໄດ້ຮັບການຄວບຄຸມ ແຕ່ຈີນຄວນລະມັດລະວັງຢ່າງສຸດຂີດ ແລະ ສ້າງລະບົບ “ກຳແພງປ້ອງກັນ” ສະກັດກັ້ນຄວາມສ່ຽງດ້ານການເງິນ. ຕາມນັ້ນແລ້ວ, ຈີນຈະນຳໃຊ້ບັນດາເຄື່ອງມືນະໂຍບາຍເງິນຕາ, ຮັກສາຄວາມໝັ້ນທຽງທາງດ້ານການຊຳລະ, ຮັກສາຄ່າດອກເບ້ຍໃນທ້ອງຕະຫຼາດຢ່າງສົມເຫດສົມຜົນ ແລະ ປົວແປງກົນໄກສົ່ງຕໍ່ຂອງນະໂຍບາຍເງິນຕາ. ການປັບປຸງລັດວິສາຫະກິດ ກໍແມ່ນໜຶ່ງໃນບັນດາບຸລິມະສິດຂອງລັດຖະບານຈີນ. ທ່ານນາຍົກລັດຖະມົນຕີຈີນ ຫຼີເຄີຊຽງ ໃຫ້ຮູ້ວ່າ ເລື່ອງສືບຕໍ່ຊຸກຍູ້ການປັບປຸງກຳມະສິດຢູ່ໃນກ່ວາ 100 ວິສາຫະກິດແຫ່ງລັດໂດຍສູນກາງຄຸ້ງຄອງຈະສຳເລັດໃນທ້າຍປີນີ້. ຈີນຈະກະທຳຢ່າງຂ້ຽວຂາດກ່ວາໃນການປິດປະຕູບັນດາວິສາຫະກິດ, ບັນດາບໍລິສັດແຫ່ງລັດທີ່ທຳມາຄ້າຂາຍຢ່າງມີປະສິດທິຜົນຕ່ຳ. ໜຶ່ງໃນບັນດາປັດໄຈກໍ່ສິ່ງກີດຂວາງໃຫ້ແກ່ເສດຖະກິດຈີນ ແມ່ນສະພາບເຫຼືອເກີນການຜະລິດອຸດສາຫະກຳໜັກ. ທ່ານນາຍົກລັດຖະມົນຕີຈີນ ຫຼີເຄີຊຽງ ຢືນຢັນວ່າ ຈະປັດເຂ່ຍປັດໄຈນີ້ ຂະນະທີ່ໃຫ້ຮູ້ວ່າ ຈະຫຼຸດຜ່ອນເຫຼັກກ້າ 50 ລ້ານໂຕນ ແລະ ຖ່ານຫີນ 150 ລ້ານໂຕນ. ຈີນຍັງໃຫ້ຢຸດການເຄື່ອນໄຫວຢູ່ໂຮງງານໄຟຟ້າໃຊ້ພະລັງຖ່ານຫີນຫຼືໂຈະບັນດາໂຄງການກໍ່ສ້າງໃໝ່.
ເຖິງວ່າ ຄາດໝາຍການເຕີບໂຕເສດຖະກິດໃນປີ 2017ໂດຍຈີນວາງອອກແມ່ນຕ່ຳສຸດໃນ 25 ປີທ່ານຜ່ານມາກໍຕາມ, ແຕ່ຕົວເລກຄາດໝາຍນີ້ສອດຄ່ອງກັບສະພາບການປະຈຸບັນຂອງຈີນ. ຈຸດໝາຍນີ້ ອະນຸຍາດໃຫ້ລັດຖະບານຈີນມີຄວາມເປັນເຈົ້າການ, ມີໄຫວພິບໃນການບໍລິຫານບັນດາມາດຕະການແກ້ໄຂເພື່ອຮັກສາທ່າເຕີບໂຕຂອງພື້ນຖານເສດຖະກິດໃຫຍ່ອັນດັບ 2 ໃນໂລກໃນປີ 2017ນີ້ . /.
Van