(vovworld)- ເສັ້ນທາງໂຮ່ຈິມີນ ຫລືເອີ້ນວ່າ ເສັ້ນທາງເຈື່ອງເຊີນ(ໝາຍເຖິງສາຍພູຫລວງ), ໄດ້ເລີ່ມຕົ້ນກໍ່ສ້າງເມື່ອປີ 1959 ດ້ວຍຈຸດໝາຍສືບຕໍ່ລຳລຽງໃຫ້ພາກໃຕ້, ໃນສະຖານະການທ່ີປະເທດຫວຽດນາມ ຖືກແບ່ງເປັນ 2 ພາກ. ໃນໄລຍະ 16 ປີ, ເສັ້ນທາງໂຮ່ຈິມີນ ແມ່ນຫນຶ່ງໃນບັນດາປັດໄຈມີຄວາມໝາຍຍຸດທະສາດຕັດສິນຊີ້ຂາດພາລະກິດປົດປ່ອຍພາກໃຕ້ຫວຽດນາມ ໂຮມປະເທດຊາດເປັນເອກະພາບ. ເສັ້ນທາງນີ້ໄດ້ກາຍເປັນສັນຍາລັກຂອງເຈດຈຳນົງຍາດເອົາເອກະລາດ, ເສລີພາບມາໃຫ້ປະເທດຊາດຫວຽດນາມ ພ້ອມທັງແມ່ນສັນຍາລັກແຫ່ງຄວາມສາມັກຄີສູ້ຮົບຕ້ານສັດຕູໂຕດຽວຂອງສາມຊາດ ຫວຽດນາມ ,ລາວ ແລະ ກຳປູເຈຍ. ເນື່ອງໃນໂອກາດສະເຫລີມສະຫລອງ 55 ປີແຫ່ງວັນກໍ່ສ້າງເສັ້ນທາງໂຮ່ຈິມີນ(19/5), ພວກເຮົາແນະນຳບົດຂຽນທີ່ມີຫົວຂໍ້ວ່າ: ເສັ້ນທາງໂຮ່ຈິມີນ, ເສັ້ນທາງເຈື່ອງເຊີນ:ລຳລຽງໃຫ້ສະຫນາມຮົບເພື່ອໂຮມປະເທດຊາດເປັນເອກະພາບ, ສ້າງສາ ແລະ ພັດທະນາປະເທດຊາດ.
ເສັ້ນທາງເຈື່ອງເຊີນໃນເມື່ອກ່ອນ
ພາບ:internet
|
ເສັ້ນທາງໂຮ່ຈິມີນ ແມ່ນຕາຫນ່າງຄົມມະນາຄົມການທະຫານຍຸດທະສາດ ໄປຜ່ານພາກກາງຫວຽດນາມ, ພາກໃຕ້ຂອງລາວ ແລະ ກຳປູເຈຍ.ລະບົບເສັ້ນທາງນີ້ແມ່ນສະຫນອງກຳລັງທະຫານ, ສະບຽງອາຫານ ແລະ ອາວຸດຍຸດທະພັນເພື່ອລຳລຽງໃຫ້ທະຫານປົດປ່ອຍພາກໃຕ້ຫວຽດນາມ ແລະ ກອງທັບປະຊາຊົນຫວຽດນາມ ໃນກວ່າ 16 ປີ(1959-1975) ຂອງໄລຍະຕໍ່ຕ້ານຕ້ານຈັກກະພັດອາເມລິກາ ຢູ່ ຫວຽດນາມ. ລະບົບເສັ້ນທາງນີ້ຖືກຕັ້ງຊື່ວ່າ: ເສັ້ນທາງເຈື່ອງເຊີນ(ສາຍພູຫລວງ). ຫລັງຈາກນັ້ນລະບົບເສັ້ນທາງນີ້ມີຊື່ເອີ້ນຕື່ມອີກວ່າ: ເສັ້ນທາງໂຮ່ຈິມີນ ໄປຜ່ານຫລາຍແຂວງຢູ່ຫວຽດນາມ.
ຄວາມຫຍຸ້ງຍາກ, ລຳບາກເພື່ອກໍ່ສ້າງເປັນເສັ້ນທາງແຫ່ງເທບນິຍາຍ
ວັນທີ 19/5/1959, ຄະນະພັກສູນກາງ ໄດ້ຕົກລົງແຕ່ງຕັ້ງກອງທະຫານ 559, ຊື່ງຕົ້ນກຳເນີດຂອງພົນລະພາກຫລວງ 12- ທະຫານເຈ່ືອງເຊີນ ເປັນກົມກອງຂົນສົ່ງກໍ່ສ້າງເສັ້ນທາງລຳລຽງໃຫ້ສະຫນາມຮົບພາກໃຕ້. ໃນການຕໍ່ຕ້ານຕ້ານຈັກກະພັດອາເມລິກາ, ທະຫານເຈື່ອງເຊີນ ໄດ້ຂຸດ, ຖົມດິນ,ຫິນປະມານ 29 ລ້ານແມດກ້ອນ, ກໍ່ສ້າງຕາຫນ່າງຄົມມະນາຄົມທາງບົກ ຊື່ງລວມມີ 5 ລະບົບເສ້ັນທາງລວງຍາວ, 21 ເສັ້ນທາງລວງຂວາງຢູ່ທາງທິດຕາເວັນອອກ ແລະ ຕາເວັນຕົກສາຍພູຫລວງ ດ້ວຍຄວາມຍາວເກືອບ 20.000 ກິໂລແມັດ. ແລະ ກໍ່ຢູ່ລະບົບເສັ້ນທາງນີ້, ທະຫານເຈື່ອງເຊີນພ້ອມກັບບັນດາເຫລົ່າຮົບໄດ້ຍິງເຮືອບິນອາເມເລິກາ ຕົກກວ່າ 2.400 ລຳ. ພັນເອກ ເລກີມເທີ, ນັກຮົບເກົ່າຂຶ້ນກັບກອງບັນຊາການ ກອງທະຫານ 559 ໃຫ້ຮູ້ວ່າ:
“ອາດຈະເວົ້າໄດ້ວ່າ, ແຕ່ລະນາທີ, ແຕ່ລະຊົ່ວໂມງ, ແຕ່ລະມື້ ຍາມໃດກໍໄດ້ຍິນສຽງລະເບີດແຕກ ແລະ ສຽງເຮືອບິນ. ນັກຮົບ ແລະ ຜູ້ຮ່ວມກົມກອງຖືກເສຍຊີວິດຫລາຍຄົນ. ເຖິງວ່າມີສຽງລະເບີດ, ເຮືອບິນ ແຕ່ອ້າຍນ້ອງໃນກົມກອງຍັງອອກສູ່ເສັ້ນທາງ, ປະຕິບັດຫນ້າທີ່, ຕັດສິນໃຈເພື່ອ ປົດປ່ອຍພາກໃຕ້ຫວຽດນາມ.”
ເສັ້ນທາງໂຮ່ຈິມີນ
ພາບ:baodongnai.com.vn
|
ໃນຕະຫລອດ 16 ປີ ແຫ່ງການຕໍ່ສູ້ຢ່າງດຸເດືອດ, ບັນດາພະນັກງານ, ນັກຮົບ ເຈື່ອງເຊີນ ທີ່ຂຶ້ນກັບບັນດາກຳລັງທະຫານຊ່າງແສງ, ຂົນສົ່ງ, ປືນໃຫຍ່, ປ້ອງກັນອາກາດ, ຜູ້ຕິດຕໍ່ພາທາງ, ຊາວຫນຸ່ມຕະລຸມບອນ, ຄົນງານເກນ ໄດ້ລະດົມມະຫາຊົນ, ກໍ່ສ້າງຮາກຖານການເມືອງ ກໍຄືຖັນແຖວເຮັດວຽກງານການຂ່າວ, ວັດທະນະທຳ, ສິລະປະ ໄດ້ຜ່ານຜ່າຄວາມຫຍຸ້ງຍາກ, ລຳບາກ, ເສຍສະຫລະຊີວິດ, ກໍ່ສ້າງສຳເລັດເສັ້ນທາງມະຫັດສະຈັນດັ່ງກ່າວ.
ເສັ້ນທາງໂຮ່ຈິມີນ ປະກອບສ່ວນສ້າງເປັນໄຊຊະນະນປະຫວັດສາດ
ເສັ້ນທາງເຈື່ອງເຊີນ-ເສັ້ນທາງໂຮ່ຈິມີນ ກໍ່ສ້າງຂຶ້ນ ໄດ້ເສີມຂະຫຍາຍບົດບາດຢ່າງສູງສຸດສຳລັບບັນດາສະຫນາມຮົບຢູ່ ອິນດູຈີນ, ບໍ່ພຽງແຕ່ສຳລັບຫວຽດນາມ ຫາກທັງການປະຕິວັດລາວ ແລະ ກຳປູເຈຍອີກດ້ວຍ. ພົນຈັດຕະວາ ໂດຢາງນາມ, ຜູ້ບັນຊາການພົນລະພາກຫລວງ 12, ຜູ້ອຳນວຍການໃຫຍ່ ບໍລິສັດກໍ່ສ້າງເຈື່ອງເຊີນ ໃຫ້ຮູ້ວ່າ:
“ຍ້ອນມີເສັ້ນທາງລຳລຽງເຈື່ອງເຊີນ ນີ້ ຊື່ງພວກເຮົາໄດ້ຂົນສົ່ງອາວຸດຍຸດທະພັນ , ລູກປືນ, ກວ່າ 12 ລ້ານໂຕນ ແລະ ກວ່າ 2 ລ້ານເທື່ອຄົນເຂົ້າອອກບັນດາສະຫນາມຮົບ. ແລະກໍ່ຍ້ອນມີເສັ້ນທາງນີ້ ກອງທັບຫວຽດນາມ ໄດ້ດຳເນີນການເຄື່ອນທັບຄັ້ງໃຫຍ່ພ້ອມກັບກຳລັງລົດຖັງ, ປືນໃຫຍ່ ເພື່ອເຂົ້າສະຫນາມຮົບພາກໃຕ້. ສິ່ງດັ່ງກ່າວໄດ້ປະກອບສ່ວນສຳຄັນເຂົ້າໃນການຍາດເອົາໄຊຊະນະ ດ້ວຍບັນດາຂີດໝາຍສຳຄັຍ, ພິເສດແມ່ນໄຊຊະນະຂອງການບຸກໂຈມຕີຄັ້ງໃຫຍ່ ແລະ ການລຸກຮືຂຶ້ນຍາມລະດູບານໃຫມ່ປີ 1975”
ເສັ້ນທາງປະກອບສ່ວນສ້າງສາ ແລະ ພັດທະນາປະເທດຊາດ
ສົງຄາມໄດ້ຜ່ານພົ້ນໄປ, ເສັ້ນທາງໂຮ່ຈີມີນໃນເມື່ອກ່ອນ ປະຈຸບັນ ໄດ້ມີການປ່ຽນແປງຫລາຍຢ່າງແລ້ວ. ຖ້າຫາກກ່ອນນີ້ 55 ປີ, ນີ້ແມ່ນເສັ້ນທາງຍຸດທະສາດ ເພື່ອລຳລຽງໃຫ້ສະຫນາມຮົບພາກໃຕ້, ປະຈຸບັນ ເສັ້ນທາງນີ້ໄດ້ກາຍເປັນເສັ້ນທາງທີ່ສຳຄັນ, ຂົນສົ່ງສິນຄ້າ, ປະກອບສ່ວນເຂົ້າໃນການພັດທະນາເສດຖະກິດຂອງທ້ອງຖິ່ນຢູ່ລຽບຕາມເສັ້ນທາງ. ພົນຈັດຕະວາ ໂດ໋ຢາງນາມ, ຜູ້ບັນຊາການ ພົນລະພາກຫລວງ 12, ຜູ້ອຳນວຍການໃຫຍ່ບໍລິສັດໃຫຍ່ກໍ່ສ້າງເຈື່ອງເຊີນ ໃຫ້ຮູ້ວ່າ:
“ປະຈຸບັນ ໃນໄລຍະສັນຕິພາບ, ເສັ້ນທາງ ເຈື່ອງເຊີນ ພວມໄດ້ຮັບການລົງທຶນຢ່າງໃຫຍ່ຫລວງຈາກພັກ, ລັດ ຫວຽດນາມ. ເສັ້ນທາງນີ້ແມ່ນກິດຈະກຳເຊື່ອມຕໍ່ລະຫວ່າງສອງພາກເຫນືອໃຕ້ຂອງປະເທດຊາດ, ແມ່ນເສັ້ນທາງຫັນເປັນອຸດສາຫະກຳແລະ ທັນສະໄຫມ. ເສັ້ນທາງເຈື່ອງເຊີນ ຈະສ້າງເງື່ອນໄຂເພື່ອນຳເສດຖະກິດຂອງປະເທດຊາດພັດທະນາແບບຍືນຍົງ, ຮັບປະກັນຊີວິດສັງຄົມ ຢູ່ບັນດາເຂດຫ່າງໄກສອກຫລີກ, ລຽມຕາມເສັ້ນທາງເຈື່ອງເຊີນ, ປະກອບສ່ວນຮັບປະກັນການປ້ອງກັນຊາດປ້ອງກັນຄວາມສະຫງົບ.”
ໂດຍເສີມຂະຫຍາຍບັນດາທ່າໄດ້ປຽບ, ຄວາມສາມາດບົ່ມຊ້ອນຂອງເສັ້ນທາງຄົມມະນາຄົມສຳຄັນ ກໍແມ່ນຫນຶ່ງໃນບັນດາຫນ້າທີ່ສຳຄັນຊື່ງພັກ, ລັດ ໄດ້ວາງອອກໃນພາລະກິດສ້າງສາ ແລະ ພັດທະນາປະເທດຊາດ. ພົນເອກ ຟຸ່ງກວາງແທງ, ລັດຖະມົນຕີກະຊວງປ້ອງກັນປະເທດຫວຽດນາມ ຢືນຢັນວ່າ:
“ພວກເຮົາຕ້ອງເສີມຂະຫຍາຍນ້ຳໃຈເອກະລາດ, ປະຊາທິປະໄຕ ແລະ ເສີມຂະຫຍາຍກຳລັງແຮງສັງລວມຂອງທົ່ວປວງຊົນທັງຊາດ ແລະ ພວກເຮົາຈະ ເປີດບັນດາເສັ້ນທາງລຽບຕາມເສັ້ນທາງເຈື່ອງເຊີນໃນເມື່ອກ່ອນ ໃຫ້ກາຍເປັນຫນຶ່ງໃນບັນດາຕາຫນ່າງຄົມມະນາຄົມໃຫ້ສົມບູນແບບ ເພື່ອພັດທະນາເສດຖະກິດສັງຄົມຢູ່ທາງທິດຕາເວັນຕົກຂອງປະເທດຊາດ, ຮັບປະກັນການລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ພັດທະນາເສດຖະກິດສິນຄ້າ, ຮັບປະກັນທ່າຮົບປ້ອງກັນຊາດປ້ອງກັນຄວາມສະຫງົບຂອງປະເທດຊາດ, ປົກປັກຮັກສາເຂດຊາຍແດນທາງທິດຕາເວັນຕົກຂອງປະເທດຊາດໃຫ້ໝັ້ນຄົງ,ເພື່ອພັດທະນາເສດຖະກິດສັງຄົມ ຈາກພາກເຫນືອລົງຮອດພາກໃຕ້ຂອງປະເທດຊາດ.”
ຈາກເສັ້ນທາງໄດ້ຮັບການກໍ່ສ້າງດ້ວຍການຂຸດພູ, ຜ່ານປ່າ ເພື່ອໃຫ້ທະຫານ ແລະ ປະຊາຊົນພາກເຫນືອລຳລຽງຂົນສົ່ງສິນຄ້າ, ອາວຸດ, ກຳລັງມະນຸດຮັບໃຊ້ສະຫນາມຮົບພາກໃຕ້. ເສັ້ນທາງເຈື່ອງເຊີນ ປະຈຸບັນ ດ້ວຍບັນດາເສັ້ນທາງໃຫຍ່ຄຽງຄູ່ກັບທາງຫລວງ 1 A, ບໍ່ພຽງແຕ່ແມ່ນເສັ້ນທາງສຳຄັນ ປະກອບສ່ວນຮັບປະກັນການປ້ອງກັນຊາດປ້ອງກັນຄວາມສະຫງົບ, ພັດທະນາເສດຖະກິດສັງຄົມເທົ່ານັ້ນ ຫາກຍັງແມ່ນປູຊະນີຍະສະຖານປະຫວັດສາດແຫ່ງຊາດພິເສດ, ເປັນສະຖານທີ່ແຫ່ງຂີດໝາຍການຕໍ່ສູ້ຍາດເອົາເອກະລາດອັນສະຫງ່າອົງອາດຂອງຊາດຫວຽດນາມອີກດ້ວຍ.