(vovworld) - ໂດຍໄດ້ຮັບຄຳເຊີນຂອງທ່ານນາຍົກລັດຖະມົນຕີ ສສ ຫວຽດນາມ ຫງວຽນຊວນຟຸກ, ວັນທີ 21/03 ທ່ານນາຍົກລັດຖະມົນຕີ ສິງກະໂປ ຫຼີຊຽນຫຼົງ ແລະ ພັນລະຍາເລີ່ມຕົ້ນການຢ້ຽມຢາມ ຫວຽດນາມ ຢ່າງເປັນທາງການທີ່ແກ່ຍາວເປັນເວລາ 4 ວັນ. ການຢ້ຽມຢາມໄດ້ດຳເນີນໃນສະພາບການພົວພັນຮ່ວມມື 2 ປະເທດພວມສືບຕໍ່ມີທ່າພັດທະນາ, ຈະປະກອບສ່ວນເຮັດໃຫ້ການພົວພັນຄູ່ຮ່ວມມືຍຸດທະສາດລະຫວ່າງ ຫວຽດນາມ - ສິງກະໂປ ເລິກເຊິ່ງຫລາຍກ່ວາອີກ.
ທ່ານນາຍົກລັດຖະມົນຕີ ສິງກະໂປ ຫຼີຊຽນຫຼົງ
(ພາບ: TTXVN)
ແມ່ນປະເທດທີ່ນອນໃນກຸ່ມ ອາຊຽນ, ສາທາລະນະລັດ ສິງກະໂປ ແມ່ນປະເທດອຸດສາຫະກຳພັດທະນາແຖວໜ້າຂອງ ອາຊີ ແລະ ໂລກ. ສິງກະໂປ ກໍ່ແມ່ນປະເທດນຳໜ້າໃນການຫັນປ່ຽນສູ່ພື້ນຖານເສດຖະກິດພູມປັນຍາດ້ວຍແຜນການຮອດປີ 2018 ຈະກາຍເປັນນະຄອນແຖວໜ້າຂອງໂລກ, ແມ່ນຈຸດສຸມຂອງຕາໜ່າງໃໝ່ໃນພື້ນຖານເສດຖະກິດໂລກ.
ບາດກ້າວຍາວໄກໃນການພົວພັນຮ່ວມມືລະຫວ່າງ 2 ປະເທດ
ຫວຽດນາມ ແລະ ສິງກະໂປ ສ້າງຕັ້ງການພົວພັນທາງການທູດຢ່າງເປັນທາງການນັບແຕ່ເດືອນ 08/1973. ນັບແຕ່ນັ້ນມາຮອດປະຈຸບັນ, ການພົວພັນລະຫວ່າງ 2 ປະເທດມີບັນດາບາດກ້າວພັດທະນາອັນດີງາມ ແລະ ຮອບດ້ານ. ພິເສດ, ນັບແຕ່ເມື່ອ ຫວຽດນາມ ເຂົ້າຮ່ວມ ອາຊຽນ (ປີ 1995), ການພົວພັນລະຫວ່າງ 2 ປະເທດພັດທະນາຢ່າງວ່ອງໄວ. ສິງກະໂປ ຖືເປັນສຳຄັນການພົວພັນກັບ ຫວຽດນາມ ແລະ ຫວຽດນາມ ກາຍເປັນໜຶ່ງໃນບັນດາຕະຫລາດສຳຄັນກ່ຽວກັບດ້ານການຄ້າ, ການລົງທຶນຂອງ ສິງກະໂປ ຢູ່ ອາຊີຕາເວັນອອກສ່ຽງໃຕ້. ປີ 2004 2 ປະເທດໄດ້ລົງນາມໃນ “ຖະແຫຼງການຮ່ວມກ່ຽວກັບຂອບເຂດການຮ່ວມມືຮອບດ້ານໃນສະຕະວັດທີ 21”, ສ້າງພື້ນຖານນິຕິກຳ ແລະ ເງື່ອນໄຂສະດວກເພື່ອຊຸກຍູ້ການພົວພັນມິດຕະພາບ ແລະ ການຮ່ວມມືຫລາຍດ້ານລະຫວ່າງ 2 ປະເທດ. ເດືອນ 09/2013, ເນື່ອງໃນໂອກາດຢ້ຽມຢາມ ຫວຽດນາມ ຂອງທ່ານນາຍົກລັດຖະມົນຕີ ສິງກະໂປ ຫຼີຊຽນຫຼົງ ແລະ ສະເຫຼີມສະຫຼອງ 40 ປີແຫ່ງວັນສ້າງຕັ້ງການພົວພັນທາງການທູດ, 2 ຝ່າຍໄດ້ອອກຖະແຫຼງການຮ່ວມກ່ຽວກັບການສ້າງຕັ້ງການພົວພັນຄູ່ຮ່ວມມືຍຸດທະສາດ ຫວຽດນາມ - ສິງກະໂປ.
ການພົວພັນເສດຖະກິດການຄ້າລະຫວ່າງ 2 ປະເທດໄດ້ພັດທະນາຢ່າງກະໂດດຂັ້ນ. ວົງເງິນການຄ້າ 2 ປະເທດເພີ່ມຂຶ້ນແຕ່ລະປີ, ບັນລຸກ່ວາ 7 ຕື້ USD ໃນປີ 2016. ການລົງທຶນໂດຍກົງຈາກ ສິງກະໂປ ເຂົ້າ ຫວຽດນາມ ໄດ້ເພີ່ມຂຶ້ນຢ່າງລຽນຕິດນັບແຕ່ປີ 1998. ສິງກະໂປ ສືບຕໍ່ແມ່ນນັກລົງທຶນລາຍໃຫຍ່ສຸດຂອງ ຫວຽດນາມ (ຈັດອັນດັບທີ 3/101) ດ້ວຍຍອດເງິນລົງທຶນ 39 ຕື້ USD. ເຂດອຸດສາຫະກຳ ຫວຽດນາມ - ສິງກະໂປ (VSIP) ແມ່ນສັນຍາລັກຂອງລັກສະນະປະສິດທິຜົນໃນບັນດາໂຄງການລົງທຶນຂອງ ສິງກະໂປ, ຊຶ່ງໄດ້ເຄື່ອນໄຫວມາເປັນເວລາກ່ວາ 11 ປີດ້ວຍເຂດອຸດສາຫະກຳ VSIP 7 ແຫ່ງ. ເມື່ອໃຫ້ຂໍ້ສັງເກດກ່ຽວກັບຄວາມສາມາດບົ່ມຊ້ອນການຮ່ວມມືເສດຖະກິດລະຫວ່າງ ຫວຽດນາມ ແລະ ສິງກະໂປ ທ່ານ ຫງວຽນຕ໋ຽນມີງ ເອກອັກຄະລັດຖະທູດ ຫວຽດນາມ ປະຈຳ ສິງກະໂປ ໃຫ້ຮູ້ວ່າ:
“ ໄລຍະປະຈຸບັນ, ລະຫວ່າງ ຫວຽດນາມ-ສິງກະໂປ ມີຄວາມສາມາດບົ່ມຊ້ອນດ້ານການຮ່ວມມືຢ່າງໃຫຍ່ຫຼວງທີ່ສຸດ ເພາະ 2 ພື້ນຖານເສດຖະກິດກໍລ້ວນແຕ່ມີລັກສະນະນູນຊ່ວຍແກ່ກັນ. ຝ່າຍໜຶ່ງແມ່ນມີທຶນ, ມີບົດຮຽນທາງດ້ານເສດຖະກິດ, ການຕະຫຼາດ, ບົດຮຽນກ່ຽວກັບການພັດທະນາພື້ນຖານເສດຖະກິດ. ຝ່າຍໜຶ່ງແມ່ນຫວຽດນາມ ກໍມີແຫຼ່ງຊັບພະຍາກອນມະນຸດຫຼວງຫຼາຍ, ຊັບພະຍາກອນທຳມະຊາດທີ່ອຸດົມສົມບູນ ແລະ ມີທີ່ຕັ້ງພູມີປະເທດທີ່ກ້ວາງໃຫຍ່. ດັ່ງນັ້ນ 2 ພື້ນຖານເສດຖະກິດອາດຈະເພີ່ມເຕີມໃຫ່ແກ່ກັນ, ພິເສດໃນປະຈຸບັນ, ໃນສະພາວະທີ່ບັນດາສັນຍາການຄ້າເສລີ FTA ໄດ້ສ້າງເປັນຮູບປະທຳ ແລະ ພັດທະນາ. FTA ໃນພາກພື້ນລວມມີປະຊາຄົມເສດຖະກິດອາຊຽນ AEC . ສັນຍາຄູ່ຮ່ວມມືພາກພື້ນ RCEP ຊຶ່ງລວມມີ 16 ພື້ນຖານເສດຖະກິດ, ດັ່ງນັ້ນຂອບເຂດການຮ່ວມມືແມ່ນກ້ວາງໃຫຍ່ທີ່ສຸດ ”
ນອກຈາກຂົງເຂດເສດຖະກິດ, ການຄ້າ ແລະ ການລົງທຶນ, ການຮ່ວມມືໃນຂົງເຂດການສຶກສາ, ບຳລຸງສ້າງ, ສາທາລະນະສຸກ, ວັດທະນະທຳ, ການທ່ອງທ່ຽວ ກໍລ້ວນແຕ່ບັນລຸບັນດາຕົວເລກທີ່ໜ້າປະທັບໃຈ. ປີ 2016, ຫວຽດນາມໄດ້ຕ້ອນຮັບແຂກທ່ອງທ່ຽວ ສິງກະໂປ ເກືອບ 260.000 ເທື່ອຄົນ, ເພີ່ມຂຶ້ນ 8,7%ເມື່ອທຽບໃສ່ປີ 2015. 2 ຝ່າຍໄດ້ຮ່ວມມື ແລະ ສົມທົບກັນຢ່າງແໜ້ນແຟ້ນໃນບັນດາເວທີປາໄສຫຼາຍຝ່າຍ ແລະ ສາກົນຄື: ອາຊຽນ, ອາເປັກ, ອາແຊມ ແລະ ສະຫະປະຊາຊາດ. ກ່ຽວຂ້ອງເຖິງບັນດາບັນຫາຄວາມໝັ້ນຄົງຍຸດທະສາດໃນພາກພື້ນ, ໃນນັ້ນມີບັນຫາທະເລຕາເວັນອອກ, 2 ປະເທດຕັ້ງໜ້າຮ່ວມມື, ແບ່ງປັນທັດສະນະ ແລະ ປົກປ້ອງຫຼັກໝັ້ນລວມຂອງອາຊຽນ.
ຂີດໝາຍໃໝ່ໃນການພົວພັນຫວຽດນາມ-ສິງກະໂປ
ໃນຂອບເຂດການຢ້ຽມຢາມຄັ້ງນີ້, 2 ຝ່າຍຈະແລກປ່ຽນບັນດາທິດທາງຍຸດທະສາດ, ມາດຕະການລະອຽດ ແນໃສ່ເຮັດໃຫ້ການພົວພັນຄູ່ຮ່ວມມືຍຸດທະສາດໃນໄລຍະທີ່ຈະມາເຖິງໃຫ້ເລິກເຊິ່ງຂຶ້ນຕື່ມ, ໄປທັນກັບບັນດາການຫັນປ່ຽນຢ່າງວ່ອງໄວໃນປະຈຸບັນຂອງການປະຕິວັດຄັ້ງທີ 4, ໜູນຊ່ວຍຊຶ່ງກັນ ແລະ ກັນເພື່ອພັດທະນາແບບຍືນຍົງ, ວັດທະນາຖາວອນ, ຊຸກຍູ້ການຮ່ວມມືລະຫວ່າງ 2 ປະເທດໃນບັນດາເວທີປາໄສຫຼາຍຝ່າຍ, ໃນນັ້ນມີອາຊຽນ, ອາເປັກ, ອາແຊມ ແລະ ສະຫະປະຊາຊາດ. ທ່ານເອກອັກຄະລັດຖະທູດຫວຽດນາມປະຈຳສິງກະໂປ ຫງວຽນຕ້ຽນມິນ ຢືນຢັນວ່າ :
“ ກາລະໂອກາດຮ່ວມມືໃນໄລຍະທີ່ຈະມາເຖິງແມ່ນໃຫຍ່ຫຼວງທີ່ສຸດ. ການຮ່ວມມືລະຫວ່າງ ຫວຽດນາມ-ສິງກະໂປຈະບໍ່ພຽງແຕ່ຖືກຈຳກັດໃນຂອບເຂດຂອງສິງກະໂປເທົ່ານັ້ນ ຫາກຍັງຢູ່ຂອບເຂດທີ່ກ້ວາງຂວາງກ່ວາ, ນັ້ນແມ່ນອາຊຽນ, ອາຊີປາຊີຝິກ ”
ການພົວພັນ 2 ຝ່າຍ ຫວຽດນາມ-ສິງກະໂປໄດ້ພັດທະນາຢ່າງກະໂດດຂັ້ນໃນຕະຫຼອດ 42 ປີທີ່ຜ່ານມາ ໃນຫຼາຍຂົງເຂດເຊັ່ນ ການຮ່ວມມືເສດຖະກະດ, ການເມືອງ, ການປ້ອງກັນຊາດ, ການສຶກສາ, ສາທາລະນະສຸກ, ວັດທະນະທຳສິລະປະ… ການພົວພັນທາງດ້ານການເມືອງອັນດີງາມ ແມ່ນພື້ນຖານໃຫ້ແກ່ການຮ່ວມມືເສດຖະກິດທີ່ນັບມື້ນັບໝັ້ນຄົງໜັກແໜ້ນລະຫວ່າງ 2 ຝ່າຍ. ການຢ້ຽມຢາມຫວຽດນາມຂອງທ່ານນາຍົກລັດຖະມົນຕີ ສິງກະໂປ ຫຼີຊຽນຫຼົງໃນຄັ້ງນີ້ ແນ່ນອນວ່າ ຈະເຮັດໃຫ້ຄວາມໄວ້ເນື້ອເຊື່ອໃຈດ້ານການເມືອງລະຫວ່າງການນຳ 2 ຝ່າຍຍິ່ງໜັກແໜ້ນຕື່ມອີກ, ອັນໄດ້ສ້າງທ່ວງທ່າໃຫ້ແກ່ການພົວພັນຄູ່ຮ່ວມມືຍຸດທະສາດ ຫວຽດນາມ-ສິງກະໂປ ໃຫ້ພັດທະນາຍິ່ງໆຂຶ້ນ. /.