(vovworld) - ວັນທີ 19/2, ກອງທັບ ອີຣັກ ເລີ່ມຕົ້ນໄລຍະໃໝ່ໃນບັ້ນຮົບຢຶດຄອງ Mosul ຄືນໃໝ່ ເມື່ອເປີດການບຸກໂຈມຕີຢຶດຄອງເຂດດິນແດນທາງທິດຕາເວັນຕົກຂອງນະຄອນ Mosul ຈາກກຳມືຂອງກຳລັງລັດອິດສະລາມ (IS) ອ້າງຊື່ເອງ. ແຕ່ເຖິງຢ່າງໃດກໍ່ຕາມ, ເພື່ອຕີໃຫ້ IS ຕ້ອງອອກຈາກຖານທີ່ໝັ້ນແຫ່ງສຸດທ້າຍຢູ່ປະເທດ ຕາເວັນອອກກາງນີ້ ແມ່ນສິ່ງທີ່ບໍ່ງ່າຍດ່າຍ, ເພາະວ່າຢູ່ທີ່ບ່ອນນີ້ມີສາມັນຊົນດຳລົງຊີວິດເປັນຈຳນວນຫຼວງຫຼາຍ.
Mosul ແມ່ນນະຄອນໃຫຍ່ທີ່ສອງຂອງ ອີຣັກ, ຫ່າງຈາກນະຄອນຫຼວງ Baghdad ປະມານ 400 ກມ ແລະ ມີທີ່ຕັ້ງຍຸດທະສາດສຳຄັນທີ່ສຸດ, ເປັນບ່ອນເຊື່ອມຕໍ່ທາງທິດເໜືອ ອີຣັກ ກັບທາງທິດຕາເວັນອອກຂອງ ຊີຣີ. ນັບແຕ່ເມື່ອຖືກ IS ຄວບຄຸມນັບແຕ່ເດືອນ 6/2014 ມາຮອດປະຈຸບັນ, Mosul ໄດ້ກາຍເປັນຖານທີ່ໝັ້ນຕົ້ນຕໍຂອງກຳລັງນີ້ຢູ່ ອີຣັກ. IS ໄດ້ຖະແຫຼງສ້າງຕັ້ງ “ລາຊະອານາຈັກ ອິດສະລາມ” (caliphate) ລວມທັງບັນດາເຂດດິນແດນທີ່ຢຶດໄດ້ຈາກຊີຣີ.
ກຳລັງທະຫານ ອີຣັກ
(ພາບປະກອບຈາກ AFP/TTXVN)
|
ມາຮອດປະຈຸບັນ, ບັ້ນຮົບຢຶດຄອງ Mosul ຄືນໃໝ່ (ໄດ້ດຳເນີນແຕ່ເດືອນ 10/2016) ຂອງບັນດາກຳລັງ ອີຣັກ, ດ້ວຍການໜູນຊ່ວຍຂອງທະຫານປະສົມຕ້ານກໍ່ການຮ້າຍໂດຍ ອາເມລິກາ ນຳໜ້າ, ສາມາດປັດເຂ່ຍບັນດາມືປືນ IS ໃຫ້ອອກຈາກທາງທິດຕາເວັນອອກຂອງນະຄອນນີ້. ພວກກໍ່ການຮ້າຍປະມານ 1.500 ຄົນຖືກເສຍຊີວິດໃນຮອບເວລາ 4 ເດືອນຜ່ານມາ. ປະຈຸບັນ, ທາງທິດຕາເວັນຕົກ Mosul, ແມ່ນເຂດທີ່ມີສາມັນຊົນດຳລົງຊີວິດເປັນຈຳນວນຫຼວງຫຼາຍ, ຍັງບໍ່ທັນໄດ້ຮັບການປົດປ່ອຍເທື່ອ. ບ່ອນຂີດຂັ້ນລະຫວ່າງ 2 ຝ່າຍແມ່ນແມ່ນ້ຳ Tigris.
ກອງທັບອີຣັກພວມມີທ່າໄດ້ປຽບຫຼາຍຢ່າງໃນສະໜາມຮົບ
ບັ້ນຮົບເພື່ອແນໃສ່ຢຶດຄອງເຂດຕາເວັນຕົກຂອງນະຄອນ Mosul ຄືນໃໝ່ພວມບັນລຸໄດ້ຫຼາຍຜົນງານທີ່ຕັ້ງໜ້າ. ພາຍຫຼັງປຸກລະດົມບັ້ນຮົບຍັງບໍ່ທັນຮອດໜຶ່ງອາທິດ, ປະຈຸບັນ, ບັນດາກຳລັງປະຕິບັດງານພິເສດຂອງ ອີຣັກ ສາມາດຄວບຄຸມໂນນພູຍຸດທະສາດ Abu Saif ທັງໝົດ, ເຊິ່ງແມ່ນບ່ອນທີ່ສາມາດສັງເກດສະໜາມບິນ Mosul ແລະ ທາງແຍກ Hamam Al Alil ໃນເສັ້ນທາງຕົ້ນຕໍພາໄປເຖິງນະຄອນນີ້. ໃນທ່າສະດວກນັ້ນ, ບັນດາກຳລັງ ອີຣັກ ພວມກະກຽມບັນດາແຜນການໃຫ້ບັ້ນຮົບຂະໜາດໃຫຍ່ ບຸກເຂົ້າສະໜາມບິນ Mosul. ການຢຶດເອົາສິດຄວບຄຸມສະໜາມບິນຈະອະນຸຍາດໃຫ້ບັນດາທະຫານນຳໃຊ້ສະຖານທີ່ນີ້ເປັນແປ້ນຢັນເພື່ອປົດປ່ອຍນະຄອນນີ້. ແຕ່ເຖິງຢ່າງໃດກໍ່ຕາມ, ຕາມບັນດານັກຊ່ຽວຊານແລ້ວ, ໃນຊຸມວັນຈະມາເຖິງ, ບັ້ນຮົບອາດຈະສັບສົນກ່ວາຫຼາຍຍ້ອນບັນດາຖະໜົນຢູ່ເຂດຕາເວັນຕົກຂອງ Mosul ຄັບແຄບ ແລະ ຖືກຕັດຂາດເຮັດໃຫ້ລົດຫຸ້ມເກາະຍາກທີ່ຈະແລ່ນເຂົ້າໄປໄດ້. ໃນຂະນະນັ້ນ, ວົງການເຈົ້າໜ້າທີ່ ອາເມລິກາ ໃຫ້ຮູ້ວ່າ: ປະຈຸບັນ, ຍັງມີມືປືນ IS ຢູ່ທາງທິດຕາເວັນຕົກນະຄອນ Mosul ປະມານ 2.000 ຄົນເພື່ອປົກປ້ອງຖານທີ່ໝັ້ນຕໍ່ໜ້າບັນດາການບຸກໂຈມຕີຂະໜາດໃຫຍ່ຂອງບັນດາກຳລັງປ້ອງກັນຄວາມສະຫງົບ ອີຣັກ. ບັນດາມືປືນເຫຼົ່ານີ້ໄດ້ຮັບຖືວ່າຈະໂຕ້ຕອບຢ່າງດຸເດືອດທີ່ສຸດ ຍ້ອນພວມຕົກເຂົ້າສູ່ສະພາບບໍ່ມີທາງອອກ. ກ່ອນບັ້ນຮົບຢຶດຄອງທາງທິດຕາເວັນຕົກ Mosul ຄັ້ງນີ້ຂອງກອງທັບ ອີຣັກ, IS ເອງກໍ່ຟ້າວຟັ່ງກະກຽມໃຫ້ແກ່ການປະທະກັນດ້ວຍການເປີດບັນດາຊ່ອງທາງໄປຊອດເຮືອນຊານຂອງສາມັນຊົນເພື່ອຫຼີກລ້ຽງບໍ່ໃຫ້ພົບເຫັນ. ໃນຂະນະນັ້ນ, ບົດລາຍງານຂອງສະຫະປະຊາຊາດເມື່ອທ້າຍປີ 2016 ໃຫ້ຮູ້ວ່າ: IS ອາດຈະພວມຊ້ອນເຊື່ອງກໍ່ຄືປະຕິບັດບັນດາການບຸກໂຈມຕີດ້ວຍທາດເຄມີຢູ່ Mosul.
ໄພເກີດວິກິດການມະນຸດສະທຳ
ບັ້ນຮົບຢຶດຄອງ Mosul ຄືນໃໝ່ທີ່ແກ່ຍາວເປັນເວລາກ່ວາ 4 ເດືອນຜ່ານມາ ໄດ້ເຮັດໃຫ້ IS ຖືກຜົນເສຍຫາຍຫຼາຍຢ່າງແຕ່ປະຈຸບັນບັ້ນຮົບພັດປະສົບກັບການທ້າທາຍຫຼາຍຢ່າງ, ເຮັດໃຫ້ປະຊາຊົນຢູ່ Mosul ອາດຈະຕົກເຂົ້າສູ່ວິກິດການມະນຸດສະທຳຢ່າງເລິກເຊິ່ງ ໃນຂະນະທີ່ພວມປະເຊີນໜ້າກັບສະພາບການຂາດແຄນໄຟຟ້າ, ທັນຍາຫານ, ນ້ຳດື່ມຢ່າງໜັກໜ່ວງ. ປະຈຸບັນ, ຊາຕາກຳຂອງສາມັນຊົນປະມານ 750.000 ຄົນພວມຖືກຕິດຄ້າງຢູ່ທາງທິດຕາເວັນຕົກ Mosul ພວມແມ່ນຄວາມສົນໃຈອັນໃຫຍ່ຫຼວງສຳລັບບັນດາກຳລັງ ອີຣັກ ເມື່ອກອງທັບ ລັດຖະບານຜັນຂະຫຍາຍບັນດາບັ້ນຮົບ ທີ່ໄດ້ຮັບຖືວ່າດຸເດືອດທີ່ສຸດໃນບັ້ນຮົບດັບສູນ IS. IS ໄດ້ຈັດວາງກັບດັກລະເບີດຫຼາຍບ່ອນ ແລະ ລົດວາງລະເບີດຫຼາຍຄັນໂດຍຢູ່ຕາມບັນດາ ແລະ ຖະໜົນຢູ່ທີ່ນີ້, ກໍ່ຄວາມຫຍຸ້ງຍາກໃຫ້ບັນດາກຳລັງ ອີຣັກ ກໍ່ຄືສາມັນຊົນໃນວິວັດການອົບພະຍົບ. ຕາມບັນດາອົງການກູ້ໄພກູ້ຊີບສາກົນແລ້ວ, ສາມັນຊົນພວມຕົກຄ້າງຢູ່ທິດຕາເວັນຕົກ Mosul ເກືອບເຄິ່ງໜຶ່ງແມ່ນເດັກນ້ອຍ, ໃນຂະນະທີ່ໂຮງໝໍເກືອບທັງໝົດຢູ່ນີ້ລ້ວນແຕ່ຖືກຕົກເຂົ້າສູ່ກຳມື IS. ອົງການກູ້ໄພກູ້ຊີບເດັກນ້ອຍ (Save The Children) ມີສຳນັກງານຕັ້ງຢູ່ລອນດອນ, ວັນທີ 19/2 ໄດ້ກ່າວເຕືອນວ່າມີເດັກນ້ອຍປະມານ 350.000 ນ້ອງພວມຖືກຕິດຄ້າງຢູ່ທິດຕາເວັນຕົກ Mosul. ທ່ານ Maurizo Crivallero, ຜູ້ອຳນວຍການອົງການກູ້ໄພກູ້ຊີບເດັກນ້ອຍ, ຮຽກຮ້ອງໃຫ້ກຳລັງ ອີຣັກ ພ້ອມກັບພັນທະມິດ ອາເມລິກາ ແລະ ອັງກິດ ຕ້ອງເຮັດທຸກສິ່ງທຸກຢ່າງເພື່ອປົກປ້ອງເດັກນ້ອຍ ແລະ ຄອບຄົວຂອງພວກເດັກນ້ອຍ, ຫຼີກລ້ຽງ: ໂຮງຮຽນ ແລະ ໂຮງໝໍ ເມື່ອກອງທັບບຸກເລິກເຂົ້ານະຄອນ.
ບັ້ນຮົບດ້ານການທະຫານໂດຍກອງທັບ ອີຣັກ ດຳເນີນຢູ່ ທິດຕາເວັນຕົກ Mosul ບໍ່ກຳນົດໄດ້ວັນສິ້ນສຸດເທື່ອ. ສິ່ງດັ່ງກ່າວສະແດງໃຫ້ເຫັນຄວາມສັນສົນ, ການຜັນແປຍາກທີ່ຈະຄາດຄະເນລ່ວງໜ້າໄດ້ຂອງບັ້ນຮົບຕ້ານ IS. ແຕ່ເຖິງຢ່າງໃດກໍ່ຕາມ, ດ້ວຍບັນດາທ່າໄດ້ປຽບພວມມີຢູ່ແລ້ວໃນສະໜາມຮົບຂອງກອງທັບອີຣັກ, ວັນທີ່ປະຊາຊົນ Mosul ຫລຸດຜົ້ນອອກຈາກການຄວບຄຸມຂອງ IS ແມ່ນບໍ່ໄກອີກ. ສິ່ງດັ່ງກ່າວກໍ່ໝາຍຄວາມວ່າບັ້ນຮົບຍຶດຄອງ Mosul ຄືນໃໝ່ ບັນລຸຜົນສຳເລັດ.