ໄລຍະມໍ່ໆມານີ້, ການທ່ອງທ່ຽວເພື່ອການກຸສົນ ແມ່ນຮູບແບບທ່ອງທ່ຽວໃໝ່ ອັນໄດ້ດຶງດູດຄວາມສົນໃຈຈາກບັນດາອົງການ, ສຳນັກງານ, ຫົວໜ່ວຍ, ສ່ວນບຸກຄົນເຂົ້າຮ່ວມຢ່າງຫຼວງຫຼາຍ ຍ້ອນລັດສະນະສັງຄົມ ແລະ ວັດທະນະທຳມະນຸດສູງ. ບໍ່ພຽງແຕ່ຜ່ານຜ່າໄລຍະທາງທີ່ຍາວໄກເພື່ອປ່ຽນບັນຍາກາດເທົ່ານັ້ນ, ການທ່ອງທ່ຽວເພື່ອການກຸສົນ ຍັງຊ່ວຍໃຫ້ແຂກທ່ອງທ່ຽວເຫັນໄດ້ເຖິງຄວາມໝາຍ ແລະ ຈຸດປະສົງອັນແທ້ຈິງຂອງການດຳລົງຊີວິດອີກດ້ວຍ.
ຮູບແບບການທ່ອງທ່ຽວປະສານສົມທົບກັບການເຄື່ອນໄຫວເພື່ອການກຸສົນໄດ້ສ້າງຜົນກະທົບຢ່າງຕັ້ງໜ້າໃນສັງຄົມ |
ການທ່ອງທ່ຽວເພື່ອການກຸສົນແມ່ນຖືກປະຕິບັດຢູ່ຕາມເຂດຫ່າງໄກສອກຫຼີກ, ແຫ່ງທີ່ປະຊາຊົນປະສົບກັບຄວາມຫຍຸ້ງຍາກຫຼາຍຢ່າງ. ກ່ອນທີ່ໄປທ່ອງທ່ຽວ, ແຂກທ່ອງທ່ຽວອາດຈະກະກຽມວັດຖຸເຄື່ອງຂອງເພື່ອເອົາໄປນຳເຊັ່ນ: ເຄື່ອງນຸ່ງຮົ່ມ, ປຶ້ມ, ອຸປະກອນການຮຽນ ເພື່ອເຮັດວຽກງານເພື່ອການກຸສົນໃຫ້ແກ່ປະຊາຊົນຢູ່ບ່ອນທີ່ເຂົາເຈົ້າຈະແວ່ຢາມ. ນອກຈາກການໄປຢ້ຽມຢາມຖາມຂ່າວ, ມອບຂອງຂວັນໃຫ້ແກ່ພໍ່ແມ່ພີນ້ອງບັນດາເຜົ່າຢູ່ເຂດພູດອຍແລ້ວ, ແຂກທ່ອງທ່ຽວທັງ ຫຼາຍຍັງຈະໄດ້ເຊື່ອມຕົວເຂົ້າກັບທຳມະຊາດທີ່ສວຍງາມຢູ່ຫຼາຍແຫ່ງ, ໄດ້ລົງມືເຮັດວຽກງານປະຈຳວັນຂອງຊາວທ້ອງຖິ່ນອີກດ້ວຍ. ທ່ານ ຝ້າມວູ້ຮ່ວາງ ຫົວໜ້າພະແນກສັງລວມ, ບໍລິສັດຄອມພິວເຕີ ໂທລະຄົມມະນາຄົມ ເມໂຈລີເມັກ ໃຫ້ຮູ້ວ່າ :
“ການທ່ອງທ່ຽວເພື່ອການກຸສົນໄດ້ຊ່ວຍອ້າຍເອື້ອຍນ້ອງໃນຄະນະນັກທ່ອງທ່ຽວ ໄດ້ເຂົາ້ຮ່ວມວຽກງານເພື່ອການກຸສົນ. ພ້ອມທັງເພີ່ມຄວາມຮູ້ ແລະ ມີການສັງເກດຕົວຈິງທີ່ດີກວ່າກ່ຽວກັບຊີວິດການເປັນຢູ່ທີ່ຫຍຸ້ງຍາກຂອງປະຊາຊົນຢູ່ເຂດຫ່າງໄກສອກຫຼີກ ”
ບໍລິສັດທ່ອງທ່ຽວ ຫວຽດຈານຕົວໃຫ້ຮູ້ວ່າ ຮູບແບບການທ່ອງທ່ຽວປະສານສົມທົບກັບການເຄື່ອນໄຫວເພື່ອການກຸສົນໄດ້ສ້າງຜົນກະທົບຢ່າງຕັ້ງໜ້າໃນສັງຄົມ, ອັນໄດ້ດຶງດູດຄວາມສົນໃຈຈາກບັນດາອົງການ, ສຳນັກງານ, ຫົວໜ່ວຍ, ສ່ວນບຸກຄົນເຂົ້າຮ່ວມຢ່າງຫຼວງຫຼາຍ. ເພາະສະນັ້ນ, ການທ່ອງທ່ຽວເພື່ອການກຸສົນແມ່ນໜຶ່ງໃນບັນດາຜະລິດຕະພັນທ່ອງທ່ຽວຄວນໄດ້ຮັບການຍຸ້ແຮງ. ທ່ານ ເລກົງນັງ ຫົວໜ້າພະແນກປະຊາສຳພັນ ບໍລິສັດທ່ອງທ່ຽວ ຫວຽດຈານຕົວໃຫ້ຮູ້ວ່າ:
“ ການພັດທະນາ ບັນດາຜະລິດຕະພັນທ່ອງທ່ຽວເພື່ອການກຸສົນ, ທ່ອງທ່ຽວເຂດຊຸມຊົນ ແມ່ນສອດຄ່ອງກັບທ່າອຽງພັດທະນາການທ່ອງທ່ຽວໃນໂລກ, ຕອບສະໜອງຄວາມຕ້ອງການຂອງແຂກທ່ອງທ່ຽວສາກົນທີ່ຢາກມາຊອກຮູ້ກ່ຽວກັບວັດທະນະທຳບັນດາເຜົ່າຫວຽດນາມ. ຮູບແບບທ່ອງທ່ຽວເພື່ອການກຸສົນຈະປະກອບສ່ວນຢ່າງຕັ້ງໜ້າໃຫ້ແກ່ການພັດທະນາວົງຄະນະຍາດຊຸມຊົນເວົ້າສະເພາະ ແລະ ພັດທະນາເສດຖະກິດສັງຄົມເວົ້າລວມ, ຍົກສູງລາຍຮັບໃຫ້ແກ່ປະຊາຊົນຜູ້ທຸກຍາກຢູ່ເຂດຫ່າງໄກສອກຫຼີກ ”
ສ່ວນ ບໍລິສັດທ່ອງທ່ຽວເບັນແທ່ງກໍໄດ້ມອບເຄື່ອງນຸ່ງ, ຜ້າຮົ່ມ, ອຸປະກອນການຮຽນ, ທຶນສຶກສາ, ສະບຽງອາຫານຢ່າງຫຼວງຫຼາຍໃຫ້ແກ່ນັກຮຽນທີ່ທຸກຍາກຢູ່ບັນດາແຂວງເຂດພູດອຍພາກເໜືອ. ທ່ານ ຫງວຽນຍືຮ້ຽວ ຮອງຫົວໜ້າບໍລິສັດທ່ອງທ່ຽວເບັນແທ່ງ ເວົ້າວ່າ :
“ ແຂກທ່ອງທ່ຽວຫຼາຍຄົນທີ່ເຂົ້າຮ່ວມການທ່ອງທ່ຽວເພື່ອການກຸສົນ ຕ່າງກໍພາກພູມໃຈທີ່ສຸດ ເພື່ອເຂົາເຈົ້າທັງໄດ້ໄປທ່ອງທ່ຽວ, ທັງໄດ້ລົງຕົວຈິງ. ຊ້ຳບໍໜຳ, ກໍມີແຂກທ່ອງທ່ຽວຫຼາຍຄົນຮູ້ສຶກມ່ວນຊື່ນ ແລະ ເຫັນໄດ້ຄວາມໝາຍ, ດັ່ງນັ້ນກໍຈົດຊື່ໄປຕໍ່. ພວກຂ້າພະເຈົ້າໄດ້ຈັດຕັ້ງການທ່ອງທ່ຽວເພື່ອການກຸສົນດ້ວຍລາຄາທີ່ເໝາະສົມເພື່ອໃຫ້ທຸກໆຄົນສາມາດຕອບສະໜອງໄດ້, ດັ່ງນັ້ນການທ່ອງທ່ຽວທຸກຄັ້ງກໍລ້ວນແຕ່ມີປະສິດທິຜົນ ”.