ຫວ່າງແລ້ວນີ້ ຜູ້ຊົມຫວຽດນາມຫາກໍໄດ້ຮັບຊົມການສະແດງລະຄອນຕຸກກະຕາໂດຍປະສານສົມທົບລະຫວ່າງນັກສິລະປີນຍີປຸ່ນ ແລະ ບັນດານັກສິລະປີນໂຮງລະຄອນໄວໜຸ່ມຂອງຫວຽດນາມ. ນັກສິລະປີນຂອງ 2 ປະເທດໄດ້ພ້ອມກັນເຂົ້າຮ່ວມ ການສະແດງລະຄອນຕຸກກະຕາທີ່ມີຊື່ວ່າ : “ ເປັດສະຫວັນຕິດສານພິດ ”. ດ້ວຍຫົວຄິດປະດິດສ້າງທີ່ຈັບໃຈ ແລະ ຄວາມໝາຍດ້ານວັດທະນະທຳມະນຸດທີ່ເລິກເຊິ່ງ, ບົດລະຄອນດັ່ງກ່າວໄດ້ຮັບການຕີລາຄາສູງຈາກມວນຊົນຜ່ານການສະແດງຢູ່ຫວຽດນາມໃນເວລາທີ່ຜ່ານມາ.
ລະຄອນຕຸກກະຕາ “ ເປັດສະຫວັນຕິດສານພິດ ” |
“ ເປັດສະຫວັນຕິດສານພິດ ” ໂດຍຜູ້ກຳກັບການສະແດງທີ່ມີຊື່ສຽງຊາວຍີປຸ່ນ Sakate Yoji ປະຕິບັດ ພ້ອມກັບການເຂົ້າຮ່ວມຂອງ ນັກສິລະປີນຍີປຸ່ນ ແລະ ບັນດານັກສິລະປີນໂຮງລະຄອນໄວໜຸ່ມຂອງຫວຽດນາມ. ບົດລະຄອນນີ້ໄດ້ຮັບການສະແດງໂດຍປະສານສົມທົບລະຫວ່າງມະນຸດກັບຕຸກກະຕາ, ລະຫວ່າງອະດີດຕະການ ແລະ ປະຈຸບັນ, ເປັນສານກ່າວປະນາມ ການທຳລາຍຂອງມະນຸດຕໍ່ທຳມະຊາດ, ຈາກສະພາບມົນລະພິດສິ່ງແວດລ້ອມຍ້ອນສານພິດຫຼາຍປະເພດຕະຫຼອດຮອດການລ່າສັດຢ່າງຊະຊາຍ. ຜູ້ກຳກັບການສະແດງ Sakate Yoji ເວົ້າວ່າ :
“ ຂ້າພະເຈົ້າເລືອກເອົາເລື່ອງລາວ “ ເປັດສະຫວັນ ” ເພາະນີ້ແມ່ນເລື່ອງລາວທີ່ເປັນໜ້າຈັບໃຈ, ພິເສດຕົວລະຄອນເອກ ຈີນາ ໃນບົດລະຄອນ ມີຄວາມແທດເໝາະກັບນັກສິລະປີນ ເລແຄງຂອງຫວຽດນາມ. ພ້ອມນັ້ນ, ນີ້ກໍເປັນຄັ້ງທຳອິດ ເວທີສະແດງລະຄອນຫວຽດນາມ ແລະ ເວທີສະແດງລະຄອນຕຸກກະຕາພື້ນເມືອງຍີປຸ່ນມີການຮ່ວມມືກັນເພື່ອສະເໜີບົດລະຄອນທີ່ເປັນເອກະລັກສະເພາະຕໍ່ຜູ້ຊົມ ”
“ ເປັດສະຫວັນຕິດສານພິດ ” ໄດ້ຮັບການສະແດງໂດຍການປະສານສົມທົບລະຫວ່າງນັກສິລະປີນຍີປຸ່ນ ແລະ ບັນດານັກສິລະປີນໂຮງລະຄອນໄວໜຸ່ມຂອງຫວຽດນາມ ດ້ວຍ 2 ພາສາຫວຽດນາມ ແລະ ຍີປຸ່ນ. ນີ້ແມ່ນໜຶ່ງໃນບັນດາການເຄື່ອນໄຫວຮ່ວມມືໃນຂອບເຂດການພົວພັນແລກປ່ຽນວັດທະນະທຳລະຫວ່າງຫວຽດນາມ ແລະ ຍີປຸ່ນ. ນັກສິລະປີນປະຊາຊົນຫວຽດນາມ ເລແຄງ ເວົ້າວ່າ :
“ ບົດລະຄອນຕົ້ນສະບັບແມ່ນມີຊື່ວ່າ : ການເຖິງແກ່ຄວາມຕາຍຂອງເປັດສະຫວັນ, ແຕ່ໃນວັນນີ້, ຜູ້ກຳກັບການສະແດງທີ່ມີຊື່ສຽງຊາວຍີປຸ່ນ Sakate Yoji ໄດ້ປ່ຽນຊື່ເປັນ : “ ເປັດສະຫວັນຕິດສານພິດ ” . ນີ້ບໍ່ແມ່ນບັນຫາສະເພາະຂອງ 2 ປະເທດເທົ່ານັ້ນ, ຫາກຍັງກາຍເປັນບັນຫາຂອງທົ່ວໂລກແລ້ວ ”
ເປັນຄັ້ງທຳອິດທີ່ໄດ້ຮັບຊົມການສະແດງລະຄອນຕຸກກະຕາທີ່ເປັນເອກະລັກສະເພາະ ໂດຍປະສານສົມທົບລະຫວ່າງນັກສິລະປີນຍີປຸ່ນ ແລະ ບັນດານັກສິລະປີນໂຮງລະຄອນໄວໜຸ່ມຂອງຫວຽດນາມ, ນາງມາຍທຸເຮືອງ ຜູ້ຊົມລະຄອນເປີດເຜີຍວ່າ :
“ ນີ້ເປັນຄັ້ງທຳອິດ ທີ່ໄດ້ຮັບຊົມການສະແດງລະຄອນຕຸກກະຕາຂອງຍີປຸ່ນ ແລະ ເຫັນວ່າ ມິຄວາມແຕກຕ່າງກັບລະຄອນຕຸກກະຕາຂອງຫວຽດນາມ. ຮູບພາບບົນເວທີສະແດງມີຄວາມອຸດົມສົມບູນກວ່າ, ນັກສະແດງກໍແມ່ນຜູ້ບັນຊາບັນດາຕົວ ລະຄອນຕຸກກະຕາທີ່ມີຄວາມໄຫວພິບ ແລະ ມີສີສັນຍຸກທັນສະໄໝ ”
“ ເປັດສະຫວັນຕິດສານພິດ ” ແມ່ນໜຶ່ງໃນບັນດາລະຄອນໄດ້ຮັບການສະແດງຢ່າງປະສົບຜົນສຳເລັດທີ່ສຸດຂອງໂຮງລະຄອນ ເອດໍ-ຢູກິຊາ ຂອງຍີປຸ່ນ. ພາຍຫຼັງສະແດງຮັບໃຊ້ຜູ້ຊົມຫວຽດນາມ ແລ້ວ, “ ເປັດສະຫວັນຕິດສານພິດ ” ຈະເຂົ້າ ຮ່ວມງານມະໂຫລານເວທີສະແດງສາກົນ ຊີບີຢູ ປະເທດຣູມານີ ໃນເດືອນ 6 ໜ້ານີ້.