(vovworld) - ໃນຊຸມວັນມໍ່ໆມານີ້, ຕອນຄຳ່ມື້ໃດຢູ່ໂຮງລະຄອນ ກາວວັນເຫຼົ່າ ໃນນະຄອນ ບາກລຽວ ກໍ່ມີຜູ້ມາຊົມຂັບລຳເລື່ອງ ໃນງານປະກວດລຳເລື່ອງອາຊີບທົ່ວປະເທດປີ 2015 ເປັນຈຳນວນຫຼວງຫຼາຍ. ສິ່ງພິເສດແມ່ນ, ເປັນຄັ້ງທຳອິດທີ່ຊາວ ບາກລຽວ ສ່ວນຫຼາຍໄດ້ຮັບຊົມລະຄອນລຳເລື່ອງໂດຍບັນດານັກສິລະປິນພາກເໜືອສະແດງໃນດິນແດນແຫ່ງລຳເລື່ອງທີ່ເປັນມູນເຊື້ອ. ຜ່ານບັນດາບົດລະຄອນລຳເລື່ອງ, ຜູ້ຊົມສາມາດເຂົ້າໃຈຕື່ມອີກກ່ຽວກັບຄວາມຮັກຂອງບັນດານັກສິລະປິນພາກເໜືອທີ່ມີຕໍ່ສິລະປະລຳເລື່ອງທີ່ເປັນມູນເຊື້ອຂອງພາກໃຕ້.
ໃນງານປະກວດລະຄອນລຳເລື່ອງອາຊີບທົ່ວປະເທດປີ 2015 ຄັ້ງນີ້, ສິ່ງທີ່ພາໃຫ້ຜູ້ຊົມບາກລຽວ ລໍຖ້າ ແລະ ສົນໃຈທີ່ສຸດ ນັ້ນແມ່ນບັນດາລະຄອນໂດຍຄະນະລຳເລື່ອງທີ່ມາຈາກພາກເໜືອສະແດງ. ເຂົາເຈົ້າຢາກຮູ້ກ່ຽວກັບສີສັນສະເພາະຂອງວັດທະນະທຳພາກເໜືອຜ່ານຮູບການສະແດງລຳເລື່ອງທີ່ເປັນມູນເຊື້ອຂອງພາກໃຕ້. ອ້າຍ ວືວລອງວີ້, ຜູ້ອຳນວຍການສູນກາງວັດທະນະທຳ ບາກລຽວ, ແບ່ງປັນວ່າ, ນີ້ແມ່ນເທື່ອທຳອິດທີ່ອ້າຍມີໂອກາດໄດ້ຮັບຊົມລາຍການສະແດງລຳເລື່ອງຂອງພາກເໜືອ. ເມື່ອຊົມບົດລະຄອນເຫຼົ່ານັ້ນ, ອ້າຍຮູ້ສຶກສະເທືອນໃຈ ແລະ ແປກປະຫຼາດທີ່ສຸດຕໍ່ລັກສະນະໃໝ່ອ່ຽມ, ລະອຽດລະອໍໃນການສະແດງຂອງບັນດານັກສິລິປິນພາກເໜືອ.
“ບັນດາຄະນະລຳເລື່ອງພາກເໜືອທີ່ເຂົ້າຮ່ວມງານປະກວດຄັ້ງນີ້ ລ້ວນແຕ່ມີການກະກຽມຢ່າງລອບຄອບຖີ່ຖ້ວນ. ໃນເບື້ອງຕົ້ນ, ຜູ້ຊົມແຂວງບາກລຽວມັກສົງໃສບໍ່ຮູ້ວ່າບັນດາບົດລະຄອນລຳເລື່ອງຂອງພາກເໜືອຈະສ້າງຄວາມດູດດື່ມໄດ້ຫຼືບໍ. ແຕ່ພາຍຫຼັງຮັບຊົມແລ້ວກໍ່ເຫັນວ່າລະຄອນລຳເລື່ອງຂອງພາກເໜືອໄດ້ສ້າງຄວາມດູດດື່ມທີ່ສຸດໃຫ້ແກ່ຜູ້ຊົມ“.
ໃນຈຳນວນບົດລະຄອນທີ່ເຂົ້າຮ່ວມງານປະກວດຂອງບັນດາຄະນະລຳເລື່ອງພາກເໜືອ, ຕ້ອງເວົ້າເຖິງລະຄອນ “ມາຍຮັກແດ໋“ ຂອງໂຮງລະຄອນລຳເລື່ອງຫວຽດນາມ. ນີ້ແມ່ນລະຄອນທີ່ໄດ້ຮັບການຕີລາຄາຈາກຜູ້ຊົມວ່າມີການລົງທຶນຢ່າງຫຼວງຫຼາຍ, ພິເສດແມ່ນໄດ້ສ້າງຄວາມປະທັບໃຈໃຫ້ຜູ້ຊົມທີ່ສຸດ ເມື່ອນຳໃຊ້ເຕັກນິກທີ່ທັນສະໄໝ, ເຮັດໃຫ້ເວທີສະແດງສວຍງາມ, ມີຊີວິດຊີວາກວ່າ ແລະ ສ້າງພະລັງຊີວິດໃໝ່ໃຫ້ແກ່ສິລະປະລຳເລື່ອງພື້ນເມືອງ.
ບົດລະຄອນວາດພາບຮູບພາບຕົວລະຄອນປະຫວັດສາດ ມາຍທຸກລວານ ຜ່ານການສະແດງຂອງບັນດານັກສິລະປິນລຳເລື່ອງພາກເໜືອ, ເຮັດໃຫ້ບຸກຄະລິກພາບຂອງວິລະຊົນຜູ້ໜຶ່ງໃນສະໄໝຕໍ່ສູ້ຕ້ານສັດຕູຕ່າງດ້າວເມື່ອກ່ອນນີ້ພົ້ນເດັ່ນຂຶ້ນ. ທ່ານ ຈ້ຽວຈູງກຽນ, ຮອງຜູ້ອຳນວຍການໂຮງລະຄອນລຳເລື່ອງຫວຽດນາມ, ໃຫ້ຮູ້ວ່າ:
“ອາດເວົ້າໄດ້ວ່າ, ນີ້ແມ່ນລະຄອນທີ່ໄດ້ຮັບການລົງທຶນຢ່າງລອບຄອບທີ່ສຸດນັບແຕ່ກ່ອນມານີ້ຂອງໂຮງລະຄອນລຳເລື່ອງຫວຽດນາມ ດ້ວຍຈີນຕະນາການພະຍາຍາມເຮັດໃຫ້ບົດລະຄອນປະຫວັດສາດມີພະລັງຊີວິດໃໝ່ຂອງຍຸກປະຈຸບັນ, ຜ່ານນັ້ນຮຽກຮ້ອງໃຫ້ມີຄວາມມະຫາສາມັກຄີທົ່ວປວງຊົນທັງຊາດ, ເພື່ອປົກປັກຮັກສາອະທິປະໄຕຂອງຊາດໄວ້ຢ່າງໝັ້ນຄົງ. ບົດລະຄອນນນຳໃຊ້ບັນດາອຸປະກອນທີ່ທັນສະໄໝ, ສ້າງຄວາມດຶງດູດໃຫ້ແກ່ຜູ້ຊົມ“.
ຕາມບັນດານັກສິລະປິນລຳເລື່ອງພາກໃຕ້ແລ້ວ, ບັນດາຄະນະລຳເລື່ອງມາຈາກພາກເໜືອ ມີວິທີສະແດງແຕກຕ່າງກັບພາກໃຕ້, ມີລະຄອນດີເດັ່ນຫຼາຍເລື່ອງ, ໃກ້ຊິດຕິດແທດກັບຊີວິດປະຈຳວັນເຊັ່ນບົດລະຄອນ “ບັນດາຜູ້ເປັນລູກແທກແທ່ງໃນເມື່ອກ່ອນ“, ຂອງຄະນະລຳເລື່ອງແຂວງແທງຮ໋ວາ, ລະຄອນ “ທາງແຂ່ງຂັນໃນເງົາມືດ“ ຂອງຄະນະລຳເລື່ອງແຂວງ ທ໋າຍບິ່ງ, ລະຄອນ “ຮັກແມ່ນພົ້ນອອກຈາກໂທດ“ ຂອງໂຮງລະຄອນລຳເລື່ອງ ຮ່າໂນ້ຍ.
ຈຸດທີ່ພົ້ນເດັ່ນຂອງງານປະກວດລະຄອນລຳເລື່ອງອາຊີບທົ່ວປະເທດຄັ້ງນີ້ແມ່ນເລື່ອງຄະນະຈັດຕັ້ງໄດ້ສ້າງເງື່ອນໄຂໃຫ້ບັນດາຄະນະລຳເລື່ອງພາກເໜືອໄປສະແດງຮັບໃຊ້ພໍ່ແມ່ປະຊາຊົນຢູ່ 5 ເມືອງຂອງ ບາກລຽວ. ການສະແດງໄດ້ສ້າງຄວາມປະທັບໃຈອັນດີງາມໃຫ້ປະຊາຊົນ ແລະ ບັນດານັກສິລະປິນທີ່ມາຈາກພາກເໜືອ. ນັກສິລະປິນດີເດັ່ນ ຫງວຽນດັງຕ່ວານ, ຫົວໜ້າຄະນະລຳເລື່ອງຫາຍຝ່ອງ, ແບ່ງປັນວ່າ:
“ຜູ້ຊົມ ບາກລຽວ ໄດ້ຕ້ອນຮັບບັນດາຄະນະລຳເລື່ອງພາກເໜືອຢ່າງສຸດຈິດສຸດໃຈ ແລະ ອົບອຸ່ນ, ສ້າງຄວາມປະທັບໃຈອັນດີງາມທີ່ສຸດໃຫ້ແກ່ນັກສິລະປິນພວກຂ້າພະເຈົ້າ. ມີບາງຄົນບໍ່ໄດ້ຊົມລຳເລື່ອງພາກເໜືອຈັກເທື່ອ, ເຂົາເຈົ້າສົນໃຈບໍ່ຮູ້ວ່າລຳເລື່ອງພາກເຫນືອແມ່ນຄືແນວໃດ, ແຕ່ສຸດທ້າຍຜູ້ຊົມໄດ້ຕົມມືຍ້ອງຍໍຊົມເຊີຍພວກຂ້າພະເຈົ້າຢ່າງຫຼວງຫຼາຍ“
ດ້ວຍຄວາມເມົາມົວທີ່ສະຫງວນໃຫ້ສິລະປະລຳເລື່ອງ, ບັນດານັກສິລະປິນທີ່ມາຈາກພາກເໜືອໄດ້ອຸທິດບັນດາລະຄອນທີ່ມີຄຸນນະພາບ, ເຂັ້ມຄົ້ນໄປດ້ວຍລັກສະນະສິລະປະ ແລະ ຄວາມສະເທືອນໃຈໃຫ້ແກ່ຜູ້ຊົມບາກລຽວ. ບັນດາລະຄອນຂອງຄະນະລຳເລື່ອງພາກເໜືອເວົ້າສະເພາະ ແລະ ບັນດາຄະນະສິລະປະທີ່ເຂົ້າຮ່ວມງານປະກວດເວົ້າລວມ ໄດ້ສ້າງພະລັງຊີວິດໃໝ່ໃຫ້ແກ່ລຳເລື່ອງພື້ນເມືອງ, ເຮັດໃຫ້ສິລະປະປະເພດນີ້ໃກ້ຊິດກັບຜູ້ຊົມຢູ່ທຸກເຂດພາກໃນຍຸກປະຈຸບັນກວ່າ.