ຊາວໜຸ່ມ, ນັກສຶກສາຫວຽດນາມຕັດສິນໃຈປົກປັກຮັກສາ ອະທິປະໄຕເຂດທະເລໝູ່ເກາະຂອງປະເທດຊາດ
|
ໃນກາງເດືອນ 5 ທີ່ຜ່ານມາ, ນັກສຶກສາ 900 ຄົນທີ່ມາຈາກບັນດາມະຫາ ວິທະຍາໄລໃນທົ່ວປະເທດ ໄດ້ພ້ອມກັນເຂົ້າຮ່ວມບັນດາເຫດການທີ່ດຳເນີນຢູ່ເກາະຟູ້ກວ໋ກ ແລະ ເກາະ ໂຖຈູ ຊຶ່ງຂຶ້ນກັບ ແຂວງກຽນຢາງ ໃນຂອບເຂດ ລາຍການ “ ນັກສຶກສາກັບເຂດທະເລໝູ່ເກາະຂອງປະເທດຊາດຫວຽດນາມປີ 2014”. ການເຂົ້າຮ່ວມພິທີເລີ່ມລົງມືກໍ່ສ້າງເສົາທຸງຊາດຢູ່ ເກາະ ໂຖຈູ, ໄປທັດສະນະສຶກສາຢູ່ບັນດາສະຖານທີ່ປະຫວັດສາດ, ເຂົ້າຮ່ວມບັນດາການເຄື່ອນໄຫວອາສາສະໝັກເພື່ອວົງຄະນະຍາດ...ໄດ້ກາຍເປັນບັນດາອະນຸສອນອັນດີງາມສຳລັບແຕ່ລະຄົນ. ບໍ່ພຽງແຕ່ເຊັ່ນນັ້ນ, ນ້ຳໃຈຮັກຊາດ, ຮັກໝູ່ເກາະທະເລບ້ານເກີດເມືອງນອນຂອງນັກສຶກສາແຕ່ລະຄົນໄດ້ຮັບການປຸກລຸກ, ຈາກນັ້ນແຕ່ລະຄົນຍິ່ງເພີ່ມສະຕິຄວາມຮັບຮູ້ໃນການປົກປັກຮັກສາອະທິປະໄຕ ເຂດທະເລໝູ່ເກາະຂອງປະເທດຊາດ .
ກຳປັ່ນຄວາມໄວສູງ Supperdong ໄດ້ເລີ່ມເດີນທະເລຈາກທ່າກຳປັ່ນ ແຣກຢ້າ ບັນທຸກນັກສຶກສາ 900 ຄົນໄປຍັງເກາະຟູ້ກວ໋ກ, ຊຶ່ງແມ່ນແຫ່ງດຳເນີນລາຍການ “ນັກສຶກສາກັບເຂດທະເລໝູ່ເກາະຂອງປະເທດຊາດຫວຽດນາມປີ 2014”. ແຕ່ລະຄົນຕ່າງກໍມີຄວາມນຶກຄິດຕ່າງຫາກ, ແຕ່ລ້ວນແຕ່ມີຄວາມຕື້ນຕັນໃຈເຊັ່ນກັນ. ນັກສຶກສາ ຫງວຽນຫວຽດຈາງ ສັງກັດມະຫາວິທະຍາໄລຄົມມະນາຄົມຂົນສົ່ງຮ່າໂນ້ຍເປີດເຜີຍວ່າ :
“ ນ້ອງຮູ້ສຶກມ່ວນຫຼາຍ, ນີ້ແມ່ນກາລະໂອກາດເພື່ອໃຫ້ພວກນ້ອງໄດ້ພົບປະໂດຍກົງ, ປະກອບເຫືອ່ແຮງຂອງຕົນບໍ່ຫຼາຍກໍໜ້ອຍເພື່ອກໍ່ສ້າງເຂດທະເລໝູ່ເກາະຂອງປະເທດຊາດໃຫ້ນັບມື້ນັບໝັ້ນຄົງເຂັ້ມແຂງ”
ລາຍການ“ ນັກສຶກສາກັບເຂດທະເລໝູ່ເກາະຂອງປະເທດຊາດຫວຽດນາມປີ 2014” ດ້ວຍຫົວເລື່ອງ “ ຄວາມເອກອ້າງທະນົງໃຈເຂດທະເລໝູ່ເກາະຂອງປະເທດຊາດ” ໂດຍສູນໜູນຊ່ວຍ ແລະ ພັດທະນານັກສຶກສາຫວຽດນາມເປັນຜູ້ປຸກລະດົມ. ຜ່ານການຈັດຕັ້ງຫຼາຍຄັ້ງ, ບັນດາເພື່ອນໜຸ່ມທີ່ເຂົ້າຮ່ວມລາຍການໄດ້ສ້າງຫຼາຍກິດຈະການເຄື່ອນໄຫວຊາວໜຸ່ມທີ່ມີຄວາມໝາຍເພື່ອມຸ່ງໄປສູ່ເຂດທະເລໝູ່ເກາະພ້ອມທັງຢັ້ງຢືນອະທິປະໄຕເຂດທະເລໝູ່ເກາະຂອງປະເທດຊາດຢູ່ທະເລຕາເວັນອອກ. ທ່ານ ຫງວຽນມິນຈຽດ ຜູ້ອຳນວຍການ ສູນໜູນຊ່ວຍ ແລະ ພັດທະນານັກສຶກສາຫວຽດນາມ ໃຫ້ຮູ້ວ່າ :
“ ແຕ່ລະແຫ່ງທີ່ນັກສຶກສາຫວຽດນາມມາເຄື່ອນໄຫວ ກໍລ້ວນແຕ່ມີຈຸດພິເສດສະເພາະ. ເນື້ອໃນຂອງລາຍການ ແມ່ນມຸ່ງໄປສູ່ເຂດທະເລໝູ່ເກາະ ແລະ ດ້ວຍການກຳນົດທິດນັກສຶກສາຫວຽດນາມອອກສູ່ເຂດທະເລໝູ່ເກາະນັ້ນ, ກໍລ້ວນແຕ່ມີຜະລິດຕະພັນເພື່ອຢັ້ງຢືນອະທິປະໄຕຢູ່ທີ່ນັ້ນ.”
ໃນຊຸມມື້ດຳເນີນງານຕັ້ງຄ້າຍນັກສຶກສາຢູ່ເກາະຟູ້ກວ໋ກ, ພວກເພື່ອນນັກສຶກສາໄດ້ພົບປະແລກປ່ຽນກັບບັນດາອະດີດນັກໂທດເກາະຟູ້ກວ໋ກ, ໄດ້ຮັບຟັງເລື່ອງລາວປະຫວັດສາດ, ເຂົ້າຮ່ວມການເຄື່ອນໄຫວຕ່າງໆ...ນັກສຶກສາ ກີງຖິວຈາງ ສັງກັດມະຫາວິທະຍາໄລກົດໝາຍຮ່າໂນ້ຍ ໃຫ້ຮູ້ວ່າ :
“ ນ້ອງເອງແມ່ນນັກສຶກສາ, ນ້ອງຄິດວ່ານັກສຶກສາຄວນມີໜ້າທີ່ຮັບຜິດຊອບສ້າງສາປະເທດຊາດດ້ວຍວິທີສູ້ຊົນຮ່ຳຮຽນ, ເຂົ້າຮ່ວມບັນດາໂຄງການ, ແຜນງານເພື່ອພັດທະນາເຂດທະເລໝູ່ເກາະ ”
ສ່ວນນັກສຶກສາ ເລອານຮິ້ວ ສັງກັດມະຫາວິທະຍາໄລເສດຖະກິດນະຄອນໂຮ່ຈິມິນໃຫ້ຮູ້ວ່າ :
“ ເມື່ອມາຮອດເກາະຟູ້ກວ໋ກ, ນ້ອງເຫັນວ່າ ເຂດທະເລໝູ່ເກາະຂອງປະເທດຫວຽດນາມແມ່ນສວຍສົດງົດງາມທີ່ສຸດ. ມາເກາະຟູ້ກວ໋ກຄັ້ງນີ້, ກອງນັກສຶກສານະຄອນໂຮຈິມິນ ໄດ້ນຳມາຍັງເກາະ ບັນດາຮູບແບບ, ບັນດາວິທີການແກ້ໄຂຢ່າງມີຫົວຄິດປະດິດສ້າງໃນການພັດທະນາເຂດທະເລໝູ່ເກາະ; ພ້ອມກັນນັ້ນ ກໍສະແດງໃຫ້ເຫັນນ້ຳໃຈຮັກຊາດ, ຮັກຫອມສັນຕິພາບ ແລະ ນ້ຳໃຈເດັດດຽວປົກປັກຮັກສາອະທິປະໄຕຜືນແຜ່ນດິນອັນຄົບຖ້ວນຂອງປະເທດຊາດ” .