(vovworld) - ເຖິງວ່າປະກົດມີບໍ່ດົນປານໃດກໍ່ຕາມ, ແຕ່ບັນດາບໍລິເວນປະດິດສ້າງທີ່ໄດ້ຮັບການສ້າງຕັ້ງໃນ 5 ປີມານີ້ຢູ່ ຫວຽດນາມເຊັ່ນ: Hanoi Creative City, Heritage Space, Hanoi Rock City, ເຮືອນຮ້ານ Colletive, ສະຖານີ 3A... ໄດ້ກາຍເປັນ “ຈຸດນັດພົບ“ ຂອງບັນດານັກສິລະປິນ, ແມ່ນແຫ່ງເຕົ້າໂຮມ ແລະ ແນະນຳບັນດາແນວຄວາມຄິດໃໝ່, ນຳເອົາສິນລະປະມາໃກ້ກັບສາທາລະນະຊົນກວ່າ. ໃນລາຍການສາລະຄະດີວັນເສົາມື້ນີ້, ເຊີນທ່ານຮັບຟັງບົດຂຽນຂອງນັກຂ່າວ ເຟືອງຖູຍ ທີ່ມີຫົວຂໍ້ວ່າ “ບໍລິເວນປະດິດສ້າງ - ແຫ່ງໜູນຊ່ວຍຄວາມໄຝ່ຝັນເຮັດວຽກງານສິລະປະ“.
ບໍລິເວນປະດິດສ້າງ - ແຫ່ງໜູນຊ່ວຍຄວາມໄຝ່ຝັນເຮັດວຽກງານສິລະປະ
(ພາບ: PhuongThuy)
ເທບສຽງປະກອບ
ນີ້ແມ່ນລາຍການສິລະປະຕາມທ້ອງຖະໜົນທຳອິດ (street Art Fair) ທີ່ຫາກໍ່ດຳເນີນຢູ່ ຮ່າໂນ້ຍຫວ່າງແລ້ວນີ້. ເຊິ່ງລວມມີບັນດາການເຄື່ອນໄຫວແຕ້ມພາບ, ປັ້ນຮູບ, ສະແດງດົນຕີ, ອັນໄດ້ສ້າງຄວາມໃກ້ຊິດລະຫວ່າງນັກສິລະປິນກັບຜູ້ຊົມ, ຢູ່ເຂດວາງສະແດງ, ບັນດາຈິດຕະກອນໄດ້ແຕ້ມໂດຍກົງ ແລະ ວາງສະແດງບັນດາພາບແຕ້ມຢູ່ບໍລິເວນປະດິດສ້າງ Hanoi Creative City, ສ່ວນຜູ້ຊົມທັງໄດ້ຮັບຊົມພາບແຕ້ມ, ທັງສາມາດສະເໜີຈິດຕະກອນແຕ້ມຕາມຄວາມຕ້ອງການຂອງຕົນ. ຈິດຕະກອນ ເຟືອງວູແມ້ງ, ໃຫ້ຮູ້ວ່າ: ໃນເດືອນ 5 ຈະມາເຖິງ, ຢູ່ Hanoi Creative City ຈະສືບຕໍ່ຈັດລາຍການສິລະປະຢູ່ກາງແຈ້ງລາຍການທີສອງອີກ.
“ພວກຂ້າພະເຈົ້າຢາກຈັດລາຍການສິລະປະທີ່ເປັນເອກະລັກສະເພາະ. ດັ່ງນັ້ນຈຶ່ງເລືອກເຟັ້ນເຂດຕຶກອາຄານ Hanoi Creative City, ເພາະວ່າເມື່ອຈັດລາຍການຢູ່ທີ່ນີ້, ແຂກມາຊົມຈະບໍ່ສົ່ງຜົນສະທ້ອນເຖິງການຄົມມະນາຄົມ. ຖ້າຈັດຢູ່ຕາມຖະໜົນຈະຕ້ອງຂໍໜັງສືອະນຸຍາດ.“
ສ່ວນຢູ່ບໍລິເວນປະດິດສ້າງ Heritage Space, ບົນຖະໜົນ ເຈິ່ນບິ່ງ, ຮ່າໂນ້ຍ, ສາທາລະນະຊົນໄດ້ຮັບຊົມລາຍການສະແດງບົດປະພັນດົນຕີໃໝ່ທີ່ມີຊື່ວ່າ“ໂລກແຫ່ງຄວາມເປົ່າປ່ຽວ“ ຂອງນັກດົນຕີ ຫວູເຍິດເຕິນ. ນີ້ແມ່ນບົດດົນຕີປະສານສຽງລະຫວ່າງດົນຕີເອເລັກໂຕນິກ, ປີອາໂນ, ແລະ ດົນຕີພື້ນເມືອງ. ເພື່ອສະແດງບັນດາບົດປະພັນດົນຕີຂອງຕົນເປັນປະຈຳ, ນັກດົນຕີ ຫວູເຍິດເຕິນ, ໃຫ້ຮູ້ວ່າ:
“ນີ້ແມ່ນບົດປະພັນດົນຕີທີ່ຂ້າພະເຈົ້າແຕ່ງຕາມຄວາມຕ້ອງການຂອງລາຍການທີ່ສະແດງໃນບໍລິເວນກວ້າງ 600 ຕາແມັດ. ຍ້ອນບໍລິເວນກວ້າງທີ່ສຸດ, ພວກຂ້າພະເຈົ້າຈຶ່ງຕ້ອງພະຍາຍາມເຝິກແອບຕະຫຼອດເພື່ອໃຫ້ລາຍການດົນຕີເໝາະສົມກັບບໍລິເວນນີ້“.
ຢູ່ຫວຽດນາມ, ໃນ 10 ປີມານີ້, ຄຽງຂ້າງບັນດາສູນວັດທະນະທຳຕ່າງປະເທດ, ທີ່ຖືຈຸດໝາຍພົບປະແລກປ່ຽນ ແລະ ແນະນຳວັດທະນະທຳເປັນຕົ້ນນັ້ນ, ບັນດາສູນສິລະປະຍຸກປະຈຸບັນເຊັ່ນ: Hanoi Creative City, ເຮືອນຮ້ານ Colletive, ສູນ Art ຢູ່ນະຄອນ ໂຮ່ຈີມິນ... ກໍ່ໄດ້ຮັບຖືວ່າແມ່ນບໍລິເວນປະດິດສ້າງ ແລະ ຊົມໃຊ້ວັດທະນະທຳໃໝ່. Heritage Space, ໄດ້ຮັບການສ້າງຕັ້ງຢ່າງເປັນທາງການແຕ່ເດືອນ 3/2016, ດ້ວຍຄວາມປາຖະໜາຢາກກາຍເປັນສູນເຄື່ອນໄຫວສິລະປະເຊັ່ນ: ສະແດງສິລະປະ, ວາງສະແດງ, ສຶກສາ, ແລກປ່ຽນກ່ຽວກັບສິລະປະ ປະດິດຮູບ, ດົນຕີ ແລະ ສະຖາປັດຕະຍະກຳ, ເຕົ້າໂຮມ ແລະ ໜູນຊ່ວຍບັນດາກຸ່ມປະດິດສ້າງໃໝ່... ນັກສະຖາປະນິກ ດ່ວານກີ່ແທງ, ຜູ້ອຳນວຍການສູນປະດິດສ້າງ Hanoi Creative City, ໃຫ້ຮູ້ວ່າ:
“ສູນປະດິດສ້າງມີ 3 ປັດໃຈພື້ນຖານ: ທີ່ໜຶ່ງແມ່ນພື້ນຖານດ້ານວັດຖຸ, ໂຄງລ່າງ, ທີສອງແມ່ນເນື້ອໃນບັນດາລາຍການເຄື່ອນໄຫວ ແລະ ທີສາມແມ່ນການສ້າງປະຊາຄົມ. ມັນຈະນຳເອົາອາຫານດ້ານຈິດໃຈມາໃຫ້ປະຊາຊົນ. ຄວາມຈິງ, ຮ່າໂນ້ຍຕ້ອງການສູນຄືແນວນີ້ຫຼາຍ“.
ທ່ານ ຫງວຽນແອງຕ໋ວນ, ຜູ້ອຳນວຍການຝ່າຍບໍລິຫານສູນ Heritage Space, ຖືວ່າ, ການສ້າງຕັ້ງບັນດາສູນປະດິດສ້າງ ຈະປະກອບສ່ວນຊຸກຍູ້ການພັດທະນາຂະແໜງອຸດສາຫະກຳວັດທະນະທຳໃນອະນາຄົດ.
“ເມື່ອມີຫໍພິພິດຕະພັນສິລະປະຍຸກປະຈຸບັນ, ຫຼືມີສູນສິລະປະ, ຜູ້ຄົນທັງຫຼາຍຈະເຂົ້າໃຈວ່າ, ນະຄອນນັ້ນ, ສະຖານທີ່ນັ້ນໄດ້ສົ່ງເສີມການພັດທະນາບັນດາຄຸນຄ່າໃໝ່, ສົ່ງເສີມການປະດິດສ້າງ, ຮັບຮູ້ການອຸທິດສ່ວນຂອງຫຼາຍຄົນ, ຫຼາຍພື້ນຖານວັດທະນະທຳທີ່ແຕກຕ່າງກັນ“.
ການສ້າງຕັ້ງບັນດາສູນປະດິດສ້າງຢູ່ຫວຽດນາມພວມຢູ່ໃນໄລຍະຕົ້ນ, ດັ່ງນັ້ນມັນຈະຂຶ້ນກັບຂໍ້ລິເລີ່ມຂອງນັກສິລະປິນ ແລະ ນັກລົງທຶນຫຼາຍ. ເພື່ອກາຍເປັນສູນປະດິດສ້າງໃຫ້ຖືກກັບຄວາມໝາຍ, ບັນດາສູນນີ້ພວມມີບັນດາຮູບແບບເຄື່ອນໄຫວຕາມທ່າອ່ຽງແຫ່ງການເຊື່ອມໂຍງ.