(vovworld)- ງານຕະຫລາດນັດປື້ມເກົ່າເປັນຄັ້ງທຳອິດຖືກຈັດຂຶ້ນຢູ່ຮ່າໂນ້ຍ ໄດ້ດຶງດູດຜູ້ອ່ານມາຢ້ຽມຊົມເປັນຈຳນວນຫລວງຫລາຍ. ບໍ່ພຽງແຕ່ເຊີດຊູ ແລະ ສົ່ງເສີມວັດທະນະທຳການອ່ານເທົ່ານັ້ນ, ງານຕະຫລາດນັດປື້ມເກົ່າ ຍັງນຳມາໃຫ້ຜູ້ອ່ານຄວາມຮູ້ສຶກຫລາຍຢ່າງຈາກບັນດາປື້ມເກົ່າອີກດ້ວຍ.
ບັນດາປື້ມທີ່ນຳມາຂາຍຢູ່ງານຕະຫລາດນັດຄັ້ງນີ້ ເຖິງວ່າຖືກເກົ່າແກ່, ຫນ້າປົກເປ່ເພແລ້ວກໍຕາມ, ແຕ່ຜູ້ອ່ານຫລາຍຄົນກໍຢາກເລືອກອ່ານ, ເພາະວ່າ ປື້ມເຫລົ່ານັ້ນລ້ວນແຕ່ແມ່ນປື້ມໃຫມ່ສຳລັບຜູ້ທີ່ບໍ່ເຄີຍໄດ້ອ່ານຈັກເທື່ອ.
ມີຊາວຫນຸ່ມຫລາຍຄົນມາຊົມແລະຊື້ປຶ້ມເກົ່າ
ພາບ:vtv.vn
|
ຈຳນວນປື້ມທີ່ນຳມາຂາຍໃນງານຕະຫລາດນັດຄັ້ງນີ້ ສ່ວນຫລາຍແມ່ນສະຫງວນໃຫ້ແກ່ຜູ້ມັກອ່ານ ແລະ ມັກປື້ມເກົ່າ. ມີປື້ມເກົ່າຫລາຍປະເພດ, ໃນນັ້ນ ປື້ມວັນນະຄະດີ, ປະຫວັດສາດ ແລະ ວິທະຍາສາດເຕັກນິກ ຖືກພິມຈຳຫນ່າຍດ້ວຍເຈ້ຍດຳ. ໃນນັ້ນ ມີປື້ມບາງຫົວແມ່ນໄດ້ພິມຈຳຫນ່າຍໃນຊຸມປີ 1950 -1990 ຂອງສັດຕະວັດທີ 20. ສະນັ້ນ ໄດ້ດຶງດູດຜູ້ອ່ານມາຊື້ເປັນຈຳນວນຫລວງຫລາຍ. ອ້າຍ ຫງວຽນກີ, ຜູ້ມັກອ່ານ ແລະ ສະສົມປື້ມເກົ່າ ໃຫ້ຮູ້ວ່າ: ປື້ມເກົ່າແຕ່ນຳມາເຊິ່ງຄວາມຮູ້ສຶກພິເສດ.
“ຜູ້ມັກອ່ານກໍຄືຜູ້ສົນໃຈເຖິງພູມປັນຍາສ່ວນຫລາຍແມ່ນມັກປື້ມເກົ່າ. ພິເສດແມ່ນບັນດາຫົວຊື່ງບໍ່ມີໂອກາດພິມຈຳຫນ່າຍຄືນໃຫມ່, ສະນັ້ນ ງານຕະຫລາດນັດຄັ້ງນີ້ ແມ່ນຕອບສະຫນອງຄວາມມຸ່ງມາດປາດຖະຫນາຂອງບັນດາຜູ້ອ່ານເຫລົ່ານັ້ນ. ມານີ້ ເຂົາເຈົ້າຊອກໄດ້ບັນດາປື້ມທີ່ບໍ່ເຄີຍເຫັນຈັກເທື່ອ. ທີສອງ ແມ່ນປຸກລຸກນ້ຳໃຈອ່ານປື້ມໃຫ້ແກ່ຫລາຍຄົນ, ພິເສດແມ່ນຜູ້ທີ່ຢາກເພີ່ມພູມປັນຍາໃຫ້ແກ່ຕົນເອງ.”
ມີປື້ມຫລາຍຫົວພິມຈຳຫນ່າຍແຕ່ທົດສະວັດທີ 50
ພາບ:vov
|
ບັນດາຜູ້ອ່ານມາງານຕະຫລາດນັດປື້ມເກົ່ານີ້ ເຄີຍຊອກປື້ມທີ່ໄດ້ພິມຈຳຫນ່າຍແຕ່ທົດສະວັດທີ 50,60 ແລະ 70. ຕາມນາງ ຟານທິເວີນແອງ, ຊື້ປື້ມຫົວນີ້ເພື່ອຢາກເຫັນປະຈັກຕາວິທີປະດັບປະດາຫນ້າປົກ, ການຂຽນທວາຍ, ວິທີແນະນຳໃນປື້ມໃນໄລຍະກ່ອນ. ພິເສດ ແມ່ນເຂົ້າໃຈໄດ້ທັດສະນະ, ເນື້ອໃນຂອງປື້ມໃນໄລຍະກ່ອນນີ້ເມື່ອທຽບໃສ່ໄລຍະປະຈຸບັນຄືແນວໃດ.
“ຂ້າພະເຈົ້າເຫັນວ່າ ປື້ມເກົ່າ ມີຈຸດວັດທະນະທຳສະເພາະ, ຄຸນຄ່າສະເພາະ. ປື້ມເກົ່າຈະບໍ່ໄດ້ພິມຈຳຫນ່າຍຄືນໃຫມ່, ມັນມີລັກສະນະປະຫວັດສາດ, ບັນດາຜູ້ມັກຄົ້ນຄ້ວາແມ່ນຕ້ອງການທີ່ສຸດ. ການອອກແບບເກົ່າ, ວິທີພິມຈຳຫນ່າຍເກົ່າ ມັນນຳມາເຊິ່ງໃຫ້ຜູ້ອ່ານຄວາມຮູ້ສຶກຫລາຍຢ່າງກວ່າ.”
ຈຸດແຕກຕ່າງໃນງານຕະຫລາດນັດປື້ມເກົ່າ ນັ້ນແມ່ນ ປື້ມຂາຍຖືກລາຄາ. ຜູ້ຂາຍ ແລະ ຜູ້ຊື້ບໍ່ມີການຕໍ່ລາຄາ. ປື້ມເກົ່າບໍ່ມີລາຄາຕິດຢູ່ຫນ້າປົກ ພຽງແຕ່ກຳນົດລາຄາຕາມຄວາມເຂົ້າໃຈຂອງຜູ້ຂາຍ ແລະ ຜູ້ຊື້ເທົ່ານັ້ນ. ບັນດາຜູ້ຂາຍປື້ມເກົ່າ ສ່ວນຫລາຍແມ່ນຜູ້ມັກອ່ານ ແລະ ມັກປື້ມເກົ່າ. ອ້າຍ ຫງວຽນວັນເຫີບ, ຜູ້ມັກປື້ມເກົ່າ ແລະ ກໍເປັນຜູ້ມີຮ້ານຂາຍປື້ມຢູ່ທີ່ນີ້ໃຫ້ຮູ້ວ່າ:
“ພວກຂ້າພະເຈົ້າແມ່ນຜູ້ມັກອ່ານປື້ມຢາກແບ່ງປັນກັບພວກເພື່ອນນິຍົມປື້ມ. ງານຕະຫລາດນັດປື້ມຄັ້ງນີ້ ເພື່ອສົ່ງເສີມທຸກຄົນຄວນຊອກຄືນວັດທະນະທຳພື້ນເມືອງຂອງຄົນລຸ້ນກ່ອນ. ເຖິງວ່າ ປື້ມເຫົຼ່ານັ້ນ ຖືກພິມຈຳຫນ່າຍໃນເງື່ອນໄຂຫຍຸ້ງຍາກທີ່ສຸດ, ແຕ່ເນື້ອໃນແມ່ນອຸດົມສົມບູນ, ມີຄວາມໝາຍແທ້ຈິງ. ຂ້າພະເຈົ້າກໍໄດ້ຊ່ວຍໃຫ້ຫລາຍຄົນກັບຄືນຄາວເຍົາໄວຜ່ານບັນດາປື້ມເກົ່າ”
ເຖິງວ່າໄລຍະເວລາໄດ້ເຮັດໃຫ້ປື້ມຫລາຍຫົວເກົ່າກໍຕາມ ແຕ່ຄຸນຄ່າຂອງມັນຍິ່ງມີຄຸນຄ່າ. ປື້ມເກົ່າແຕ່ພູມປັນຍາບໍ່ເກົ່າ.