(vovworld) - ໃນຊຸມມື້ນີ້, ຊາວຫວຽດນາມພວມເຈືອຈານໃນບັນຍາກາດຟົດຟື້ນ, ເຕັມໄປດ້ວຍພະລັງຊີວິດຂອງລະດູບານໃໝ່. ຢູ່ອ້ອມພາເຂົ້າທີ່ອົບອຸ່ນພ້ອມກັບຄອບຄົວ, ໃນບັນດາເລື່ອງລາວຂອງຕົນ, ທຸກຄົນພ້ອມກັນຫວນຄືນທຸກສິ່ງທຸກຢ່າງໃນປີຜ່ານມາ ແລະ ຫວັງຈະປະສົບແຕ່ສິ່ງທີ່ຈົບງາມໃນປີໃໝ່.
ສຳລັບຫວຽດນາມ, ປີ 2014 ໄດ້ຜ່ານໄປ, ດ້ວຍບັນດາເຫດການທີ່ພົ້ນເດັ່ນໃນຫຼາຍຂົງເຂດ: ການເມືອງ - ສັງຄົມ, ວິທະຍາສາດ - ເຕັກໂນໂລຢີ… ພິເສດຫວຽດນາມໄດ້ມີບາດກ້າວສຳຄັນຫຼາຍຢ່າງໃນການເຊື່ອມໂຍງເຂົ້າກັບເສດຖະກິດໂລກ, ສິ່ງດັ່ງກ່າວສະແດງອອກຜ່ານເລື່ອງຫວຽດນາມບັນລຸໄດ້ຂໍ້ຕົກລົງ, ສັນຍາຮ່ວມມືກັບສາກົນຫຼາຍສະບັບຄື: ສິ້ນສຸດການເຈລະຈາສັນຍາການຄ້າເສລີ (FTA) ສອງຝ່າຍກັບ ສເກົາຫຼີ ແລະ FTA ກັບພັນທະມິດພາສີລັດເຊຍ - ເບລາຣຸດ - ກາຢັກສະຖານ, ບັນລຸໄດ້ຂໍ້ຕົກລົງກ່ຽວກັບທິດທາງສິ້ນສຸດການເຈລະຈາ FTA ກັບພັນທະພາບເອີລົບ (EU); ກະກຽມສຳເລັດຂັ້ນຕອນເຈລະຈາກ້າວໄປເຖິງການເຊັນສັນຍາການຄ້າເສລີຄູ່ຮ່ວມມືຂ້າມປາຊີຝິກ (TPP)… ປີ 2015, ຄາດວ່າຈະມີແງ່ຫວັງແລະ ກາລະໂອກາດຫຼາຍຢ່າງ ເພື່ອໃຫ້ຫວຽດນາມພັດທະນາ. ພິເສດແມ່ນໃນສະພາບທີ່ຫວຽດນາມພວມເຊື່ອມໂຍງຢ່າງເລິກເຊິ່ງ, ກວ້າງຂວາງກັບສາກົນໃນປະຈຸບັນ. ທ່ານ ຫງວຽນຮື້ວເລິມ, ຜູ້ອຳນວຍການບໍລິສັດທ່ອງທ່ຽວບໍລິການ Arirang, ຢູ່ຮ່າໂນ້ຍ, ຫວັງວ່າ:
“ຕາມຂໍ້ສັງເກດຂອງພວກຂ້າພະເຈົ້າແລ້ວ, ປີ 2015, ເສດຖະກິດຫວຽດນາມພວມຢູ່ໃນທ່າຟື້ນຕົວ ແລະ ຈະຟື້ນຕົວໂດຍໄວ, ຖ້າຫາກວ່າສັນຍາ TPP ໄດ້ຮັບການຮັບຮອງເອົາ. ນັ້ນແມ່ນບາດກ້າວຍາວພໍສົມຄວນສຳລັບພື້ນຖານເສດຖະກິດຂອງພວກເຮົາ. ນີ້ແມ່ນຄວາມຫວັງໃຫຍ່ສຸດຂອງພວກຂ້າພະເຈົ້າ. ເມື່ອບັນດາວິສາຫະກິດຫວຽດນາມເຂົ້າຮ່ວມຕະຫຼາດນັ້ນໄດ້, ພື້ນຖານເສດຖະກິດຫວຽດນາມຈະມີໂອກາດພັດທະນາກວ່າອີກ. ເມື່ອພື້ນຖານເສດຖະກິດພັດທະນາ, ຂະແໜງທ່ອງທ່ຽວກໍ່ໄດ້ຮັບຜົນປະໂຫຍດນຳອີກ“.
ພາບປະກອບ ຄຽງຂ້າງຄວາມສາມາດບົ່ມຊ້ອນດ້ານການພັດທະນາເສດຖະກິດທີ່ໄດ້ຮັບການຕີລາຄາສູງຈາກປະຊາຄົມໂລກແລ້ວ, ບັນດາຄຸນຄ່າດ້ານວັດທະນະທຳທີ່ເປັນເອກະລັກຂອງຫວຽດນາມກໍ່ໄດ້ຮັບການຮັບຮອງຈາກໂລກ. ປີ 2014, ຊາວຫວຽດນາມ ໄດ້ຕ້ອນຮັບຂ່າວດີຂ່າວມ່ວນຫຼາຍຢ່າງ ເມື່ອເຂດປູຊະນີຍະສະຖານຈ່າງອານ ຢູ່ແຂວງນິງບິ່ງໄດ້ຮັບການຮັບຮອງຈາກ UNESCO ວ່າເປັນມໍລະດົກໂລກປະສົມ ແຫ່ງທຳອິດຂອງຫວຽດນາມ. ນອກນັ້ນເພງພື້ນເມືອງ ວິ໋, ຢ້ຳເງ້ຕິງ ກໍ່ໄດ້ຮັບການຮັບຮອງວ່າເປັນມໍລະດົກວັດທະນະທຳບໍ່ມີຮູບຮ່າງທີ່ຕາງໜ້າຂອງມວນມະນຸດ, ພ້ອມກັນນັ້ນແຜ່ນພິມດ້ວຍໄມ້ຂອງສະໄໝລາຊະວົງ ຫງວຽນ ກໍ່ໄດ້ຮັບການຮັບຮອງວ່າແມ່ນມໍລະດົກເອກະສານ ລາຍການອະນຸສອນໂລກ ພາກພື້ນອາຊີ - ປາຊີຝິກ. ບັນດາຜົນງານດັ່ງກ່າວກໍ່ເປັນພື້ນຖານເພື່ອກ້າວເຂົ້າສູ່ປີ 2015 ດ້ວຍຄວາມໄວ້ເນື້ອເຊື່ອໃຈໃໝ່. ໂດຍສະເພາະແມ່ນກ່ອນນີ້ບໍ່ດົນ. ຫວຽດນາມຫາກໍ່ຍື່ນສຳເນົາສະເໜີ UNESCO ຮັບຮອງ “ປະເພນີບູຊາເຈົ້າແມ່ຕາມຟູ໋ຂອງຊາວຫວຽດນາມ“ ເປັນມໍລະດົກບໍ່ມີຮູບຮ່າງຂອງມວນມະນຸດ. ທ່ານ ໂດ້ວັນຢາງ, ຜູ້ທີ່ເຄີຍທຳພິທີເຂົ້າຊົງມາເປັນເວລາ 10 ປີແລ້ວ, ຍາມໃດກໍ່ປາຖະໜາຢາກຮັກສາວັດທະນະທຳທີ່ເປັນເອກະລັກສະເພາະນີ້ຂອງຊາດຫວຽດນາມໄວ້, ທ່ານແບ່ງປັນວ່າ:
“ຂ້າພະເຈົ້າຫວັງວ່າຮອດເດືອນ 11 ປີນີ້, ປະເພນີບູຊາເຈົ້າແມ່ຕາມຟູ໋ ຈະໄດ້ຮັບການຮັບຮອງຈາກ UNESCO ວ່າແມ່ນມໍລະດົກວັດທະນະທຳບໍ່ມີຮູບຮ່າງຂອງມວນມະນຸດ. ຖ້າໄດ້ຄືແນວນັ້ນ, ຊາວຫວຽດນາມເວົ້າລວມ ແລະ ພວກຂ້າພະເຈົ້າເອງເວົ້າສະເພາະແມ່ນມີຄວາມພາກພູມໃຈທີ່ສຸດ“.
ພາບປະກອບ ບຸນປີໃໝ່ວຽນມາ, ຜູ້ໃດກໍ່ອວຍພອນກັນປີໃໝ່ໄດ້ຮັບແຕ່ຄວາມໂຊກດີ. ລະດູບານໃໝ່ຟົດຟື້ນມ່ວນຊື່ນ, ປະເທດຊາດມີຄວາມສັນຕິສຸກ. ທຸກຄົນຕ່າງກໍ່ຮູ້ສຶກມີຄວາມສຸກເມື່ອໄດ້ດຳລົງຊີວິດໃນບັນຍາກາດແຫ່ງສັນຕິພາບຂອງປະເທດຊາດ. ແຕ່ລະຄົນກໍ່ມີຄວາມຫວັງສະເພາະໃຫ້ແກ່ຕົນ, ໃຫ້ແກ່ຄອບຄົວ. ສຳລັບປ້າ ຫງວຽນທິຊິງ, ອາຍຸ 60 ປີ ຢູ່ເມືອງຮ່ວາງມາຍ , ພຽງແຕ່ມີຄວາມຫວັງວ່າຍາມໃດກໍ່ໄດ້ດຳລົງຊີວິດຢ່າງເບີກບານມ່ວນຊື່ນ; ລູກຫຼານມີຄວາມປອງດອງກັນ, ໂຊກດີ ແລະ ປະສົບຜົນສຳເລັດ. ສິ່ງສຳຄັນທີ່ສຸດແມ່ນຢາກມີສຸຂະພາບເຂັ້ມແຂງ. ປ້າ ຫງວຽນທິຊິງ ແບ່ງປັນວ່າ:
“ປີນີ້ຂ້າພະເຈົ້າປາຖະໜາຢາກມີສຸຂະພາບເຂັ້ມແຂງ, ເພື່ອດຳລົງຊີວິດຢ່າງເບີກບານມ່ວນຊື່ນ. ສຸຂະພາບກໍ່ມີຄວາມສຳຄັນກັບທຸກຄົນ, ດັ່ງນັ້ນຂ້າພະເຈົ້າຫວັງວ່າປີນີ້, ຂະແໜງສາທາລະນະສຸກຈະມີການປ່ຽນໃໝ່, ເພື່ອສົ່ງເສີມສຸຂະພາບໃຫ້ແກ່ປະຊາຊົນ“.
ສ່ວນນັກຮຽນປີສຸດທ້າຍຊັ້ນມັດທະຍົມຕອນປາຍແລ້ວ, ປີ 2015 ແມ່ນປີຂີດໝາຍບັນດາບາດລ້ຽວທີ່ສຳຄັນ. ພາຍຫຼັງຊຸມວັນພັກຮຽນຕ້ອນຮັບບຸນເຕັດບໍ່ດົນອີກ, ພວກນ້ອງຈະກ້າວເຂົ້າສູ່ການເສັງຈົບຊັ້ນ, ແຕ່ລະຄົນຈະເລືອກເຟັ້ນທາງເດີນສະເພາະໃຫ້ແກ່ຕົນ. ເຢືອງມິງເວືອງ, ນັກຮຽນຫ້ອງ 12, ໂຮງຮຽນມັດທະຍົມຕອນປາຍ ຫວຽດນາມ - ເຢັຍລະມັນ, ຮ່າໂນ້ຍ, ຫວັງວ່າ:
“ປີນີ້ແມ່ນປີສຳຄັນທີ່ສຸດສຳລັບນ້ອງ. ພາຍຫຼັງເສັງຈົບຊັ້ນແລ້ວ, ນ້ອງຈະເສັງເຂົ້າສະຖາບັນໄປສະນີໂທລະຄົມ. ນ້ອງຄິດວ່າຈະປະສົບກັບຄວາມຫຍຸ້ງຍາກຫຼາຍ, ແຕ່ນ້ອງຈະພະຍາຍາມຈົນສຸດຄວາມສາມາດຂອງຕົນເພື່ອໃຫ້ເສັງໄດ້ເຂົ້າມະຫາວິທະຍາໄລຄືດັ່ງຄວາມມຸ່ງຫວັງຂອງຕົນ“.
ປີໃໝ່ດ້ວຍຄວາມຫວັງອັນດີງາມຫຼາຍຢ່າງ. ຫວັງວ່າບັນດາຄວາມມຸ່ງຫວັງນັ້ນຈະປະກົດຜົນເປັນຈິງ, ເພື່ອທົ່ວທຸກແຫ່ງລ້ວນແຕ່ເຕັມໄປດ້ວຍຄວາມຜາສຸກ, ຄວາມອິ່ມໜຳສຳລານ.