(vovworld)---- ສອງຮູບການ, ຫົວເລື່ອງດຽວ. ທີໜຶ່ງແມ່ນຮູບປະຕິມະກຳ, ແລະ ທີໜຶ່ງອີກແມ່ນບັນດາພາບສີຂັດມັນ ໄດ້ສ້າງເປັນບັນດາຜະລິດຕະພັນດ້ານຈິດໃຈພິເສດສະເພາະຂອງວິຈິດສິນ ເຮັດໃຫ້ຜູ້ຊົມຕ້ອງຄິດເຖິງບັນດາບັນຫາສ່ວນຕົວ ຫລືສັງຄົມທີ່ເກີດຂຶ້ນໃນຊີວິດປະຈຳວັນ. ນັ້ນແມ່ນເນື້ອໃນງານວາງສະແດງທີ່ມີຫົວຂໍ້ວ່າ “ຫຼອກຫຼອນ“ ຂອງຈິດຕະກອນຮ່າຈິຮຽວ ແລະ ນັກປະຕິມະກຳເຈິ່ນດຶກຊິ ທີ່ພວມຈັດຂຶ້ນຢູ່ສູນສິລະປະ Heritage Space ມີ້ດິ່ງ-ຮ່າໂນ້ຍ.
ພາບນາງສາວບ້ານນາ ແລະ ງົວຖືກຸບ
(ພາບ: vov)
ງານວາງສະແດງໄດ້ແນະນຳພາບແຕ້ມ 12 ແຜ່ນຂອງຈິດຕະກອນຮ່າຈິຮຽວ, ຮູບປະຕິມະກຳ 7 ຮູບຂອງນັກປະຕິມະກຳເຈິ່ນດຶກຊິ. ພາບແຕ້ມຂອງຈິດຕະກອນຮ່າຈິຮຽວ ດ້ວຍຮູບພາບຝູງງົວ ແລະ ນາງສາວຮ້ອງເພງແມ່ນບັນດາຮູບພາບທີ່ເປັນເອກະລັກສະເພາະ ຄືດັ່ງທຳນອງເພງອະມະຕະ. ສ່ວນບັນດາຜະລິດຕະພັນຂອງ ນັກປະຕິມະກຳເຈິ່ນດຶກຊິ ໄດ້ສ້າງຄວາມຮູ້ສຶກດ້ານຈິນຕະນາການ. ການສົມທົບກັນລະຫວ່າງພາບສີຄັດມັນ ແລະ ຮູບປະຕິມະກຳໄດ້ສ້າງເປັນຄວາມຫຼອກຫຼອນດ້ວຍບັນດາຜະລິດຕະພັນທີ່ເຕັມໄປດ້ວຍລັກສະນະວັດທະນະທຳມະນຸດ. ຈິດຕະກອນຮ່າຈິຮຽວ ແບ່ງປັນວ່າ:
“ ຂ້າພະເຈົ້າ ແລະ ນັກປະຕິມະກຳ ເຈິ່ນດຶກຊິ ຢາກພ້ອມກັນຈັດງານວາງສະແດງກ່ອນນີ້ປະມານ 6 ເດືອນ. ຂ້າພະເຈົ້າ ແລະ ເຈິ່ນດຶກຊິ ມີຄວາມສະໜິດຕິດພັນກັນ ແລະ ເຂົ້າໃຈຮູບການສິລະປະຂອງກັນ, ສະນັ້ນ, ຂ້າພະເຈົ້າຈຶ່ງເຊີນ ເຈິ່ນດຶກຊິ ເຂົ້າຮ່ວມງານວາງສະແດງນຳກັນ“.
ບັນດາແນວຄວາມຄິດໃນຊີວິດປະຈຳວັນສະແດງອອກໃນຜະລິດຕະພັນຂອງນັກປະຕິມະກຳ ເຈິ່ນດຶກຊິ ພ້ອມກັບພາບສີຄັດມັນແຜ່ນຕ່າງໆ ຂອງຈິດຕະກອນຮ່າຈິຮຽວ ໄດ້ເຮັດໃຫ້ຜູ້ຊົມຫວນຄືນຊຸມເດືອນປີໃນອະດີດຕະການຂອງຕົນ. ນັກຈິດຕະກອນ ຫງວຽນມິງເຟືອກ ແບ່ງປັນວ່າ:
“ໃນສະພາບການວັດທະນະທຳສິລະປະປະຈຸບັນ, ນີ້ແມ່ນງານວາງສະແດງດີພໍສວມຄວນ. ຈິດຕະກອນຮ່າຈິຮຽວ ແມ່ນຜູ້ນິຍົມຫົວເລື່ອງ ຈິດວິນຍານແຫ່ງບ້ານນາ ແລະ ໃນງານວາງສະແດງຄັ້ງນີ້, ນັກຈິດຕະ ກອນຮ່າຈິຮຽວ ກໍ່ສະແດງໃຫ້ເຫັນຄວາມສວຍງາມຂອງເຈດບ້ານນາ. ນີ້ແມ່ນການສະແດງທີ່ດີທີ່ສຸດ. ສ່ວນຮູບປະຕິມະກຳຂອງທ່າຍ ເຈິ່ນດຶກຊິ ໄດ້ເຮັດໃຫ້ຜູ້ຊົມຕ້ອງມີຄວາມນຶກຄິດກ່ຽວກັບສິ່ງທີ່ໄດ້ ແລະ ພວມເກີດຂຶ້ນ. ຂ້າພະເຈົ້າມີຄວາມຮູ້ສຶກປະທັບໃຈທີ່ສຸດ”
ຜະລິດຕະພັນຂອງນັກປະຕິມະກຳເຈິ່ນດິແຊິ
(ພາບ:vov)
ງານວາງສະແດງ ໄດ້ເຮັດໃຫ້ຜູ້ຊົມຄວາມຮູ້ສຶກພິເສດສະເພາະ ກໍ່ຄືແນວຄວາມຄິດກ່ຽວກັບທັດສະນະໃນການດຳລົງຊີວິດ, ການເລືອກເຟັ້ນຂອງແຕ່ລະຄົນໃນຊີວິດຂອງຕົນ. ເພື່ອນຫງວນລິງດານ, ນັກສຶກສາສະຖາບັນສື່ສານ ແລະ ໂຄສະນາ ໃຫ້ຮູ້ວ່າ:
“ເມື່ອຮັບຊົມບັນດາພາບສີຂັດມັນຢູ່ງານວາງສະແດງສິລະປະນີ້, ນ້ອງມັກທີ່ສຸດແມ່ນຈິດຕະກອນໄດ້ໃຊ້ບັນດາວັດຖຸທີ່ງ່າຍດາຍເພື່ອສະແດງໃຫ້ເຫັນຫົວເລື່ອງກ່ຽວກັບເຂດບ້ານນາ. ບັນດາພາບແຕ້ມຢູ່ງານວາງສະແດງໄດ້ເຮັດໃຫ້ຜູ້ຊົມຕ້ອງມີຄວາມນຶກຄິດຫຼາຍທີ່ສຸດ. ສວ່ນບັນດາຮູບປະຕິມະກຳ, ນັກປະຕິມະກຳເຈິ່ນດຶກຊິ ໄດ້ເວົ້າເຖິງຄວາມໃນໃຈຂອງມະນຸດ. ເມື່ອຮັບຊົມບັນດາຜະລິດຕະພັນນັ້ນ, ພວກເຮົາຈະມີຄວາມຮູ້ສຶກວ່າ, ໄດ້ມີໂອກາດດຳລົງຊີວິດ ແລະ ເຂົ້າໃຈຕົນເອງ“
“ຫຼອກຫຼອນ“ ແມ່ນງານວາງສະແດງທີ່ມີລັກສະນະພິເສດສະເພາະ, ຍ້ອນນີ້ແມ່ນງານວາງສະແດງທຳອິດທີ່ມີການສົມທົບລະຫວ່າງພາບສີຂັດມັນ ແລະ ຜະລິດຕະພັນປະຕິມະກຳດ້ວຍແນວຄິດດຽວ. ພ້ອມກັນນັ້ນ, ງານວາງສະແດງໄດ້ນຳມາເຊິ່ງບັນດາຄວາມນຶກຄິດເລິກເຊິ່ງ, ສານທີ່ດີງາມຂອງຊີວິດ, ເຮັດໃຫ້ຜູ້ຊົມບໍ່ພຽງແຕ່ຮັບຊົມລ້າໆເທົ່ານັ້ນ ຫາກຕ້ອງມີຄວາມນຶກຄິດອີກດ້ວຍ./.