ລະດູບານໃໝ່ໄດ້ວຽນມາສູ່ປະເທດຊາດຫວຽດນາມ. ປະຊາຊົນຢູ່ທຸກແຖບຖິ່ນມີຄວາມພາກພູມໃຈຕ້ອນຮັບລະດູບານໃໝ່ດ້ວຍຄວາມຫວັງເມື່ອກ້າວເຂົ້າສູ່ປີໃໝ່, ຄອບຄົວມີຄວາມສຸກ, ປະເທດຊາດນັບມື້ນັບພັດທະນາ.
ລະດູບານໃໝ່ໄດ້ວຽນມາສູ່ເຂດ ໄຕບັກ ໝາຍເຖິງເຂດທາງທິດຕາເວັນຕົກສ່ຽງເໜືອ |
ຢູ່ທຸກໝູ່ບ້ານໃນເຂດ ໄຕບັກ ໝາຍເຖິງເຂດທາງທິດຕາເວັນຕົກສ່ຽງເໜືອ, ໃນມື້ຕົ້ນລະດູບານໃໝ່, ດອກຄາຍ, ດອກໝັ້ນພາກັນບານສະພັ່ງເອ້ຄວາມງາມ. ຢູ່ບ້ານສີ່ເທົາຈາຍ, ຕາແສງໂຮ່ເທົ່າ, ເມືອງຕາມເດືອງ, ແຂວງລາຍເຈົາ, ລະດູບານໃໝ່ປີນີ້, ພໍ່ແມ່ພີນ້ອງໃນໝູ່ບ້ານມີຄວາມມ່ວນຊື່ນຫຼາຍຢ່າງ. ທ່ານ ລູ່ອາງີ ນາຍບ້ານ ບ້ານສີ່ເທົາຈາຍ, ຕາແສງໂຮ່ເທົ່າ, ເມືອງຕາມເດືອງ, ແຂວງລາຍເຈົາ ໃຫ້ຮູ້ວ່າ :
“ ປີນີ້, ບ້ານຂອງເຮົາມີການປ່ຽນແປງຫຼາຍຢ່າງ. ໝູ່ບ້ານໄດ້ຮັບການຢັ້ງຢືນແມ່ນໝູ່ບ້ານທ່ອງທ່ຽວເຂດຊຸມຊົນ, ບຸນເຕັດປີນີ້, ພໍ່ແມ່ພີນ້ອງພາຍໃນບ້ານມີຄວາມມ່ວນຊື່ນກ່ວາທຸກໆປີ ”
ທັງຕາແສງໂຮ່ເທົ່າ, ເມືອງຕາມເດືອງມີກວ່າ 660 ຄອບຄົວ , ແຕ່ມີເຖິງ 90% ແມ່ນຊົນເຜົ່າຢ້າວ. ໃນປີຜ່ານມາ, ພໍ່ແມ່ພີນ້ອງພາຍໃນຕາແສງໄດ້ຮັບຊົມໃຊ້ຫຼາຍນະໂຍບາຍເພື່ອພັດທະນາເສດຖະກິດຄື: ຫນູນຊ່ວຍປະກອບເຄື່ອງຈັກ, ຫນູນຊ່ວຍແນວພັນປູກ, ໄດ້ຮັບການກູ້ຢືມທຶນດ້ວຍຄ່າດອກເບ້ຍຕ່ຳຈາກທະນາຄານນະໂຍບາຍສັງຄົມ. ທ່ານ ແກັກຕາຖ້ຽນ ປະທານຄະນະກຳມະການປະຊາຊົນຕາແສງ ໂຮ່ເທົ່າ, ເມືອງຕາມເດືອງ, ແຂວງລາຍເຈົາ ເປີດເຜີຍວ່າ :
“ ກ້າວເຂົ້າສູ່ປີ 2017, ພວກຂ້າພະເຈົ້າສຸມໃສ່ຜະລິດກະສີກຳປ່າໄມ້, ພິເສດແມ່ນພັດທະນາຕົ້ນໄມ້ກິນໝາກຄື: ຕົ້ນຄາຍ…ເພື່ອຊ່ວຍພໍ່ແມ່ພີນ້ອງລົບລ້າງຄວາມອຶດຫິວຫຼຸດຜ່ອນຄວາມທຸກຍາກ ”
ຕ້ອນຮັບ ລະດູບານໃໝ່ປີຣະກາ 2017, ອຳນາດການປົກຄອງ ແລະ ປະຊາຊົນຕາແສງ ດັກຢາ ເມືອງ ມາງຢາງ ແຂວງຢາລາຍ ມີຄວາມປາດຖະໜາວ່າ ຊີວິດທາງດ້ານວັດຖຸ ແລະ ຈິດໃຈຈະໄດ້ຮັບການປົວແປງຢ່າງບໍ່ຢຸດຢັ້ງ. ອ້າຍ ເດີຊີນ ຊາວບ້ານດັກຢາ, ຕາແສງດັກຢາ ໃຫ້ຮູ້ວ່າ :
“ ກ່ອນນີ້, ມີພຽງບາງຄອບຄົວຈັດຕັ້ງການຕ້ອນຮັບບຸນເຕັດເທົ່ານັ້ນ, ໃນ 2-3 ປີມໍ່ໆມານີ້, ມີຄອບຄົວຈັດຕັ້ງຕ້ອນຮັບບຸນເຕັດນັບມື້ນັບຫຼາຍຂຶ້ນ ແລະ ໃນປີນີ້, ທຸກໆຄອບຄົວກໍລ້ວນແຕ່ຈັດຕັ້ງຕ້ອນຮັບບຸນປີໃໝ່ປະຈຳຊາດ. ບຸນເຕັດປີນີ້, ພໍ່ແມ່ພີນ້ອງພາຍໃນບ້ານມີຄວາມມ່ວນຊື່ນກ່ວາທຸກໆປີເພາະຕາແສງໄດ້ຮັບການຢັ້ງຢືນເປັນຕາແສງຊົນນະບົດໃໝ່. ກາຍວັນທີ 3 ຂອງບຸນເຕັດ, ພໍ່ແມ່ພີນ້ອງຊາວບ້ານຈະລົງນາ, ເຮັດສວນ ”
ໃນເຮືອນຫຼັງໃໝ່ທີ່ຫາກໍໄດ້ຮັບການປຸກສ້າງ, ເຈົ້າກົກ ປອກບີ, ຜູ້ນຳໜ້າໃນການບໍລິຈາກທີ່ດິນເພື່ອກໍ່ສ້າງຊົນນະບົດໃໝ່ ໃຫ້ຄຳຕັກເຕືອນວ່າ :
“ ປີໃໝ່, ຂ້າພະເຈົ້າຫວັງວ່າ ພໍ່ແມ່ພີນ້ອງໃນບ້ານຜູ້ຢູ້ໃກ້ຫຼືໄກ ຈົ່ງອອກແຮງສ້າງສາບ້ານເກີດເມືອງນອນຂອງຕົນໃຫ້ຮັ່ງມີສວຍງາມ. ໃຜມີວັດຖຸກໍປະກອບສ່ວນວັດຖຸ, ໃຜມີທີ່ດິນ ກໍບໍລິຈາກທີ່ດິນ ແລະ ປະກອບສ່ວນແຮງງານເພື່ອໃຫ້ໂຄງການກໍ່ສ້າງຊົນນະບົດໃໝ່ປະສົບຜົນສຳເລັດ ແລະ ບຸນເຕັດປີນີ້ຈະມ່ວນຊື່ນກ່ວາ ”
ໃນທ່າມກາງຄວາມເບີກບານມ່ວນຊື່ນຕ້ອນຮັບລະດູບານໃໝ່ຢູ່ເຂດແຫ້ງແລ້ງນິງຖ້ວນ, ອ້າຍເຄ້ວັນດ້ວານ ໃຫ້ຮູ້ວ່າ ໃນການຜະລິດເຂົ້າຍາມລະດູໜາວຕໍ່ລະດູບານໃໝ່, ດ້ວຍເນື້ອທີ່ດິນ 5 ໄລ, ລາວເອົາເຄິ່ງໜຶ່ງເພື່ອປູກຖົ່ວຂຽວ, ສ່ວນທີຍັງເຫຼືອແມ່ນປູກຫຍ້າລ້ຽງແກະ, ດັ່ງນັ້ນ ຊີວິດການເປັນຢູ່ໄດ້ຮັບການປົວແປງໃຫ້ດີຂຶ້ນ. ອ້າຍເຄ້ວັນດ້ວານ ເວົ້າວ່າ:
“ ປີນີ້, ຍ້ອນທຳການປູກຖົ່ວຂຽວ ແລະ ປູກຫຍ້າລ້ຽງແກະ, ດັ່ງນັ້ນລາຍຮັບຂອງຄອບຄົວກໍໄດ້ຮັບການປົວແປງດີຂຶ້ນ. ບຸນເຕັດປີນີ້, ພໍ່ແມ່ພີນ້ອງກໍພາກພູມໃຈຫຼາຍ ”
ປະສິດທິຜົນຈາກການຫັນປ່ຽນໂຄງປະກອບແນວປູກເພື່ອໃຫ້ແທດເໝາະກັບການປ່ຽນແປງຂອງດິນຟ້າອາກາດ ໄດ້ເຮັດໃຫ້ການຕ້ອນຮັບບຸນເຕັດປີນີ້ຂອງປະຊາຊົນມີຄວາມສົມບູນກວ່າ. ທ່ານເຈີນກ໋ວກນາມ ຮອງປະທານ ຄະນະກຳມະການປະຊາຊົນແຂວງນິງຖ້ວນ ໃຫ້ຮູ້ວ່າ :
“ ກິດຈະການຫັນປ່ຽນແມ່ນຕ້ອງສືບຕໍ່ປະຕິບັດ. ຖ້າຫາກບໍ່ຫັນປ່ຽນ ແມ່ນບໍ່ສາມາດຜະລິດໄດ້ບົນດິນແດນແຫ້ງແລ້ງນີ້. ແລະ ເມື່ອຫັນປ່ຽນແລ້ວ, ບັນດາຜະລິດຕະພັນຈະຖືກວິສາຫະກິດເກັບຊື້ ແລະ ນຳມາເຊິ່ງຜົນກຳໄລໃຫ້ແກ່ພໍ່ແມ່ປະຊາຊົນ, ປະກອບສ່ວນສ້າງຊີວິດການເປັນຢູ່ຂອງປະຊາຊົນເປັນປົກກະຕິ ”
ສຳລັບປະຊາຄົມວິສາຫະກິດແລ້ວ, ໃນຊຸມມື້ຕົ້ນລະດູບານໃໝ່, ມີຄວາມຄາດຫວັງສືບຕໍ່ອຸທິດສ່ວນໃຫ້ແກ່ປະເທດຊາດຫຼາຍຂຶ້ນ. ອ້າຍເລີມຫ້ຽນທິ້ງ, ຜູ້ອຳນວຍການບໍລິສັດ HIT ຈຳກັດ ເຄື່ອນໄຫວໃນຂົງເຂດເຕັກໂນໂລຢີຂໍ້ມູນຂ່າວສານ ແບ່ງປັນວ່າ :
“ ຂ້າພະເຈົ້າຢາກຜະລິດອອກບັນດາຜະລິດຕະພັນ, ລາຍການຊອບແວຄື: ການຈັດລຳດັບດີຈີຈອນ, ລະບົບຄຸ້ມຄອງສັງລວມໂຮງໝໍ, ໃຫ້ຄຳປຶກສາປົວແປງໂຄງລ່າງໂຮງໝໍ. ຂ້າພະເຈົ້າຢາກປະກອບສ່ວນໜຶ່ງເຂົ້າໃນການພັດທະນາຂອງຂະແໜງສາທາລະນະສຸກນະຄອນໂຮ່ຈິມິນ ”
ບັນດາວິສາຫະກິດກໍຝາກຄວາມຫວັງຕໍ່ການຫັນປ່ຽນຢ່າງຕັ້ງໜ້າຂອງອຳນາດການປົກຄອງທ້ອງຖິ່ນຂັ້ນຕ່າງໆໃນການແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດ. ທ່ານນາງ ຮ່າທູແທງ, ຜູ້ອຳນວຍການໃຫຍ່ບໍລິສັດກວດສອບບັນຊີ ແລະ ໃຫ້ຄຳປຶກສາ Deloitte ຫວຽດນາມ ຖືວ່າ :
“ ຄວາມຫວັງຢ່າງໃຫຍ່ທີ່ສຸດຂອງວິສາຫະກິດແມ່ນທຸກສິ່ງທີ່ທ່ານນາຍົກລັດຖະມົນຕີໄດ້ກ່າວມາ, ດັ່ງນັ້ນກົງຈັກຕ້ອງຫນູນຊ່ວຍຢ່າງແທ້ຈິງ ”
ຮ່ວມເດີນທາງພ້ອມກັບວິສາຫະກິດ, ການນຳຫຼາຍທ້ອງຖິ່ນໄດ້ໝັ້ນໝາຍນັບແຕ່ຕົ້ນປີ 2017 ວ່າ ຈະສືບຕໍ່ຍູ້ແຮງການປະຕິຮູບດ້ານລະບຽບການບໍລິຫານ, ເປັນເຈົ້າການແກ້ໄຂຄວາມຫຍຸ້ງຍາກ, ໜູນຊ່ວຍທຶນຮອນ, ສ້າງກາລະໂອກາດເພື່ອໃຫ້ວິສາຫະກິດຄົງຕົວ ແລະ ຂະຫຍາຍຕົວ. ທ່ານ ເຈີນວິ້ງຕ້ວຽນ ຮອງປະທານ ຄະນະກຳມະການປະຊາຊົນນະຄອນໂຮ່ຈິມິນ ໃຫ້ຮູ້ວ່າ :
“ ພວກຂ້າພະເຈົ້າຄົ້ນຄ້ວາ ເຮັດແນວໃດເພື່ອຊ່ວຍວິສາຫະກິດເລີ່ມທຸລະກິດດ້ວຍບັນດາການກະທຳລະອຽດ ບໍ່ພຽງແຕ່ທາງດ້ານທຶນຮອນເທົ່ານັ້ນ, ຫາກຍັງແມ່ນຕະຫຼາດ ແລະ ສ້າງໃຫ້ມີກົນໄກເພື່ອໃຫ້ວິສາຫະກິດຊ່ວຍເຫຼືອກັນ. ບັນດາວິສາຫະກິດທີ່ມີປະສົບການ, ມີເງື່ອນໄຂທາງດ້ານທຶນຮອນ ແມ່ນຈະຊ່ວຍບັນດາວິສາຫະກິດອື່ນໆເລີ່ມທຸລະກິດ, ພັດທະນາຕະຫຼາດ. ນີ້ແມ່ນຄວາມສາມາດບົ່ມຊ້ອນ, ທ່າແຮງເພື່ອສ້າງແຫຼ່ງງົບປະມານທັງເຂັ້ມແຂງທັງໝັ້ນຄົງຍາວນານ ”
ປີໃໝ່ດ້ວຍບັນດາສິ່ງທ້າທາຍໃໝ່, ຊາວຫວຽດນາມແຕ່ລະຄົນດ້ວຍຄວາມປະເອີບໃຈທີ່ມີຢູ່ແລ້ວ, ດ້ວຍບັນດາການກະທຳລະອຽດ ຍາມໃດກໍມຸ່ງໄປສູ່ອະນາຄົດເພື່ອພ້ອມກັນສ້າງຊີວິດທີ່ອີ່ມໜຳສຳລານກວ່າປີເກົ່າ ແລະ ປະເທດຊາດນັບມື້ນັບຂະຫຍາຍຕົວ.