(vovworld)- ງານວາງສະແດງ “ຫວຽດນາມໃນຊຸມປີ 80” ຂອງນັກຂ່າວ ຝລັ່ງ Michel Blanchard ພວມດຳເນີນໄປຢູ່ສູນວັດທະນະທຳ ຝລັ່ງ ເລກທີ 24 ຖະຫນົນ ຈາງຕຽນ ຮ່າໂນ້ຍ ໄດ້ດຶງດູດຄວາມສົນໃຈຂອງມະຫາຊົນ ແລະ ນັກທ່ອງທ່ຽວເປັນຈຳນວນຫລວງຫລາຍ. ມີພາບຖ່າຍເກືອບ 60 ແຜ່ນ ຄືດັ່ງຮູບເງົາເລື່ອງຫນຶ່ງທີ່ສ່ອງແສງເຖິງຫລາຍດ້ານໃນຊີວິດປະຈຳວັນຂອງຊາວຫວຽດນາມ ກ່ອນນີ້ເກືອບ 40 ປີ ໄດ້ນຳມາເຊິ່ງຄວາມຮູ້ສຶກຫລາຍຢ່າງທີ່ແຕກຕ່າງກັນໃຫ້ແກ່ຜູ້ຊົມກ່ຽວກັບໄລຍະທີ່ຫຍຸ້ງຍາກ ແຕ່ເຕັມໄປດ້ວຍຄວາມເອກອ້າງທະນົງໃຈຂອງປະເທດຊາດ ແລະ ຊາວຫວຽດນາມ. ບົດຂຽນຂອງນັກຂ່າວ ຮົ່ງບັກ ທີ່ມີຫົວຂໍ້ວ່າ: ຫວຽດນາມຜ່ານການສັງເກດຂອງນັກຂ່າວ ຝລັ່ງ.
ງານວາງສະແດງ “ຫວຽດນາມໃນຊຸມປີ 80
ພາບ:dangcongsan
|
“ຄວາມຊົງຈຳກ່ຽວກັບໄລຍະຍັງຫນຸ່ມນ້ອຍບໍ່ອາດເຮັດໃຫ້ຂ້າພະເຈົ້າຫລົງລືມໄດ້. ຮູບພາບກ່ຽວກັບລົດໄຟ, ຮ້ານຂາຍເຄື່ອງຢູ່ຕະຫລາດ ດົງຊວນ ຫລື ບັນຍາກາດຢູ່ຫນອງ ທ່ວຽນກວາງ ໃນເມື່ອກ່ອນຍາມໃດກໍຝັງເລິກໃນດວງໃຈຂອງຂ້າພະເຈົ້າ.”
“ຂ້າພະເຈົ້າເຫັນວ່າ ງານວາງສະແດງຄັ້ງນີ້ແມ່ນໃກ້ຊິດສະຫນິດສະຫນົມສຳລັບຊາວຮ່າໂນ້ຍ. ລຸ້ນຄົນທີ່ເກີດຫລັງຊຸມປີ 1980 ຄືພວກຂ້າພະເຈົ້າ ມີໂອກາດໄດ້ເຂົ້າໃຈແຈ້ງກ່ຽວກັບຈຸດວັດທະນະທຳ ຈາກຊຸດອາພອນຕະຫລອດຮອດດ້ານສະຖາປັດຕະຍະກຳຂອງຊາວຮ່າໂນ້ຍກ່ອນນີ້ເກືອບ 40 ປີ. ຂ້າພະເຈົ້າຄິດວ່າ ໃນຊຸມປີມໍ່ໆມານີ້ ໄວ
ຫນຸ່ມ ຫວຽດນາມ ມີຄວາມສົນໃຈເຖິງດ້ານວັດທະນະທຳ ແລະ ຄວາມງາມໃນອະດີດຕະການຂອງຊາວຫວຽດນາມ. ນັ້ນແມ່ນສາຍເຫດທີ່ເຮັດໃຫ້ງານວາງສະແດງຄັ້ງນີ້ດຶງດູດເພື່ອນຫນຸ່ມມາຊົມເປັນຈຳນວນຫລວງຫລາຍ.”
ພາບຖ່າຍແຕ່ລະແຜ່ນໃນຈຳນວນເກືອບ 60 ແຜ່ນທີ່ນຳມາວາງສະແດງຄັ້ງນີ້ແມ່ນສ່ອງແສງເຖິງທິວທັດທຳມະຊາດສວຍງາມຂອງປະເທດຊາດ, ຊີວິດປະຈຳວັນຂອງຊາວຫວຽດນາມ, ຄວາມງາມແບບດັ້ງເດີມຂອງຖະຫນົນເກົ່າຢູ່ ຮ່າໂນ້ຍ ຫລື ທັດສະນີຍະພາບສວຍງາມຢູ່ ອ່າວຮ້າລອງ, ວັດ ໄຖ່ (Chua Thay), ຮູບພາບຊາວກະສິກອນເຮັດໄຮ່ໄຖນາ ຫລື ຕະຫລາດດອກໄມ້ຖະຫນົນ ຫງວຽນເຫ້ວ ຢູ່ ນະຄອນ ໂຮ່ຈິມີນ. ໃນນັ້ນ ບັນດາພາບຖ່າຍກ່ຽວກັບຊາວຮ່າໂນ້ຍ ໄປຊື້ເຄື່ອງຂອງເພື່ອກະກຽມຕ້ອນຮັບບຸນປີໃຫມ່ປະຈຳຊາດ ແລະ ບັນດາຈຸດວັດທະນະທຳທີ່ເປັນເອກະລັກສະເພາະຂອງຊາວ ໄຊງ່ອນໃນເມື່ອກ່ອນ ໄດ້ ຄວາມປະທັບໃຈ ແລະ ຄວາມຮູ້ສຶກພິເສດ ນຳມາໃຫ້ຜູ້ຊົມ.
ນັກຂ່າວ Michel Blanchard ເກີດປີ 1949 ແມ່ນນັກຂ່າວເຮັດວຽກຢູ່ສຳນັກຂ່າວສານ AFP ຂອງຝລັ່ງ ແຕ່ປີ 1976 ຮອດປີ 2006, ຜູ້ອຳນວຍການຫ້ອງການ AFP ປະຈຳ ຮ່າໂນ້ຍ ແຕ່ປີ 1981 ຮອດປີ 1983. ໃນພາບເອກະສານກ່ຽວກັບຫວຽດນາມນັບພັນໆແຜ່ນຢູ່ ງານວາງສະແດງຄັ້ງນີ້ ທ່ານ Michel Blanchard ຢາກສົ່ງເຖິງປະຊາຊົນຫວຽດນາມ ບັນດາຮູບພາບທຳມະດາສາມັນທີ່ປະກົດຂຶ້ນໃນຊີວິດປະຈຳວັນ. ປະຈຸບັນ ຫວຽດນາມ ມີການປ່ຽນແປງຫລາຍຢ່າງເມື່ອທຽບໃສ່ກ່ອນນີ້ເກືອບ 40 ປີ ແຕ່ທ່ານບໍ່ອາດຫລົງລືມຮູບພາບນະຄອນຫລວງຮ່າໂນ້ຍ, ປະເທດຫວຽດນາມທີ່ສະຫງົບສຸກ, ເກົ່າແກ່ໃນຊຸມປີ 1980ໄດ້.ເຖິງວ່າໄລຍະນັ້ນ ຊີວິດການເປັນຢູ່ຂອງປະຊາຊົນຍັງປະສົບກັບຄວາມຫຍຸ້ງຍາກ, ຂາດແຄນ ພາຍຫລັງສົງຄາມກໍຕາມ ແຕ່ໃບຫນ້າຂອງຊາວຫວຽດນາມແຕ່ລະຄົນຍາມໃດກໍຍິ້ມແຍ້ມແຈ່ມໃສດ້ວຍຄວາມຜາສຸກ ແລະ ຄວາມເສລິພາບ. ກ່າວຄຳເຫັນທີ່ງານວາງສະແດງ, ທ່ານ Michel Blanchard ເວົ້າວ່າ:
“ຂ້າພະເຈົ້າມັກຖ່າຍຮູບເຄິ່ງຄີງທີ່ສຸດ ເພາະວ່າ ນັ້ນແມ່ນບັນດາພາບຖ່າຍຫນຶ່ງດຽວທີ່ບັນທຶກຊ່ວງເວລາດັ່ງກ່າວບໍ່ສາມາດຖ່າຍອີກຄັ້ງໃຫມ່ໄດ້. ສ່ວນຮູບພາບກ່ຽວກັບທິວທັດທຳມະຊາດ ພວກເຮົາສາມາດໄປເຖິງສະຖານທີ່ຢາກໄດ້ຮູບເພື່ອຖ່າຍເອົາຮູບທີ່ສວຍງາມ. ຍິ່ງໄປກວ່ານັ້ນ ຮູບເພາບເຄິ່ງຄີງ ແມ່ນສະແດງໃຫ້ເຫັນເລື່ອງລາວເລື່ອງຫນຶ່ງ ແລະ ຂ້າພະເຈົ້າທັງແມ່ນນັກຖ່າຍຮູບທັງແລະກໍທັງແມ່ນຜູ້ສະສົມບັນດາເລື່ອງລາວພ້ອມ.”
ຜູ້ຊົມຮ່າໂນ້ຍ ສົນໃຈບັນດາພາບຖ່າຍຂອງນັກຂ່າວຝລັ່ງ
ພາບ:internet
|
ໃນໄລຍະທີ່ດຳລົງຊີວິດ ແລະ ເຮັດວຽກຢູ່ ຫວຽດນາມ, ເມື່ອມີເວລາຫວ່າງ ທ່ານ Michel Blanchard ເຄີຍຂີ່ລົດຖີບໄປເລາະຫລິ້ນເພື່ອຖ່າຍຮູບບັນດາຖະຫນົນຫົນທາງຢູ່ຮ່າໂນ້ຍ. ນອກນັ້ນ ທ່ານຍັງໄປຢ້ຽມຢາມບັນດາແຂວງ ນະຄອນ ຈາກພາກເຫນືອລົງຮອດພາກໃຕ້ຫວຽດນາມ ຄືຈາກແຂວງ ລ້ານເຊີນ ໄປຮອດນະຄອນໂຮ່ຈິມີນ ເພື່ອຄົ້ນຫາກ່ຽວກັບປະເທດຊາດ ແລະ ຊາວຫວຽດນາມ.
ພາຍຫລັງສິ້ນສຸດ ອາຍຸການ 3 ປີທີ່ປະຕິບັດງານຢູ່ຫວຽດນາມ, ນັກຂ່າວ Michel Blanchard ເຄີຍກັບຄືນມາຫວຽດນາມ ດ້ວຍບົດບາດແມ່ນຜູ້ນຳທ່ຽວ. ໃນບັນດາການຢ້ຽມຢາມນັ້ນ, ທ່ານລ້ວນແຕ່ຍາດເວລາໄປຢ້ຽມຢາມໝູ່ເພື່ອນຫວຽດນາມ ແລະ ບັນດາຖະຫນົນຫົນທາງຕ່າງໆທີ່ສະຫນິດຕິດພັນກັບທ່ານ. ນອກນັ້ນ ທ່ານໄດ້ພິມຈຳຫນ່າຍປື້ມຄູ່ມືທ່ອງທ່ຽວແນະນຳທັດສະນີຍະພາບສວຍງາມຂອງປະເທດຊາດ ແລະ ຊາວຫວຽດນາມ, ຈັດຕັ້ງງານວາງສະແດງເປັນສອງຄັ້ງຢູ່ ຫໍອິນດູຈີນທີ່ ປາຣີ ແນະນຳກ່ຽວກັບຫວຽດນາມ ກັບຜູ້ຊົມຝລັ່ງ. ໄລຍະຈະມາເຖິງ, ບັນດາຮູບຖ່າຍຂອງທ່ານ ກ່ຽວກັບ “ຫວຽດນາມ ໃນຊຸມປີ 80” ຈະໄດ້ນຳວາງສະແດງຢູ່ນະຄອນ ໂຮ່ຈິມີນ. ນີ້ກໍແມ່ນວິທີເພື່ອໃຫ້ທ່ານ Michel Blanchard ສະແດງຄວາມຮັກຕໍ່ປະເທດຊາດ ແລະ ຊາວຫວຽດນາມ ຊື່ງແມ່ນສະຖານທີ່ສ້າງຄວາມປະທັບໃຈຫລາຍຢ່າງໃຫ້ທ່ານ.