(ເກາະ ເຈື່ອງຊາໃຫຍ່)
(vovworld)- ບັນດາປະພາຄານ ຢູ່ ໝູ່ເກາະ ເຈື່ອງຊາ ເມືອງ ເຈື່ອງຊາ ແຂວງ ແຄງຮ່ວາ ໂດຍບໍລິສັດຮັບປະກັນຄວາມປອດໄພການເດີນທະເລຢູ່ ທະເລຕາເວັນອອກ ແລະ ໝູ່ເກາະ ຂຶ້ນກັບ ບໍລິສັດໃຫຍ່ ຮັບປະກັນຄວາມປອດໄພໃນການເດີນທະເລ ພາກໃຕ້, ຄຸ້ມຄອງ ແລະ ນຳໃຊ້. ໂດຍຜ່ານຜ່າຄວາມຫຍຸ້ງຍາກລຳບາກຈາກລົມພາຍຸ, ແລະຄື້ນຟອງທະເລ, ບັນດາພະນັກງານຂອງບໍລິສັດຮັບປະກັນຄວາມປອດໄພໃນການເດີນ ທະເລຕາເວັນອອກ ແລະ ໝູ່ເກາະ ຍາມໃດກໍຮັກສາໃຫ້ບັນດາປະພາຄານແຈ້ງສະຫວ່າງ, ເພື່ອໃຫ້ກຳປັ່ນໄປມາບົນທະເລຢ່າງປອດໄພ.
ຢູ່ທະເລທີ່ກວ້າງໃຫຍ່, ເລື່ອງກໍ່ສ້າງ ປະພາຄານແມ່ນຫຍຸ້ງຍາກລຳບາກທີ່ສຸດ ແລະ ຕ້ອງເສຍເວລາຫລາຍ. ຈາກການຂົນສົ່ງວັດສະດຸກໍ່ສ້າງ, ອຸປະກອນຮັບໃຊ້ ການກໍ່ສ້າງຕະຫລອດຮອດການສ້ອມແປງບັນດາປະພາຄານ ລ້ວນແຕ່ໂດຍກຳປັ່ນ ຫາຍດັງ 5 ຮັບຜິດຊອບ. ກຳປັ່ນລຳນີ້ ໄດ້ນຳເຂົ້າເຄື່ອນໄຫວມາເປັນເວລາ 10 ປີ, ບັນລຸ ຄວາມໄວ ພຽງ 6 ໄມທະເລ/ຊົ່ວໂມງ (ປະມານ 11 ກິໂລແມັດ) ແຕ່ປະຈຸບັນຍັງຄົງສືບຕໍ່ເຄື່ອນໄຫວຢູ່. ທ່ານ ຫງວຽນດືງຮູຍ, ຫົວຫນ້າພະແນກແຜນການ ສັງກັດບໍລິສັດຮັບປະກັນຄວາມປອດໄພການເດີນທະເລຢູ່ທະເລຕາເວັນອອກ ແລະ ໝູ່ເກາະ ຊື່ງແມ່ນຜູ້ທີ່ໄດ້ຕິດພັນກັບບັນດາປະພາຄານມາເປັນເວລາຫລາຍປີໃຫ້ຮູ້ວ່າ.
“ເມື່ອອາກາດຮ້າຍແຮງ, ເລື່ອງຂົນສົ່ງວັດສະດຸກໍ່ສ້າງແມ່ນຫຍຸ້ງຍາກທີ່ສຸດ. ເພື່ອ ກໍ່ສ້າງ ປະພາຄານ ຢູ່ ເກາະ ອານບາງ, ກຳປັ່ນຫາຍດັງ ຕ້ອງຢູ່ເກາະແຫ່ງນີ້ 3 ເດືອນ. ເມື່ອຂາດວັດສະດຸກໍ່ສ້າງ ກຳປັ່ນຕ້ອງກັບຄືນ ຍາຈາງ ເພື່ອຂົນສົ່ງວັດສະດຸມາຮັບໃຊ້ການກໍ່ສ້າງ.”
ມາຮອດປະຈຸບັນ ຢູ່ໝູ່ເກາະ ເຈື່ອງຊາ ມີປະພາຄານ 9 ແຫ່ງ, ໃນນັ້ນ 3 ແຫ່ງໄດ້ຮັບການກໍ່ສ້າງຢູ່ເກາະໃຕ້ນ້ຳ ດາລາດ, ດາໄຕ ແລະຕຽນຫນື. ນອກຈາກເບິ່ງແຍງຮັບປະກັນໃຫ້ບັນດາປະພາຄານແຈ້ງສະຫວ່າງແລ້ວ, ບໍລິສັດດັ່ງກ່າວຍັງຮັບປະກັນເລື່ອງອອກສັນຍານເດີນທະເລໃຫ້ 21 ເກາະ ແລະ 33 ສະຖານທີ່ໃນເກາະຢູ່ເຂດທະເລ ເຈື່ອງຊາ. ສອງເດືອນເທື່ອຫນຶ່ງ, ກຳປັ່ນ ຫາຍດັງ 05 ຂົນສົ່ງອຸປະກອນ, ເຄື່ອງຂອງທີ່ຈຳເປັນໃຫ້ແກ່ພະນັກງານຢູ່ເມືອງເກາະ ເຈື່ອງຊາ. ນັບແຕ່ເດືອນ 10 ຂຶ້ນໄປ, ອາກາດຢູ່ທະເລແມ່ນຮ້າຍແຮງກວ່າ, ບາງເທື່ອກຳປັ່ນບໍ່ສາມາດລຳລຽງຂົນສົ່ງເຄື່ອງຂອງ, ທັນຍາຫານໃຫ້ພະນັກງານຢູ່ເມືອງເກາະ ເຈື່ອງຊາໄດ້. ທ່ານ ຫງວຽນຢີຫຽດ, ຜູ້ອຳນວຍການບໍລິສັດຮັບປະກັນຄວາມປອດໄພໃຫ້ການເດີນທະເລຢູ່ທະເລຕາເວັນອອກ ແລະ ໝູ່ເກາະ ໃຫ້ຮູ້ວ່າ:
“ພວກຂ້າພະເຈົ້າພວມສະເຫນີລັດ ຕໍ່ກຳປັ່ນໃຫຍ່ກວ່າຕື່ມອີກ ເພື່ອຮັບປະກັນໃຫ້ການລຳລຽງຂົນສົ່ງເຄື່ອງຂອງໃຫ້ພະນັກງານພວມປະຕິບັດງານຢູ່ໝູ່ເກາະເຈື່ອງຊາ. ພວກຂ້າພະເຈົ້າປາດຖະຫນາ ແລະ ສະເຫນີໃຫ້ກະຊວງຄົມມະນາຄົມຂົນສົ່ງ ແລະ ລັດມີແຜນການກໍ່ສ້າງບັນດາປະພາຄານຢູ່ 21 ເກາະ ທີ່ຂຶ້ນກັບໝູ່ເກາະ ເຈື່ອງຊາ ແລະ ປະຈຸບັນ ຍັງມີເກາະ 13 ແຫ່ງບໍ່ທັນມີປະພາຄານເພື່ອຮັບປະກັນຄວາມປອດໄພໃນການຄົມມະນາຄົມບົນທະເລໃຫ້ແກ່ກຳປັ່ນພາຍໃນ ແລະ ຕ່າງປະເທດ, ພິເສດ ແມ່ນຢືນຢັນອະທິປະໄຕຂອງຫວຽດນາມ ຢູ່ ທະເລຕາເວັນອອກ.”
(ປະພາຄານ ດ໋າລາດ)
ທ່ານ ຟ້າມກວກຊູຍ, ຜູ້ອຳນວຍການບໍລິສັດໃຫຍ່ ຮັບປະກັນຄວາມປອດໄພໃນການເດີນທະເລພາກໃຕ້ ໃຫ້ຮູ້ວ່າ, ນອກຈາກນຳໃຊ້ຄວາມກ້າວໜ້າດ້ານວິທະຍາສາດເຕັກນິກເພື່ອຍົກສູງຄຸນນະພາບລະບົບປະພາຄານແລ້ວ, ທາງບໍລິສັດໃຫຍ່ຍັງປັບປຸງ ແລະ ບູລະນະຖັນແຖວພະນັກງານ, ກຳມະກອນທີ່ເຮັດວຽກງານຮັກສາປະພາຄານໃຫ້ມີຄຸນນະທາດໝັ້ນຄົງ, ມີລະດັບຄວາມຮູ້ດ້ານວິຊາການສູງ.
“ບໍລິສັດໃຫຍ່ຈະສຸມໃສ່ເລົງທຶນຕື່ມອີກໃຫ້ເຂດໝູ່ເກາະ ເຈື່ອງຊາ, ສ້າງສະພາບແວດລ້ອມຮັບປະກັນຄວາມປອດໄພໃຫ້ການເດີນທະເລໃນພາກພື້ນ. ພ້ອມກັນນັ້ນ ຍັງປະຕິບັດບັນດາພັນທະ, ສິດ ແລະ ອະທິປະໄຕຂອງປະເທດທີ່ມີທະເລ ແລະ ພ້ອມກັບບັນດາກຳລັງຄື ທະຫານເຮືອ ແລະ ບັນດາກຳລັງອື່ນ ກຽມພ້ອມປົກປັກຮັກສາປະເທດຊາດເມື່ອມີຄວາມຈຳເປັນ.”
ໂດຍບໍ່ຫວາດຫວັ່ນຕໍ່ຄວາມຫຍຸ້ງຍາກລຳບາກ ທັງວັນ ແລະ ຄືນ ບັນດາກຳມະກອນຢູ່ປະພາຄານ ເຈື່ອງຊາ ໄດ້ຮັກສາບັນດາປະພາຄານ ໃຫ້ແຈ້ງສະຫວ່າງ. ບໍ່ພຽງແຕ່ຊ່ວຍໃຫ້ຊາວປະມົງອອກຫາປາຢູ່ ໄກຝັ່ງເທົ່ານັ້ນ, ຫາກຍັງປະກອບສ່ວນຢັ້ງຢືນອະທິປະໄຕຂອງປະເທດຊາດບົນທະເລຕາເວັນອອກອີກດ້ວຍ.