ປ້າເທີ ພວມບົວລະບັດສວນໝາກນັດຂອງຕົນ
|
(vovworld) - ດຸໝັ່ນຂະຫຍັນພຽນ, ກ້າຄິດ, ກ້າທຳ ແມ່ນບັນດາສິ່ງທີ່ປະຊາຊົນຢູ່ບ້ານ ເວີດລ້າຍ, ຕາແສງເວີດລ້າຍ, ເມືອງ ບາວີ່ (ຮ່າໂນ້ຍ) ເຄີຍເວົ້າກ່ຽວກັບປ້າ ຟູ່ງທິເທີ, ເຊິ່ງແມ່ນແບບຢ່າງແມ່ຍິງສ້າງຄວາມຮັ່ງມີໃນເຂດທີ່ດິນແຫ້ງແລ້ງຢູ່ທ້ອງຖິ່ນຕົນ. ດ້ວຍຄວາມຕັດສິນໃຈສູງ, ປ້າ ເທີ ໄດ້ຫັນເນື້ອທີ່ດິນຢູ່ເຂດພູດອຍ 12 ເຮັກຕາກາຍເປັນຮູບແບບເສດຖະກິດຟາມ ສວນ - ສະ - ຄອກ, ສ້າງວຽກເຮັດງານທຳເປັນປົກກະຕິໃຫ້ແກ່ຊາວກະສິກອນຫຼາຍຄົນ. ໄລຍະມໍ່ໆມານີ້, ປ້າ ຟູ່ງທິເທີ, ແມ່ນໜຶ່ງໃນຈຳນວນແມ່ຍິງດີເດັ່ນ100 ຄົນຂອງທົ່ວປະເທດທີ່ໄດ້ຮັບເຊີດຊູໃນລາຍການ “ຄວາມເອກອ້າງທະນົງໃຈແມ່ຍິງ ຫວຽດນາມ” ເນື່ອງໃນໂອກາດກອງປະຊຸມໃຫຍ່ແມ່ຍິງທົ່ວປະເທດຄັ້ງ 12. ບົດຂຽນຂອງ ເຟືອງທວາ, ນັກຂ່າວ VOV, ດ້ວຍຫົວຂໍ້ວ່າ “ແມ່ຍິງຜູ້ໄດ້ຫັນດິນແຫ້ງແລ້ງກາຍເປັນຟາມມີມູນຄ່ານັບຕື້ດົ່ງ”.
ປ້າ ຟູ່ງທິເທີ, ໄດ້ກຳເນີດໃນຄອບຄົວເຮັດກະສິກຳ. ລາຍຮັບຕົ້ນຕໍຂອງຄອບຄົວອີງໃສ່ ການຜະລິດກະສິກຳ. ປີ 2010, ເມື່ອທ້ອງຖິ່ນ ມີແຜນນະໂຍບາຍສົ່ງເສີມພັດທະນາເສດຖະກິດຄອບຄົວກະສິກຳ, ປ້າເທີ ໄດ້ກ້າຫານຮັບເໝົາເນື້ອທີ່ດິນພູຫົວໂລ້ນ 12 ເຮັກຕາເພື່ອເຮັດຮູບແບບຟາມ ສວນ - ສະ - ຄອກ. ດວຍຄວາມລຳບາກກາກກຳຢ່າງຫຼວງຫຼາຍ, ແຕ່ດ້ວຍຄວາມຄິດ “ຮັກທີ່ດິນ, ດິນຈະໃຫ້ຜົນ” ດັ່ງນັ້ນ, ປ້າ ເທີ ໄດ້ຕັດສິນໃຈຄົ້ນຄ້ວາຜ່ານການອ່ານປື້ມ, ຢູ່ບ່ອນໃດມີຮູບແບບສ້າງເສດຖະກິດ ຟາມ ມີປະສິດທິຜົນ ປ້າກໍ່ໄປຮ່ຳຮຽນເອົາບົດຮຽນ. ປ້າ ຟູ່ງທິເທີ ໄດ້ແບ່ງປັນວ່າ:
“ໄລຍະທຳອິດບໍ່ທັນຮູ້ວິທີລ້ຽງໄກ່, ດັ່ງນັ້ນຂ້າພະເຈົ້າໄດ້ປູກໝາກຖົ່ວ. ຮອດຍາມເກັບກູ້ປະສົບກັບຄວາມຫຍຸ້ງຍາກຍ້ອນວ່າຕົ້ນໃຫ້ໝາກຫຼາຍໂພດ. ຫຼັງຈາກນັ້ນໄດ້ປູກມັນເພົາ ເພື່ອຫາເງິນຈ່າຍຄ່າແຮງງານໃຫ້ກຳມະກອນຜູ້ອອກແຮງງານ ແລະ ຫາເງິນເພື່ອບົວລະບັດຕົ້ນໝາກກ້ຽງໃຫຍ່, ໝາກລຳໄຍ… ພວກຂ້າພະເຈົ້າ ໄດ້ເບິ່ງສື່ມວນຊົນເພື່ອຮູ້ວ່າລ້ຽງສັດໂຕຫຍັງ, ເກັບກູ້ບັນດາຂໍ້ມູນກ່ຽວກັບການຈຳໜ່າຍ. ຖ້າຫາກບໍ່ໄດ້ຄົ້ນຄ້ວາກໍ່ບໍ່ສາມາດເຮັດໄດ້.”
ແຕ່ເຖິງຢ່າງໃດກໍ່ຕາມ, ເມື່ອເລີ່ມດຳເນີນທຸລະກິດ, ຄອບຄົວຂອງປ້າ ເທີ ໄດ້ປະສົບກັບຄວາມຫຍຸ້ງຍາກຫຼາຍຢ່າງໃນຂະນະທີ່ຖືກຈຳກັດດ້ານທຶນຮອນ, ລາຄາໃນທ້ອງຕະຫຼາດມີການເໜັງຕີງ… ຍ້ອນໄດ້ຮັບການລະດົມກຳລັງໃຈ ແລະ ສ້າງເງື່ອນໄຂສະດວກເພື່ອເຂົ້າຮ່ວມບັນດາຊຸກຝຶກອົບຮົມ, ຖ່າຍທອດວິທະຍາສາດ, ເຕັກນິກ, ໄປຢ້ຽມຢາມບັນດາຮູບແບບເສດຖະກິດດີເດັ່ນຈາກສະຫະພັນແມ່ຍິງ, ສະມາຄົມຊາວກະສິກອນຕາແສງ ເວີດລ້າຍ, ປ້າ ຟູ່ງທິເທີ ໄດ້ຢຶດໝັ້ນ, ແກ້ໄຂຄວາມຫຍຸ້ງຍາກ, ຖອດຖອນບົດຮຽນຢ່າງບໍ່ຢຸດຢັ້ງ. ປະຈຸບັນ, ໃນເນື້ອທີ່ 12 ເຮັກຕາ, ປ້າເທີ ໄດ້ສະຫງວນເນື້ອທີໜ້ານ້ຳ 1 ເຮັກຕາເພື່ອລ້ຽງປູກສິນໃນນ້ຳ; ເນື້ອທີດິນຍັງເຫຼືອໄດ້ເຮັດສວນປູກຕົ້ນໄມ້, ປູກຕົ້ນໄມ້ກິນໝາກປະເພດຕ່າງໆຄື: ໝາກກ້ຽງໃຫຍ່ຢ໋ຽນ, ລຳໄຍ, ໝາກມີ້, ໝາກນັດ… ແລະ ເຮັດຄອກລ້ຽງສັດບາງປະເພດຄື: ໄກ່, ໝູ່, ໄກ່ລ້ຽງຢູ່ນົນພູ. ແຕ່ລະປີ, ຮູບແບບນີ້ໄດ້ນຳມາເຊິ່ງແຫຼ່ງລາຍຮັບສະເລ່ຍກ່ວາ 1 ຕື້ດົ່ງ. ປ້າ ເທີ ໄດ້ໃຫ້ຮູ້ວ່າ:
“ກ່ອນນີ້, ມີຜູ້ອອກແຮງງານຢ່າງຫຼວງຫຼາຍ, ແຕ່ປະຈຸບັນ, ຂ້າພະເຈົ້າໄດ້ປະຕິບັດການຫັນເປັນທັນສະໄໝ ຄືລົງທຶນຊື້ເຄື່ອງຈັກຈຳນວນໜຶ່ງ. ຄຽງຄູ່ກັນນັ້ນ ແມ່ນຕິດຕາມຂໍ້ມູນຂ່າວຈາກຕະຫຼາດ, ເຫັນວ່າສິນຄ້າປະເພດໃດທີ່ຕະຫຼາດຕ້ອງການເຮົາຈະທະວີຄຸນຕື່ມອີກ”
ປ້າເທິໃນພິທີຮັບໃບຍ້ອງຍໍແມ່ນ 1 ໃນຈຳນວນ 100 ແມ່ຍິງດີເດັ່ນ
|
ຟາມຂອງປ້າ ເທີ ກໍ່ໄດ້ປະກອບສ່ວນສ້າງວຽກເຮັດງານທຳເປັນປົກກະຕິໃຫ້ແກ່ຄົນງານປະມານ 30 ຄົນ, ດ້ວຍລາຍຮັບເປັນປົກກະຕິປະມານແຕ່ 3 – 7 ລ້ານດົ່ງ/ເດືອນ. ບໍ່ພຽງແຕ່ສຸມໃສ່ເຂົ້າການເສີມຂະຫຍາຍຮູບແບບຟາມຢູ່ຄອບຄົວຕົນເທົ່ານັ້ນ, ປ້າ ຟູ່ງທິເທີ ຍັງເປັນເຈົ້າການຊ່ວຍໃຫ້ບັນດາຄອບຄົວທຸກຍາກກ່ຽວກັບທຶນຮອນ, ສ້າງວຽກເຮັດງານທຳ… ຊ່ວຍໃຫ້ເຂົາເຈົ້າເພີ່ມລາຍຮັບ ແລະ ບື່ນຕົວຂຶ້ນຫລຸດພົ້ນອອກຈາກຄວາມທຸກຍາກແບບຍືນຍົງ. ເອື້ອຍ ຫງວຽນທິຮ່າ, ບ້ານ ເວີດລ້າຍ, ຕາແສງ ເວີດລ້າຍ, ເມືອງ ບາວີ, ໄດ້ເຮັດວຽກຢູ່ຟາມຂອງປ້າ ເທີ ມາເປັນເວລາ 7 ປີໄດ້ໃຫ້ຮູ້ວ່າ:
“ເອື້ອຍເທີ ໄດ້ສ້າງເງື່ອນໄຂໃຫ້ພວກຂ້າພະເຈົ້າມີວຽກເຮັດງານທຳ ແລະ ຍັງໄດ້ສ້າງເງື່ອນໄຂສະດວກໃຫ້ແກ່ເອື້ອຍນ້ອງປູກເຂົ້າ, ລ້ຽງສັດຢູ່ຄອບຄົວ. ສຳລັບບັນດາຜູ້ເຮັດເສດຖະກິດຟາມ ມານີ້ຊອກຮູ້ບົດຮຽນໃນການປູກຕົ້ນໄມ້ກິນໝາກ ແລະ ລ້ຽງສັດ, ສັດປີກ, ຍາມໃດເອື້ອຍ ເທີ ກໍ່ແບ່ງປັນບົດຮຽນຢ່າງສຸດຈິດສຸດໃຈ”
ພາຍຫຼັງຫຼາຍປີມານະພະຍາຍາມ, ດ້ວຍຄວາມສຸດຈິດສຸດໃຈ, ຄວາມດຸໝັ່ນຂະຫຍັນພຽນ, ກ້າຄິດກ້າທຳຂອງຕົນເອງ, ຄອບຄົວປ້າ ຟູ່ງທິເທີ ຄ່ອຍໆໄດ້ຫລຸດພົ້ນອອກຈາກຄວາມທຸກຍາກ, ບື່ນຕົວຂຶ້ນເທື່ອລະກ້າວ ກາຍເປັນຄອບຄົວຮັ່ງມີພໍສົມຄວນ. ຜົນງານຈາກຮູບແບບເສດຖະກິດຟາມສວນ - ສະ - ຄອກ, ແບບຢ່າງສ້າງຄວາມຮັ່ງມີຂອງ ປ້າ ຟູ່ງທິເທີ ໄດ້ກາຍເປັນແບບຢ່າງໃຫ້ແກ່ບັນດາຄອບຄົວໃນເຂດຮ່ຳຮຽນ ແລະ ເຮັດຕາມ.