(vovworld) - ຕອນຄ່ຳວັນທີ 21/03, ຢູ່ຕາແສງ ທໍ້ໂລກ, ເມືອງ ຟຸ໋ກທໍ້, ຮ່າໂນ້ຍ ໄດ້ຈັດພິທີສະຫຼຸບລາຍການ “ສົ່ງນັກສຶກສາລາວ ພວມຮ່ຳຮຽນຢູ່ໂຮງຮຽນ T78 ລົງຕົວຈິງຢູ່ເຮືອນຂອງຊາວຫວຽດນາມ” (homestay) ສົກຮຽນ 2016 – 2017. ເຂົ້າຮ່ວມພິທີສະຫຼຸບມີທ່ານ ອຳພາວັນ ກວ້າງມະນີວັນ, ທີ່ປຶກສາດ້ານວັດທະນະທຳ - ການສຶກສາ, ສະຖານທູດລາວ ປະຈຳຫວຽດນາມ; ທ່ານນາງ ຫງວຽນທິລານແອງ, ຮອງເລຂາທິການໃຫຍ່, ທັງເປັນຮອງຫົວໜ້າຫ້ອງການສະມາຄົມມິດຕະພາບຫວຽດນາມ - ລາວ ນະຄອນຮ່າໂນ້ຍ; ທ່ານ ຫງວຽນຕ່ວານເຫງັ້ຍ, ຫົວໜ້າອຳນວຍການໂຮງຮຽນ T78, ພ້ອມກັບຄະນະອຳນວຍການໂຮງຮຽນ, ບັນດາຄອບຄົວຕ້ອນຮັບນັກສຶກສາລາວ ແລະ ບັນດານັກສຶກສາ.
.jpg)
(ທ່ານ ເລຟຸ໋ທັ໋ງ, ຮອງຫົວໜ້າອຳນວຍການໂຮງຮຽນ T78 ກ່າວຄຳເຫັນທີ່ພິທີ)
ທີ່ພິທີ, ທ່ານ ເລຟຸ໋ທັ໋ງ, ຮອງຫົວໜ້າອຳນວຍການໂຮງຮຽນ T78, ຫົວໜ້າຄະນະຈັດຕັ້ງແຜນຮ່າງ homestay ໃຫ້ຮູ້ວ່າ: ລາຍການ homestay ສົກຮຽນ 2016 – 2017 ໄດ້ຮັບການຜັນຂະຫາຍດ້ວຍຂອບຂະໜາດໃຫຍ່, ດ້ວຍຈຳນວນນັກຮຽນເຂົ້າຮ່ວມແມ່ນ 80 ຄົນ, ພັກອາໄສຢູ່ກັບ 40 ຄອບຄົວໃນບ້ານ ເບື໋ອມ ແລະ ບ້ານ ໂຫທົນ ໄດ້ຮັບໝາກຜົນຢ່າງດີງາມ.
“ບັນດານັກສຶກສາລາວ ເມື່ອດຳລົງຊີວິດພ້ອມກັບພໍ່ແມ່ປະຊາຊົນນັ້ນ, ນ້ຳໃຈຄວາມຮັກແພງລະຫວ່າງນັກສຶກສາ ແລະ ພໍ່ແມ່ປະຊາຊົນເລິກເຊິ່ງກວ່າອີກ, ບັນດາພວກນ້ອງກໍ່ຮັກຫອມບັນດາສະມາຊິກໃນຄອບຄົວເຊິ່ງຕົນເອງດຳເນີນຊີວິດ ແລະ ພວກນ້ອງກໍ່ຖືນັ້ນເປັນຄອບຄົວທີ່ 2 ຂອງຕົນ, ບັນດາຄອບຄົວນັ້ນກໍ່ເບິ່ງແຍງດູແລ, ຊ່ວຍເຫຼືອພວກນ້ອງໃນການຮ່ຳຮຽນ ແລະ ດຳລົງຊີວິດ. ນີ້ແມ່ນໝາກຜົນທີ່ໜ້າປະທັບໃຈ ແລະ ມີຄວາມໝາຍອັນໃຫຍ່ຫຼວງໃນການສ້າງສາ ແລະ ເພີ່ມພູນຄຸນສ້າງນ້ຳໃຈມິດຕະພາບລະຫວ່າງຫວຽດນາມ - ລາວ”
.jpg)
(ທ່ານນາງ ຫງວຽນທິລານແອງ, ຮອງຫົວໜ້າຫ້ອງການ
ສະມາຄົມມິດຕະພາບຫວຽດນາມ - ລາວ ນະຄອນຮ່າໂນ້ຍ ມອບໃບຍ້ອງຍໍ)
ເມື່ອຕີລາຄາກ່ຽວກັບຮູບແບບການເຄື່ອນໄຫວ homestay, ທ່ານນາງ ຫງວຽນທິລານແອງ, ຮອງເລຂາທິການໃຫຍ່, ທັງເປັນຮອງຫົວໜ້າຫ້ອງການສະມາຄົມມິດຕະພາບຫວຽດນາມ - ລາວ ນະຄອນຮ່າໂນ້ຍ, ໃຫ້ຮູ້ວ່າ.
“ຮູບແບບການເຄື່ອນໄຫວ homestay ແມ່ນຈຸດທີ່ເປັນເອກະລັກສະເພາະຂອງສະມາຄົມມິດຕະພາບຫວຽດນາມ - ລາວ ນະຄອນຮ່າໂນ້ຍ. ຮູບແບບ homestay ໄດ້ຮັບການຕີລາຄາສູງຈາກສູນກາງ ແລະ ພວກຂ້າພະເຈົ້າກໍ່ສະໜັບສະໜູນການມີຫົວຄິດປະດິດສ້າງຂອງໂຮງຮຽນ T78. ປະຊາຊົນຢູ່ທີ່ນີ້ຕ້ອນຮັບນັກສຶກສາລາວ ມາດຳລົງຊີວິດຢູ່ຮ່ວມກັບຄອບຄົວຢ່າງສຸດຈິດສຸດໃຈ. ນີ້ແມ່ນການເຄື່ອນໄຫວເພື່ອຍູ້ແຮງການພົວພັນກັບປະຊາຊົນຕ່າງປະເທດ ຖືກຕາມການຊີ້ນຳນຳພາຂອງພັກ ແລະ ລັດ”.
.jpg)
ເນື່ອງໃນໂອກາດນີ້, ທາງໂຮງຮຽນ, ສະຖານທູດລາວ ປະຈຳຫວຽດນາມ, ສະມາຄົມມິດຕະພາບຫວຽດນາມ - ລາວ ນະຄອນຮ່າໂນ້ຍ ກໍໄດ້ມອບໃບຍ້ອງຍໍໃຫ້ບັນດາຄູອາຈານ ແລະ ຄອບຄົວ ທີ່ໄດ້ເຂົ້າຮ່ວມລາຍການ ເພື່ອຮັບຮູ້ບັນດາການປະກອບສ່ວນເພີ່ມທະວີການພົວພັນຮ່ວມມືລະຫວ່າງຫວຽດນາມ - ລາວ.