ສຳລັບຊາວຫວຽດນາມແລ້ວ, ຕົ້ມເຄັມປາໂຄກແມ່ນເຍື່ອງອາຫານປະຈຳວັນມີຢູ່ທຸກແຫ່ງຫົນໃນປະເທດຫວຽດນາມ. ແຕ່ຢູ່ໝູ່ບ້ານ ດ້າຍຮ່ວາງ, ເມືອງຫຼີເຍີນ, ແຂວງຮ່ານາມ, ອາຫານເຍື່ອງນີ້ໄດ້ກາຍເປັນເຄື່ອງໝາຍການຄ້າທີ່ມີຊື່ສຽງ. ຊາວບ້ານດ້າຍຮ່ວາງຖືວ່າ : ຕົ້ມເຄັມປາໂຄກຢູ່ບ້ານຕົນ ແມ່ນແຊບກວ່າໝູ່ເມື່ອທຽບໃສ່ແຫ່ງອື່ນໆ.
ຕົ້ມເຄັມປາໂຄກ - ເຍື່ອງອາຫານພິເສດຂອງແຂວງຮ່ານາມ |
ພາຍຫຼັງຂີ່ລົດຈັກປະມານ 50 ນາທີ, ຈາກນະຄອນຝູຫຼີ, ແລ່ນລຽບຕາມຝັ່ງແມ່ນ້ຳເຈົາຢາງ, ກໍຈະຮອດໝູ່ບ້ານ ດ້າຍຮ່ວາງ. ໂດຍຍ່າງຕາມເສັ້ນທາງຖືກກໍ່ສ້າງດ້ວຍເບຕົງພາໄປເຖິງເຮືອນຂອງລຸງ ເຈີນບ້າລ້ວນ, ເວລານີ້ແມ່ນປະມານ 14 ໂມງ. ຈາກຫົວທາງຮ່ອມ, ພວກຂ້າພະເຈົ້າກໍໄດ້ຍິນສຽງລົມກັນຢ່າງເນື່ອງນັນຢູ່ສະລ້ຽງປາທາງຫຼັງເຮືອນ. ເວລານີ້, ລຸງລ້ວນພ້ອມກັບພີ່ນ້ອງອີກ 3 ຄົນພວມດຶງມອງຫາປາໂຄກດຳໃນສະກວ້າງປະມານຮ້ອຍຕາແມັດເພື່ອກະກຽມປຸງແຕ່ງເຍື່ອງອາຫານຕົ້ມເຄັມປາໂຄກ. ລຸງ ເຈີນບ້າລ້ວນໃຫ້ຮູ້ວ່າ :
“ ປາໂຄກດຳ ເມື່ອປຸງແຕ່ງເປັນເຍື່ອງອາຫານຕ່າງໆກໍຈະເຮັດໃຫ້ມີລົດຊາດພິເສດ ແລະ ມີບັນດາທາດບຳລຸງຕໍ່ສຸຂະພາບ. ສຳລັບປາໂຄກດຳ, ກໍແມ່ນປາຊະນິດທີ່ແຊບກວ່າໝູ່ເມື່ອທຽບໃສ່ປານ້ຳຈືດທຸກຊະນິດທີ່ໃຊ້ເພື່ອປຸງແຕ່ງເຍື່ອງອາຫານຕົ້ມເຄັມ. ເມື່ອຕົ້ມເຄັມປາ, ຖ້າຮູ້ຈັກວິທີປະສົມກັບເຄື່ອງປຸງ, ກໍຈະເຮັດໃຫ້ອາຫານເຍື່ອງນີ້ແຊບ ແລະ ມີລົດຊາດຫອມພິເສດ ”
ລຸງລ້ວນພວມຊອຍຫົວຂ່າເປັນປ່ຽງບາງໆເພື່ອເອົາຮອງໃສ່ພື້ນໝໍ້ດິນເພື່ອບໍ່ໃຫ້ປາໄໝ້ ແລະ ຕິດໝໍ້. ລຸງລ້ວນເອົາປາທີ່ໄດ້ຕັດເປັນ 4 ຕ່ອນ (ບໍ່ເອົາຫົວ ແລະ ຫາງຂອງມັນ)ໃສ່ໝໍ້ດິນ. ລຸງລ້ວນສືບຕໍ່ເອົາຫົວຂ່າ ແລະ ຂີງທີ່ໄດ້ຕຳໃຫ້ມຸ່ນ, ແລ້ວໂຮຍໃສ່ຕ່ອນປາ ເພື່ອເຮັດໃຫ້ໃນເວລາຕົ້ມເຄັມ, ເຄື່ອງປຸງຈະຊຶມເຂົ້າເນື້ອປາ. ຕໍ່ຈາກນັ້ນ, ກໍເອົາໝໍ້ຕົ້ມເຄັມປາໄປໃຫ້ປ້າຮ່ວານ ຊຶ່ງແມ່ນຜູ້ເປັນເມຍຂອງລຸງລ້ວນ ເພື່ອເອົາຫົວຜັກບົ່ວ, ໝາກເຜັດ, ນ້ຳປາໃສ່ຕື່ມອີກ. ສຳຄັນກວ່າໝູ່ແມ່ນຕ້ອງເອົານ້ຳດອງປູໃສ່ຕື່ມ ເພາະມັນຈະເຮັດໃຫ້ເພີ່ມລົດຫວານແບບທຳມະຊາດໃຫ້ເຍື່ອງອາຫານຕົ້ມເຄັມປາຕື່ມອີກ. ປ້າຮ່ວານເປີດເຜີຍວ່າ :
“ ເມື່ອຕົ້ມເຄັມປາ ແມ່ນແຊບກ່ວາເມື່ອທຽບໃສ່ໝໍ້ໂລຫະ. ສຳລັບໝໍ້ດິນເຜົານັ້ນ, ແມ່ນຕ້ອງຊື້ມາຈາກແຂວງເງະອ່ານ ຈຶ່ງສາມາດຮັບປະກັນຄວາມທົນທານໃນຕະຫຼອດເວລາຕົ້ມເຄັມ. ພາຍຫຼັງທີ່ເອົາປາໃສ່ໝໍ້ແລ້ວ, ຈຶ່ງເອົາເຄື່ອງປຸງໃສ່ຕາມຫຼັງ ”
ປ້າຮ່ວານຟ້າວນຳເອົາໝໍ້ຕົ້ມເຄັມປາເຂົ້າໃນເຮືອນຄົວທີ່ມີເນື້ອທີ່ປະມານ 10 ຕາແມັດ. ໃນເຮືອນຄົວມີຂ່ຽງຍາວເຮັດດ້ວຍເຫຼັກ 3 ອັນ, ແຕ່ລະອັນ ກໍສາມາດວາງໝໍ້ຕົ້ມເຄັມໄດ້ປະມານ 10 ໝໍ້. ລຸງລ້ວນໃຫ້ຮູ້ກ່ຽວກັບວິທີດັງໄຟເມື່ອຕົ້ມເຄັມປາວ່າ :
“ ຂອດທີ່ສຳຄັນກ່ວາໝູ່ ແມ່ນຕ້ອງຮັກສາຄວາມຮ້ອນຂອງເຕົາໄຟໄດ້, ຕ້ອງເຮັດໄຟອ່ອນໆເພື່ອໃຫ້ນ້ຳໃນໝໍ້ຕົ້ມເຄັມປາຄ່ອຍຟົດຕະຫຼອດ, ຖ້າບໍ່ດັ່ງນັ້ນ, ຈະເຮັດໃຫ້ນ້ຳໃນໝໍ້ແຫ້ງໄວ. ຖ້າຢາກຕົ້ມເຄັມປາໃຫ້ແຊບນັ້ນ, ກໍຕ້ອງໃຊ້ເວລາປະມານ 14-16 ຊົ່ວໂມງ. ດ້ວຍບົດຮຽນໃນການຕົ້ມເຄັມປາຂອງຄອບຄົວແລ້ວ, ຖ້າໄດ້ຟັງສຽງນ້ຳຟົດ ກໍອາດຈະຮູ້ວ່າຮອດເວລາໃດນ້ຳໃນໝໍ້ຈະແຫ້ງ ແລະ ຖ້າໄດ້ດົມກິ່ນ ກໍຈະຮູ້ໂລດວ່າປາຈະເຄັມຫຼືຈາງ ”
ໃນເມື່ອຕົ້ມເຄັມປາໃກ້ຈະສຳເລັດນັ້ນ, ປ້າຮ່ວານກໍເອົານ້ຳໝາກນາວຕື່ມໃສ່ 1 ບ່ວງກາເຟເພື່ອດັບກິ່ນຄາວ, ທັງເປັນການສ້າງລົດຊາດພິເສດໃຫ້ອາຫານເຍື່ອງນີ້.
ແຕ່ລະມື້, ຄອບຄົວລຸງລ້ວນໄດ້ຂາຍຕົ້ມເຄັມປາອອກສູ່ຕະຫຼາດໄດ້ແຕ່ 300-400 ໝໍ້, ດ້ວຍລາຄາແຕ່ 4 ແສນຫາ 1 ລ້ານກວ່າດົງ. ໝໍ້ຕົ້ມເຄັມປາເມື່ອປຸງແຕ່ງສຳເລັດແລ້ວ ຈະມີກິ່ນຫອມຫວນ, ເນື້ອປາແໜ້ນ, ຫວານ ແລະ ຫອມກິ່ນຫົວຂ່າ.
ທ່ານຜູ້ຟັງທີ່ເຄົາລົບ! ຖ້າຫາກພວກເພື່ອນຢາກເຮັດຕົ້ມເຄັມປາໃຫ້ຄອບຄົວກິນ, ພວກເພື່ອນຕ້ອງກະກຽມວັດຖຸດິບດັ່ງນີ້:
- ປາໂຄກດຳ:ໂຕ 1 (ປະມານ 3 kg ຂຶ້ນໄປ)
- ຫົວຂ່າ, ຂີງ, ຫົວຜັກຫອມບົວແຫ້ງ, ໝາກພີກໄທ, ເກືອ, ແປ້ງນົວ
- ນ້ຳຕານໄໝ້, ນ້ຳກະທິໝາກພ້າວ
- ໝາກນາວ, ໝາກເຜັດດິບ
- ວິທີປຸງແຕ່ງ :
ທຳອິດຕ້ອງຄົວປາ, ເຊາະເກັດ, ເອົາໄສ້ອອກ ແລະ ລ້າງໃຫ້ສະອາດ, ຕັດເອົາແຕ່ໂຕ, ບໍ່ເອົາຫົວ ແລະ ຫາງຂອງປາ, ແລ້ວກໍເອົາມີດຄ່ອຍແລ່ສອງສາມບາດ, ຫຼັງຈາກນັ້ນເອືອບກັບເກືອ, ແປ້ງນົວ.
ສຳລັບໝໍ້ດິນເຜົານັ້ນ, ກ່ອນທີ່ຈະໃຊ້ເພື່ອຕົ້ມເຄັມປາ, ກໍຕ້ອງຕົ້ມໝໍ້ໃຫ້ສະອາດເສຍກ່ອນ, ແລ້ວຊອຍຫົວຂ່າເປັນປ່ຽງບາງໆເພື່ອເອົາຮອງໃສ່ກົ້ນໝໍ້ດິນເຜົາເພື່ອບໍ່ໃຫ້ປາຖືກໄໝ້ ແລະ ຕິດໝໍ້. ແລ້ວກໍເອົາເນື້ອປາໃສ່. ຕໍ່ຈາກນັ້ນ ກໍໂຮຍຫົວຂ່າ ແລະ ຂີງທີ່ໄດ້ຕຳໃຫ້ມຸ່ນໃສ່ເທິ່ງ. ຫຼັງຈາກນັ້ນ, ກໍເອົານ້ຳປາ 1 ບ່ວງກາເຟ, ເກືອ 2 ບ່ວງກາເຟພ້ອມກັບແປ້ງນົວ, ນ້ຳໝາກນາວ, ນ້ຳກະທິ ແລະ ນ້ຳນ້ຳຕານໄໝ້ໃສ່ເພື່ອໃຫ້ມີສີງາມ. ຕໍ່ຈາກນັ້ນ ກໍເຕີມນ້ຳໃສ່ ແລະ ເຮັດໄຟອ່ອນໆ. ຕ້ອງຕົ້ມເຄັມປາໃນເວລາປະມານ 16 ຊົ່ວໂມງ ຈົນກວ່າເນື້ອປາອ່ອນນຸ່ມ. ສຸດທ້າຍກໍເອົາຜັກຫອມບົ່ວ, ໝາກເຜັດ, ນ້ຳໝາກນາວ ແລະ ໝາກພີກໄທໃສ່ຕື່ມເພື່ອເພີ່ມກິ່ນຫອມ. ຫວັງວ່າພວກເພື່ອນຈະເຮັດກິນແຊບ.