ກໍ່ຄ້າຍຄືກັນກັບເຍື່ອງອາຫານເຝີທີ່ຢູ່ທາງພາກເໜືອ, ຮູຕ໋ຽວແມ່ນເຍື່ອງອາຫານທີ່ແຜ່ຂະຫຍາຍຫຼາຍຢູ່ທາງພາກໃຕ້ຂອງຫວຽດນາມ ແລະ ໄດ້ຮັບການປຸງແຕ່ງເປັນຫຼາຍປະເພດຄື: ຮູຕ໋ຽວນາມວາງ, ຮູຕ໋ຽວຊາແດັກ, ຮູຕ໋ຽວມີທໍ,….ດ້ວຍລົດຊາດທີ່ແຊບນົວ, ມີກິ່ນຫອມ, ເຂັ້ມຂຸ້ນ, ຮູຕ໋ຽວໄດ້ດຶງດູດຄວາມສົນໃຈຈາກແຂກທັງຢູ່ພາຍໃນ ແລະ ຕ່າງປະເທດຫຼາຍທີ່ສຸດ.
ຮູຕ໋ຽວໃສ່ປາເມິກ ກັບ ລູກຊີ້ນ
|
ເວລາ 9 ໂມງເຊົ້າ, ໃຕ້ແສງແດດຮ້ອນອົບເອົ້າຢູ່ໄຊງ່ອນ, ຮັ່ງໄດ້ພາສ່ຽວຂອງຕົນ ທີ່ມາຈາກຮ່າໂນ້ຍ ຊຶ່ງແມ່ນເພື່ອນຮ່ວມຫ້ອງດຽວກັນຢູ່ມະຫາວິທະຍາໄລ ໄປກິນຮູຕ໋ຽວ-ເຍື່ອງອາຫານທີ່ເປັນເອກະລັກສະເພາະຂອງພາກໃຕ້, ບໍ່ວ່າແຂກຜູ້ໃດມາຢ້ຽມຢາມເຂດດິນແດນນີ້ກໍ່ບໍ່ອາດຂາດໄດ້.
ຮັ່ງ ແລະ ເພື່ອນຂອງລາວໄດ້ເຂົ້າໄປຮ້ານ “ຮູຕ໋ຽວໃສ່ປາເມິກ ກັບ ລູກຊີ້ນ-ອາຫານທີ່ເປັນເອກະລັກສະເພາະຂອງດິນແດນພາກໃຕ້” ທີ່ມີຊື່ສຽງໃນຖະນົນຫງວຽນຮົ່ງດ່າວ, ເມືອງເຕິນບິ່ງ-ນະຄອນໂຮ່ຈີມິນ. ເຊິ່ງແມ່ນຮ້ານທີ່ມີຊື່ສຽງດ້ວຍປ້າຍໃຫຍ່, ສີແດງ, ຍາວເກືອບ 3 ແມັດຕິດຢູ່ທາງນອກຊັ້ນ3ຂອງຮ້ານ. ຍ້ອນມີປ້າຍອັນໃຫຍ່ໂຕນັ້ນ ຮ້ານຈຶ່ງດຶງດູດຄວາມສົນໃຈຈາກຜູ້ຄົນໄປມາໃນຄຸ້ມຖະໜົນນີ້ໄດ້ຫຼາຍຄົນ. ຮັ່ງ ແລະ ເພື່ອນຂອງລາວກໍ່ ຟ້າວໄປເລືອກນັ່ງໂຕະບ່ອນທີ່ສາມາດເບິ່ງເຫັນທັດສະນະຍະພາບຖະໜົນຫົນທາງຜ່ານແກ້ວແວ່ນໃສນັ້ນ.
ປະຈຸບັນ ຖ້ວຍຮູຕ໋ຽວໃສ່ປາເມິກ ແລະ ລູກຊີ້ນຮ້ອນໆທີ່ພວມອອກອາຍ ແລະ ມີກິ່ນຫອມໄປທົ່ວຫ້ອງນັ້ນໄດ້ວາງຢູ່ຕໍ່ໜ້າຂອງຮັ່ງ ແລະ ເພື່ອນຂອງລາວແລ້ວ.
“ເມື່ອຂ້າພະເຈົ້າຮັບປະທານຮູຕ໋ຽວຢູ່ທີ່ນີ້, ຂ້າພະເຈົ້າຮູ້ສຶກວ່າມີລົດຊາດນົວໆ, ເຂັ້ມຂຸ້ນຂອງນ້ຳຮູຕ໋ຽວ, ພິເສດແມ່ນມີກິ່ນຫອມຈາກອາຫານທະເລ, ເສັ້ນຮູຕ໋ຽວກໍ່ໜຽວນຸ້ມ, ກອບ. ພິເສດແມ່ນມັນມີລົດຊາດທີ່ບໍ່ຄືກັນກັບລົດຊາດຂອງຮູຕ໋ຽວທີ່ຂ້າພະເຈົ້າເຄີຍໄດ້ຮັບປະທານຜ່ານມາ ບໍ່ວ່າແຕ່ຢູ່ແຫ່ງໃດ. ເມື່ອເວລາວ່າງ ຂ້າພະເຈົ້າພ້ອມກັບໝູ່ເພື່ອນມັກມາກິນຢູ່ຮ້ານນີ້ ບາງເທື່ອອາທິດໜຶ່ງກໍ່ 3-4 ເທື່ອ.”:
“ນີ້ເປັນຄັ້ງທຳອິດທີ່ຂ້າພະເຈົ້າໄດ້ຮັບປະທານເຍື່ອງອາຫານ ຮູຕ໋ຽວໃສ່ປາເມິກ ແລະ ລູກຊີ້ນຢູ່ທີ່ນີ້, ຕົນເອງຮູ້ສຶກວ່ານ້ຳຮູຕ໋ຽວນົວໆ, ມີກິ່ນຫອມຂອງລູກຊີ້ນ ແລະ ປາເມິກ, ກິ່ນຫອມຂອງຜັກຫອມຊະນິດຕ່າງໆ ໄດ້ສ້າງເປັນເຍື່ອງອາຫານທີ່ມີຄວາມກົມກຽວ ແລະ ເປັນເອກະລັກສະເພາະ. ເທື່ອໜ້າຖ້າມີໂອກາດ ແນ່ນອນວ່າຕົນເອງຕ້ອງມາກິນຮູຕ໋ຽວຢູ່ຮ້ານນີ້ອີກ.”
ຮ້ານຮູຕ໋ຽວກວ້າງປະມານ 20 ຕາແມັດ, ທາງໜ້າຂອງຮ້ານທັງສາມຊັ້ນລ້ວນແຕ່ໃສ່ແກ້ວ ເພື່ອຮັບແສງແດດໃນຍາມເຊົ້າຂອງມື້ໃໝ່. ແຕ່ລະຊັ້ນຈັດວາງໂຕະຕັ່ງໃສ່ປະມານ 5-6 ຊຸດ. ເຖິງວ່າມີເນື້ອທີ່ໜ້ອຍຄືແນວນັ້ນກໍຕາມ ແຕ່ຮ້ານກໍ່ສາມາດຮັບໃຊ້ແຂກທີ່ມາກິນໃນເວລາດຽວກັນ ແຕ່ 30 – 40 ຄົນໄດ້. ເມື່ອຖືກຖາມວ່າ ເປັນຫຍັງຈຶ່ງຕັ້ງຊື່ຮ້ານວ່າ “ຮູຕ໋ຽວ ປາເມິກ ລູກຊີ້ນ-ເອກະລັກສະເພາະພາກໃຕ້ ” ອ້າຍ ຫງວຽນວັນເກື່ອງ ເຈົ້າຂອງຮ້ານໃຫ້ຮູ້ວ່າ :
“ຄອບຄົວຂອງຂ້າພະເຈົ້າແມ່ນຢູ່ເບ໋ນແຈ, ມີມູນເຊື້ອເຮັດ ຮູຕ໋ຽວໃສ່ປາເມິກກັບລູກຊີ້ນມາຫຼາຍລຸ້ນຄົນແລ້ວ. ຂ້າພະເຈົ້າໄປນະຄອນເປີດຮ້ານ ເພື່ອສືບຕໍ່ຮັກສາ ແລະ ເສີມຂະຫຍາຍອາຊີບທີ່ເປັນມູນເຊື້ອຂອງຄອບຄົວ. ເພື່ອໃຫ້ໄດ້ຖ້ວຍຮູຕ໋ຽວທີ່ແຊບນົວນັ້ນຕ້ອງໄດ້ຜ່ານຂັ້ນຕອນຢ່າງລະອຽດ, ສຳຄັນແມ່ນເຮັດໃຫ້ເຍື່ອງອາຫານ ຕົ້ນຕໍແລ້ວແມ່ນນ້ຳຂອງຮູຕ໋ຽວຕ້ອງມີລົດຊາດເຂັ້ມຂຸ້ນ, ແຊບນົວ. ເພາະສະນັ້ນ, ໝໍ້ນ້ຳຮູຕ໋ຽວ ປາເມິກ ລູກຊີ້ນຕ້ອງຕົ້ມຂ້ຽວຈາກກະດູກແຂ່ງ ເອົາຫົວຜັກກາດຂາວ, ຜັກທຽມ ແລະ ຫົວຜັກບົ່ວຈຽວໃສ່ໜ້ອຍໜຶ່ງເພື່ອໃຫ້ມີກິ່ນຫອມ. ເພື່ອຮັກສາລົດຊາດຂອງນ້ຳໄວ້ໄດ້ຄືເກົ່າ ບໍ່ໃຫ້ມັນເຄັມເມື່ອຂ້ຽວແລ້ວ ພຽງແຕ່ຮັກສາລະດັບຄວາມຮ້ອນຂອງເຕົາໄຟໄວ້ ຈົນຮອດຍາມໃດເມື່ອມີແຂກມາກິນຈຶ່ງຕົ້ມໃຫ້ຟົດ ແລະ ປຸງແຕ່ງ.”
ຮູຕ໋ຽວແຕ່ລະຖ້ວຍຖືກແຕ່ງໃຫ້ເຫັນກັບຕາ: ປາເມິກ, ກຸ້ງແຫ້ງ, ລູກຊີ້ນ, ຢໍປາ, ໄຂ່ນົກກະທາ, ຜັກເກິ່ນ, ຜັກຕັງໂອຖືກຈັດຢ່າງລະອຽດ, ຕາມຂັ້ນຕອນແລ້ວໆເອົາຜັກບົ່ວໃບທີ່ຊອຍໄວ້ໃສ່. ທາງຂ້າງຖ້ວຍຮູຕ໋ຽວຍາມໃດກໍ່ແມ່ນຖວ້ຍເກືອ, ໝາກເຜັດ ແລະ ໝາກນາວພ້ອມກັບຈານຜັກດິບກິນພ້ອມ. ບໍ່ພຽງແຕ່ເອົາໃຈໃສ່ເປັນພິເສດກ່ຽວກັບວີທີການປຸງແຕ່ງຈັດວາງໃສ່ຖ້ວຍເທົ່ານັ້ນ ຫາກ ອ້າຍ ເກື່ອງ ຍາມໃດກໍ່ວາງເປົ້າໝາຍສູງໃຫ້ຕົນເອງກ່ຽວກັບລົດຊາດຂອງຮູຕ໋ຽວແຕ່ລະຖ້ວຍ ໂດຍຜ່ານວັດຖຸດິບແຕ່ລະປະເພດອີກດ້ວຍ.
“ຮູຕ໋ຽວຢູ່ທີ່ນີ້ ພວກຂ້າພະເຈົ້າໄດ້ສັ່ງຊື້ເສັ້ນຮູຕ໋ຽວມາແຕ່ເບ໋ນແຈໂດຍກົງ,ເສັ້ນນຸ້ມໜຽວດີ ແຊບ ແລະ ເຮັດມາຈາກແປ້ງເຂົ້າ. ປາເມິກສົດເມື່ອຊື້ມາແລ້ວກໍ່ລ້າງໃຫ້ສະອາດ, ຕັດເປັນຕ່ອນປະມານ 3 ຊັງຕີແມັດ, ລວກນ້ຳຮ້ອນປະມານ 1-2 ນາທີ. ລູກຊີ້ນແມ່ນເອົາຊີ້ນສາມຊັ້ນມາບົດແລ້ວເຮັດເປັນລູກໃຫຍ່ສ່ຳໝາກບີ. ”
ເມື່ອເວລາຮັບປະທານພຽງແຕ່ບີບໝາກນາວໃສ່ຕື່ມປ່ຽງ ໜຶ່ງ, ເອົາໝາກເຜັດໃສ່ຕື່ມໜ້ອຍໜຶ່ງ ເພື່ອໃຫ້ເຍື່ອງອາຫານນີ້ມີສີສັນສວຍງາມ ແລະ ລົດຊາດແປກໆ. ບັນດາເສັ້ນຮູຕ໋ຽວໜຽວ ນຸ້ມ ກອບ, ຊົດນ້ຳໃສ່ແຕ່ລະບ່ວງຈະຮູ້ສຶກໄດ້ຄວາມລະອຽດອ່ອນ, ລົດຊາດທີ່ເຂັ້ມຂຸ້ນ ແຊບນົວ ພ້ອມກັບກິ່ນຫອມເຄື່ອງທະເລຂອງເຍື່ອງອາຫານຮູຕ໋ຽວທີ່ຈັບອົກຈັບໃຈນີ້.
--------------------
ຖ້າພວກເພື່ອນຢາກທົດລອງຊີມເຍື່ອງອາຫານນີ້ ໂດຍບໍ່ຕ້ອງເສຍເວລາໄປຮອດໄຊງ່ອນ ພວກເພື່ອນສາມາດເຮັດຕາມຂັ້ນຕອນດັ່ງລຸ່ມນີ້ :
1 ວັດຖຸດິບຄວນກະກຽມສຳລັບກິນ 4 ຄົນ.
- ກະດູກຂາ 2 ກິໂລກຼາມ
- ເສັ້ນຮູຕ໋ຽວ 1 ກິໂລກຼາມ
- ຊີ້ນໝູ 200 ກຼາມ
- ກຸ້ງສົດ 400 ກຼາມ
- ປາເມິກສົດ 200 ກຼາມ
- ໄຂ່ນົກກະທາ 7 ໜ່ວຍ
- ຊີ້ນບົດ 200 ກຼາມ
- ກຸ້ງແຫ້ງ, ປາເມິກແຫ້ງ
- ໝາກຖົ່ວງອກ, ນ້ຳສະອິ້ວຂາວ
- ຜັກອີ່ຄູ້
- ຜັກສະລັດ, ຜັກເກິ່ນ, ຜັກຕັງໂອ, ຜັກບົ່ວໃບ, ຫົວຜັກທຽມຜັກບົ່ວຈຽວ.
2 ວິທີເຮັດ :
ຂັ້ນຕອນທີ1: ລ້າງກະດູກໃຫ້ສະອາດແລ້ວກໍ່ເອົາໄປຕົ້ມ. ເສັ້ນຮູຕ໋ຽວເອົາມາລວກນ້ຳຮ້ອນປະໄວ້. ຊີ້ນໝູໄຂ່ນົກຕົ້ມໃຫ້ສຸກ.
ຂັ້ນຕອນທີ2: ຂ້ຽວນ້ຳຕົ້ມກະດູກ, ຈີ່ຜັກບົ່ວຫົວໃຫຍ່ໃສ່ 3 ຫົວ ກະນ້ຳໃຫ້ພໍດີ, ໄດ້ປະມານ 20 ນາທີແລ້ວກໍ່ເອົາເກືອໃສ່ ແລ້ວກໍ່ເອົາກຸ້ງ ແລະ ປາເມິກແຫ້ງໃສ່.
ຂັ້ນຕອນທີ3: ຫົວຜັກທຽມ ແລະ ຫົວຜັກບົ່ວແຫ້ງ ປອກເປືອກອອກລ້າງນ້ຳໃຫ້ສະອາດ ເອົາມາຊອຍເປັນຕອ່ນນ້ອຍ ແລ້ວກໍ່ເອົາໄປຈຽວໃສ່ນ້ຳມັນໃຫ້ມີສີເຫຼືອງ ແລ້ວກໍ່ຕັກອອກໃສ່ຖ້ວຍໄວ້. ໃຊ້ໝໍ້ທີ່ຈຽວຜັກບົ່ວຜັກທຽມຂົ້ວຊີ້ນໃຫ້ສຸກ ເຮັດເປັນກ້ອນນ້ອຍ ແລ້ວເອົາມາຖອກໃສ່ໝໍ້ນ້ຳຮູຕ໋ຽວ.
ຂັ້ນຕອນທີ4: ປາເມິກສົດລ້າງໃຫ້ສະອາດ ຕັດເປັນຕ່ອນພໍດີກິນ. ຕົ້ມນ້ຳໃຫ້ຟົດ ລວກ 1-2 ນາທີ ສຸກແລ້ວກໍ່ເອົາໄປຈັດຢອງເທິງເສັ້ນຮູຕ໋ຽວ.
ຂັ້ນຕອນທີ5: ໂຮຍຜັກບົ່ວຜັກຫອມ, ກະທຽມຈຽວ, ແປ້ງນົວໃສ່ ສຸດທ້າຍແມ່ນຕັກນ້ຳໃສ່ເປັນອັນວ່າຮັບປະທານໄດ້ເລີຍ.