ເຂົ້າໜົມເສັ້ນແມ່ນຂອງຫວານທີ່ເຮັດໃຫ້ບໍ່ວ່າຜູ້ໃດກໍ່ຕິດໃຈ. ວັດຖຸດິບ ແລະ ວິທີການເຮັດແມ່ນງ່າຍດາຍ ແຕ່ວ່າເຮັດແນວໃດເພື່ອໃຫ້ແຊບນັ້ນພັດແມ່ນເລື່ອງທີ່ຫຍຸ້ງຍາກທີ່ສຸດ. ດັ່ງນັ້ນໃນປະຈຸບັນ ຢູ່ຕາມແຈຖະໜົນນ້ອຍ ໃນໃຈກາງຕະຫຼາດມືດຟູ໋ກວກຍັງມີຄົນຂາຍເຂົ້າໜົມເສັ້ນຕາມທາງຍ່າງຢູ່. ຮ້ານຂາຍແຕ່ລະຮ້ານພັດມີເຄັດລັບສະເພາະເພື່ອດຶງດູດເອົາແຂກມາກິນ.
ເຂົ້າໜົມເສັ້ນ-ຂອງຫວານທີ່ໄດ້ຮັບຄວາມນິຍົມຈາກໄວໜຸ່ມ
|
ສຽງຈ່າວຂາຍເຂົ້າໜົມເສັ້ນດັງອຶກກະທຶກຄຶກໂຄມໄປທົ່ວຕະຫຼາດຍາມກາງຄືນຟູ໋ກວກ. ໄປຍ່າງເລາະອ້ອມໄດ້ຮອບໜຶ່ງ, ຂ້າພະເຈົ້າໄດ້ພົບກັບ ອາວໄບ ເຊິ່ງແມ່ນຄົນທີ່ຂາຍເຂົ້າໜົມເສັ້ນຢູ່ຕາມທາງຍ່າງ ແລະ ເປັນທີ່ລື້ງເຄີຍກັບປະຊາຊົນໃນເຂດຕະຫຼາດກາງຄືນນີ້ທີ່ສຸດ. ອາວໄບ ເຖິງວ່າມີອາຍຸສູງແລ້ວກໍ່ຕາມ ແຕ່ເບິ່ງລາວຍັງແຂງແຮງຢູ່. ໃນແຕ່ລະມື້ອາວໄບ ໄດ້ຂີ່ລົດຖີບໄປເຖິງຕະຫຼາດກາງຄືນເພື່ອຂາຍເຂົ້າໜົມເສັ້ນໃຫ້ແຂກ.
“ສະເລ່ຍແລ້ວໃນແຕ່ລະມື້ ຂ້າພະເຈົ້າຂາຍເຂົ້າໜົມເສັ້ນໄດ້ປະມານ 50-60 ອັນ. ຂາຍໄດ້ໜ້ອຍຫຼືຫຼາຍແມ່ນຂຶ້ນກັບລະດູ, ຕາມປົກກະຕິແລ້ວໃນລະດູທ່ອງທ່ຽວນັບແຕ່ເດືອນ 5-10 ຈະຂາຍໄດ້ຫຼາຍກ່ວາ. ຕອນເຊົ້າບໍ່ມີໃຜກິນຂອງຫວານປະເພດນີ້ ສະນັ້ນຂ້າພະເຈົ້າຈຶ່ງຂາຍແຕ່ຕອນແລງຈົນຮອດກາງຄືນ. ແຕ່ລະອັນຂາຍດ້ວຍ 20.000 ດົ່ງ ແລະ ໄດ້ກຳໄລອັນໜຶ່ງແມ່ນ 4.000-5.000 ດົ່ງ”
ນັບແຕ່ 3-4 ປີມານີ້, ເມື່ອຮອດເວລາ 6 ໂມງແລງ ອາວໄບ ໄດ້ຂີ່ລົດຖີບເກົ່າໄປຂາຍເຂົ້າໜົມເສັ້ນຢູ່ຕະຫຼາດ, ທາງຫຼັງຕາງຕູ້ແກ້ວເປັນຮູບສີ່ແຈສາກມີສອງຖ້ານ ຍາວ 50 ຊັງຕີແມັດ, ກວ້າງ 30 ຊັງຕີແມັດເພື່ອບັນຈຸວັດຖຸດິບຕ່າງໆ. ຍາມໃດ ອາວກໍ່ເຮັດອະນາໄມຕູ້ແກ້ວໃຫ້ສະອາດເບິ່ງຄືວ່າຍັງໃໝ່ຢູ່ຕະຫຼອດ. ທາງໜ້າຂອງຕູ້ແກ້ວໄດ້ຕິດເຈ້ຍ A4 ໃສ່ດ້ວຍແຖວຕົວໜັງສືທີ່ວ່າ “ ເຂົ້າໜົມເສັ້ນ-ຫອມຫວານພິເສດ ”. ຕູ້ຖ້ານເທິງແມ່ນບັນຈຸໝາກພ້າວສົດທີ່ຂູດເປັນເສັ້ນບາງໆ, ນົມຂຸ້ນ, ນ້ຳຕານ, ໝາກຖົ່ວດິນຂົ້ວ, ເຂົ້າຂຽບ. ຖ້ານລຸ່ມແມ່ນບັນຈຸ ບັນດາກະປຸກເຂົ້າໜົມແມັກຍາ ( ເຊິ່ງແມ່ນເຂົ້າໜົມທີ່ເຮັດມາຈາກໜໍ່ເຂົ້າ) ແລະ ແປ້ງ. ຢູ່ກະຕ່າລົດຖີບແມ່ນບັນຈຸ ຕຸກນ້ຳດຶ່ມ 2-3 ຕຸກ, ແພຈ້ອງ ແລະ ເສື້ອກັນຝົນຕື່ມອີກ ເພື່ອປົກຕູ້ແກ້ວ ແລະ ນຸ່ງເມື່ອຍາມຝົນຕົກ.
ທີ່ທ່ານຟັງຜ່ານໄປແມ່ນສຽງເອີ້ນຊື້ເຂົ້າໜົມເສັ້ນ ແມ່ນເອື້ອຍ ຮ່າ ຊາວຮ່າໂນ້ຍເປັນຄັ້ງທຳອິດທີ່ມາຢ້ຽມຢາມຟູ໋ກວກ. ເອື້ອຍຮ່າເວົ້າວ່າ ເອື້ອຍຕິດອົກຕິດໃຈເຂົ້າໜົມເສັ້ນ ດັ່ງນັ້ນຈຶ່ງຕັດສິນໃຈຊື້ເຂົ້າໜົມທີ່ເປັນເອກະລັກສະເພາະຂອງຟູ໋ກວກນີ້. ທັງໂອ້ລົມກັບເອື້ອຍຮ່າ, ອາວໄບທັງເຮັດເຂົ້າໜົມໄປພ້ອມ. ອາວໄບເປີດຝາຕູ້ແກ້ວອອກແລ້ວເຮັດເປັນໂຕະນ້ອຍໜຶ່ງ, ດຶງເອົາແມັກຍາສີຂຽວກ້ອນນ້ອຍໜຶ່ງ, ອາວໄບເອົາສົ້ນຂອງຕ່ອນເຂົ້າໜົມນັ້ນຕິດໃສ່ກັນໃຫ້ເປັນວົງມົນ, ມວ້ນເຂົ້າ ແລະ ເກືອກໃສ່ກັບແປ້ງ. ເຮັດຄືແນວນັ້ນຢ່າງຕໍ່ເນື່ອງປະມານ 15 – 20 ເທື່ອ, ແມັກຍາທີ່ຢູ່ໃນມືຂອງອາວໄບຄ່ອຍໆກາຍເປັນເສັ້ນທີ່ມີສີຂຽວສວຍງາມທີ່ສຸດ. ອາວເອົາເຂົ້າໜົມນັ້ນວາງໃສ່ເທິງໃບເຟີ, ເອົາໝາກພ້າວ, ນົມຂຸ້ນ, ໝາກຖົ່ວດິນໂຮຍໃສ່ຕື່ມຕາມລຳດັບ, ເອົາເຂົ້າຂຽບມາປົກເທິງອີກຊັ້ນໜຶ່ງ, ເອົາເຈ້ຍຂາວຫໍ່ ແລ້ວອາວໄບກໍ່ຍື່ນໃຫ້ເອື້ອຍຮ່າໃນທັນທີ. ເອື້ອຍຮ່າທັງກິນເຂົ້າໜົມທັງແບ່ງປັນວ່າ :
“ຂຶ້ຶ້ນຊື່ວ່າແມ່ນເຂົ້າໜົມ, ແຕ່ຂ້າພະເຈົ້າເຫັນວ່າເຂົ້າໜົມເສັ້ນພັດຄ້າຍຄືກັນກັບເຂົ້າໜົມທົ່ວໄປກວ່າ ເພາະວ່າບໍ່ພຽງແຕ່ຍ້ອນຮູບຮ່າງຂອງມັນເທົ່ານັ້ນ ຫາກຍັງເນື່ອງຈາກພາກສ່ວນປະກອບ ແລະ ບັນດາບາດກ້າວໃນການເຮັດອີກດ້ວຍ. ເມື່ອກິນ, ລົດຊາດຫວານມັນຂອງເຂົ້າໜົມ ແລະ ໝາກພ້າວ ພັດມີລົດຊາດແປກໆຂອງແປ້ງຕື່ມອີກໜ້ອຍໜຶ່ງ, ທັງໝົດເຫຼົ່ານັ້ນໄດ້ປະສົມກົມກຽວເຂົ້າກັນສ້າງເປັນລົດຊາດທີ່ເປັນເອກະລັກສະເພາະທີ່ສຸດ ”
ເຖິງຢ່າງໃດກໍ່ຕາມ, ບໍ່ແມ່ນວ່າເຂົ້າໜົມເສັ້ນໃດກໍ່ແຊບ ແລະ ມີລົດຊາດພິເສດສະເພາະຄ້າຍຄືຂອງອາວໄບ. ຕາມອາວໄບແລ້ວ, ເຄັດລັບທີ່ງ່າຍດາຍຕົ້ນຕໍແມ່ນຂຶ້ນກັບຄວາມຮັກມັກອາຊີບ ແລະ ມີຄວາມປາຖະໜາຢາກໃຫ້ລູກຄ້າມີຄວາມເພິ່ງພໍໃຈ:
“ ເມື່ອຫາກໍ່ເລີ່ມຂາຍເຂົ້າໜົມເສັ້ນ ທຳອິດຂ້າພະເຈົ້າຊື້ແມັກຍາທີ່ຂາຍທົ່ວໄປຕາມຮ້ານຄ້າ, ແຕ່ວ່າມາໃນປະຈຸບັນແຂກບໍ່ມັກກິນແມັກຍາຊະນິດນັ້ນອີກແລ້ວ ສະນັ້ນຂ້າພະເຈົ້າຈຶ່ງໄດ້ເຮັດແມັກຍາເອງ. ເພື່ອເຮັດໃຫ້ແມັກຍາມີສີຂຽວງາມຕາ ແລະ ເຂົ້າໜົມມີລົດຊາດແຊບ, ມີກິ່ນຫອມກວ່າ, ຂ້າພະເຈົ້າໄດ້ປັ່ນເອົານ້ຳໃບໝາກນັດຈຽວພ້ອມກັນກັບແມັກຍາ. ຂັ້ນຕອນນີ້ຕ້ອງມີຄວາມຄ່ອງແຄ້ວ, ຈຽວໃຫ້ສະໝ່ຳສະເໝີ, ຖ້າບໍ່ດັ່ງນັ້ນແມັກຍາຈະແຂງ ຫຼື ແຫຼວເກີນໄປ, ຊ້ຳບໍ່ໜຳເຮັດໃຫ້ເສຍລົດຊາດຂອງແມັກຍາ, ກິນຈະບໍ່ແຊບ.
ການເຮັດເຂົ້າໜົມເສັ້ນໃຫ້ແຊບນັ້ນແມ່ນປະກອບດ້ວຍຫຼາຍປັດໃຈ, ແຕ່ວ່າເຂົ້າໜົມເສັ້ນປະເພດນີ້ແມ່ນຕ້ອງເໝາະສົມກັບໝາກພ້າວ, ແມັກຍາຫອມຫວານ, ໝາກຖົ່ວດິນຜົງ, ເຂົ້າໂຂບກອບ, ເວົ້າລວມແລ້ວແມ່ນປະສົມຫຼາຍລົດຊາດເຂົ້າກັນຈຶ່ງແຊບ”
ເຖິງວ່າວັດຖຸດິບຕົ້ນຕໍແມ່ນເຮັດດ້ວຍນ້ຳຕານກໍ່ຕາມ ແຕ່ວ່າເຂົ້າໜົມເສັ້ນກໍ່ບໍ່ໄດ້ຫວານຈົນແຂ້ນຄໍ. ພວກເພື່ອນພຽງແຕ່ກັດຄຳນ້ອຍໆ, ກໍ່ຈະຮູ້ສຶກໄດ້ຍິນສຽງໃບເຟີກອບແຕກຫັກ, ຄວາມນຸ້ມ, ຫວານ, ໜຽວໆໜ້ອຍໜຶ່ງຂອງແມັກຍາພ້ອມກັບຄວາມມັນ ແລະ ກິ່ນຫອມຂອງໝາກພ້າວ ເພີ່ມຄວາມຜົງຂອງໝາກຖົ່ວດິນເຂົ້າໄປຕື່ມ ເຮັດໃຫ້ຜູ້ບໍລິໂພກຍິ່ງຕິດໃຈ.
ຖ້າຫາກບັນດາໝູ່ເພື່ອນຢາກທົດລອງກິນຂອງຫວານປະເພດນີ້ເຊິ່ງບໍ່ຕ້ອງໄປໄກ ອາດຈະເຮັດຕາມສູດດັ່ງລຸ່ມນີ້:
1. ຄວນກະກຽມວັດຖຸດິບກິນໄດ້ 4 ຄົນ
- ນ້ຳຕານ ( ແມັກຍາ ) 500 ກຼາມ
- ນ້ຳດຶ່ມ 150 ມິນລີລິດ
- ໝາກຖົ່ວດິນ 100 ກຼາມ
- ແປ້ງ 200 ກຼາມ
- ເຂົ້າຂຽບ 1 ຖົງ
- ໝາກນາວ 1 ໜ່ວຍ
2. ວິທີເຮັດ
ບາດກ້າວ 1: ຂົ້ວໝາກຖົ່ວດິນໃຫ້ກອບ ປະໃຫ້ເຢັນແລ້ວເອົາກາບທາງນອກອອກ.
ບາດກ້າວ 2: ນວນໝາກພ້າວລ້າງໃຫ້ສະອາດແລ້ວຂູດເປັນເສັ້ນບາງ
ບາດກ້າວ 3: ເອົານ້ຳຕານ ແລະ ນ້ຳດຶ່ມທີ່ກະກຽມໄວ້ນັ້ນໃສ່ໝໍ້ຍົກຂຶ້ນຄ້າງໃສ່ເຕົາໄຟເຮັດໄຟອ່ອນໆ, ໃຊ້ໄມ້ທູ່ຄົນໃຫ້ສະໝ່ຳສະເໝີ, ຄົນຈົນໃຫ້ນ້ຳຕານໜຽວ ແລ້ວປົງໝໍ້ລົງປະໃຫ້ເຢັນ. ເມື່ອປົງໝໍ້ລົງແລ້ວພວກເຮົາຢອດນ້ຳໝາກນາວໃສ່ໜ້ອຍໜຶ່ງເພື່ອບໍ່ໃຫ້ນ້ຳຕານແຂງ ແລະ ເຂົ້າໜົມຈະນຸ້ມນວນກວ່າ.
ບາດກ້າວ 4: ທານ້ຳມັນໃສ່ພາທາດທີ່ສະອາດ ຫຼັງຈາກນັ້ນຖອກນ້ຳຕານຢູ່ໝໍ້ລົງໃສ່. ໃຊ້ມືດຶງນ້ຳຕານໃຫ້ເປັນເສັ້ນຍາວທົບເຂົ້າກັນ ແລ້ວເອົາທາໃສ່ແປ້ງເພື່ອບໍ່ໃຫ້ຕິດກັນ. ດຶງແນວນັ້ນໄປຕະຫຼອດຈົນໃຫ້ເປັນເສັ້ນ.
ບາດກ້າວ 5: ເອົາເສັ້ນນ້ຳຕານສ່ວນໃດໜຶ່ງໃຫ້ເໝາະສົມກັບລົດຊາດຂອງແຕ່ລະຄົນ ວາງໃສ່ເທິງເຂົ້າຂຽບ, ຫຼັງຈາກນັ້ນເອົາໝາກພ້າວ, ໝາກຖົ່ວດິນທີ່ກຽມໄວ້ນັ້ນໂຮຍໃສ່ ແລະ ສຸດທ້າຍແມ່ນເອົາເຂົ້າຂຽບປົກໃສ່ອີກຊັ້ນໜຶ່ງ ເປັນອັນວ່າເຂົ້າໜົມເສັ້ນສຳເລັດ ແລະ ກຽມພ້ອມຮັບປະທານໄດ້ເລີຍ.ຫວັງວ່າພວກທ່ານຈະເຮັດກິນແຊບ.