ລົດຫວານຂອງໄກ່, ລົດຫອມຂອງໃບບົວ, ໃບໝາກນາວ, ແກ່ນດອກບົວພ້ອມກັບລົດເຄັມຂອງເກືອ, ລົດເຜັດຂອງໝາກພີກໄທ…ປະສານກັບລົດຫອມຂອງເຟືອງເມື່ອປີ້ງ… ນັ້ນກໍແມ່ນຄວາມເປັນເອກະລັກສະເພາະຂອງເຍື່ອງອາຫານປີ້ງໄກ່ໂອບດິນດາກ.
ເຍື່ອງອາຫານປີ້ງໄກ່ໂອບດິນດາກ
|
ພວກຂ້າພະເຈົ້າໄດ້ມີໂອກາດແວ່ຢາມພັດທະຄານ ເວືອນຫວາຍ ທີ່ເມືອງຫາຍອານ, ນະຄອນຫາຍຟ່ອງ. ເສັ້ນທາງພາໄປເຖິງ ພັດທະຄານ ເວືອນຫວາຍມີລວງກ້ວາງປະມານ 3 ແມັດຖືກກໍ່ສ້າງດ້ວຍເບຕົງ. ລຽບຕາມ 2 ຟາກທາງແມ່ນແຖວຕົ້ນໝາກລີ້ນຈີທີ່ປົກຄຸມຄວາມເຢັນໄປທົ່ວສາຍທາງ. ພັດທະຄານ ເວືອນຫວາຍຖືກປຸກສ້າງໃນຢູ່ກາງເຂດສວນຕົ້ນໝາກລີ້ນຈີມີເນື້ອທີ່ປະມານ 200 ຕາແມັດ. ອ້າຍຮ່ວາງມິນຢູ່ເມືອງເລເຈີນ, ຫາຍຟ່ອງພ້ອມດ້ວຍຄອບຄົວມາຮັບປະທານເຍື່ອງອາຫານປີ້ງໄກ່ໂອບດິນດາກໃຫ້ຮູ້ວ່າ :
“ເຍື່ອງອາຫານປີ້ງໄກ່ໂອບດິນດາກນີ້ ມີຄວາມແຕກຕ່າງກັບ ເຍື່ອງອາຫານໄກ່ປະເພດອື່ນໆເຊັ່ນ: ຕົ້ມໄກ່, ໜຶ້ງໄກ່…ສຳລັບ ເຍື່ອງອາຫານປີ້ງໄກ່ໂອບດິນດາກ, ຂ້າພະເຈົ້າຄິດວ່າວິທີປຸງແຕ່ງຈະສັບສົນກວ່າ. ເມື່ອກິນອາຫານເຍື່ອງນີ້, ຂ້າພະເຈົ້າຮູ້ສຶກມີລົດຫອມຂອງຢາສະໝຸນໄພ, ແກ່ນດອກບົວ, ແຊບຫຼາຍ. ສຳລັບເດັກນ້ອຍ ແລະ ຜູ້ໃຫຍ່ ແມ່ນສາມາດບຳລຸງສຸຂະພາບດີທີ່ສຸດ ”
ພາຍຫຼັງທີ່ໄດ້ຮັບໃຊ້ຄອບຄົວອ້າຍມິນແລ້ວ, ອ້າຍຟຸ່ງວັນເດ ພໍ່ຄົວຂອງພັດທະຄານ ເວືອນຫວາຍ ໄດ້ພາຂ້າພະເຈົ້າໄປເຂດປຸງແຕ່ງອາຫານຢູ່ທາງຫຼັງພັດທະນາ ແລະ ຕັ້ງຢູ່ແຄມແມ່ນ້ຳ. ຢູ່ນີ້ມີໂຕະຍາວ 2 ໜ່ວຍ ແລະ ຢູ່ເທິງໂຕະ ແມ່ນເຕັມໄປດ້ວຍວັດຖຸດິບຫຼາຍຢ່າງເຊັ່ນ: ໄກ່ທີ່ໄດ້ຄົວແລ້ວ, ເຄື່ອງຫອມ, ໃບບົວ, ດິນດາກ…ຢູ່ຂ້າງເຂດປຸງແຕ່ງແມ່ນສວນລ້ຽງໄກ່ເຖິງນັບຮ້ອຍໂຕ. ອ້າຍເດເອົາຜ້າເຊັດໄກ່ທີ່ໄດ້ຄົວແລ້ວໃຫ້ແຫ້ງ, ຫຼັງຈາກນັ້ນ, ລາວກໍເລີ່ມແນະນຳໃຫ້ຂ້າພະເຈົ້າກ່ຽວກັບວິທີປຸງແຕ່ງເຍື່ອງອາຫານປີ້ງໄກ່ໂອບດິນດາກ :
“ ພາຍຫຼັງໄດ້ທີ່ຄົວໄກ່ສຳເລັດແລ້ວ, ພວກເຮົາເອົາເກືອ, ຂີງມາຮຸກຖູໃສ່ໜັງໄກ່, ແລ້ວກໍຕ້ອງລ້າງອີກຄັ້ງໜຶ່ງໃຫ້ສະອາດ. ກ່ອນທີ່ຈະປຸງແຕ່ງ, ພວກເຮົາຄວນເອົາຜ້າເຊັດໄກ່ໃຫ້ແຫ້ງ, ຫຼັງຈາກນັ້ນ, ເອົາແກ່ນດອກບົວ, ສະຫມຸນໄພ, ໃບໝາກນາວພ້ອມກັບນ້ຳປາ, ໝາກພີກໄທ, ແປ້ງນົວ, ນ້ຳມັນພືດປະສົມເຂົ້າກັນ, ແລ້ວກໍຍັດໃສ່ທ້ອງໄກ່, ແລ້ວກໍຕ້ອງຫຍິບໃຫ້ແຈບ ”
ອ້າຍເດໃຫ້ຮູ້ວ່າ ໄກ່ທີ່ພັດທະຄານປຸງແຕ່ງນັ້ນ ແມ່ນໄກ່ຖືກລ້ຽງໃນສວນ, ມີນ້ຳໜັກປະມານກວ່າ 1 ກີໂລຣາມ ເພາະໃນເວລາໄກ່ມີນ້ຳໜັກຊ່ຳນີ້ ແມ່ນແຊບທີ່ສຸດ. ອ້າຍເດເອົາໃບບົວຫຸ້ມໄກ່ເປັນ 2 ຊັ້ນ, ແລ້ວເອົາເຈ້ຍອາລູມີນຽມຫຸ້ມທາງນອກ, ຫຼັງຈາກນັ້ນກໍນຳໄປໂອບດ້ວຍດິນດາກທີ່ມີຄວາມໜາປະມານ 5 cm ເພື່ອປ້ອງກັນບໍ່ໃຫ້ໄກ່ມີກິ່ນຂິວຈາກຄວັນເມື່ອປີ້ງ. ພາຍຫຼັງໂອບດິນດາກແລ້ວໆ, ກໍນຳໄປປີ້ງ. ອ້າຍເດເປີດເຜີຍວ່າ :
“ ເມື່ອປີ້ງໄກ່, ພວກເຮົາຕ້ອງເຝົ້າຕະຫຼອດເວລາ ແລະ ຕ້ອງຄວບຄຸມຄວາມຮ້ອນ, ບໍ່ຄວນເຮັດໄຟແຮງເກີນໄປ. ທຳອິດພວກເຮົາໃຊ້ຖ່ານໄຟເພື່ອປີ້ງແບບເຜີນໆ ໃຫ້ດິນຄ່ອຍແຫ້ງ, ຫຼັງຈາກນັ້ນກໍນຳໄປໝົກໃສ່ຖ່ານ ແລະ ເຟືອງເປັນເວລາແຕ່ 1-2 ຊົ່ວໂມງຢ່າງຕໍ່ເນື່ອງ ແລະ ຕ້ອງຮັກສາຄວາມຮ້ອນພໍດີຂອງຖ່ານໄຟໃນຕະຫຼອດເວລາປີ້ງໄກ່. ເມື່ອສັງເກດເຫັນດິນຊັ້ນນອກຖືກແຕກແຫງນັ້ນ, ກໍພໍດີຮອດເວລາໄກ່ສຸກແລ້ວ. ”
ໄກ່ປີ້ງແລ້ວ, ແມ່ນຕ້ອງກິນກັບໝາກເລັ່ນ, ໝາກແຕງ, ຜັກຫອມ, ຜັກສະຫຼັດ ຈ້ຳກັບເກືອປົນໝາກພີກໄທ ແລະ ນ້ຳໝາກນາວ. ການປະສົມປະສານລະຫວ່າງ ລົດຫວານຂອງໄກ່, ລົດຫອມຂອງໃບບົວ, ໃບໝາກນາວ, ແກ່ນດອກບົວພ້ອມກັບລົດເຄັມຂອງເກືອ, ລົດເຜັດຂອງໝາກພີກໄທ…ປະສານກັບລົດຫອມຂອງເຟືອງໃນເວລາປີ້ງ ໄດ້ເຮັດໃຫ້ຜູ້ບໍລິໂພກຮູ້ສຶກເຖິງຄວາມເປັນເອກະລັກສະເພາະຂອງອາຫານເຍື່ອງນີ້.
ທ່ານຜູ້ຟັງທີ່ເຄົາລົບ! ຖ້າຫາກພວກເພື່ອນຢາກເຮັດເຍື່ອງອາຫານປີ້ງໄກ່ໂອບດິນດາກ ໃຫ້ຄອບຄົວກິນ, ພວກເພື່ອນຕ້ອງກະກຽມວັດຖຸດິບດັ່ງນີ້:
- ໄກ່ 1 ໂຕ, ມີນ້ຳໜັກປະມານກວ່າ 1 ກີໂລຣາມ
- ດິນດາກ, ຫົວຂີງ, ເກືອ, ນ້ຳມັນພືດ, ໝາກພີກໄທ, ໃບໝາກນາວ, ແກ່ນດອກບົວ, ໃບບົວ(ຫຼືໃບຕອງກ້ວຍ), ເຈັ້ຍອາລູມີນຽມ, ຖ່ານໄຟ…
ທຳອິດພວກເພື່ອນສັບດິນດາກພ້ອມກັບເຟືອງ. ຊອຍຫົວຂີງເປັນປ່ຽງບາງໆ, ເອົານ້ຳມັນພືດທາໃສ່ທາງໃນ ແລະ ໜັງຂອງໄກ່. ຫຼັງຈາກນັ້ນ, ເອົາແກ່ນດອກບົວ, ຢາສະຫມຸນໄພ, ໃບໝາກນາວພ້ອມກັບນ້ຳປາ, ໝາກພີກໄທ, ແປ້ງນົວ, ນ້ຳມັນພືດປະສົມເຂົ້າກັນ, ແລ້ວຍັດໃສ່ທ້ອງໄກ່, ແລ້ວກໍຕ້ອງຫຍິບໃຫ້ແຈບ. ຕໍ່ຈາກນັ້ນ ແມ່ນເອົາໃບບົວຫຸ້ມໄກ່ເປັນ 2 ຊັ້ນ, ແລ້ວເອົາເຈ້ຍອາລູມີນຽມ ຫຸ້ມທາງນອກ, ຫຼັງຈາກນັ້ນກໍໂອບດ້ວຍດິນດາກທີ່ມີຄວາມໜາປະມານ 5 cm. ພາຍຫຼັງໂອບດິນດາກແລ້ວໆ, ກໍນຳໄປປີ້ງປະມານ 1-2 ຊົ່ວໂມງ, ເມື່ອສັງເກດເຫັນດິນຊັ້ນນອກຖືກແຕກແຫງນັ້ນ, ກໍພໍດີຮອດເວລາໄກ່ສຸກແລ້ວ. ໄກ່ປີ້ງເມື່ອກິນກໍຄວນຈ້ຳກັບເກືອປົນໝາກພີກໄທ ແລະ ນ້ຳໝາກນາວ. ຫວັງວ່າພວກເພື່ອນຈະເຮັດກິນແຊບ.