ຕະຫຼາດດົງຊວນຕັ້ງຢູ່ຄຸ້ມຖະໜົນເກົ່າຮ່າໂນ້ຍ ຊຶ່ງໄດ້ມີມາແຕ່ດົນນານແລ້ວ ແລະ ຕິດພັນກັບການສ້າງຕັ້ງ ແລະ ພັດທະນາດ້ານການຄ້າຂອງດິນແດນທັງລອງ-ຮ່າໂນ້ຍ. ຢູ່ຕະຫຼາດແຫ່ງນີ້ບໍ່ພຽງແຕ່ແມ່ນບ່ອນແລກປ່ຽນຄ້າຂາຍເທົ່ານັ້ນ, ຫາກຍັງມີຄຸນຄ່າວັດທະນະທຳ ແລະ ຈິດໃຈ, ອັນໄດ້ສ່ອງແສງຊີວິດປະຈຳວັນຂອງຊາວຮ່າໂນ້ຍເມື່ອກ່ອນນີ້. ໃນທຸກວັນນີ້, ຕະຫຼາດດົງຊວນຍັງຄົງເສີມຂະຫຍາຍມູນເຊື້ອພັດທະນາການຄ້າຕິດພັນກັບການຮັກສາວັດທະນະທຳ ແລະ ຂຸດຄົ້ນການທ່ອງທ່ຽວ.
ຕະຫຼາດດົງຊວນໃນວັນນີ້
|
ຕະຫຼາດດົງຊວນໄດ້ຖືກສ້າງຂຶ້ນເມື່ອປີ 1889 ໂດຍແມ່ນຊາວຝະລັ່ງເປັນຜູ້ກໍ່ສ້າງພາຍຫຼັງທັບຖົມກະແສນ້ຳໄຫຼຂອງແມ່ນ້ຳ ໂຕລິກ ແລະ ແມ່ນ້ຳແດງ. ໂດຍຖືກຕັ້ງຢູ່ເມືອງດົງຊວນ, ດັ່ງນັ້ນຕະຫຼາດກໍໃສ່ຊື່ຂອງເມືອງເລີຍ. ຢູ່ເບື້ອງຊ້າຍຕະຫຼາດແມ່ນວັດ ຮ່ວຽນທວຽນ ຢູ່ຖະໜົນຮ່າງຄວາຍ, ສ່ວນຢູ່ເບື້ອງຂວາຕະຫຼາດແມ່ນພະວິຫານແບກມ້າທີ່ຖະໜົນຮ່າງບວມ. ເມື່ອກ່ອນນີ້, ປະຊາຊົນມາເຕົ້າໂຮມກັນຢ່າງໜາແໜ້ນຢູ່ 2 ຟາກແມ່ນ້ຳ, ການໄປມາແລກປ່ຽນຊື້ຂາຍ ແມ່ນໃຊ້ເຮືອເປັນຕົ້ນຕໍ ແລະ ມີຄວາມສະດວກທີ່ສຸດ. ພິເສດເມື່ອຊາວຝະລັ່ງກໍ່ສ້າງຂົວລອງບຽນນັ້ນ, ການເຄື່ອນໄຫວແລກປ່ຽນຄ້າຂາຍຢູ່ຕະຫຼາດດົງຊວນໄດ້ພັດທະນາໄວຍ້ອນມີທີ່ຕັ້ງທີ່ດີກ່ຽວກັບທາງບົກ, ທາງນ້ຳ ແລະ ທາງເຫຼັກ. ຕະຫຼາດດົງຊວນໃນຊຸມວັນທຳອິດໄດ້ຖືກມຸງດ້ວຍຫຼັງຄາສັງກະສີເພື່ອສາມາດກັນແດດ ແລະ ຝົນໃຫ້ບັນດາຜູ້ມາຊື້ເຄື່ອງ ແລະ ພວກພໍ່ຄ້າຊາວຂາຍ. ຕະຫຼາດດົງຊວນມີເນື້ອທີ່ກວ່າ 20.000 m2 . ໃນເມື່ອກ່ອນ, ຕະຫຼາດມີຊື່ວ່າ ດົງຊວນ-ບັກກວາ ແລະ ມີເສັ້ນທາງແລ່ນຕັດເຄິ່ງຕະຫຼາດ.
ພາຍຫຼັງເຫດອັກຄີໄພເມື່ອປີ 1994, ຕະຫຼາດດົງຊວນໄດ້ຮັບການກໍ່ສ້າງຄືນໃໝ່. ປະຈຸບັນ, ຕະຫຼາດປະກອບດ້ວຍ 3 ຊັ້ນ, ລວງກ້ວາງ 73,5 ແມດ, ລວງຍາວ 130,5 ແມດ, ສ່ວນຕະຫຼາດບັກກວາກໍໄດ້ຮັບການກໍ່ສ້າງຄືນໃໝ່, ມີການອະນຸລັກຮັກສາດ້ານໜ້າຂອງຕະຫຼາດດົງຊວນຄືເກົ່າ. ລະຫວ່າງ 2 ຕະຫຼາດດົງຊວນ ແລະ ບັກກວາ ກໍມີທາງເຊື່ອມຕໍ່ກັນດ້ວຍຂັ້ນໄດ ແລະ ຂົວລອຍ, ລົດໂອໂຕກໍສາມາດແລ່ນອ້ອມຮອບຕະຫຼາດໄດ້. ທ່ານໂດ້ຊວນຖີ, ຜູ້ອຳນວຍການໃຫຍ່ບໍລິສັດ ຫຸ້ນສ່ວນດົງຊວນ ໃຫ້ຮູ້ວ່າ :
“ ໄລຍະທີ່ຜ່ານມາ, ບໍລິສັດ ຫຸ້ນສ່ວນດົງຊວນແມ່ນຫົວໜ່ວຍຄຸ້ມຄອງຕະຫຼາດ, ສືບຕໍ່ຮັກສາ ແລະ ພັດທະນາຕະຫຼາດດົງຊວນດ້ວຍສີສັນຂອງຕະຫຼາດຊຸມຊົນຫວຽດນາມ. ໃນໄລຍະທີ່ຜ່ານມາ ກໍຄືໄລຍະທີ່ຈະມາເຖິງ, ພວກຂ້າພະເຈົ້າສືບຕໍ່ເອົາໃຈໃສ່ລົງທຶນທາງດ້ານພື້ນຖານວັດຖຸ, ພື້ນຖານໂຄງລ່າງຂອງຕະຫຼາດໃຫ້ເປັນຢ່າງດີເພື່ອຕອບສະໜອງຄວາມຕ້ອງການຂອງປະຊາຊົນໃນທ່າອຽງຂະຫຍາຍຕົວ. ໃນບັນຫາຄຸ້ມຄອງບັນດາຄອບຄົວດຳເນີນທຸລະກິດນັ້ນ, ພວກຂ້າພະເຈົ້າສຸມໃສ່ການສ້າງອະລິຍະທຳທາງດ້ານການຄ້າໃນການເຄື່ອນໄຫວດຳເນີນທຸລະກິດຂອງຕະຫຼາດ, ສ້າງວັດທະນະທຳການປະພຶດ, ມະນຸດສຳພັນແຫ່ງອະລິຍະທຳ ”
ບໍ່ພຽງແຕ່ມີບັນດາຜູ້ຊື້ຂາຍເຄື່ອງມາຕະຫຼາດດົງຊວນເພື່ອແລກປ່ຽນຄ້າຂາຍເທົ່ານັ້ນ, ຫາກຍັງມີແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດເມື່ອເຂົ້າ ມາທ່ອງທ່ຽວຮ່າໂນ້ຍ ກໍມັກມາທັດສະນະສຶກສາ ແລະ ຊື້ເຄື່ອງຂອງຢູ່ຕະຫຼາດດົງຊວນ. ຕະຫຼາດແຫ່ງນີ້ ຖືກຕັ້ງຢູ່ໃນຄຸ້ມຖະໜົນເກົ່າ, ໃກ້ກັບຖະໜົນຮ່າງງາງ, ຮ່າງດາວ, ຮ່າງບົງ, ຮ່າງກາຍ…ແລະ ໃກ້ກັບໜອງຮ່ວານກຽມ, ອັນໄດ້ສ້າງເງື່ອນໄຂສະດວກໃຫ້ແກ່ການໄປທັດສະນະສຶກສາຢູ່ເຂດໃຈກາງນະຄອນ. ທ່ານໂດ້ຊວນຖີ, ຜູ້ອຳນວຍການໃຫຍ່ບໍລິສັດຫຸ້ນສ່ວນດົງຊວນ ໃຫ້ຮູ້ວ່າ :
“ ໃນຊຸມປີມໍ່ໆມານີ້, ຈຳນວນແຂກທ່ອງທ່ຽວມາຕະຫຼາດດົງຊວນນັບມື້ນັບເພີ່ມຂຶ້ນ. ປີ 2016, ຈຳນວນແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດມາ ຕະຫຼາດດົງຊວນແມ່ນ 400.000 ເທື່ອຄົນ. ຕະຫຼາດດົງຊວນບໍ່ພຽງແຕ່ແມ່ນສູນການຄ້າ, ແມ່ນຕະຫຼາດຂາຍສົ່ງໃຫຍ່ເທົ່ານັ້ນ, ຫາກຍັງແມ່ນສະຖານທີ່ທ່ອງທ່ຽວຂອງນະຄອນຮ່າໂນ້ຍອີກດ້ວຍ. ພວກຂ້າພະເຈົ້າໄດ້ສ້າງຕັ້ງໜ່ວຍຫນູນຊ່ວຍແຂກທ່ອງທ່ຽວເມື່ອມາທັດສະນະສຶກສາ ແລະ ຊື້ຂາຍເຄື່ອງເພື່ອຮັບປະກັນຄວາມປອດໄພ ກໍຄືແນະນຳຫຼາຍຢ່າງໃຫ້ແຂກທ່ອງທ່ຽວເມື່ອມາຕະຫຼາດ ”
ຕະຫຼາດມືດດົງຊວນໄດ້ຮັບການສ້າງຂຶ້ນເມື່ອປີ 2003 ແນໃສ່ຫັນການເຄື່ອນໄຫວຂອງຕະຫຼາດເປັນຫຼາຍຮູບຫຼາຍແບບ, ທັງຮັບໃຊ້ຄວາມຕ້ອງການຊື້ເຄື່ອງຂອງແຂກທ່ອງທ່ຽວ. ຢູ່ແຫ່ງນີ້, ຍັງຈັດຕັ້ງບັນດາການເຄື່ອນໄຫວວັດທະນະທຳພື້ນເມືອງຄື : ການສະແດງຂັບສຳ, ຂັບແຈວ, ຂັບກວານເຫາະ….ຊຶ່ງໄດ້ຮັບການຕີລາຄາສູງໃນການຟື້ນຟູວັດທະນະທຳພື້ນເມືອງ. ນັກສິລະປີນ ທາວຢາງ ຜູ້ອຳນວຍການສູນພັດທະນາສິລະປະດົນຕີຫວຽດນາມໃຫ້ຮູ້ວ່າ :
“ ການສະແດງແມ່ນຖືກຈັດຂຶ້ນໃນຕອນຄ່ຳວັນເສົາປະຈຳອາທິດໃນຕະຫຼອດ 12 ປີມານີ້ ແລະ ໄດ້ຮັບການຕອບສະໜອງຈາກປະຊາຊົນ. ຢູ່ຕະຫຼາດດົງຊວນ ມີລາຍການສະແດງຂັບສຳ ຊຶ່ງເປັນຄວາມເປັນເອກະລັກຂອງຮ່າໂນ້ຍ ”
ປະຈຸບັນ, ບໍລິສັດຫຸ້ນສ່ວນດົງຊວນພວມຮັກສາສາຍທ່ອງທ່ຽວຂຸດຄົ້ນບັນດາຄວາມສາມາດບົ່ມຊ້ອນດ້ານການທ່ອງທ່ຽວຂອງຕະຫຼາດ, ເສີມຂະຫຍາຍຮູບແບບທ່ອງທ່ຽວວັດທະນະທຳ, ຄົ້ນຄ້ວາພັດທະນາບັນດາຜະລິດຕະພັນທ່ອງທ່ຽວເພື່ອປະກອບສ່ວນໂຄສະນາພາບພົດຂອງຕະຫຼາດດົງຊວນອີກດ້ວຍ.