ຄະນະໄດ້ຖ່າຍຮູບທີ່ລະນຶກ ພາຍຫຼັງພິທີຕ້ອນຮັບ
(ພາບ: ໝີບີ່ງ/ ນັກຂ່າວ VOV ປະຈຳວຽງຈັນ)
|
(vovworld) – ຕອນບ່າຍວັນທີ 13/3, ຢູ່ນະຄອນຫຼວງ ວຽງຈັນ, ປະເທດ ລາວ, ທ່ານ ສິນລະວົງ ຄຸດໄພທູນ, ເລຂາຄະນະພັກ, ເຈົ້າຄອງນະຄອນຫຼວງ ວຽງຈັນ ໄດ້ຕ້ອນຮັບຄະນະຜູ້ແທນນະຄອນຫຼວງ ຮ່າໂນ້ຍ, ໂດຍທ່ານຮອງປະທານຄະນະກຳມະການປະຊາຊົນ ຫງວຽນເທ໋ຮູ່ງ ເປັນຫົວໜ້າຄະນະ, ໄປຢ້ຽມຢາມ ແລະ ເຮັດວຽກຢູ່ລາວ, ເຂົ້າຮ່ວມກອງປະຊຸມຄັ້ງທີ 10 ເວທີປາໄສຄົມມະນາຄົມແບບຍືນຍົງ ກ່ຽວກັບສິ່ງແວດລ້ອມ ອາຊີ. ທີ່ການຕ້ອນຮັບ, 2 ຝ່າຍເນັ້ນໜັກວ່າ ປີ 2017 ແມ່ນປີສຳຄັນທີ່ສຸດໃນການພົວພັນແບບພິເສດ ຫວຽດນາມ - ລາວ, ເມື່ອ 2 ຝ່າຍພ້ອມກັນຈັດຕັ້ງພິທີສະເຫຼີມສະຫຼອງ 55 ປີແຫ່ງວັນ 2 ປະເທດສ້າງຕັ້ງການພົວພັນທາງການທູດ ແລະ 40 ປີແຫ່ງວັນ 2 ປະເທດເຊັນສົນທິສັນຍາມິດຕະພາບ, ການຮ່ວມມື ຫວຽດນາມ - ລາວ. ນະຄອນຫຼວງ ຮ່າໂນ້ຍ ແລະ ນະຄອນຫຼວງ ວຽງຈັນ ເປັນກຽດໄດ້ຮັບເລືອກເຟັ້ນເປັນເຈົ້າພາບຈັດຕັ້ງບັນດາເຫດການຂ່ຳນັບຮັບຕ້ອນ 2 ເຫດການສຳຄັນຍິ່ງນີ້. 2 ຝ່າຍຢັ້ງຢືນວ່າຈະສົມທົບກັນຢ່າງແໜ້ນແຟ້ນເພື່ອຈັດຕັ້ງບັນດາການເຄື່ອນໄຫວແທດຈິງ, ມີຄວາມໝາຍ, ປະກອບສ່ວນເຂົ້າໃນການປັບປຸງທີ່ເປັນມູນເຊື້ອ, ເພີ່ມທະວີການພົວພັນມິດຕະພາບ, ຄວາມສາມັກຄີແບບພິເສດ, ການຮ່ວມມືຮອບດ້ານ ຫວຽດນາມ - ລາວ.
ໃນຂອບເຂດການຢ້ຽມຢາມ, ຕອນເຊົ້າວັນທີ 14/3, ທ່ານຮອງປະທານຄະນະກຳມະການປະຊາຊົນ ຫງວຽນເທ໋ຮູ່ງ ພ້ອມກັບຄະນະຜູ້ແທນຄະນະກຳມະການປະຊາຊົນນະຄອນຫຼວງ ຮ່າໂນ້ຍ ເຂົ້າຮ່ວມກອງປະຊຸມຄັ້ງທີ 10 ເວທີປາໄສຄົມມະນາຄົມແບບຍືນຍົງກ່ຽວກັບສິ່ງແວດລ້ອມ ອາຊີ ດ້ວຍຫົວຂໍ້ວ່າ ວິວັດທະນາການຮອດປີ 2030 ໃຫ້ແກ່ການຄົມມະນາຄົມແບບຍືນຍົງຕິດພັນກັບເປົ້າໝາຍພັດທະນາແບບຍືນຍົງ.