(ພາບປະກອບ)
(vovworld)- ບັນດາການເຄື່ອນໄຫວ ວັດທະນະທຳທີ່ເປັນເອກະລັກສະເພາະ ເພື່ອສະເຫຼີມສະຫຼອງວັນມໍລະດົກວັດທະນະທຳຫວຽດນາມ (23/11), ເຊີດຊູບັນດາມູນຄ່າ ວັດທະນະທຳ ທີ່ເປັນມູນເຊື້ອຂອງຊາດ ຖືກດຳເນີນ ຢູ່ຄຸ້ມເມືອງເກົ່າຮ່າໂນ້ຍ ໃນລະຫວ່າງວັນທີ 18-27/11. ນີ້ແມ່ນຂໍ້ມູນ ໂດຍຄະນະຄຸ້ມຄອງຄຸ້ມເມືອງເກົ່າຮ່າໂນ້ຍ ຍົກອອກ ທີ່ການປະຊຸມຂ່າວ ດຳເນີນໃນຕອນບ່າຍວັນທີ 16/11. ເລີ່ມຕົ້ນບັນດາການເຄື່ອນໄຫວແມ່ນພິທີເປີດ, ການສະແດງຊຸດອາພອນປະຈຳຊາດ ດ້ວຍຫົວຂໍ້ “ຮູບບູຮານ” ດຳເນີນຢູ່ສູນພົບປະແລກປ່ຽນວັດທະນະທຳຄຸ້ມເມືອງເກົ່າຮ່າໂນ້ຍ, ເລກທີ 50 ຖະໜົນ ດ່າວຢີຕື, ຮ່າໂນ້ຍ ໃນຕອນຄ່ຳວັນທີ 18/11. ນອກຈາກການສະແດງຊຸດອາພອນແລ້ວ, ບັນດາມູນຄ່າວັດທະນະທຳທີ່ເປັນມູນເຊື້ອຂອງຊາດ ຍັງຖືກສົ່ງເຖິງປະຊາຊົນ ແລະ ນັກທ່ອງທ່ຽວ ຜ່ານຫຼາຍລາຍການ ເຊັ່ນ: ຂັບແຈ່ວ, ຂັບຕ່ວາງ, ຂັບກວານເຫາະ, ຂັບເຈົ່າວັນ.
ໃນໂອກາດນີ້, ຢູ່ສະຖານທີ່ປູສະນີຍະຖານເຂດຄຸ້ມເມືອງເກົ່າຮ່າໂນ້ຍ ຈະດຳເນີນຫຼາຍການເຄື່ອນໄຫວ ດ້ານວັດທະນະທຳທີ່ອຸດົມສົມບູນ, ເປັນເອກະລັກສະເພາະອື່ນໆ ເພື່ອຄ່ຳນັບຮັບຕ້ອນ ວັນມໍລະດົກທາງວັດທະນະທຳຫວຽດນາມ ເຊັ່ນ: ແນະນຳກ່ຽວກັບວັດທະນະທຳກ່ຽວກັບຊາຫວຽດນາມ, ສິລະປະປັກແສ່ວທີ່ເປັນມູນເຊື້ອ, ວາງສະແດງກ່ຽວກັບຊຸດເຄື່ອງແບບເຂົ້າຊົງ ແລະ ການໂອ້ລົມສົນທະນາ ກ່ຽວກັບວັດທະນະທຳບູຊາພະແມ່, ແນະນຳຊຸດອາພອນພະລາດຊະວັງຫວຽດນາມ.