(vovworld) – ໃນຊຸມປີຜ່ານມາ, ຈາກແຫຼ່ງທຶນຂອງໂຄງການຈຸດໝາຍແຫ່ງຊາດກ່ຽວກັບນ້ຳປະປາ ແລະ ອະນາໄມສິ່ງແວດລ້ອມ, ແຂວງ ບັກນີງ ໄດ້ຍູ້ແຮງການສະໜອງນ້ຳປະປາ, ນ້ຳສະອາດເຖິງປະຊາຊົນເຂດຊົນນະບົດ. ມາຮອດປະຈຸບັນ, ອັດຕາປະຊາຊົນເຂດຊົນນະບົດໄດ້ນຳໃຊ້ນ້ຳສາອາດຂຶ້ນເຖິງ 98%. ບົດຂຽນ “ບັນດາຮູບແບບສະໜອງນ້ຳປະປາໃຫ້ແກ່ເຂດຊົນນະບົດຢູ່ແຂວງ ບັກນີງ” ຂອງຕ໋ຽນຢູ້ງ, ນັກຂ່າວ VOV.
 |
ດ້ວຍຈຳນວນເງິນໄດ້ຮັບການກູ້ຢືມຈາກທະນາຄານໂລກ (WB) ແລະ ແຫຼ່ງເງິນຈາກ ສັງຄົມ, ຮອດທ້າຍປີ 2015, ບັນດາເຂດຊົນນະບົດຂອງແຂວງ ບັກນີງ ມີ 36 ໂຄງການລົງທຶນສະໜອງນ້ຳໄດ້ປະຕິບັດສຳເລັດ ແລະ ພວມເຄື່ອນໄຫວດ້ວຍຄວາມສາມາດສະໜອງນ້ຳປະປາ 57.000 ເມັດກ້ອນ/ວັນ, ໃຫ້ເກືອບ 50.500 ຄອບຄົວ. ເມື່ອນຳບັນດາໂຄງການສະໜອງນ້ຳປະປາໃຫ້ເຂດຊົນນະບົດເຂົ້າເຄື່ອນໄຫວ ໄດ້ນຳມາເຊິ່ງປະສິດທິຜົນແທດຈິງ, ຍົກສູງຄຸນນະພາບການດຳລົງຊີວິດໃຫ້ແກ່ປະຊາຊົນ, ປະກອບສ່ວນຫລຸດຜ່ອນຊ່ອງຫວ່າງລະຫວ່າງເຂດຊົນນະບົດກັບເຂດຕົວເມືອງ, ພ້ອມທັງປ່ຽນໃໝ່ຄວາມຮັບຮູ້ຂອງປະຊາຊົນເຂດຊົນນະບົດກ່ຽວກັບຄວາມໝາຍ, ຜົນປະໂຫຍດຂອງການນຳໃຊ້ນ້ຳປະປາ ແລະ ການອະນາໄມສິ່ງແວດລ້ອມ. ທ່ານ ຫງວຽນດັງຄາງ, ຮອງຜູ້ອຳນວຍການບໍລິສັດ ອານທິ້ງ, ຢູ່ເທດສະບານ ຕື່ເຊີນ, ແຂວງ ບັກນີງ, ຫົວໜ່ວຍລົງທຶນກໍ່ສ້າງໂຮງງານສະໜອງນ້ຳປະປາຢູ່ຕາແສງ ເຕືອງຢາງ, ເທດສະບານ ຕື່ເຊີນ, ໃຫ້ຮູ້ວ່າ:
“ໃນວິວັດແຫ່ງການຜັນຂະຫຍາຍໂຄງການຕະຫຼອດຮອດເວລານຳໂຄງການເຂົ້າເຄື່ອນໄຫວນັ້ນ, ພວກຂ້າພະເຈົ້າໄດ້ສົມທົບກັບອຳນາດການປົກຄອງທ້ອງຖິ່ນ ເພື່ອແກ້ໄຂບັນດາບັນຫາທີ່ຍັງຄົງຄ້າງ. ປະຈຸບັນ, ພວກຂ້າພະເຈົ້າໄດ້ສະໜອງນ້ຳປະປາໃຫ້ທົ່ວ 6 ບ້ານຂອງຕາແສງ ເຕືອງຢາງ ແລະ ຮັບປະກັນໃຫ້ທຸກໆຄອບຄົວລ້ວນແຕ່ມີນ້ຳປະປາເພື່ອນຳໃຊ້”
ໃນຊຸມປີມໍ່ໆມານີ້, ແຂວງ ບັກນີງ ແມ່ນໜຶ່ງໃນບັນດາແຂວງມີລະດັບການພັດທະນາດ້ານເສດຖະກິດທີ່ຂະຫຍັນຂັນເຄື່ອນທີ່ສຸດ. ມີຫຼາຍເຂດອຸດສາຫະກຳໄດ້ຮັບການກໍ່ສ້າງໃໝ່, ຈຳນວນວິສາຫະກິດໃໝ່ໄດ້ຮັບການສ້າງຕັ້ງຢ່າງວ່ອງໄວ, ດັ່ງນັ້ນ ຄວາມຕ້ອງການນຳໃຊ້ແຫຼ່ງນຳ້ປະປານັບມື້ນັບຫຼາຍ. ທ່ານ ຫງວຽນແອງຕ໋ວນ, ຮອງຜູ້ອຳນວຍການໃຫຍ່ບໍລິສັດຫຸ້ນສ່ວນບຳລຸງສ້າງ ແລະ ຕິດຕັ້ງໄຟຟ້າ ຮ່າໂນ້ຍ, ຫົວໜ່ວຍພວມລົງທຶນກໍ່ສ້າງໂຮງງານນ້ຳປະປາ ຢູ່ເມືອງ ທ້ວນແທ່ງ, ໃຫ້ຮູ້ຕື່ມອີກວ່າ:
“ໃນວິວັດແຫ່ງການລົງທຶນໂຄງການ, ພວກຂ້າພະເຈົ້າກໍ່ເຫັນໄດ້ຄວາມຕ້ອງການນຳໃຊ້ນ້ຳຂອງວິສາຫະກິດກໍ່ຄືຂອງພໍ່ແມ່ປະຊາຊົນແມ່ນໃຫຍ່ຫຼວງທີ່ສຸດ ໃນຂະນະທີ່ແຫຼ່ງນ້ຳປະປາໃນເຂດຍັງອ່ອນຫຼາຍ. ຄະນະຜູ້ອຳນວຍການບໍລິສັດ ພ້ອມກັບບັນດາຜູ້ຖືຫຸ້ນໄດ້ເຫັນດີເຫັນພ້ອມເຂົ້າຮ່ວມໂຄງການທີ່ມີລັກສະນະຫັນເປັນສັງຄົມ. ໂຄງການນ້ຳປະປາຢູ່ແຂວງ ບັກນີງ ໄດ້ຮັບການລົງທຶນຕາມມະຕິ 318 ດ້ວຍຈຸດປະສົງແມ່ນຫັນເປັນທົ່ວສັງຄົມ, ເພື່ອຊຸກຍູ້ເຂດຊຸມຊົນໃຫ້ພັດທະນາດີຂຶ້ນ”
ເພື່ອປະຕິບັດສຳເລັດຈຸດໝາຍຮອດເຄິ່ງຕົ້ນປີ 2017, ອັດຕາປະຊາຊົນຢູ່ເຂດຊົນນະບົດໄດ້ນຳໃຊ້ບັນດາແຫຼ່ງນ້ຳສະອາດບັນລຸ 100%, ໃນໄລຍະຈະມາເຖິງ, ແຂວງ ປັກນີງ ຈະຕັ້ງໜ້າກ່ວາໃນການລົງທຶນ, ກໍ່ສ້າງບັນດາໂຮງງານບຳບັດນ້ຳປະປາ. ພ້ອມທັງ, ເອົາໃຈໃສ່ລະດົມບັນດາວິສາຫະກິດເຂົ້າຮ່ວມການກໍ່ສ້າງ, ຄຸ້ມຄອງ ແລະ ຂຸດຄົ້ນ, ເພື່ອປະກອບສ່ວນພ້ອມກັບລັດລົງທຶນເຂົ້າບັນດາກິດຈະກຳສະໜອງນ້ຳປະປາ ໃຫ້ແກ່ປະຊາຊົນຢູ່ເຂດຊົນນະບົດ. ທ່ານ ຫງວຽນດົງທາບ, ຜູ້ອຳນວຍການສູນນ້ຳປະປາ ແລະ ອະນາໄມສິ່ງແວດລ້ອມເຂດຊົນນະບົດແຂວງ ບັກນີງ, ໃຫ້ຮູ້ວ່າ:
“ຜ່ານວິວັດການນຳໃຊ້ນະໂຍບາຍທົ່ວສັງຄົມເຂົ້າຮ່ວມຂອງແຂວງ ບັກນີງ, ໃນບໍລິເວນແຂວງມີທັງໝົດ 97 ຕາແສງ, ມາຮອດປະຈຸບັນບັນດາວິສາຫະກິດໄດ້ລົງທຶນ 52 ຕາແສງ, ໃນນັ້ນມີ 21 ຕາແສງໄດ້ມອບສົ່ງສຳເລັດ ແລະ ນຳເຂົ້າເຄື່ອນໄຫວ ແລະ 26 ຕາແສງພວມດຳເນີນການກໍ່ສ້າງ ຄາດວ່າຮອດທ້າຍປີ 2016 ຈະປະຕິບັດສຳເລັດ. ບັນດາລະບົບທໍ່ສົ່ງນ້ຳປະປາເຖິງເຂດໃຈກາງຕາແສງຕ່າງໆນັ້ນຮອດໄຕມາດທີ 2 ປີ 2017 ຈະລົງສູ່ແຕ່ລະຄອບຄົວ. 5 ຕາແສງໄດ້ອະນຸມັດຜ່ານໂຄງການ ແລະ ພວມເລືອກເຟັ້ນບັນດານັກລົງທຶນ. ດັ່ງນັ້ນ, ຮອດໄຕມາດທີ 2 ປີ 2017 ຈະມີ 100% ຕາແສງເຂດຊົນນະບົດໃນບໍລິເວນແຂວງ ບັກນີງ ໄດ້ນຳໃຊ້ນ້ຳປະປາ”
ແຂວງ ບັກນີງ ໄດ້ກຳນົດຍູ້ແຮງວຽກງານຫັນເປັນທົ່ວສັງຄົມກ່ຽວກັບນ້ຳສະອາດ ແລະ ອະນາໄມສິ່ງແວດລ້ອມເຂດຊົນນະບົດ ນັ້ນແມ່ນການກໍ່ສ້າງບັນດານະໂຍບາຍບຸລິມະສິດ, ສົ່ງເສີມພາກເອກະຊົນ ແລະ ບັນດາພາກສ່ວນເສດຖະກິດອື່ນໆລົງທຶນກໍ່ສ້າງກິດຈະກຳສະໜອງນ້ຳແບບລວມ. ເຮັດໄດ້ຄືແນວນັ້ນ, ຕະຫຼາດສະໜອງນ້ຳປະປາເຂດຊົນນະບົດຢູ່ແຂວງ ບັກນີງ ຈຶ່ງມີຫຼາຍຮູບຫຼາຍແບບ, ປະຊາຊົນຈະໄດ້ສຳດກັບການບໍລິການດີທີ່ສຸດ, ມີຄຸນນະພາບທີ່ສຸດເພື່ອຍົກສູງສຸຂະພາບຂອງວົງຄະນະຍາດ.