ປີ 2016, ເຖິງວ່າສະພາບການທາງດ້ານເສດຖະກິດໂລກຍັງປະສົບກັບຄວາມຫຍຸ້ງຍາກຫຼາຍຢ່າງ ດ້ວຍການຊຸດໂຊມຢ່າງແຮງທັງທາງດ້ານການສະໜອງ ແລະ ຄວາມຕ້ອງການໃນຕະຫຼາດກໍ່ຕາມ, ແຕ່ວົງເງິນສົ່ງອອກຂອງທົ່ວປະເທດໃນປີ 2016 ເບິ່ງລວມແລ້ວຍັງຄົງຮັກສາໄດ້ທ່າອ່ຽງເພີ່ມຂຶ້ນ. ນີ້ແມ່ນສັນຍານອັນຕັ້ງໜ້າທີ່ຊີ້ໃຫ້ເຫັນວ່າການສົ່ງອອກຂອງຫວຽດນາມ ສືບຕໍ່ຮັກສາລະດັບເຕີບໂຕໄດ້, ເຖິງວ່າລະດັບເຕີບໂຕຍັງຕ່ຳເມື່ອທຽບໃສ່ຄາດໝາຍທີ່ໄດ້ວາງອອກ.
ຕາມຕົວເລກສະຖິຕິຫຼ້າສຸດ, ຍອດວົງເງິນຂາອອກຂາເຂົ້າໃນທົ່ວປະເທດບັນລຸປະມານ 170 ຕື້ USD, ຮັກສາລະດັບເຕີບໂຕ 7 - 7,5%. ຜ່ານນີ້ອາດເຫັນໄດ້ທ່າອ່ຽງຢ່າງຈະແຈ້ງພໍສົມຄວນ ນັ້ນແມ່ນການສົ່ງອອກຍັງຄົງຮັກສາໄດ້ລະດັບເຕີບໂຕເຖິງວ່າຢູ່ໃນລະດັບຕ່ຳກວ່າເມື່ອທຽບໃສ່ຄາດໝາຍທີ່ໄດ້ວາງອອກແມ່ນ 10% ກໍ່ຕາມ, ແຕ່ນີ້ແມ່ນໜຶ່ງໃນບັນດາປັດໃຈປະກອບສ່ວນຮັກສາທ່າອ່ຽງສົ່ງອອກເກີນດູນໃນເຄິ່ງຕົ້ນປີ.
ສາຍເຫດຕົ້ນຕໍທີ່ເຮັດໃຫ້ວົງເງິນສົ່ງອອກເຕີບໂຕຊ້າ ແມ່ນຍ້ອນລາຄາສົ່ງອອກຖືກຫຼຸດລົງຢ່າງແຮງ, ລວມທັງການຫຼຸດລາຄານ້ຳມັນດິບ ແລະ ລາຄາສົ່ງອອກສິນຄ້າອຸດສາຫະກຳປຸງແຕ່ງ. ສິ່ງດັ່ງກ່າວໄດ້ຊີ້ໃຫ້ເຫັນວ່າ, ກໍເຊັ່ນດຽວກັບຫຼາຍປະເທດໃນພາກພື້ນ, ການສົ່ງອອກຂອງຫວຽດນາມກໍ່ຖືກຜົນສະທ້ອນຫຼຸດລົງຢ່າງແຮງຈາກທ່າອ່ຽງການຫຼຸດລາຄາຂອງຕະຫຼາດໂລກຢ່າງຕໍ່ເນື່ອງນັບແຕ່ປີ 2015 ມາຮອດປະຈຸບັນ. ເຄື່ອງຕ່ຳແຜ່ນຕັດຫຍິບຂອງຫວຽດນາມ, ເຊິ່ງແມ່ນຂົງເຂດສົ່ງອອກໄດ້ຮັບຄວາມຫວັງຫຼາຍທີ່ສຸດນັບແຕ່ກ່ອນມາຮອດປະຈຸບັນ ຖືກຜົນກະທົບຈາກການຫຼຸດລາຄາຂອງຕະຫຼາດໂລກໃນປີນີ້. ທ່ານນາງ ຟານທິແທງຊວນ, ເລຂາທິການໃຫຍ່ສະຫະພັນເກີບໜັງ - ກະເປົາຫີ້ວຫວຽດນາມ ໃຫ້ຮູ້ວ່າ.
“ສຳລັບການເຕີບໂຕຂອງຂະແໜງເກີບໜັງປີ 2016, ຍ້ອນການຫຼຸດລົງຂອງບັນດາຕະຫຼາດສົ່ງອອກຄືອີຢູ, ໃນນັ້ນບັນດາຕະຫຼາດຕົ້ນຕໍຄືຕະຫຼາດອັງກິດ ມີລະດັບຫຼຸດລົງຫຼາຍພໍສົມຄວນ, ສະນັ້ນຈຶ່ງມີຜົນສະທ້ອນເຖິງວົງເງິນສົ່ງອອກຂອງທົ່ວຂະແໜງ. ປະຈຸບັນ, ລະດັບເຕີບໂຕທົ່ວຂະແໜງບັນລຸພຽງແຕ່ປະມານ 8% ເທົ່ານັ້ນ, ຕ່ຳກວ່າແຜນການທີ່ໄດ້ວາງອອກໃນປີ 2016 ແມ່ນ 10%.”
ເຖິງວ່າການສົ່ງອອກໃນປີ 2016 ຍັງບໍ່ທັນບັນລຸໄດ້ຄາດໝາຍໄດ້ວາງອອກກໍ່ຕາມ, ແຕ່ຍັງມີຈຸດພົ້ນເດັ່ນເປັນໜ້າສົນໃຈຫຼາຍຢ່າງ. ມີສິນຄ້າໃໝ່ບາງຊະນິດບັນລຸລະດັບເຕີບໂຕສູງຄື: ຜັກ, ໝາກໄມ້ ເພີ່ມຂຶ້ນ 30% ເມື່ອທຽບໃສ່ປີ 2015; ເຂົ້າໜົມເພີ່ມຂຶ້ນ 17%; ຫົວອາຫານລ້ຽງສັດເພີ່ມຂຶ້ນ 17%... ພິເສດ, ການສົ່ງອອກສິນໃນນ້ຳຂອງຫວຽດນາມ ໃນປີ 2016 ແມ່ນຈຸດເດັ່ນ. ຕົວຢ່າງຄືປາຈາ ຂອງຫວຽດນາມ ໄດ້ມີໜ້າຢູ່ 140 ຕະຫຼາດ, ເພີ່ມຂຶ້ນຕື່ມ 4 ຕະຫຼາດເມື່ອທຽບໃສ່ປີ 2015. ໃນນັ້ນ, ການສົ່ງອອກປາຈາ ໄປຍັງອາເມລິກາ, ເຊິ່ງແມ່ນຕະຫຼາດສົ່ງອອກປາຈາ ໃຫຍ່ກວ່າໝູ່ຂອງຫວຽດນາມ, ບັນລຸກວ່າ 360 ລ້ານ USD, ກວມເອົາ 20% ຍອດມູນຄ່າສົ່ງອອກປາຈາ, ປະກອບເຂົ້າລະດັບເຕີບໂຕໃນການສົ່ງອອກລວມຫຼາຍພໍສົມຄວນ. ໃນສະພາບທີ່ຫວຽດນາມ ນັບມື້ນັບຕ້ອງປະເຊີນໜ້າກັບການໜັງຕີງຂອງຕະຫຼາດ, ບັນດາຮົ້ວກີດຂວາງດ້ານເຕັກນິກຂອງບັນດາປະເທດນຳເຂົ້າ, ລະດັບເຕີບໂຕນີ້ແມ່ນຄວາມມານະພະຍາຍາມຢ່າງໃຫຍ່ຫຼວງ. ນັກຊ່ຽວຊານດ້ານເສດຖະກິດ ລິວບິ໋ກໂຮ່, ຖືວ່າ.
“ບັນດາມາດຕະການເພື່ອໃຫ້ພວກເຮົາຊຸກຍູ້ການເຕີບໂຕ ລ້ວນແຕ່ຕິດພັນກັບການຍົກສູງປະສິດທິຜົນຄຸນນະພາບ, ສະມັດຕະພາບ. ສິ່ງດັ່ງກ່າວລັດຖະບານກໍໄດ້ຊີ້ແຈ້ງຫຼາຍເທື່ອແລ້ວ, ພິເສດແມ່ນໃນຂົງເຂດກະສິກຳ ໄດ້ມີຫຼາຍວຽກງານເພື່ອແນໃສ່ຊຸກຍູ້ການເລີ່ມດຳເນີນອາຊີບ, ການໝູນໃຊ້ເຕັກໂນໂລຊີສູງໃນຂົງເຂດກະສິກຳ. ບັນດາຂະແໜງອື່ນຈາກອຸດສາຫະກຳ, ການບໍລິການລ້ວນແຕ່ມີຄວາມມານະພະຍາຍາມຫຼາຍຢ່າງ ເພື່ອສ້າງໂຄງປະກອບຄືນໃໝ່ ຕິດພັນກັບລະບອບລະບຽບການ”.
ຕາມທ່ານເຈີ່ນແທງຫາຍ, ຮອງຫົວໜ້າກົມຂາອອກຂາເຂົ້າ, ກະຊວງອຸດສາຫະກຳການຄ້າ ແລ້ວ, ໃນສະພາບທີ່ລະດັບການເຕີບໂຕຂອງບັນດາປະເທດພວມຫຼຸດລົງນັ້ນ, ເລື່ອງຫວຽດນາມ ຍັງຄົງຮັກສາລະດັບເຕີບໂຕໄດ້ກວ່າ 7% ແມ່ນເປັນໜ້າຮັບຮອງ. ສະນັ້ນ, ປີ 2017, ວົງເງິນສົ່ງອອກອາດສາມາດບັນລຸລະດັບເຕີບໂຕສູງກວ່າ. ທ່ານ ເຈີ່ນແທງຫາຍ ໄຈ້ແຍກວ່າ.
“ຄຽງຂ້າງການເປີດກວ້າງຕະຫຼາດ, ພວກເຮົາກໍຕ້ອງເອົາໃຈໃສ່ເຖິງການດັດປັບບັນດາຂະແໜງສິນຄ້າ. ບໍ່ພຽງແຕ່ເອົາໃຈໃສ່ເປັນພິເສດເຖິງການຄອງບັນດາຕະຫຼາດເທົ່ານັ້ນ, ຫາກຍັງຕ້ອງຄອບຄອງບັນດາຂະແໜງສິນຄ້າທີ່ມີທ່າແຮງໃນແຜນທີ່ໂລກອີກດ້ວຍ. ຍົກຕົວຢ່າງຄື: ກ່ອນນີ້ 5 ປີ, ຫວຽດນາມ ແມ່ນປະເທດພົ້ນເດັ່ນດ້ານເຕັກໂນໂລຊີ ຫຼື ໂຮງຈັກໂຮງງານເພື່ອຜະລິດໂທລະສັບມືຖື, ມາຮອດປະຈຸບັນພວກເຮົາໄດ້ມີຊື່ສຽງແລ້ວ. ສະນັ້ນ, ຄວນກຳນົດຄືນບັນດາຂະແໜງສິນຄ້າ ແລະ ພັດທະນາບັນດາຂະແໜງສິນຄ້າເຊິ່ງພວກເຮົາມີທ່າແຮງ”.
ປີ 2016 ແມ່ນປີທີ່ປະສົບກັບຄວາມຫຍຸ້ງຍາກຫຼາຍຢ່າງສຳລັບບັນດາປະເພດສິນຄ້າຕົ້ນຕໍຂອງຫວຽດນາມ. ບັນດາຄວາມຫຍຸ້ງຍາກເຫຼົ່ານັ້ນໄດ້ກາຍເປັນກຳລັງດັນເພື່ອໃຫ້ບັນດາວິສາຫະກິດພັດທະນາກຳລັງພາຍໃນ ແລະ ຍາດແຍ່ງທ່າໄດ້ປຽບໃນການລົງນາມໃນບັນດາສັນຍາການຄ້າເສລີຫຼາຍສະບັບ, ບືນຕົວຂຶ້ນເຊື່ອມໂຍງໃນທົ່ວໂລກ. ນີ້ແມ່ນບັນດາກາລະໂອກາດເພື່ອສືບຕໍ່ເພີ່ມທະວີ ແລະ ຊຸກຍູ້ການພັດທະນາດ້ານການຄ້າ, ແມ່ນກຳລັງຊຸກຍູ້ການເຕີບໂຕໃນການສົ່ງອອກ, ກໍຄືການເຕີບໂຕດ້ານເສດຖະກິດຂອງປະເທດໃນປີ 2017 ແລະ ໃນຊຸມປີຕໍໄປ.