ເຖິງວ່າໄດ້ປະສົບກັບຄວາມຫຍຸ້ງຍາກຫຼາຍຢ່າງ ຈາກການຟື້ນຟູຊັກຊ້າຂອງພື້ນຖານເສດຖະກິດໂລກກໍ່ຕາມ, ແຕ່ເສດຖະກິດຂອງຫວຽດນາມ ໃນປີ 2016 ໄດ້ຮັບການພັດທະນາປົກກະຕິພໍສົມຄວນ. ພ້ອມກັບການເຕີບໂຕໃນການສົ່ງອອກ, ຂົງເຂດລົງທຶນໂດຍກົງຈາກຕ່າງປະເທດ (FDI) ເຂົ້າຫວຽດນາມ ສືບຕໍ່ບັນລຸໄດ້ບັນດາໝາກຜົນທີ່ໜ້າຊື່ນຊົມ, ປະກອບສ່ວນເຂົ້າໃນການພັດທະນາຢ່າງໝັ້ນຄົງຂອງພື້ນຖານເສດຖະກິດ. ຕົວເລກສະຖິຕິຮອດເດືອນ 12/2016 ໄດ້ຊີ້ໃຫ້ເຫັນວ່າ, ຫວຽດນາມ ດຶງດູດໄດ້ 2.200 ກວ່າໂຄງການລົງທຶນໃໝ່, ດ້ວຍຍອດທຶນຈົດທະບຽນກວ່າ 13 ຕື້ USD. ກວ່າ 1.000 ໂຄງການເພີ່ມເງິນລົງທຶນ, ບັນລຸກວ່າ 5 ຕື້ USD. ນັກຊ່ຽວຊານດ້ານເສດຖະກິດ ເລດັງແຢງ, ຖືວ່າ.
“ໃນປີ 2016, ຫວຽດນາມ ສືບຕໍ່ປັບປຸງສະພາບແວດລ້ອມແຫ່ງການລົງທຶນ ແລະ ພິເສດແມ່ນການປ່ອຍແຫຼ່ງເງິນລົງທຶນຈາກຕ່າງປະເທດເພີ່ມຂຶ້ນຢ່າງຈະແຈ້ງ. ໃນນັ້ນ, ການປ່ອຍເງິນບັນດາໂຄງການລົງທຶນຈາກສ.ເກົາຫຼີ, ໃນນັ້ນກຸ່ມບໍລິສັດໃຫຍ່ Samsung ແລະ Intel ຂອງສ.ເກົາຫຼີ ໄດ້ປະກອບສ່ວນຢ່າງໃຫຍ່ຫຼວງໃຫ້ແກ່ການສົ່ງອອກຂອງຫວຽດນາມ. ຕົວເລກປ່ອຍເງິນຂອງບັນດາໂຄງການລົງທຶນຢູ່ຫວຽດນາມ ໃນປີ 2016 ບັນລຸປະມານ 13 ຕື້ USD, ນີ້ແມ່ນລະດັບສູງທີ່ສຸດນັບແຕ່ກ່ອນມາຮອດປະຈຸບັນ”.
ນັບແຕ່ຕົ້ນປີ 2016, ລັດຖະບານໄດ້ປະກາດໃຊ້ບັນດາກົນໄກ, ນະໂຍບາຍຕັດສິນໃຈປັບປຸງສະພາບແວດລ້ອມແຫ່ງການດຳເນີນທຸລະກິດ, ຊຸກຍູ້ການດຶງດູດເງິນລົງທຶນ. ພ້ອມກັນນັ້ນ, ຫວຽດນາມ ໄດ້ ແລະ ພວມຍູ້ແຮງບັນດາຄວາມມານະພະຍາຍາມເຊື່ອມໂຍງຢ່າງເລິກເຊິ່ງ, ກວ້າງຂວາງເຂົ້າໃນພື້ນຖານເສດຖະກິດໂລກໃນທຸກຂົງເຂດຄື: ເສດຖະກິດ, ການຄ້າ ແລະ ການລົງທຶນ. ນອກນັ້ນ, ກົມໃຫຍ່ສ່ວຍສາອາກອນ, ກົມໃຫຍ່ພາສີ ກໍປັບປຸ່ງການເຄື່ອນໄຫວຂອງຕົນເພື່ອຫຼຸດຜ່ອນລາຍຈ່າຍ, ປະຢັດເວລາໃຫ້ວິສາຫະກິດ. ບັນດາການກະທຳນີ້ໄດ້ ແລະ ພວມເປີດບັນດາກາລະໂອກາດພັດທະນາເສດຖະກິດຢູ່ພາຍໃນປະເທດ ແລະ ສ້າງບາດກ້າວບຸກທະລຸໃຫ້ການດຶງດູດ FDI. ນັກຊ່ຽວຊານດ້ານເສດຖະກິດ ເລດັງແຢງ ໃຫ້ຮູ້ຕື່ມອີກວ່າ.
“ໃນຕາຕະລາງຈັດອັນດັບສະພາບແວດລ້ອມແຫ່ງການລົງທຶນຂອງທະນາຄານໂລກປີ 2017 ໄດ້ຍົກອັນດັບຂອງຫວຽດນາມ ຂຶ້ນ 8 ຂັ້ນ, ຢືນອັນດັບທີ 81. ຫວຽດນາມ ກໍໄດ້ຮັບການຕີລາຄາວ່າໄດ້ມີບັນດາການປັບປຸງໃນການແກ້ໄຂບັນດາຂໍ້ຕິດຂັດ, ບັນດາລະບຽບການໃນການສົ່ງອອກ, ນຳເຂົ້າ. ເວທີ່ປາໄສເສດຖະກິດໂລກ ກໍສືບຕໍ່ຍົກອັບດັບຫວຽດນາມ ໃນຕາຕະລາງຈັດອັນດັບສະພາບແວດລ້ອມແຫ່ງການຄ້າສາກົນ. ທ່ານນາຍົກລັດຖະມົນຕີ ຫງວຽນຊວນຟຸກ ກໍ່ໃຫ້ຄຳໝັ້ນສັນຍາເປັນຫຼາຍຄັ້ງ ແມ່ນຍົກສູງກຳລັງແກ່ງແຍ້ງຂອງພື້ນຖານເສດຖະກິດຫວຽດນາມ”.
ປີ 2016, ຫວຽດນາມ ກໍ່ປະສົບກັບໄພທຳມະຊາດຢ່າງລຽນຕິດ, ຈາກໄພແຫ້ງແລງ, ນຳ້ເຄັມຊຶມເຂົ້າຢູ່ເຂດທົ່ງພຽງແມ່ນຳ້ຂອງທາງພາກໃຕ້ຫວຽດນາມ; ນຳ້ແກ່ງຖ້ວມ ແລະ ມົນລະຜິດສິ່ງແວດລ້ອມຢູ່ພາກກາງ. ຍ້ອນເຫດນັ້ນ, ຫວຽດນາມ ພວມປັບປຸງບັນດານະໂຍບາຍຄືນໃໝ່, ເພື່ອແນໃສ່ຮັບປະກັນດຶງດູດການລົງທຶນຕາມທິດໝັ້ນຄົງ. ທ່ານ ຫງວຽນວັນຕ່ວານ, ນັກຊ່ຽວຊານກ່ຽວກັບການລົງທຶນຕ່າງປະເທດຖືວ່າ.
“ກຳນົດທິດການລົງທຶນຈາກຕ່າງປະເທດຄືນໃໝ່, ບໍ່ພຽງແຕ່ຕ້ອງເດີນຕາມດ້ານຈຳນວນເທົ່ານັ້ນ, ຫາກຍັງຕ້ອງກຳນົດທິດດຶງດູດການລົງທຶນຕາມທິດມີຄຸນນະພາບ, ມີປະສິດທິຜົນ ແລະ ສ້າງກາລະໂອກາດພັດທະນາຢູ່ຫວຽດນາມ ຢ່າງໝັ້ນຄົງ, ຫາກບໍ່ແມ່ນດຶງດູດການລົງທຶນດ້ວຍທຸກວິທີ. ໃນການດຶງດູດການລົງທຶນຈາກຕ່າງປະເທດພວກເຮົາມີສິດຄັດເລືອກບັນດາໂຄງການ, ບັນດາຜະລິດຕະພັນ, ນັກລົງທຶນ ແລະ ຄັດເລືອກປະເທດລົງທຶນ”.
ຈຸດພົ້ນເດັ່ນອີກອັນໜຶ່ງໃນການລົງທຶນເຂົ້າຫວຽດນາມ ນັ້ນແມ່ນ, ດຶງດູດບັນດາວິສາຫະກິດລົງທຶນເຂົ້າຂົງເຂດກະສິກຳ. ພ້ອມກັບການສ້າງໂຄງປະກອບຂະແໜງກະສິກຳຄືນໃໝ່ ຈາກການຜະລິດຂະໜາດນ້ອຍ, ຫັນໄປສູ່ພື້ນຖານຜະລິດສິນຄ້າລວມສູນບັນລຸໄດ້ບາດກ້າວເບື້ອງຕົ້ນແລ້ວ. ທ່ານລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ຫງວຽນຊວນເກື່ອງ ຢືນຢັນວ່າ.
“ທ່ານນາຍົກລັດຖະມົນຕີໄດ້ມອບໜ້າທີ່ໃຫ້ບັນດາຂະແໜງຄົ້ນຄວ້າ, ປັບປຸງດຳລັດ 210 ກ່ຽວກັບການດຶງດູດການລົງທຶນເຂົ້າຂົງເຂດກະສິກຳ. ໃນນັ້ນ, ສຸມໃສ່ເຂົ້າບັນດານະໂຍບາຍບຸລິມະສິດແກ່ວິສາຫະກິດລົງທຶນໃນຂົງເຂດກະສິກຳມີເຕັກໂນໂລຊີີສູງ, ກະສິກຳເຕັກໂນໂລຊີສະອາດ. ຄຽງຂ້າງນັ້ນ, ບັນດາຂໍ້ຕິດຂັດອື່ນໆຄື: ທີ່ດິນ, ສິ້ນເຊື່ອ ແລະ ທະນາຄານ, ຂະແໜງກະສິກຳກໍ່ພວມສົມທົບກັບບັນດາກະຊວງ, ຂະແໜງການທີ່ກ່ຽວຂ້ອງເພື່ອປະກາດໃຊ້ບັນດານະໂຍບາຍມີລັກສະນະບຸກທະລຸ, ຕັ້ງໜ້າ ແລະ ຕິດແທດກັບຕົວຈິງເພື່ອດຶງດູດບັນດາວິສາຫະກິດ ແລະ ພາກສ່ວນເສດຖະກິດລົງທຶນເຂົ້າຂົງເຂດກະສິກຳ”.
ປີ 2017, ລັດຖະບານຫວຽດນາມ ໃຫ້ຄຳໝັ້ນສັນຍາສືບຕໍ່ຍົກສູງກຳລັງແກ່ງແຍ່ງຂອງພື້ນຖານເສດຖະກິດ ແລະ ສ້າງລັດແຫ່ງສ້າງສັນ; ໜູນຊ່ວຍ, ຮ່ວມມືກັບວິສາຫະກິດ ແລະ ສ້າງລັດຖະບານສັດຊື່ບໍລິສຸດ, ຫຼຸດຜ່ອນບັນດາລະບຽບການບໍລິຫານໃນການລົງທຶນ. ນີ້ຈະແມ່ນບາດກ້າວບຸກທະລຸໃນການດຶງດູດ FDI ຂອງຫວຽດນາມ ໃນຊຸມປີຕໍ່ໆໄປ.