ປະຈຸບັນ, ຫວຽດນາມ ມີວິສາຫະກິດ Logistics ກວ່າ 1.300 ແຫ່ງ, ລວມທັງວິສາຫະກິດມີເງິນລົງທຶນຈາກຕ່າງປະເທດ. ນີ້ແມ່ນການບໍລິການມີຄວາມສາມາດບົ່ມຊ້ອນ ດ້ວຍຂອບຂະໜາດບັນລຸມູນຄ່າແຕ່ 20 ຫາ 22 ຕື້ດົ່ງ/ປີ, ກວມເອົາ 21% GDP ຂອງທົ່ວປະເທດ. ບົດລາຍງານແກ່ງແຍ້ງທົ່ວໂລກຂອງເວທີປາໄສເສດຖະກິດໂລກແຕ່ລະປີໄດ້ຊີ້ໃຫ້ເຫັນວ່າ, ຫວຽດນາມ ພວມຖືກຈັດອັນດັບຕ່ຳກວ່າຫຼາຍປະເທດໃນຂົງເຂດກ່ຽວກັບການບໍລິການຂົນສົ່ງ, ນັ້ນແມ່ນຄຸນນະພາບທາງບົກ ແລະ ຄຸນນະພາບທ່າກ່ຳປັ່ນ. ຕາມຕາຕະລາງຈັດອັນດັບຂອງທະນາຄານໂລກ, ຂະແໜງ Logistics ຫວຽດນາມ ຖືກຈັດອັນດັບທີ 64 ໃນຈຳນວນ 160 ປະເທດໃນໂລກ ແລະ ຢືນອັນດັບທີ 4 ໃນພາກພື້ນອາຊຽນ, ຖັດຈາກສິງກະໂປ, ມາເລເຊຍ ແລະ ໄທ. ສາຍເຫດທີ່ພາໃຫ້ຂະແໜງ Logistics ຍັງບໍ່ທັນພັດທະນາຢ່າງແຮງນັ້ນແມ່ນ ຍ້ອນວິສາຫະກິດຫວຽດນາມ ສ່ວນຫຼາຍແມ່ນຂະໜາດກາງ ແລະ ນ້ອຍ, ຕັ້ງຢູ່ກະແຈກກະຈາຍ ແລະ ຂາດການຮ່ວມສຳພັນ, ເຊິ່ງພາໄປເຖິງການຫຼຸດຜ່ອນກຳລັງແກ່ງແຍ້ງ. ໃນຂະນະນັ້ນ, ບັນດາວິສາຫະກິດມີເງິນລົງທຶນຈາກຕ່າງປະເທດພວມເຂົ້າຮ່ວມຢູ່ຕະຫຼາດຫວຽດນາມ ແມ່ນບັນດາວິສາຫະກິດໃຫຍ່, ມີການຮ່ວມສຳພັນໃນທົ່ວໂລກ ແລະ ພວມກວມເອົາອັດຕານສ່ວນຫຼາຍໃນຂົງເຂດ Logistics. ທ່ານ ເຈີນແອງເວືອງ, ເລຂາທິການໃຫຍ່ເວທີປາໄສເສດຖະກິດພາກເອກະຊົນຫວຽດນາມ ຖືວ່າ.
“ໂຄງປະກອບ, ລາຍຈ່າຍຂົນສົ່ງ Logistics ຍັງສູງຢູ່ແມ່ນສິ່ງທີ່ແນ່ນອນແລ້ວ, ນັ້ນແມ່ນຍ້ອນປະລິມານສິນຄ້າຂົນສົ່ງຂອງພວກເຮົາຕ່ຳພໍສົມຄວນເມື່ອທຽບໃສ່ບັນດາພື້ນຖານເສດຖະກິດອື່ນໆ. ສະນັ້ນ, ເຂດມີພົນລະເມືອງຫຼາຍຄືປະເທດອັງກິດ, ລາຍຈ່າຍໃຫ້ການບໍລິການດັ່ງກ່າວພຽງປະມານ 40.000 USD ເທົ່ານັ້ນ, ແຕ່ຢູ່ຫວຽດນາມຕົວເລກນີ້ແມ່ນຂຶ້ນເຖິງ 140.000 USD… ລາຍຈ່າຍແກ່ການຂົນສົ່ງ Logistics ຍັງສູງຢູ່ກໍ່ແມ່ນປັດໃຈເພື່ອອະທິບາຍນອກຈາກບັນດາປັດໃຈທີ່ຍັງຈຳກັດ, ອ່ອນດ້ອຍ”.
ທ່ານເຈີນແທງຫາຍ, ຮອງຫົວໜ້າກົມຂາອອກ, ຂາເຂົ້າ, ກະຊວງອຸດສາຫະກຳການຄ້າ, ຖືວ່າ ມີເງື່ອນໄຂຢ່າງພຽງພໍເພື່ອພັດທະນາ Logistics ແລະ ນຳການເຄື່ອນໄຫວດັ່ງກ່າວໃຫ້ຂຶ້ນສູ່ລະດັບສູງໃໝ່ ຍ້ອນຕະຫຼາດສິນຄ້າສົ່ງອອກຂອງຫວຽດນາມ ພວມຟົດຟື້ນທີ່ສຸດ, ດ້ວຍຍອດວົງເງິນການສົ່ງອອກ, ນຳເຂົ້າສິນຄ້າຂຶ້ນເຖິງ 300 ຕື້ USD ໃນປີ 2016. ຕົວເລກດັ່ງກ່າວຈະສືບຕໍ່ເພີ່ມຂຶ້ນສູງໃນຊຸມປີຈະມາເຖິງ. ສະນັ້ນ, ຄຸນນະພາບ Logistics ໄດ້ຮັບການປັບປຸງ ຈະແມ່ນກຳລັງຊຸກຍູ້ຢ່າງໃຫຍ່ຫຼວງສຳລັບຂົງເຂດສົ່ງອອກຂອງຫວຽດນາມ. ຕາມການຄິດໄລ່ແລ້ວ, ແຕ່ລະມື້ຖ້າຫາກສິນຄ້າຕ້ອງລໍຖ້າສົ່ງອອກ, ນຳເຂົ້ານັ້ນຈະເຮັດໃຫ້ການຄ້າຫຼຸດລົງເຖິງ 4 %. ສະນັ້ນ, ບັນດາສິ່ງກີດຂວາງໃນ Logistics ການຄ້າຄືປະຈຸບັນພວມແມ່ນສິ່ງກີດຂວາງຢ່າງໃຫຍ່ຫຼວງໃນຍຸດທະສາດເຕີບໂຕເສດຖະກິດ. ໃນໄລຍະຈະມາເຖິງ, ກະຊວງອຸດສາຫະກຳການຄ້າ ຈະມີບັນດາແຜນການເຄື່ອນໄຫວຢ່າງລະອຽດ ເພື່ອຍົກສູງກຳລັງຄວາມສາມາດ ແລະ ຄຸນນະພາບຂອງການບໍລິການ Logistics ຢູ່ຫວຽດນາມ.
“ທີໜຶ່ງແມ່ນກອບກົດໝາຍ, ລະບອບລະບຽບການຕ້ອງສ້າງໃຫ້ສົມບູນແບບ ຕາມກົນໄກຄຸ້ມຄອງລັດ ກ່ຽວກັບ Logistics ກໍຄືສ້າງລະບົບນະໂຍບາຍ ເພື່ອມອບໂອນການໜູນຊ່ວຍໃຫ້ຂະແໜງ Logistics ເພື່ອພັດທະນາ. ຄຽງຂ້າງນັ້ນ, ຕ້ອງມີບັນດາກອບກົດໝາຍເພື່ອແນະນຳໃຫ້ບັນດາວິສາຫະກິດເຄື່ອນໄຫວໃຫ້ຖືກຕາມຂອບເຂດລັດຖະທຳມະນູນ. ປັດໃຈທີ 2 ແມ່ນພື້ຶ້ນຖານໂຄງລ່າງ ຄືຈາກບັນດາພື້ນຖານໂຄງລ່າງຂອງຂະແໜງຄົມມະນາຄົມຂົນສົ່ງ, ຂົວທາງ, ສະຖານີລົດໄຟ, ທ່າກ່ຳປັ່ນ ຕະຫຼອດຮອດບັນດາສາງພັກສິນຄ້າ, ບັນດາສູນ Logistics, ນັ້ນແມ່ນພື້ນຖານໂຄງລ່າງທີ່ມີຄວາມຈຳເປັນທີ່ສຸດ”.
ຫວ່າງແລ້ວນີ້, ລັດຖະບານໄດ້ລົງນາມໃນຂໍ້ຕົກລົງອະນຸມັດຜ່ານແຜນການເຄື່ອນໄຫວຍົກສູງກຳລັງແກ່ງແຍ້ງ ແລະ ພັດທະນາການບໍລິການ Logistics ຫວຽດນາມ ຮອດປີ 2025. ເປົ້າໝາຍອັດຕາການປະກອບຂອງຂະແໜງການບໍລິການ Logistics ເຂົ້າ GDP ບັນລຸແຕ່ 8% - 10%, ລະດັບເຕີບໂຕການບໍລິການບັນລຸແຕ່ 15% - 20%, ລາຍຈ່າຍໃຫ້ Logistic ຫຼຸດລົງແຕ່ 16% - 20% GDP; ການຈັດອັນດັບດັດຊະນີກຳລັງຄວາມສາມາດແຫ່ງຊາດກ່ຽວກັບ Logistics ໃນໂລກ ບັນລຸອັນດັບທີ 50 ຂຶ້ນໄປ. ນີ້ແມ່ນກຳລັງໜູນອັນໃຫຍ່ຫຼວງທີສຸດໃຫ້ວິສາຫະກິດ Logistics ຢູ່ຫວຽດນາມ ຍ້ອນຂໍ້ຕົກລົງປະກາດໃຊ້ມີແຜນການລະອຽດ ດ້ວຍ 60 ໜ້າທີ່ທີ່ໄດ້ມອບໝາຍໃຫ້ບັນດາອົງການ, ຂະແໜງການ, ທ້ອງຖິ່ນຕ່າງໆ ປະຕິບັດຢ່າງຈະແຈ້ງ ແລະ ມີເວລາເພື່ອປະຕິບັດໃຫ້ສຳເລັດ. ທ່ານ ເລຢຸຍຮ້ຽບ, ປະທານສະຫະສະມາຄົມວິສາຫະກິດ Logistics, ຖືວ່າ.
“ດ້ວຍຂໍ້ຕົກລົງເລກທີ 200 ທີ່ຫາກໍ່ປະກາດໃຊ້ນັ້ນ, ຫວັງວ່າລັດຖະບານ, ບັນດາຄະນະ, ຂະແໜງການສ້າງເງື່ອນໄຂເພື່ອໃຫ້ວິສາຫະກິດ Logistics ປະຕິບັດຢ່າງມີໄຊ. ນອກນັ້ນຍັງມີວຽກງານອື່ນໆທີ່ຈະຕ້ອງເຮັດຄື: ຮັບປະກັນບັນດາລະບອບລາຍຈ່າຍ, ລາຄາ, ການບໍລິການ, ເພື່ອຮັບປະກັນຢ່າງຍາວນານວ່າ ລັດຕ້ອງແຊກແຊງເຂົ້າວຽກງານດັ່ງກ່າວ, ນັບທັງບັນດາວຽກງານອື່ນໆຄື: ສ້າງເງື່ອນໄຂສະດວກໃຫ້ບັນດາວິສາຫະກິດ Logistics ສາມາດກູ້ຢືມທຶນດ້ວຍຄ່າດອກເບ້ຍບຸລິມະສິດ ແລະ ສາມາດເຈລະຈາກ່ຽວກັບຄ່າດອກເບ້ຍກັບທະນາຄານ. ນີ້ກໍ່ແມ່ນເງື່ອນໄຂເພື່ອໃຫ້ບັນດາວິສາຫະກິດຂະໜາດກາງ ແລະ ນ້ອຍສາມາດເສີມຂະຫຍາຍປະສິດທິຜົນໄດ້”.
ເພື່ອຫັນບັນດາຄາດໝາຍທີ່ໄດ້ວາງອອກໃຫ້ປະກົດຜົນເປັນຈິງ, ບັນດາວິສາຫະກິດຫວຽດນາມ ໄດ້ເປັນເຈົ້າການຕອບສະໜອງຄວາມຕ້ອງການຂອງລູກຄ້າດ້ວຍຫຼາຍຮູບຫຼາຍແບບ, ພັດທະນາຍານພາຫະນະຂົນສົ່ງ. ປະຈຸບັນ, ລັດຖະບານຫວຽດນາມ ກໍພວມສ້າງນະໂຍບາຍໃຫ້ສົມບູນແບບ, ຍູ້ແຮງການດຶງດູດການລົງທຶນເຂົ້າຂົງເຂດພື້ນຖານໂຄງລ່າງ Logistics; ເພີ່ມທະວີການຮ່ວມມືກັບບັນດາຄູ່ຮ່ວມມືຕ່າງປະເທດ ເພື່ອເປີດກວ້າງການເຊື່ອມຕໍ່ດ້ານພື້ນຖານໂຄງລ່າງ ເພື່ອແນໃສ່ເຊື່ອມຕໍ່ບັນດາທ່າກ່ຳປັ່ນຂອງຫວຽດນາມ ກັບບັນດາປະເທດບ້ານໃກ້ເຮືອນຄຽງ.