ເພື່ອແນໃສ່ພັດທະນາຄວາມສາມາດບົ່ມຊ້ອນ, ທ່າແຮງ ແລະ ເພີ່ມສະມັດຕະພາບຂອງຕົ້ນໝາກມ່ວງຫິມະພານ, ຂະແໜງກະສິກຳ ແລະ ຊາວກະສິກອນແຂວງບິ່ງເຟື໋ອກ ພວມຍູ້ແຮງການບຸລະນະສວນໝາກມ່ວງຫິມະພານ, ໂດຍສະເພາະແມ່ນຂອດປູກເບ້ຍໄມ້. ໂດຍອີ່ງໃສ່ແນວຄວາມຄິດເຊື່ອມຕໍ່ການບຸລະນະສວນໝາກມ່ວງຫິມະພານຂອງຊາວກະສິກອນບາງຄົນຢູ່ຕາແສງ ລອງຮ່າ, ເມືອງ ບຸ່ຢາເມີບ, ຕາມຮູບແບບເຊື່ອມຕໍ່ໃຫ້ມີປະສິດທະຜົນ ແລະ ສະມັດຕະພາບສູງ, ສະມາຄົມໝາກມ່ວງຫິມະພານບິ່ງເຟື໋ອກ ໄດ້ສົມທົບກັບສະຫະສະມາຄົມໝາກມ່ວງຫິມະພານຫວຽດນາມ ພ້ອມກັບສະມາຄົມຊາວກະສິກອນຢູ່ທ້ອງຖິ່ນຕ່າງໆ ກໍສ້າງ 41 ຮູບແບບ, ດ້ວຍເນື້ອທີ່ບຸລະນະສວນໝາກມ່ວງຫິມະພານທີ່ໃຫ້ສະມັດຕະພາບ, ຄຸນນະພາບຕ່ຳໃຫ້ກາຍເປັນສວນໝາກມ່ວງຫິມະພານມີຄຸນນະພາບ, ສະມັດຕະພາບສູງ 41 ເຮັກຕາ. ທ່ານ ຫງວຽນວັນຮືງ, ປະທານສະມາຄົມຊາວກະສິກອນຕາແສງລອງຮ່າ, ເມືອງຟຸ໋ຢຽງ, ແຂວງບິ່ງເຟື໋ອກ, ແບ່ງປັນວ່າ.
“ຮູບແບບນີ້ໄດ້ຮັບການຂະຫຍາຍອອກຢ່າງກ້ວາງຂວາງ. ແຕ່ລະປີ, ພວກຂ້າພະເຈົ້າໄດ້ຕ້ອນຮັບຜູ້ມາຮ່ຳຮຽນຖອດຖອນບົດຮຽນຈາກຮູບແບບນີ້ນັບຮ້ອຍຄະນະ”.
ໃນໄລຍະຜ່ານມາ, ແຂວງ ບິ່ງເຟື໋ອກ ໄດ້ປະຕິບັດ ແລະ ຂະຫຍາຍຫຼາຍຮູບແບບຄື: ສ້າງຮູບແບບຜະລິດໝາກມ່ວງຫິມະພານປອດສານພິດ; ຜັນຂະຫຍາຍທົດລອງຮູບແບບໃສ່ຟຸ່ນເພີ່ມສະມັດຕະພາບ, ຄຸນນະພາບ, ປ້ອງກັນຕ້ານແມງແຄງ, ນ້ຳໝອກເຄັມ. ນອກນັ້ນ, ພະແນກກະສິກຳ ແລະ ພັດທະນາຊົນນະບົດແຂວງ ບິ່ງເຟື໋ອກ ຍັງສົມທົບກັບສະມາຄົມຊາວກະສິກອນແຂວງ ຜັນຂະຫຍາຍ ການຮັກສາບັນດາຕົ້ນໝາກມ່ວງຫິມະພານທີ່ມີຄຸນນະພາບດີ, ເໝາະສົມກັບອາກາດຢູ່ທ້ອງຖິ່ນ ເພື່ອຊ່ວຍຍົກສູງຄວາມສາມາດທົນທານກັບສັດຕູພືດ, ອາກາດ, ພ້ອມທັງຮັກສາຄຸນນະພາບໝາກມ່ວງຫິມະພານຂອງບິ່ງເຟື໋ອກ.
ນັບແຕ່ປີ 2007 ມາຮອດປະຈຸບັນ, ສະມາຄົມໝາກມ່ວງຫິມະພານບິ່ງເຟື໋ອກ ໄດ້ໜູນຊ່ວຍກຸ່ມພັດທະນາໝາກມ່ວງຫິມະພານແບບຍືນຍົງ ຕາແສງ ຕ໋ຽນຮືງ ກໍ່ສ້າງ ແລະ ພັດທະນາຕາມທິດຜະລິດໝາກມ່ວງຫິມະພານປອດສານພິດ, ພ້ອມທັງຫັນໄປສູ່ການເຄື່ອນໄຫວຕາມຮູບແບບສະຫະກອນ. ເຂົ້າຮ່ວມຮູບແບບນີ້, ບັນດາສະມາຊິກບໍ່ພຽງແຕ່ໄດ້ຮັບການສະໜອງເບ້ຍໝາກມ່ວງຫິມະພານທີ່ມີຄຸນນະພາບສູງເທົ່ານັ້ນ, ຫາກຍັງໄດ້ຮັບການແນະນຳດ້ານເຕັກນິກບົວລະບັດ, ໄດ້ຮັບຟຸ່ນເຄມີ ແລະ ຈຳໜ່າຍຜະລິດຕະພັນ ດ້ວຍລາຄາເປັນປົກກະຕິອີກດ້ວຍ. ທ່ານ ດ່າມຊວນທໍ້, ຮອງຜູ້ອຳນວຍການສະຫະກອນຜະລິດ, ຜະລິດຕະພັນກະເສດ ຮືງເຟື໋ອກ, ເທດສະບານ ດົ່ງຊ່ວາຍ, ໃຫ້ຮູ້ວ່າ.
“ດ້ວຍພາກສ່ວນຄຸ້ມຄອງສະຫະກອນ, ແຕ່ລະປີ ອົງການການຄ້າຍຸຕິທຳສາກົນ (FLO) ໄດ້ສົ່ງໄປສຶກສາຢູ່ຕ່າງປະເທດ. ຈາກນັ້ນ, ພະນັກງານຄຸ້ມຄອງໃນກຸ່ມຈະສຶກສາຝຶກອົບຮົມຄືນຂັ້ນຕອນການຜະລິດໃຫ້ພໍ່ແມ່ປະຊາຊົນຊາວກະສິກອນ, ສ້າງເປັນບັນດາຜະລິດຕະພັນທີ່ມີເຄື່ອງໝາຍການຄ້າ ແລະ ຖືກສົ່ງໄປຂາຍຢ່າງກວ້າງຂວາງໃນຕະຫຼາດ”.
ປະຈຸບັນ, ປະລິມານການຜະລິດປຸງແຕ່ງໝາກມ່ວງຫິມະພານຂອງບິ່ງເຟື໋ອກ ກວມກວ່າ 50% ປະລິມານສົ່ງອອກໝາກມ່ວງ, ຫິມະພານຂອງທົ່ວປະເທດ, ເຕັກໂນໂລຊີຜະລິດໝາກມ່ວງຫິມະພານໄດ້ຮັບການຕີລາຄາສູງແຖວໜ້າຂອງໂລກ. ຕະຫຼາດສົ່ງອອກແກ່ນໝາກມ່ວງຫິມະພານບິ່ງເຟື໋ອກ ນອກຈາກຈີນ ແລະ ອາເມລິກາ, ໃນໄລຍະຜ່ານມາຍັງສົ່ງອອກຕະຫຼາດໃໝ່ຄື: ໂຮນລັງ, ອັງກິດ ແລະ ຫຼາຍປະເທດອື່ນຢູ່ເອີລົບ. ຂະແໜງໝາກມ່ວງຫິມະພານໄດ້ ແລະ ພວມນຳມາເຊິ່ງມູນຄ່າຜະລິດສູງໃຫ້ບັນດາວິສາຫະກິດ ແລະ ປະຊາຊົນ.
ໃນ 3 ປີມານີ້, ຍາມໃດໝາກມ່ວງຫິມະພານກໍ່ຮັກສາລາຄາສູງ, ນັ້ນແມ່ນເງື່ອນໄຂສະດວກເພືຶ່ອຮັກສາເນື້ອທີ່ປູກໝາກມ່ວງຫິມະພານ. ປີ 2009, ສະມັດຕະພາບສະເລ່ຍຂອງໝາກມ່ວງຫິມະພານ ບິ່ງເຟື໋ອກບັນລຸ 940 ກກ/ເຮັກຕາ, ຮອດປີ 2016 ໄດ້ຍົກສູງຂຶ້ນປະມານ 1,4 ໂຕນ/ເຮັກຕາ. ລະດູການ 2015 – 2016, ລາຄາຂາຍແກ່ນໝາກມ່ວງຫິມະພານສົດ ຄິດສະເລ່ຍແຕ່ 32.000 ດົ່ງ ຫາ 35.000 ດົ່ງ/kg, ສິ່ງດັ່ງກ່າວໄດ້ປັບປຸງຄວາມໄວ້ເນື້ອເຊື່ອໃຈໃຫ້ຜູ້ປູກໝາກມ່ວງຫິມະພານ. ປະຈຸບັນ, ໃນບໍລິເວນແຂວງບິ່ງເຟື໋ອກ ມີວິສາຫະກິດສົ່ງອອກ ແລະ ຜະລິດປຸງແຕ່ງແກ່ນໝາກມ່ວງຫິມະພານກວ່າ 200 ແຫ່ງ, ດ້ວຍຄວາມສາມາດຜະລິດໝາກມ່ວງຫິມະພານດິບແມ່ນ 400.000 ໂຕນ/ປີ. ທ່ານ ກາວດຶກຟ໋າດ, ອະດີດລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ຖືວ່າ.
“ສຳລັບການພັດທະນາການຜະລິດ, ປຸງແຕ່ງໝາກມ່ວງຫິມະພານໃນໄລຍະຍາວ, ພວກເຮົາບໍ່ພຽງແຕ່ເອົາໃຈໃສ່ເຖິງຊາວກະສິກອນກ່ຽວກັບການພັດທະນາວັດຖຸດິບເທົ່ານັ້ນ, ຫາກຍັງໜູນຊ່ວຍ, ເອົາໃຈໃສ່ເຖິງບັນດາວິສາຫະກິດສືບຕໍ່ຮັກສາພັດທະນາຕະຫຼາດ, ຍົກສູງປະສິດທິຜົນໃນການຜະລິດປຸງແຕ່ງ, ດຳເນີນທຸລະກິດ. ໃນນັ້ນເອົາໃຈໃສ່ເປັນພິເສດເຖິງການໜູນຊ່ວຍວິສາຫະກິດພັດທະນາການຜະລິດແບບລົງເລິກ ເພື່ອມີມູນຄ່າເພີມສູງກວ່າ.”
ໃນໄລຍະຈະມາເຖິງ, ເພື່ອເພີ່ມມູນຄ່າຂະແໜງສິນຄ້າ, ຍົກສູງປະລິມານການຜະລິດ, ຄຸນນະພາບໝາກມ່ວງຫິມະພານ, ແຂວງບິ່ງເຟື໋ອກ ຍັງເອົາໃຈໃສ່ເຖິງການພັດທະນາເຕັກໂນໂລຊີຜະລິດ, ປຸງແຕ່ງໝາກມ່ວງຫິມະພານ, ໂຄສະນາຜະລິດຕະພັນ. ຈາກນັ້ນ, ຍົກສູງມູນຄ່າ ແລະ ນຳເຄື່ອງໝາຍການຄ້າໝາກມ່ວງຫິມະພານ ບິ່ງເຟື໋ອກ ເຖິງຕະຫຼາດໂລກ.