(vovworld)- ທ້າຍປີ 2015 ນີ້, ປະຊາຄົມເສດຖະກິດ ອາຊຽນ ໄດ້ຮັບການສ້າງຕັ້ງຂຶ້ນ, ເວລານັ້ນ ມີສິນຄ້າຫລາຍປະເພດຈະຖືກຫລຸດອັດຕາພາສີແຕ່ 0%-5% ແລະ ບໍ່ຮອດ 3 ປີອີກ ຈະມີ 97% ຈຳນວນສິນຄ້ານຳເຂົ້າຈາກບັນດາປະເທດສະມາຊິກ ອາຊຽນ ມີອັດຕາພາສີພຽງຢູ່ໃນລະດັບ 0%. ສິ່ງດັ່ງກ່າວທັງສ້າງກາລະໂອກາດຫລາຍຢ່າງ ແຕ່ກໍວາງອອກສິ່ງທ້າທາຍສຳລັບວິສາຫະກິດພາຍໃນປະເທດ.
ຕາມຂັ້ນຕອນໃນຄຳໝັ້ນສັນຍາກັບ ອາຊຽນ ແລ້ວ, ໄລ່ຮອດປີ 2014, ຫວຽດນາມ ໄດ້ຫລຸດຜ່ອນ 72% ຂອງຕາຕະລາງອັດຕາພາສີນຳເຂົ້າລົງລະດັບ 0%. ນັບແຕ່ຕົ້ນປີ, ຫວຽດນາມ ມີ 1.706 ປະເພດພາສີໄດ້ຫລຸດລົງຍັງເຫລືອພຽງ 0%. ຮອດປີ 2018, ມີສິນຄ້າຫລາຍປະເພດຈະຫລຸດລົງຍັງເຫລືອພຽງ 0% ຄື: ລົດໂອໂຕ, ລົດຈັກ, ເຄື່ອງອາໄຫລ່ລົດໂອໂຕ, ລົດຈັກ, ນ້ຳມັນພືດ, ໝາກໄມ້, ເຄື່ອງໄຟຟ້າ… ນີ້ແມ່ນກາລະໂອກາດເພື່ອໃຫ້ວິສາຫະກິດຜະລິດແບບຮັບຈ້າງ, ຜະລິດປຸງແຕ່ງຮັບໃຊ້ການສົ່ງອອກ ເມື່ອລາຍຈ່າຍວັດຖຸດິບ, ລາຄາຜະລິດຕະພັນຫລຸດລົງ, ເພີ່ມກຳລັງແກ້ງແຍ້ງ, ເປີດກວ້າງຕະຫລາດ. ທ່ານ ເລືອງຮ່ວາງທາຍ, ຫົວຫນ້າກົມນະໂຍບາຍການຄ້າຫລາຍຝ່າຍ, ກະຊວງອຸດສາຫະກຳ ການຄ້າຫວຽດນາມໃຫ້ຮູ້ວ່າ:
“ອາຊຽນ ສ້າງພາກພື້ນຜະລິດລວມ ນັ້ນກໍແມ່ນຈຸດສຸມຂອງພວກເຮົາ, ພວກເຮົາພວມດຶງດູດການລົງທຶນຈາກຕ່າງປະເທດ, ຜ່ານນັ້ນ ເພື່ອຮ່ວມມືພັດທະນາເສດຖະກິດ. ເລື່ອງປະຊາຄົມອາຊຽນ ຫລຸດຜ່ອນອັດຕາພາສີ ສ້າງຕັ້ງຕະຫລາດລວມສ້າງຄວາມສະດວກດ້ານການຄ້າ, ລົບລ້າງຮົ້ວກີດຂວາງ, ນີ້ແມ່ນສິ່ງທີ່ມີປະໂຫຍດສຳລັບວິສາຫະກິດຂະຫນາດກາງ ແລະ ນ້ອຍ.”
ພາບປະກອບ:internet
|
ເລື່ອງຫລຸດຜ່ອນບັນດາປະເພດພາສີ ໃນໄລຍະຈະມາເຖິງ ກໍໝາຍຄວາມວ່າ ສິນຄ້າຫລາຍປະເພດຂອງບັນດາປະເທດອາຊຽນ ຈະໄດ້ນຳມາຂາຍຢູ່ ຫວຽດນາມ ແລະ ການແກ້ງແຍ້ງກັບບັນດາວິສາຫະກິດພາຍໃນປະເທດກໍຈະເພີ່ມຂຶ້ນ. ນີ້ແມ່ນສິ່ງທ້າທາຍບໍ່ຫນ້ອຍສຳລັບວິສາຫະກິດພາຍໃນປະເທດ. ທ່ານ ຮ່າຢູຍຕຸ່ງ, ຮອງຫົວຫນ້າກົມຮ່ວມມືສາກົນ, ກະຊວງການເງິນ ຫວຽດນາມ ຖືວ່າ:
“ຫວຽດນາມ ພວມປະຕິບັດນະໂຍບາຍເສຍພາສີສຳລັບສິນຄ້າສຳເລັດຮູບຢູ່ໃນລະດັບສູງກວ່າເມື່ອທຽບໃສ່ອັດຕາພາສີ ສຳລັບວັດຖຸດິບ ເພື່ອສົ່ງເສີມການຕິດຕັ້ງ, ຜະລິດຢູ່ພາຍໃນປະເທດ. ເຖິງຢ່າງໃດກໍຕາມ ໄລຈະມາເຖິງ ຕາມວິວັດການທີ່ໝັ້ນໝາຍໃນສັນຍາ ນັບທັງ ອັດຕາພາສີສຳລັບສິນຄ້າສຳເລັດຮູບກໍຄືອັດຕາພາສີ ສຳລັບວັດຖຸດິບ ລ້ວນແຕ່ຢູ່ໃນລະດັບ 0%. ຈາກນັ້ນ ມີວິສາຫະກິດຫລາຍແຫ່ງຜະລິດວັດຖຸດິບ ຈະປະສົບກັບຄວາມຫຍຸ້ງຍາກຫລາຍຢ່າງ. ນອກນັ້ນ ຂອບຂະຫນາດຂອງວິສາຫະກິດພາຍໃນປະເທດສ່ວນຫລາຍແມ່ນຂະຫນາດນ້ອຍ, ຈຳກັດດ້ານການເງິນ, ເຕັກໂນໂລຊີ ແລະ ເລື່ອງສຳພັດກັບຂໍ້ມູນຂ່າວສານຍັງຈຳກັດຫລາຍ.”
ມີວິສາຫະກິດຫລາຍແຫ່ງຖືວ່າ: ເມື່ອອັດຕາພາສີຫລຸດລົງ, ແນ່ນອນວ່າ ສິນຄ້າຕ່າງປະເທດເຂົ້າຫວຽດນາມຈະເພີ່ມຂຶ້ນຫລາຍ, ບັນດາຂະແຫນງຜະລິດພາຍໃນປະເທດ ຕ້ອງປະເຊີນຫນ້າກັບກຳລັງດັນກ່ຽວກັບຄຸນນະພາບ ແລະ ລາຄາຜະລິດຕະພັນ. ທ່ານ ໂຮ່ຊີ້ຈືກ, ປະທານສະພາສະມາຊິກບໍລິສັດການຄ້າ ແລະ ຜະລິດຮ່ວາງມາຍ ຈຳກັດ ຖືວ່າ: ນອກຈາກຄວາມມານະພະຍາຍາມຂອງຕົນ, ການຫນູນຊ່ວຍຈາກລັດກໍຈຳເປັນທີ່ສຸດ.
“ປະຈຸບັນ ຄວາມຫຍຸ້ງຍາກຂອງພວກເຮົາ ນັ້ນແມ່ນ ບັນດາວິສາຫະກິດພາຍໃນພາກພື້ນ ເຂົາເຈົ້າລ້ວນແຕ່ມີປະຫວັດແຫ່ງການພັດທະນາມາແຕ່ດົນນານແລ້ວ, ເຂົາເຈົ້າມີອິດທິພົນຊື່ສຽງ ແລະ ມີເຄື່ອງໝາຍການຄ້າດີສົມຄວນ. ປະຈຸບັນ ພວກເຮົາຢາກແຊກຊືມເຂົ້າບັນດາຕະຫລາດດັ່ງກ່າວ ຕ້ອງມີບາດກ້າວບຸກທະລຸ. ເຖິງຢ່າງໃດກໍຕາມ ເພື່ອເຮັດໄດ້ສິ່ງດັ່ງກ່າວ ຄວນມີການຮ່ວມແຮງຮ່ວມໃຈຈາກ ລັດຖະບານ.”
ເພື່ອປະຕິບັດຂັ້ນຕອນນີ້, ຕາມທ່ານ ຫວໍຈີແທ່ງ, ຮອງຫົວຫນ້າສະຖາບັນຄົ້ນຄ້ວາການຄຸ້ມຄອງເສດຖະກິດສູນກາງແລ້ວ, ໃນຕໍ່ຫນ້າ ວິສາຫະກິດ ຄວນກຳແຫນ້ນຄຳໝັ້ນສັນຍາກ່ຽວກັບວິວັດການຫລຸດຜ່ອນອັດຕາພາສີນຳເຂົ້າທີ່ກ່ຽວຂ້ອງເຖິງບັນດາຂົງເຂດຜະລິດດຳເນີນທຸລະກິດຂອງຕົນ; ເປັນເຈົ້າການໃນການສ້າງຍຸດທະສາດການຜະລິດ, ດຳເນີນທຸລະກິດໃຫ້ເໝາະສົມສຳລັບໄລຍະສັ້ນ ແລະ ຍາວ, ຍາດແຍ່ງກາລະໂອກາດ ກຽມພ້ອມເຂົ້າຮ່ວມຕະຫລາດທີ່ກວ້າງໃຫຍ່. ທ່ານ ຫວູຈີແທ່ງ ຖືວ່າ:
“ສຳລັບວິສາຫະກິດຂະຫນາດກາງ ແລະ ນ້ອຍ ຄວນສະຫງວນແຫລ່ງກຳລັງດີສຸດ, ຊັບພະຍາກອນມະນຸດໃຫ້ດີສຸດ ເພື່ອຄົ້ນຄ້ວາສິ່ງທີ່ສົ່ງຜົນສະທ້ອນເຖິງວິສາຫະກິດ, ຢາກປະຕິຮູບວິສາຫະກິດກໍຄືສ້າງຍຸດທະສາດພັດທະນາ ສິ່ງສຳຄັນທີ່ສຸດນັ້ນແມ່ນ ຕ້ອງເຂົ້າໃຈກ່ຽວກັບນະໂຍບາຍຂອງລັດ, ນິຕິກຳ ແລະ ວິທີເຊື່ອມໂຍງ, ຮູບການຜະລິດດຳເນີນທຸລະກິດ ກ່ອນທີ່ສ້າງຍຸດທະສາດ, ສ້າງວິໄສທັດ, ທ່າອ່ຽງປະຈຸບັນຂອງວິສາຫະກິດ ຕ້ອງມີການແກ້ງແຍ້ງ.”
ດ້ວຍຈຳນວນຜູ້ໃຊ້ສອຍກວ່າ 600 ລ້ານຄົນ, GDP ກວ່າ 1.300 ຕື້ USD/ປີ, ປະຊາຄົມເສດຖະກິດ ອາຊຽນ ໄດ້ຮັບຖືວ່າ ແມ່ນພາກພື້ນພັດທະນາຢ່າງຂະຫຍັນຂັນເຄື່ອນທີ່ສຸດໃນໂລກ. ປະຈຸບັນ ບັນດາປະເທດ ອາຊຽນ ແມ່ນຄູ່ຮ່ວມມືຢືນອັນດັບທີ 2 ສະຫນອງສິນຄ້າໃຫ້ຫວຽດນາມ ແລະ ກໍແມ່ນຕະຫາດສົ່ງອອກໃຫຍ່ອັນດັບ 3 ຂອງຫວຽດນາມ. ສະນັ້ນ ເພື່ອຍາດແຍ່ງທ່າໄດ້ປຽບຂອງຕະຫລາດພາຍໃນປະເທດ ແລະ ອອກສູ່ບັນດາຕະຫລາດໃນພາກພື້ນ, ບັນດາວິສາຫະກິດຫວຽດນາມ ຄວນຍົກສູງສະມັດຕະພາບແຮງງານ, ຫລຸດຜ່ອນລາຍຈ່າຍ, ລາຄາຜະລິດຕະພັນ, ຮັບປະກັນຄຸນນະພາບສິນຄ້າ. ເຮັດໄດ້ຄືແນວນັ້ນ ຈຶ່ງສາມາດເປັນເຈົ້າການໃນການເຊື່ອມໂຍງເຂົ້າກັບເສດຖະກິດສາກົນ.