ການຜະລິດ ແລະ ສົ່ງອອກກຸ້ງຂອງຫວຽດນາມ ໄດ້ຮັບການພັດທະນາຢ່າງຕໍ່ເນື່ອງໃນຫຼາຍປີຜ່ານມາ, ໄດ້ສ້າງທີ່ຕັ້ງໄດ້ດີພໍສົມຄວນໃນຂະແໜງກຸ້ງທົ່ວໂລກ. ປະຈຸບັນ, ຫວຽດນາມ ຢືນອັນດັບທີ 3 ກ່ຽວກັບການສົ່ງອອກກຸ້ງໃນໂລກ, ຖັດຈາກຈີນ ແລະ ອິນໂດເນເຊຍ. ສະເພາະ, ຫວຽດນາມ ໃນປະຈຸບັນແມ່ນຍັງນຳໜ້າໂລກກ່ຽວກັບການຜະລິດ ແລະ ສົ່ງອອກ. ກຸ້ງຫວຽດນາມ ໄດ້ສົ່ງອອກໄປຍັງ 100 ປະເທດ ແລະ ເຂດແຄ້ວນ. ພ້ອມກັນນັ້ນ, ຫວຽດນາມ ຍັງແມ່ນນັກສະໜອງກຸ້ງເຂົ້າຕະຫຼາດຍີ່ປຸ່ນ ໃຫຍ່ກວ່າໝູ່, ຢືນອັນດັບ 3 ຢູ່ຕະຫຼາດອາເມລິກາ ແລະ ຢືນອັບດັບທີ 4 ໃນກຸ່ມສະຫະພາບເອີລົບ. ທ່ານ ເຈືອງດິ່ງແຮ່, ເລຂາທິການໃຫຍ່ສະມາຄົມປຸງແຕ່ງ ແລະ ສົ່ງອອກສິນໃນນ້ຳຫວຽດນາມ ໃຫ້ຮູ້ວ່າ: ເມື່ອທຽບໃສ່ບັນດາປະເທດສົ່ງອອກກຸ້ງຄື: ໄທ, ອິນເດຍ, ອິນໂດເນເຊຍ… ຫວຽດນາມ ພວມມີທ່າແຮງກ່ຽວກັບການສົ່ງອອກກຸ້ງກຸລາດຳ ແລະ ກຸ້ງຂາວທ່ານເຈືອງດິ່ງແຮ່, ຖືວ່າ.
“ກ່ອນນີ້, ລາຄາກຸ້ງສູງກ່ວາເພາະວ່າໄດ້ໄປຫາເອົາຢູ່ຕາມທຳມະຊາດ, ແຕ່ມາຮອດປະຈຸບັນ ນອກຈາກແຫຼ່ງກຸ້ງທຳມະຊາດແລ້ວ, ກຸ້ງກຸລາດຳ ແລະ ກຸ້ງມັງກອນແມ່ນລ້ຽງໄດ້ ສະນັ້ນລາຄາຈິ່ງຖືກກວ່າ. ສິ່ງດັ່ງກ່າວໄດ້ປະກອບສ່ວນເພີ່ມປະລິມານ ແລະ ເປັນເຈົ້າໃນການສະໜອງ, ກໍຄືສ້າງການເຕີບໂຕກ່ຽວກັບການບໍລິໂພກ ແລະ ເພີ່ມມູນຄ່າສຳລັບບັນດາຜະລິດຕະພັນກຸ້ງຂອງຫວຽດນາມ”.
ທ່ານ ຍືວັນເກີນ, ຫົວໜ້າກົມລ້ຽງປູກສິນໃນນ້ຳ, ກົມໃຫຍ່ສິນໃນນ້ຳ, ກະຊວງກະສິກຳ ແລະ ພັດທະນາຊົນນະບົດຫວຽດນາມ ໃນຮູ້ວ່າ, ໃນໄຕມາດ 1 ປີ 2017, ຂະແໜງສິນໃນນ້ຳໄດ້ສ້າງແຜນການກະທຳກ່ຽວກັບການພັດທະນາຂະແໜງອຸດສາຫະກຳກຸ້ງ ເພື່ອຍື່ນສະເໜີຕໍ່ກະຊວງກະສິກຳ ແລະ ພັດທະນາຊົນນະບົດ ແລະ ຮັບເອົາຄຳເຫັນຂອງບັນດານັກຊ່ຽວຊານ ແລະ ບັນດາກະຊວງຂະແໜງການທີ່ກ່ຽວຂ້ອງກ່ອນທີ່ຈະຍື່ນສະເໜີຕໍ່ລັດຖະບານ. ນອກຈາກກຸ້ງກຸລາດຳ ແລະ ກຸ້ງຂາວແລ້ວ, ກະຊວງຈະເພີ່ມເຕີມກຸ້ງມັງກອນ ແລະ ກຸ້ງກ້າມຂຽວເຂົ້າໃນບັນຊີລາຍຊື່ສົ່ງອອກ ເພື່ອເພີ່ມວົງເງິນສົ່ງອອກ. ທ່ານ ຍືວັນເກີນ ໃຫ້ຮູ້ວ່າ.
“ທັດສະນະການພັດທະນາແມ່ນບໍ່ເປີດກວ້າງເນື້ອທີ່ຜະລິດ ແຕ່ຈະສຸມໃສ່ຍົກສູງປະລິມານ, ສະມັດຕະພາບເຂດລ້ຽງກຸ້ງ. ເຂດລ້ຽງໄດ້ກຳນົດເນື້ອທີ່ປະມານແຕ່ 600.000 ຫາ 700.000 ເຮັກຕາ. ບົນພື້ນຖານນີ້, ຈະກວດກາຄືນການວາງແຜນຜັງໃນການລ້ຽງກຸ້ງນ້ຳ ກອຍເພື່ອດັດປັບ, ຍົກສູງປະລິມານ ແລະ ມູນຄ່າ”.
ທ່ານຮອງລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ວູວັນຕ໋າມ ໃຫ້ຮູ້ວ່າ: ເພື່ອມຸ່ງໄປເຖິງຄາດໝາຍການສົ່ງອອກ 10 ຕື້ USD ຈາກຜະລິດຕະພັນກຸ້ງໃນປີ 2025, ຂະແໜງສິນໃນນ້ຳໄດ້ສຸມໃສ່ສ້າງບາດກ້າວບຸກທະລຸດ້ານວິທະຍາສາດເຕັກໂນໂລຊີ, ພິເສດແມ່ນຂັ້ນຕອນຜະລິດແນວພັນ ກໍຄືເປັນເຈົ້າການໃນການຜະລິດຫົວອາຫານຢູ່ພາຍໃນປະເທດ, ພ້ອມທັງຄວບຄຸມໂລກລະບາດເປັນຢ່າງດີ. ໄປພ້ອມກັບວິວັດການນັ້ນ, ຂະແໜງໄດ້ເອົາໃຈໃສ່ເປັນພິເສດເຖິງການເປີດກວ້າງຕະຫຼາດສົ່ງອອກ, ເປັນເຈົ້າການຮັບມືກັບທ່າອ່ຽງປົກປ້ອງຕະຫຼາດຂອງບັນດາປະເທດຄືໃນປະຈຸບັນ, ໂດຍສະເພາະແມ່ນບັນດາຮົ້ວກີດຂວາງດ້ານເຕັກນິກ. ໃນປີ 2017 ນີ້, ຂະແໜງສິນໃນນຳ້ຈະຜັນຂະຫຍາຍບັນດາມາດຕະການແກ້ໄຂຢ່າງຂ້ຽວຂາດບົນພື້ນຖານສ້າງແຜນການກະທຳຂອງແຜນຮ່າງພັດທະນາຂະແໜງອຸດສາຫະກຳກຸ້ງ. ທ່ານ ວູວັນຕ໋າມ ຊີ້ແຈ້ງວ່າ.
“ສຸມໃສ່ສ້າງບາດກ້າວບຸກທະລຸໃນຂົງເຂດວິທະຍາສາດເຕັກໂນໂລຊີ ເພື່ອຍົກສູງສະມັດຕະພາບຂອງບັນດາເນື້ອທີ່ດິນກະເສດສຸມ, ລ້ຽງແບບອຸດສາຫະກຳ. ປະຈຸບັນ, ເນື້ອທີ່ ລ້ຽງກຸ້ງແມ່ນ 140.000 ເຮັກຕາ, ອາດຈະຂະຫຍາຍ 2-3 ໝື່ນເຮັກຕາ ໃນໄລຍະສັ້ນ. ຍົກສະມັດຕະພາບສະເລ່ຍໃນປະຈຸບັນແມ່ນ 4 ໂຕນ/ເຮັກຕາ, ຂຶ້ນເຖິງ 6 – 8 ໂຕນ/ເຮັກຕາ ສຳລັບກຸ້ງກຸລາດຳ ກໍຄືສຳລັບກຸ້ງນ້ຳກອຍລ້ຽງແບບອຸດສາຫະກຳ. ມີກົນໄກນະໂຍບາຍເພື່ອດຶງດູດວິສາຫະກິດ, ຈັດຕັ້ງການຜະລິດຄືນໃໝ່ໃຫ້ບັນດາຄອບຄົວທີ່ກະແຈກກະຈາຍກາຍເປັນບັນດາຫົວໜ່ວຍຮ່ວມມື ຫຼື ບັນດາສະມາຄົມເພື່ອເຊື່ອມຕໍ່ກັບບັນດາວິສາຫະກິດ ແລະ ລົງທຶນວິທະຍາສາດເຕັກໂນໂລຊີ ແລະ ພັດທະນາຮູບແບບໃໝ່ໃນການຜະລິດ ແລະ ສົ່ງອອກກຸ້ງ”.
ໃນຊຸມປີມໍ່ໆມານີ້, ຍ້ອນຜົນສະທ້ອນຈາກສະພາບການປ່ຽນແປງຂອງດິນຟ້າອາກາດ, ໂດຍສະເພາະແມ່ນນຳເຄັມຊຶມເຂົ້າ ເຊິ່ງເກີດຂຶ້ນໃນບໍລິເວນກວ້າງຂວາງ, ສົ່ງຜົນສະທ້ອນເຖິງເນື້ອທີ່ການຜະລິດກະສິກຳ, ເລື່ອງຫັນປ່ຽນໂຄງປະກອບການຜະລິດ, ໃນນັ້ນຍູ້ແຮງການລ້ຽງກຸ້ງສົ່ງອອກ ແມ່ນມາດຕະການປ່ຽນແທນຢ່າງມີປະສິດທິຜົນເພື່ອຍົກສູງມູນຄ່າສົ່ງອອກ. ທ່ານນາຍົກລັດຖະມົນຕີ ຫງວຽນຊວນຟຸ໋ກ ໄດ້ກຳນົດຈະແຈ້ງວ່າ: ເພື່ອບັນລຸໄດ້ຄາດໝາຍສົ່ງອອກ 10 ຕື້ USD ໃນປີ 2025, ໃນໄລຍະຈະມາເຖິງ, ການສົ່ງອອກກຸ້ງຈະແມ່ນຂະແໜງສົ່ງອອກປາຍແຫຼມຂອງຂະແໜງກະສິກຳຫວຽດນາມ.