ໃນ 2 ເດືອນຕົ້ນປີ 2017, ຈຳນວນເງິນລົງທຶນໂດຍກົງຈາກຕ່າງປະເທດເຂົ້າຫວຽດນາມ ບັນລຸໄດ້ລະດັບສະຖິຕິ ເມື່ອທຽບໃສ່ໄລຍະດຽວກັນຂອງປີ 2016 ນັບທັງທາງດ້ານຈຳນວນໂຄງການສະໜອງໃໝ່, ຈຳນວນທຶນຈົດທະບຽນ ແລະ ການປ່ອຍເງິນ. ຕາມກົມລົງທຶນຕ່າງປະເທດ, ກະຊວງແຜນການ ແລະ ການລົງທຶນແລ້ວ, ທົ່ວປະເທດມີກວ່າ 1.100 ໂຄງການລົງທຶນໂດຍກົງຈາກຕ່າງປະເທດຈົດທະບຽນໃໝ່, ເພີ່ມຕື່ມ ແລະ ປະກອບທຶນຊື້ຫຸ້ນດ້ວຍຍອດຈຳນວນທຶນບັນລຸ 3,4 ຕື້ USD. ການປ່ອຍເງິນຄາດວ່າບັນລຸ 1,55 ຕື້ USD. ທ່ານ Ryu Hang Ha, ປະທານສະຫະສະມາຄົມວິສາຫະກິດສ.ເກົາຫຼີ ປະຈຳຫວຽດນາມ ຕີລາຄາວ່າ, ຫວຽດນາມ ພວມມີບັນດາການປະຕິຮູບຢ່າງແຮງກ່ຽວກັບສະພາບແວດລ້ອມແຫ່ງການດຳເນີນທຸລະກິດ ກໍຄືການເຊື່ອມໂຍງເຂົ້າກັບພື້ນຖານເສດຖະກິດໂລກຢ່າງເລິກເຊິ່ງ, ກວ້າງຂວາງ. ນີ້ແມ່ນບັນດາປັດໃຈພື້ນຖານເພື່ອໃຫ້ຫວຽດນາມ ດຶງດູດການລົງທຶນໂດຍກົງຈາກຕ່າງປະເທດຢ່າງແຮງ.
“ໃນໄລຍະຜ່ານມາ, ຫວຽດນາມ ຮັກສາໄດ້ພື້ນຖານເສດຖະກິດພັດທະນາແບບຍືນຍົງ. ລັດຖະບານຊຸດໃໝ່ພວມມີບັນດາການກະທຳຢ່າງແຮງ ແລະ ການປະຕິຮູບຢ່າງຕັ້ງໜ້າ ເພື່ອແນໃສ່ປະຕິຮູບໂຄງປະກອບເສດຖະກິດ ກໍຄືນຳໃຊ້ບັນດາມາດຕະການລົງໂທດຕ້ານການສໍ້ລາດບັງຫຼວງ, ການປະຕິຮູບລະບຽບການບໍລິຫານ, ສ້າງສະພາບແວດລ້ອມແຫ່ງການລົງທຶນດຳເນີນທຸລະກິດທີ່ສະດວກກວ່າໃຫ້ແກ່ວິສາຫະກິດ. ຫວຽດນາມ ແມ່ນປະເທດເຂົ້າຮ່ວມສັນຍາການຄ້າເສລີຫຼາຍສະບັບທີ່ສຸດໃນພາກພື້ນອາຊີ, ຈະສ້າງກາລະໂອກາດເພື່ອໃຫ້ບັນດາວິສາຫະກິດຜະລິດຢູ່ຫວຽດນາມ ຈະໄດ້ຊົມໃຊ້ບັນດາອັດຕາພາສີນຳເຂົ້າ, ສົ່ງອອກສຳລັບສິນຄ້າທີ່ດີທີ່ສຸດ”.
ເລື່ອງອາເມລິກາ ຖະແຫຼງວ່າບໍ່ຮັບຮອງເອົາສັນຍາຄູ່ຮ່ວມມືເສດຖະກິດຂ້າມປາຊີຟິກ (TPP) ກໍ່ໄດ້ສົ່ງຜົນສະທ້ອນເຖິງບັນດານັກລົງທຶນເຂົ້າຫວຽດນາມ. ເຖິງຢ່າງໃດກໍ່ຕາມ, ເສດຖະກິດຫວຽດນາມ ຍັງມີກາລະໂອກາດຮ່ວມມືລົງທຶນຫຼາຍຢູ່ ຍ້ອນສັນຍາການຄ້າເສລີ 16 ສະບັບໄດ້ ແລະ ພວມເຈລະຈາ. ເມື່ອຕີລາຄາກ່ຽວກັບແງ່ຫວັງສະພາບແວດລ້ອມແຫ່ງການລົງທຶນເຂົ້າຫວຽດນາມ ໃນໄລຍະຜ່ານມາ, ອົງການຈັດຕັ້ງສາກົນຫຼາຍແຫ່ງກໍ່ຍົກອອກບັນດາການຕີລາຄາຢ່າງຕັ້ງໜ້າ. ທ່ານ Sebatstian Eckardt, ນັກຊ່ຽວຊານດ້ານເສດຖະກິດທະນາຄານໂລກ ໃຫ້ຂໍ້ສັງເກດວ່າ: ຫວຽດນາມ ໄດ້ມີບັນດາບາດກ້າວເດີນຢ່າງໝັ້ນຄົງ, ມີຄວາມມານະພະຍາຍາມປັບປຸງນະໂຍບາຍ, ສ້າງສະພາບແວດລ້ອມແຫ່ງການລົງທຶນທີ່ປອດໄສ ແລະ ໄດ້ມີບັນດາເຂດເສດຖະກິດພັດທະນາແບບຍືນຍົງ. ຫວຽດນາມ ກໍ່ມີບັນດາການກຳນົດທິດຢ່າງຈະແຈ້ງ ແລະ ສຳຄັນໃນການພັດທະນາເສດຖະກິດ, ເອົາໃຈໃສ່ເປັນພິເສດເຂົ້າໃນການນຳໃຊ້ບັນດາແຫຼ່ງເງິນລົງທຶນໂດຍກົງຈາກຕ່າງປະເທດຢ່າງມີປະສິດທິຜົນ, ຈາກນັ້ນສ້າງການປ່ຽນແປງຢ່າງໜ້າອັດສະຈັນ ທ່ານ Sebatstian Eckardt ກໍ່ຖືວ່າ: ດ້ວຍນະໂຍບາຍດັ່ງກ່າວ, ຫວຽດນາມ ຈະກາຍເປັນສະຖານທີ່ດຶງດູດບັນດານັກລົງທຶນຕ່າງປະເທດໃນປະຈຸບັນ ແລະ ໃນຊຸມປີຈະມາເຖິງ.
ພ້ອມກັບການຍາດແຍ່ງເອົາບັນດາກາລະໂອກາດໃໝ່, ລັດຖະບານຫວຽດນາມ ກໍຢືນຢັນຄວາມຕັດສິນໃຈເປັນຢ່າງສູງ ສືບຕໍ່ຍູ້ແຮງການປະຕິຮູບລະບຽບການບໍລິຫານ, ປັບປຸງສະພາບແວດລ້ອມແຫ່ງການລົງທຶນ ທີ່ໄດ້ສະແດງໃຫ້ເຫັນຜ່ານບັນດານະໂຍບາຍຢ່າງລະອຽດ. ໃນນັ້ນ, ສືບຕໍ່ການປະຕິບັດບັນດາໜ້າທີ່, ມາດຕະການແກ້ໄຂຕົ້ນຕໍກ່ຽວກັບການປັບປຸງສະພາບແວດລ້ອມແຫ່ງການດຳເນີນທຸລະກິດ, ຍົກສູງກຳລັງແກ່ງແຍ້ງແຫ່ງຊາດ ໂດຍກຳນົດທິດຮອດປີ 2020. ພ້ອມກັນນັ້ນ, ກົດໝາຍວ່າດ້ວຍການລົງທຶນສະບັບປັບປຸງ ແລະ ເພີ່ມເຕີ່ມໄດ້ມີຜົນສັກສິດແຕ່ວັນທີ 01/01/2017 ເປັນຕົ້ນມາ. ບັນດານະໂຍບາຍ ແລະ ບັນດາມາດຕະການແກ້ໄຂຢ່າງລະອຽດດັ່ງກ່າວ ຈະສົ່ງຜົນກະທົບຢ່າງຕັ້ງໜ້າເຖິງແຫຼ່ງເງິນລົງທຶນໂດຍກົງຈາກຕ່າງປະເທດໃນໄລຍະຈະມາເຖິງ. ທ່ານ ຫງວຽນວັນຕ່ວານ, ຮອງປະທານສະຫະສະມາຄົມວິສາຫະກິດລົງທຶນຕ່າງປະເທດ, ຖືວ່າ.
“ການລົງທຶນຈາກຕ່າງປະເທດໃນປີ 2017 ເຖິງວ່າບໍ່ມີ TPP ແຕ່ກໍ່ຍັງມີບັນດາສັນຍານທີ່ໜ້າປະທັບໃຈ. ນອກຈາກແຫຼ່ງເງິນລົງທຶນຈາກສ.ເກົາຫຼີ, ຍີ່ປຸ່ນ, ສິງກະໂປ, ຈີນ… ແລ້ວ, ພວກເຮົາຍັງຕ້ອນຮັບບັນດານັກລົງທຶນທີ່ມາຈາກເອີລົບ ອີກດ້ວຍ. ເອີລົບ ກໍ່ພວມນຳໃຊ້ບັນດາກາລະໂອກາດຂອງບັນດາສັນຍາການຄ້າ 2 ຝ່າຍ, ຫຼາຍຝ່າຍທີ່ໄດ້ລົງນາມແລ້ວເພື່ອທົດແທນຄວາມເສຍຫາຍ ເມື່ອອັງກິດ ຖອນອອກຈາກອີຢູ, ສະນັ້ນ, ຂ້າພະເຂົ້າຄິດວ່າການແລກປ່ຽນການຄ້າລະຫວ່າງຫວຽດນາມ - ອີຢູ ຈະມີຄວາມສະດວກກວ່າ. ຢາກເຮັດໄດ້ສິ່ງດັ່ງກ່າວ, ພວກເຮົາຕ້ອງສ້າງພື້ນຖານໂຄງລ່າງເພື່ອດຶງດູດການລົງທຶນໃຫ້ເປັນຢ່າງດີ, ສ້າງສະພາບແວດລ້ອມດ້ານກົດໝາຍ, ມີລັກສະນະກະຈ່າງແຈ້ງ, ມີສິດຊັບສິນທາງປັນຍາ”.
ດ້ວຍບັນດາສັນຍາການຄ້າ 2 ຝ່າຍ ແລະ ຫຼາຍຝ່າຍທີ່ໄດ້ຮັບການລົງນາມແລ້ວ, ພ້ອມກັບທ່າໄດ້ປຽບແກ່ງແຍ້ງຫຼາຍຢ່າງເມື່ອທຽບໃສ່ບັນດາປະເທດໃນພາກພື້ນ, ຫວຽດນາມ ພວມມີທ່າແຮງເພື່ອກາຍເປັນຈຸດນັດພົບທີ່ດູດດື່ມ, ມີລັກສະນະຍຸດທະສາດຂອງບັນດາກຸ່ມບໍລິສັດນາໆຊາດ. ປີ 2017, ເງິນລົງທຶນໂດຍກົງຈາກຕ່າງປະເທດທີ່ໄດ້ຈົດທະບຽນ ແລະ ທຶນປະຕິບັດ ຄາດຄະເນວ່າ ຈະເພີ່ມຂຶ້ນແຕ່ 10 – 12% ເມື່ອທຽບໃສ່ປີ 2016. ເພື່ອຍາດແຍ່ງກາລະໂອກາດ ແລະ ທ່າໄດ້ປຽບດັ່ງກ່າວໃຫ້ເປັນຢ່າງດີ, ຫວຽດນາມ ຕ້ອງເອົາໃຈໃສ່ເປັນພິເສດເຖິງຄຸນນະພາບຂອງບັນດາໂຄງການລົງທຶນຈາກຕ່າງປະເທດ, ພ້ອມທັງເພີ່ມທະວີຄວາມສາມາດເຊື່ອມຕໍ່ຂອງບັນດາວິສາຫະກິດຫວຽດນາມ ເຂົ້າໃນລະບົບສະໜອງຂອງບັນດາວິສາຫະກິດລົງທຶນໂດຍກົງຈາກຕ່າງປະເທດ.