សម្រស់ដ៏អស្ចារ្យនៃទឹកជ្រោះ Khuoi Nhi។ (រូបថត៖ tuyenquang.gov.vn)

ពីកំពង់ផែទូកនៅ Lam Binh ភ្ញៀវទេសចរចំណាយពេលត្រឹមតែមួយម៉ោងប៉ុណ្ណោះ ដើម្បីធ្វើដំណើរតាមទូកនៅលើបឹងអេកូឡូស៊ី Na Hang – Lam Binh។ នៅពេលដែលសូរសំឡេងទឹកជ្រោះចាប់ផ្តើមបន្លឺឡើងកាន់តែខ្លាំង រូបភាពទឹកជ្រោះ Khuoi Nhi ក៏បានលេចឡើងជាបណ្ដើរៗ។

ទឹកជ្រោះនេះមានច្រើនជាន់ ដែលជាន់នីមួយៗ មើលទៅដូចសសៃសូត្រពណ៌ស ហូរចុះមកលើផ្ទាំងថ្មដែលគ្របដណ្ដប់ដោយស្លែបៃតង។ ពន្លឺព្រះអាទិត្យចែងចាំងកាត់តាមមែកឈើ បង្កើតជាបន្ទះពន្លឺរស្មីដ៏ភ្លឺចិញ្ចាចលើផ្ទៃទឹក ដែលធ្វើឱ្យទេសភាពកាន់តែស្រស់ស្អាត។ ទឹកជ្រោះ Khuoi Nhi តាំងពីយូរមកហើយ បានក្លាយជាគោលដៅទេសចរណ៍ដ៏ល្បីល្បាញមួយនៅ Lam Binh ហើយជាកន្លែងទស្សនាដែលមិនគួររំលង នៅពេលដែលភ្ញៀវទេសចរ មកទស្សនាអាងស្តុកទឹកវារីអគ្គិសនី Na Hang – Lam Binh។ លោក Dang Quoc su នាយកមជ្ឈមណ្ឌលផ្សព្វផ្សាយទេសចរណ៍ខេត្ត Tuyen Quang បានឲ្យដឹងថា៖

"ទឹកជ្រោះ Khuoi Nhi ជាទឹកជ្រោះដ៏ស្រស់ស្អាតមួយដែលនៅតែត្រូវបានរក្សាដដែល ហើយនាំមកនូវតម្លៃបទពិសោធន៍ពិសេសដល់ភ្ញៀវទេសចរពេញដំណើរកម្សាន្តទៅទស្សនាអាងស្តុកទឹកវារីអគ្គិសនី Na Hang។ ការតភ្ជាប់រវាងទឹកជ្រោះ និងទេសភាពរមណីយដ្ឋានផ្សេងទៀតបានបង្កើតបានដំណើរកម្សាន្តពហុបទពិសោធន៍សម្រាប់ភ្ញៀវទេសចរ ក៏ដូចជាបង្កើតភាពខុសប្លែកនិងភាពចម្រុះសម្រាប់ផលិតផលទេសចរណ៍របស់ខេត្ត Tuyen Quang ផងដែរ"។

នៅជើងទឹកជ្រោះមានបឹងធំមួយ ជាកន្លែងដែលភ្ញៀវទេសចរអាចសម្រាកនិងបន្ធូរអារម្មណ៍។ (រូបថត៖ tuyenquang.gov.vn)

ទឹកជ្រោះ Khuoi Nhi មាន ៣ ជាន់ ហើយដើរឡើងកាន់តែខ្ពស់ ទឹកជ្រោះបែងចែកជាចរន្តតូចៗកាន់តែច្រើន ដែលហូរកាត់ស្រទាប់ថ្ម បង្កើតជាបឹងធម្មជាតិពណ៌ខៀវថ្លា។ ភ្ញៀវទេសចរខ្លះជ្រើសរើសការមុជទឹកត្រជាក់ដើម្បីបំបាត់ភាពនឿយហត់។ អ្នកខ្លះទៀតរកជ្រុងស្អាតតូចមួយដើម្បីថតរូប ចាប់យកពេលវេលាសម្របខ្លួននៅក្នុងធម្មជាតិ។ បុរសភ្ញៀវទេសចរម្នាក់មកពីខេត្ត Phu Tho បានចែករំលែកអំពីបទពិសោធន៍របស់ខ្លួនជាមួយក្រុមមិត្តភក្តិ នៅពេលមកដល់ទឹកជ្រោះ Khuoi Nhi យ៉ាងដូច្នេះថា៖

“យើងពិតជារំភើបរីករាយមែនទែន ព្រោះយើងបានធ្វើដំណើរឆ្ងាយ ប៉ុន្តែនៅពេលមកទីនេះ យើងមានអារម្មណ៍ថា វាមានអត្ថន័យខ្លាំងហើយបរិយាកាសក៏រីករាយផងដែរ។ មានត្រីម៉ាស្សាជើងឲ្យយើង អស្ចារ្យណាស់។ មានអារម្មណ៍ដូចជាត្រូវបានចាក់ម្ជុលវិទ្យាសាស្ត្រដោយត្រីធម្មជាតិអញ្ចឹង”។

នៅជើងទឹកជ្រោះមានបឹងធំមួយដែលមានត្រីជាច្រើន។ អ្នកទស្សនាគ្រាន់តែត្រាំជើងនៅក្នុងទឹក ហើយហ្វូងត្រីនឹងហែលមកម៉ាស្សាជើង ដែលនាំមកនូវអារម្មណ៍រីករាយ។ (រូបថត៖ tuyenquang.gov.vn)

សម្រស់នៃទឹកជ្រោះ Khuoi Nhi មិនត្រឹមតែស្ថិតនៅក្នុងទឹកជ្រោះប៉ុណ្ណោះទេ។ វាក៏ជាអារម្មណ៍នៃការរស់នៅយ៉ាងយឺតៗ ស្តាប់សំឡេងព្រៃឈើ ស្តាប់សំឡេងផ្ទាល់ខ្លួនរបស់យើង នៅក្នុងលំហដ៏បរិសុទ្ធផងដែរ។ ជាពិសេស នៅទឹកជ្រោះ Khuoi Nhi មានសេវាម៉ាស្សាដោយឥតគិតថ្លៃពីធម្មជាតិ ដែលតែងតែត្រូវបានភ្ញៀវទេសចរនិយមចូលចិត្តយ៉ាងខ្លាំង។ អ្នកស្រី Nguyen Lan Phuong ភ្ញៀវទេសចរមកពីទីក្រុងហាណូយ បានចែករំលែកដោយក្ដីរំភើបថា៖

“អារម្មណ៍សុភមង្គល ផាសុខភាព និងចំណាប់អារម្មណ៍ទាំងអស់នឹងកើតឡើងក្រោយពីរយៈពេលធ្វើដំណើរយ៉ាងលំបាកដើម្បីឡើងទៅទឹកជ្រោះ។ យើងត្រូវឡើងជណ្តើរប៉ុន្មានរយកាំទើបមកដល់ទឹកជ្រោះ។ នៅទីនេះមានផាសុកភាពណាស់ ដោយមានទឹកត្រជាក់ ខៀវថ្លា ទេសភាពស្រស់ស្អាត ហ្វូងត្រីកំពុងហែលទឹក។ ពេលឮព័ត៌មានថា មានត្រីមកត្បុលជើង ខ្ញុំក៏ចូលចិត្តដែរ ប៉ុន្តែខ្ញុំមិននឹកស្មានថា វាល្អយ៉ាងដូច្នេះទេ”។

ពេលព្រះអាទិត្យលិចនៅពីក្រោយជួរភ្នំឆ្ងាយៗ កាំរស្មីចុងក្រោយនៃពន្លឺឆ្លុះបញ្ចាំងលើទឹកជ្រោះ បង្កើតជាបន្ទះពណ៌លឿងភ្លឺដ៏ត្រចះត្រចង់។ Khuoi Nhi នៅពេលនេះមើលទៅដូចជាបន្ទះសូត្រពណ៌លឿងមាសនៅកណ្ដាលព្រៃឈើ។

Khuoi Nhi ស្ថិតនៅកណ្តាលព្រៃធំល្វឹងល្វើយនៃខេត្ត Tuyen Quang។ Khuoi Nhi មិនអ៊ូអរ មិនខ្លាំងក្លា ឬអួតអាងទេ។ ទឹកជ្រោះនេះ ត្រឹមតែហូរយ៉ាងស្រទន់ ខណៈដែលព្រៃឈើឱបក្រសោបទឹកជ្រោះយ៉ាងស្ងប់ស្ងាត់។ ភាពរហោស្ថាននិងរ៉ូមម៉េនទិកនេះ បានបង្កើតជាភាពទាក់ទាញដ៏យូរអង្វែង សម្រស់ដ៏បរិសុទ្ធនិងសម្បូរទៅដោយមនោសញ្ចេតនា ដែលធ្វើឱ្យអ្នកដែលមកទីនេះម្តង ក៏ចង់វិលត្រឡប់មកវិញម្ដង ទៀត៕