ព្រៃស្រល់ Yen Minh

រំលឹកដល់ស្រុក Yen Minh គឺរំលឹកដល់ទួលស្រល់ដ៏ខៀវស្រងាត់ ភូមិស្រុកដ៏សាមញ្ញា សុខសាន្ត និងផ្កា buckwheat ដ៏រ៉ូម៉ែនទិក។ គោលដៅ ដែលភ្ញៀវទេសចរចូលចិត្តបំផុតនៅពេលមកដល់ស្រុក Yen Minh គឺព្រៃស្រល់ Yen Minh។ ព្រៃស្រល់ស្ថិតនៅភូមិសាស្ត្ររបស់ខេត្តចំនួន ៣ គឺ Bach Dich, Lao Va Chai និង Na Khe ដែលមានរហស្សនាមជា Da Lat ខ្នាតតូចនៅខេត្ត Ha Giang។ នៅទីនេះ ភ្ញៀវទេសចរបានសម្របខ្លួនក្នុងបរិយាកាសស្រស់ស្រាយ ត្រជាក់ស្រួល ស្ងប់ស្ងាត់ ជាមួយដើមស្រល់គ្រប់ប្រភេទ។ ក្រឡេកមើលពីព្រៃស្រល់ ពីចម្ងាយគឺជាផ្ទះប្រពៃណីរបស់បងប្អូនជនជាតិ Mong និងជនជាតិ Tay ដែលជួយតុបតែងបន្ថែមនូវផ្ទាំងគំនូរដីស្រស់ស្អាតនៅទីនេះ។ លោក Nguyen Hoang មកពីទីក្រុងហាណូយ បានចែករំលែក៖

“នេះគឺជាលើកដំបូងហើយ ដែលខ្ញុំបានទស្សនាភូមិ Yen Minh នៅខេត្ត Ha Giang។ ខ្ញុំចាប់អារម្មណ៍ជាមួយទេសភាពនៅទីនេះណាស់។ នៅទីនេះ យើងអាចទស្សនាព្រៃស្រល់ ស្រូបខ្យល់អាកាសបរិសុទ្ធ។ យើងខ្ញុំបានបោះជំរំ និងស្នាក់នៅទីនេះមួយយប់យ៉ាងសប្បាយរីករាយ”។

អញ្ជើញមកស្រុក Yen Minh ភ្ញៀវទេសចរអាចទៅទស្សនាភូមិវប្បធម៌ទេសចរណ៍សហគមន៍ភូមិ Buc Ban ជាមួយដំបូលផ្ទះឈើផុតពីដីដ៏បុរមបុរាណរបស់បងប្អូនជនរួមជាតិ Tay និង Giay។ ភ្ញៀវទេសចរអាចទៅទស្សនាល្អាងភ្នំ Na Luong ជញ្ជាំងកំពែង Lung Ho មូលដ្ឋានបដិវត្តន៍ល្អាង Co Cai ។ ភ្ញៀវទេសចរក៏អាចស្វែងយល់ពីជីវភាពរស់នៅខាងវប្បធម៌ និងព្រលឹងវិញ្ញាណរបស់ជនជាតិភាគតិចចំនួន ១៦ នៅស្រុក Yen Minh ដូចជា៖ Mong, Tay, Dao, Nung, Bo Y និង Pu Peo។

ដោយមានសក្តានុពល និងគុណសម្បត្តិជាច្រើន ស្រុក Yen Minh មានការបោះជំហានដំបូងក្នុងការទាក់ទាញភ្ញៀវទេសចរជាពិសេសគឺភ្ញៀវទេសចរអន្តរជាតិ។ ទោះជាយ៉ាងណាក៏ដោយ ការអភិវឌ្ឍទេសចរណ៍នៅស្រុក Yen Minh នៅតែជួបការលំបាកជាច្រើន។ លោកស្រី Trieu Thi Tinh អនុប្រធានមន្ទីរវប្បធម៌ កីឡា និងទេសចរណ៍ខេត្ត Ha Giang បានឲ្យដឹងថា ក្នុងរយៈពេលកន្លងទៅ ស្រុក Yen Minh បានសុក្រិតមូលដ្ឋានហេដ្ឋារចនាសម្ព័ន្ធទេសចរណ៍រួចរាល់ជាជំហានៗ  ប្រជាពលរដ្ឋបានចាប់ផ្តើមចូលរួមសាងសង់ខ្សែទេសចរណ៍ ទីកន្លែងស្នាក់នៅដើម្បីស្វាគមន៍ភ្ញៀវទេសចរ៖

“ខ្ញុំគិតថាស្រុក Yen Minh ចង់អភិវឌ្ឍទេសចរណ៍បន្ថែមទៀត និងកសាងអត្តសញ្ញាណវប្បធម៌ ទេសភាព ប្រភពធនធានមនុស្ស។ យើងខ្ញុំក៏មានបំណងចង់រៀបចំផែនការភូមិទេសចរណ៍វប្បធម៌សហគមន៍ឡើងវិញផងដែរ។ ក្រៅពីនេះ យើងក៏ត្រូវគិតគូអំពីការដែលភ្ញៀវទេសចរអាចចូលរួម និងផ្លាស់ប្ដូរអត្តសញ្ញាណវប្បធម៌
ម្ហូបអាហារផងដែរ”។

សិក្ខាសាលាស្ដីពីការអភិវឌ្ឍន៍ទេសចរណ៍នៅស្រុក Yen Minh ខេត្ត Ha Giang នាថ្ងៃទី ១៣ ឧសភា។ រូបថត៖ VOV

ដើម្បីពង្រីករាល់តម្លៃវប្បធម៌ សក្តានុពលប្រៀបខ្លាំងរបស់ស្រុក ធ្វើជាកម្លាំងចលករ និងប្រភពធនធានដ៏សំខាន់ ដើម្បីអភិវឌ្ឍន៍ទេសចរណ៍ប្រកបដោយនិរន្តរភាព និងទាក់ទាញភ្ញៀវទេសចរ ស្រុក Yen Minh បានវិនិយោគកែលំអ លើកកម្រិតហេដ្ឋារចនាសម្ព័ន្ធទេសចរណ៍ និងផ្លូវគមនាគមន៍ ឆ្ពោះទៅគោលដៅទទួល និងបម្រើភ្ញៀវទេសចរឲ្យបានល្អប្រសើរ នារយៈពេលខាងមុខ។ ក្នុងសិក្ខាសាលាពន្លឿនការផ្សព្វផ្សាយទេសចរណ៍ស្រុក Yen Minh ឆ្នាំ ២០២៣ ដែលបានប្រព្រឹត្តទៅកាលពីសប្តាហ៍មុននៅភូមិ Du Gia លោក Luong Duy Doanh នាយកក្រុមហ៊ុនចំកាត់ពាណិជ្ជកម្មទេសចរ ផ្កាយ ៥ - Five Star  Travel បានចាត់ទុកថា៖

“យើងចាំបាច់ត្រូវសុក្រិតប្រព័ន្ធផ្លូវគមនាគមន៍ ជាពិសេសគឺខ្សែផ្លូវទី ៤ និងខ្សែផ្លូវទៅកាន់ស្រុក Yen Minh ត្រូវបានវិនិយោគកែលម្អ និងដំឡើងសញ្ញាព្រមានបន្ថែម។ ប្រការពិសេសគឺការរៀបចំផែនការ តុបតែងកែលម្អទីក្រុង និងធានាសុវត្ថិភាពជូនភ្ញៀវទេសចរផងដែរ”។

ក្នុងរយៈពេលប៉ុន្មានឆ្នាំកន្លងទៅ បរិណាមភ្ញៀវទេសចរទៅទស្សនាស្រុក Yen Minh កាន់តែកើនឡើងពីមួយថ្ងៃទៅមួយថ្ងៃ។ កាលពីឆ្នាំមុន បរិមាណភ្ញៀវទេសចរសរុបដែលស្នាក់នៅក្នុងស្រុកសម្រេចបានប្រមាណ ៩ ម៉ឺនលើកនាក់ ក្នុងនោះមានភ្ញៀវទេសចរអន្តរជាតិប្រមាណ ២ ម៉ឺនលើកនាក់។ ក្នុងរយៈពេល៤ខែដើមឆ្នាំនេះ ភ្ញៀវទេសចរជាតិ និងអន្តរជាតិជាង ៥ ម៉ឺនលើកនាក់បានទៅទស្សនាស្រុក Yen Minh។ តាមការរំពឹងទុក ចាប់ពីពេលនេះដល់ដំណាច់ឆ្នាំ ២០២៣ ស្រុក Yen Minh នឹងទាក់ទាញភ្ញៀវទេសចរចំនួន ១៥ម៉ឺនលើកនាក់ផងដែរ៕