អាកាសយានដ្ឋាន Bien Hoa ខេត្ត Dong Nai ដែលជាចំណុចក្តៅនៃការបំពុលឌីអុកស៊ីនដ៏ធំបំផុតមួយនៅក្នុងប្រទេសវៀតណាម ក្នុងពេលសង្គ្រាម ដែលធ្លាប់ជាមូលដ្ឋានទ័ពអាកាសក្នុងអំឡុងពេលសង្គ្រាម សព្វថ្ងៃនេះបានក្លាយជានិមិត្តរូបនៃកិច្ចសហប្រតិបត្តិការមនុស្សធម៌ នៃស្មារតីនៃការផ្សះផ្សា និងការសម្លឹងមើលឆ្ពោះទៅអនាគត។

សកម្មភាពទាំងនេះគឺជាផ្នែកមួយនៃគម្រោងសហប្រតិបត្តិការលើការដោះស្រាយជាតិពុលឌីអុកស៊ីននៅក្នុងតំបន់អាកាសយានដ្ឋាន Bien Hoa ររវាងក្រសួងការពារប្រទេសវៀតណាម និងទីភ្នាក់ងារអភិវឌ្ឍន៍អន្តរជាតិសហរដ្ឋ អាមេរិក (USAID) ដែលត្រូវបានអនុវត្តចាប់តាំងពីឆ្នាំ ២០១៩ មក។ រហូតមកដល់បច្ចុប្បន្ន មានប្រហែល ៥០% នៃបរិមាណដីដែលមានផ្ទុកឌីអុកស៊ីនត្រូវបានសម្អាត  និងប្រគល់ជូនដើម្បីបម្រើដល់ការអភិវឌ្ឍសេដ្ឋកិច្ចសង្គម និងភារកិច្ចការពារជាតិ និងសន្តិសុខ។

ក្រៅពីគម្រោងបន្សាបជាតិពុលឌីអុកស៊ីន ការទូតការពារជាតិក៏ជំរុញការចូលរួមពីដៃគូ និងអង្គការអន្តរជាតិជាច្រើនក្នុងកិច្ចសហប្រតិបត្តិការក្នុងការបោសសម្អាតមីនផងដែរ។ នៅខេត្ត Quang Tri ជាតំបន់ដីដែលធ្លាប់ជាខ្សែត្រៀមជួរមុខដ៏កាចសាហាវ ឥឡូវនេះគឺជាចំណុចកណ្តាលនៃគម្រោង បោសសម្អាតមីនអន្តរជាតិជាច្រើន។

“ពីមុននេះ ផ្ទៃដីជុំវិញផ្ទះរបស់ខ្ញុំមិនត្រូវបានដាំដុះទេ ដោយសារខ្លាចមីននៅសល់។ ឥឡូវនេះ ដោយមានជំនួយពីក្រុមបោសសម្អាត យើងអាចដាំដំណាំ ចិញ្ចឹមសត្វពាហនៈដោយទំនុកចិត្ត ហើយជីវភាពរស់នៅរបស់យើងមានស្ថេរភាពជាងមុន”។

ចាប់ពីឆ្នាំ ១៩៩៣ រហូតមកដល់ពេលនេះ សហរដ្ឋអាមេរិកបានផ្តល់ជំនួយជាង ២៣០លានដុល្លារអាមេរិកដល់វៀតណាម សម្រាប់ការបោសសម្អាតមីន និងការដោះស្រាយជាតិពុលឌីអុកស៊ីន។ កូរ៉េខាងត្បូង តាមរយៈទីភ្នាក់ងារសហប្រតិបត្តិការអន្តរជាតិកូរ៉េ (KOICA) ជួយឧបត្ថម្ភគម្រោង KVMAP (២០១៨–២០២៤) ជាមួយនឹងដើមទុនសរុបជាង ២០ លានដុល្លារអាមេរិក។ ប្រទេសជប៉ុន ន័រវេស អាល្លឺម៉ង់ និងអូស្ត្រាលី សហការជាមួយក្រសួងការពារប្រទេសវៀតណាម ក្នុងការបង្កើតផែនទីជាតិស្តីពីការបំពុល មីន ដោយផ្តោតលើជំនួយបច្ចេកទេស ឧបករណ៍ ការបណ្តុះបណ្តាលអ្នកជំនាញ ការផ្ទេរបច្ចេកវិទ្យា។ល។ សកម្មភាពសហប្រតិបត្តិការអន្តរជាតិទាំងនេះបង្ហាញពីស្មារតីមនុស្សធម៌ ដើម្បីសុវត្ថិភាព និងអាយុជីវិតរបស់ប្រជាជន។

ស្មារតីមនុស្សធម៌នោះក៏ត្រូវបានកងកម្លាំងរក្សាសន្តិភាពវៀតណាមនាំ ទៅកាន់ប្រទេសស៊ូដង់ខាងត្បូង និងសាធារណរដ្ឋអាហ្វ្រិកកណ្តាល តាមរយៈសកម្មភាពជួយឧបត្ថម្ភផ្នែកវេជ្ជសាស្ត្រ ការជំនះពុះពារលើផលវិបាកនៃជម្លោះ ការសង្គ្រោះគ្រោះមហន្តរាយ និងការជួយដល់ប្រជាជននៅហ្នឹងកន្លែង។ សកម្មភាពទាំងនេះមិនត្រឹមតែធ្វើអោយប្រសើរឡើងនូវសមត្ថ ភាពការពារជាតិប៉ុណ្ណោះទេ ប៉ុន្តែថែមទាំងបង្ហាញពីសុច្ឆន្ទៈ ការទទួលខុសត្រូវអន្តរជាតិ និងរូបភាពរបស់កងទ័ពវៀតណាមទៀតផង។ អនុប្រធាននាយកដ្ឋានការបរទេស ក្រសួងការពារប្រទេសវៀតណាម វរសេនីយ៍ឯក Nguyen Duy Minh បានបញ្ជាក់ថា។

“នេះគឺជាបេសកកម្មប្រយុទ្ធក្នុងសម័យសន្តិភាព បេសកកម្មដ៏ខ្ពង់ខ្ពស់ ដែលមានសារៈសំខាន់មនុស្សសាសស្ត្រ និងមនុស្សធម៌ របស់បក្ស រដ្ឋ និងក៏ដូចជាកងទ័ពវៀតណាមប្រគល់ជូន។ ដោយហេតុនេះ រួមចំណែកដល់ការផ្សព្វផ្សាយរូបភាពរបស់យុទ្ធជនកងទ័ពប្រជាជនវៀតណាម នៅក្នុងក្រសែភ្នែករបស់មិត្តភក្តិអន្តរជាតិ”។

ការទូតការពារជាតិ និងកិច្ចសហប្រតិបត្តិការក្នុងការជំនះពុះពាលើផលវិបាកនៃសង្គ្រាម សុទ្ធតែឆ្ពោះទៅគោលបំណងរួម៖ ការកសាងទំនុកចិត្ត និងការរក្សាសន្តិភាព។ ក្នុងនាមជាប្រទេសមួយដែលធ្លាប់ឆ្លងកាត់សង្គ្រាម វៀតណាមយល់យ៉ាងស៊ីជម្រៅអំពីតម្លៃនៃសន្តិភាព។ ដូច្នេះ វៀតណាមតែងតែសហការយ៉ាងសកម្មជាមួយសហគមន៍អន្តរជាតិក្នុងសកម្មភាពដើម្បីជំនះផលវិបាកនៃសង្គ្រាម លើកកម្ពស់មិត្តភាព និងការជឿទុកចិត្ត ចូលរួមយ៉ាងសកម្មក្នុងសកម្មភាពរក្សាសន្តិភាព រួមចំណែកដល់ការផ្សព្វផ្សាយសារនៃមនុស្សសាស្ត្រ និងការទទួលខុសត្រូវអន្តរជាតិរបស់ប្រទេសជាតិ ដែលស្រឡាញ់សន្តិភាព។ ពីរណ្តៅគ្រាប់បែកកាលពីអតីតកាល សព្វថ្ងៃនេះ វាលស្រែបៃតងបានរីកចម្រើន។ ពីទឹកដីស្លាប់ ឥឡូវនេះបន្លឺឡើងសំឡេងសើចរបស់កុមារ។

ជាមួយនឹងស្មារតីមនុស្សសាស្ត្រ ជាមួយនឹងការខិតខំប្រឹងប្រែងក្នុងកិច្ចការការទូតការពារជាតិ  និងតាមរយៈចំណង់មិត្តភាពអន្តរជាតិ វៀតណាមកំពុងសរសេររឿងថ្មីមួយបន្តិចម្តងៗ រឿងរ៉ាវនៃសន្តិភាព កិច្ចសហប្រតិបត្តិការ និងការអភិវឌ្ឍ៕