ប្រធានរដ្ឋសភាវៀតណាម លោកស្រី Nguyen Thi Kim Ngan អញ្ជើញជួបពិភាក្សាជាមួយប្រធានរដ្ឋសភាកម្ពុជា សម្តេច ហេង សំរិន (រូបថតៈ Daibieunhandan)

នៅក្នុងជំនួបពិភាក្សានេះ ថ្នាក់ដឹកនាំទាំងពីររូបបានអះអាងថា: បក្ស រដ្ឋនិងប្រជាជននៃប្រទេសទាំងពីរ តែងតែគាំទ្រនិងប្រគៀកស្មារគ្នា ក្នុងការស្ថាបនានិងការអភិវឌ្ឍន៍របស់ប្រទេសនីមួយៗ។ ភាគីទាំងពីរក៏តែងតែចាត់ទុកទំនាក់ទំនងអ្នកជិតខាងល្អប្រសើរ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ ស្ថិរភាពយូរអង្វែងរវាងវៀតណាមនិងកម្ពុជាគឺជាទ្រព្យសម្បត្តិរួមមួយដ៏មានតំលៃដែលមិនអាចកាត់ថ្លៃបានរបស់ប្រជាជាតិទាំងពីរ ដើម្បីប្រគល់ជូនដល់មនុស្សជំនាន់ក្រោយ។ ថ្នាក់ដឹកនាំទាំងពីររូបបានឯកភាពលើការជំរុញខ្លាំង កិច្ចសហប្រតិបត្តិការក្នុងវិស័យសេដ្ឋកិច្ច ពាណិជ្ជកម្មនិងវិនិយោគ ជាពិសេសឆ្ពោះទៅរកការធ្វើពាណិជ្ជ កម្មទ្វេភាគីឲ្យទទួលបានចំនួន ៥ ពាន់លានដុល្លារអាមេរិកនៅឆ្នាំ២០២០ខាងមុខ។

ទាក់ទងនឹងការបោះបង្គោលខ័ណ្ឌសីមា ថាក់ដឹកនាំទាំងពីររូបបានសម្តែងក្តីសប្បាយរីករាយ ចំពោះសមិទ្ធិផលដែលវៀតណាមនិងកម្ពុជាសម្រេចបានក្នុងអតីតកាល ហើយរហូតមកដល់ពេលនេះ ភាគីទាំងពីរបានបញ្ចប់ការងារចំនួន ៨៤% រួចជាស្រេច។ ភាគីទាំងពីរបានកសាងខ្សែព្រំដែននៃសន្តិភាព មិត្តភាព កិច្ចសហប្រតិបត្តិការនិងការអភិវឌ្ឍន៍។

ទាក់ទិនដល់ការប្រើប្រាស់ប្រភពទឹកទន្លេមេគង្គ ប្រធានរដ្ឋសភាវៀតណាម លោកស្រី Nguyen Thi Kim Ngan បានសង្កត់ធ្ងន់ថា វៀតណាមចង់បន្តចែករំលែកនូវព័ត៌មាននិងសម្របសម្រួលការគ្រប់គ្រង និងការប្រើប្រាស់ប្រភពទឹកទន្លេមេគង្គ ដើម្បីធានាសុវត្ថិភាព សន្តិសុខប្រភពទឹកនិងបរិស្ថានដើម្បីផលប្រយោជន៍របស់ប្រទេសនិមួយៗនិងប្រជាជនដែលរស់នៅក្នុងតំបន់ទន្លេមេគង្គតែម្តង។

ប្រធានរដ្ឋសភាវៀតណាម លោក Nguyen Thi Kim Ngan បានស្នើររដ្ឋសភានៃប្រទេសទាំងពីរ  បន្តផ្តោតការយកចិត្តទុកដាក់ ក្នុងការជំរុញការផ្លាស់ប្តូរទស្សនកិច្ចរវាងសមាជិករដ្ឋសភាវ័យក្មេង និងសមាជិករដ្ឋសភាស្រ្តី រួមនិងការផ្លាស់ប្តូរ ចែករំលែកបទពិសោធន៍រវាងគណៈកម្មការជំនាញគ្រប់វិស័យ និងនៅក្នុងកម្រិតអគ្គលេខាធិការដ្ឋានផងដែរ ពិសេសការបន្តជំរុញដល់ដំណើរការរៀបចំសន្និសីទប្រចាំឆ្នាំរវាងគណៈកម្មការសេដ្ឋកិច្ច គណៈកម្មការកិច្ចការបរទេស និងគណៈកម្មការការពារជាតិ រវាងរដ្ឋសភាកម្ពុជា ឡាវ និងវៀតណាម ឲ្យបានទៀងទាត់ដើម្បីគាំទ្រ និងជំរុញដល់ការអភិវឌ្ឍតំបន់ត្រីកោណអភិវឌ្ឍន៍ដែលរដ្ឋាភិបាលកម្ពុជា ឡាវ និងវៀតណាមបានបង្កើតឡើងនោះ៕