តំបន់ពាណិជ្ជកម្មសេរី (FTZ) Dong Nai ត្រូវបានដាក់ពង្រាយលើផ្ទៃដីសរុប ប្រហែល ៨.២០០ ហិកតា ភ្ជាប់ជាមួយអាកាសយានដ្ឋាន Long Thanh និងកំពង់ផែ Phuoc An។ គម្រោងនេះត្រូវបានវិនិយោគប្រហែល ១៦ ពាន់លានដុល្លារអាមេរិក ក្នុងនោះទុនវិនិយោគសាធារណៈមានប្រហែល ៥% ទុនវិនិយោគឯកជនក្នុងស្រុកមានចំនួន ៤០% និងប្រហែល ៥៥% គឺជាទុនវិនិយោគផ្ទាល់ពីបរទេស។ តំបន់ពាណិជ្ជកម្មសេរី Dong Nai ត្រូវបានរំពឹងថា នឹងបង្កើតខ្សែសង្វាក់ឡូជីស្ទិកពហុមធ្យោបាយ ដែលជួយបង្កើនប្រសិទ្ធភាពការចំណាយ និងបង្កើនសមត្ថភាពប្រកួតប្រជែង។ តាមនោះ បង្កើតសន្ទុះថ្មីសម្រាប់កំណើន GRDP ទាក់ទាញការវិនិយោគពីបរទេស បង្កើតការងារធ្វើដែលមានប្រាក់ចំណូលខ្ពស់។

អាកាសយានដ្ឋាន Long Thanh កំពុងពន្លឿនល្បឿន ដោយរំពឹងថា នឹងបើកដំណើរការតាមកាលវិភាគ។ រូបថត៖ Duy Phuong/VOV-ទីក្រុងហូជីមិញ

ខេត្ត Dong Nai បានកំណត់ថា FTZ ត្រូវបង្កើនប្រសិទ្ធភាពនៃលំហអភិវឌ្ឍន៍ប្រកបដោយចីរភាព បង្កើតប្រព័ន្ធអេកូឡូស៊ីសេដ្ឋកិច្ចបើកចំហរ ស្វាហាប់ និងទូលំទូលាយ ដើម្បីបង្កើតសន្ទុះកំណើនថ្មី ជាមួយនឹងចក្ខុវិស័យរយៈពេល ៥០ ឆ្នាំឡើងទៅ។ លើសពីនេះ ការអភិវឌ្ឍទីក្រុងដោយផ្សារភ្ជាប់ជាមួយ FTZ និងប្រព័ន្ធហេដ្ឋារចនាសម្ព័ន្ធសំខាន់ៗ នឹងបង្កើតភាពទាក់ទាញយ៉ាងខ្លាំងសម្រាប់វិនិយោគិន នៅពេលមកដល់ Dong Nai។ យោងតាមស្ថាបត្យករ Ngo Viet Nam Son អាកាសយានដ្ឋាន Long Thanh នឹងក្លាយជាមជ្ឈមណ្ឌលអាកាសចរណ៍ដ៏សំខាន់មួយនៅអាស៊ីអាគ្នេយ៍ ហើយ FTZ Dong Nai នឹងមានតំណភ្ជាប់យ៉ាងជិតស្និទ្ធនិងវិសេសវិសាលជាមួយគម្រោងនេះ។ ទន្ទឹមនឹងនោះ ប្រព័ន្ធហេដ្ឋារចនាសម្ព័ន្ធសំខាន់ៗរបស់ខេត្ត Dong Nai និងទីក្រុងហូជីមិញ កំពុងត្រូវបានសុក្រឹត្យជាបណ្តើរៗ ដោយបង្កើតសន្ទុះដើម្បីជួយ FTZ បង្កើនប្រសិទ្ធភាព និងសក្តានុពលអភិវឌ្ឍន៍៖ «យើងត្រូវកត់សម្គាល់ថា ដើម្បីឱ្យ FTZ អភិវឌ្ឍន៍ គឺត្រូវតែផ្សារភ្ជាប់ជាមួយនឹងហេដ្ឋារចនាសម្ព័ន្ធសំខាន់ៗ។ ខ្ញុំគិតថា គួរតែសង្កត់ធ្ងន់លើសំណើសាសាង FTZ មិនមែនបំបែកចេញពីសំណើសម្រាប់កសាងតំបន់ទីក្រុងដែលភ្ជាប់ជាមួយហេដ្ឋារចនាសម្ព័ន្ធសំខាន់ៗទាំងនេះ។»

កំពង់ផែ Phuoc An មានទីតាំងស្ថិតនៅលើអ័ក្សថាមវន្តពី FTZ Dong Nai។ រូបថត៖ Duy Phuong/VOV-ទីក្រុងហូជីមិញ

នៅក្នុងផែនការមេនៃអាកាសយានដ្ឋាន Long Thanh អគ្គក្រុមហ៊ុនអាកាសចរណ៍វៀតណាម (ACV) ក្នុងនាមជាអ្នកវិនិយោគលើស្ថានីយអ្នកដំណើរ បានប្តេជ្ញាប្រែក្លាយ Long Thanh ទៅជាមជ្ឈមណ្ឌលឡូជីស្ទិកអាកាសចរណ៍អន្តរជាតិ ដោយតភ្ជាប់វៀតណាមជាមួយខ្សែសង្វាក់ផ្គត់ផ្គង់សកល។ ដើម្បីសម្រេចបាននូវគោលដៅនេះ តំបន់ពាណិជ្ជកម្មសេរី Dong Nai ត្រូវទទួលបានយន្តការ និងគោលនយោបាយអនុគ្រោះសមស្រប ដើម្បីបង្កើត "តំបន់លើកលែងពន្ធសម្រាប់ឡូជីស្ទិក និងផលិតកម្ម" - ជាកន្លែងដែលទំនិញអាចត្រូវបាននាំចូល ផលិត រក្សាទុក និងនាំចេញឡើងវិញ ដោយមិនចាំបាច់ជាប់ពន្ធ លុះត្រាតែទំនិញទាំងនោះត្រូវបាននាំចូលទីផ្សារក្នុងស្រុក។ ខេត្ត Dong Nai អាចក្លាយជា "តំបន់ឡូជីស្ទិកពិសេស" ឈានមុខគេ ទាក់ទងនឹងគោលនយោបាយ ដែលបង្កើតកម្លាំងចលករសម្រាប់តំបន់ទាំងមូល។

លោកបណ្ឌិត Tran Du Lich សមាជិកក្រុមប្រឹក្សាសេដ្ឋកិច្ច-សង្គមខេត្ត Dong Nai បានចាត់ទុកថា ខេត្តមានលក្ខខណ្ឌ គុណសម្បត្តិ និងចំណុចខ្លាំងជាច្រើនដើម្បីសាងសង់ FTZ ហើយនេះជាពេលវេលាត្រឹមត្រូវដើម្បីសាងសង់ FTZ Dong Nai ជាមួយនឹងមុខងារដើម្បីចូលរួមក្នុងខ្សែសង្វាក់ផ្គត់ផ្គង់សកល ដោយឆ្លៀតយកជាអតិបរមានូវប្រសិទ្ធភាពនៃអាកាសយានដ្ឋាន Long Thanh និងកំពង់ផែ Phuoc An។ ទោះជាយ៉ាងណាក៏ដោយ ខេត្តត្រូវកែសម្រួលផែនការមេឱ្យសមស្របទៅនឹងលក្ខខណ្ឌថ្មី ខេត្តថ្មី ក៏ដូចជាវិនិយោគលើគម្រោងអាទិភាព មានលក្ខណៈរបក់គំហើញ ជាមួយនឹងខ្សែផ្លូវចរាចរណ៍ ដើម្បីជំរុញការតភ្ជាប់តំបន់ ដោយបង្កើតលក្ខខណ្ឌអំណោយផលសម្រាប់ការអភិវឌ្ឍ FTZ។

ផែនការមេនៃតំបន់ពាណិជ្ជកម្មសេរី Dong Nai។ រូបថត៖ Duy Phuong/VOV-ទីក្រុងហូជីមិញ

យោងតាមលោកបណ្ឌិត Truong Minh Huy Vu ប្រធានក្រុមប្រឹក្សាសេដ្ឋកិច្ច-សង្គមខេត្ត Dong Nai ការសាងសង់គំរូ FTZ ក្នុងស្រុក គួរតែត្រូវបានតម្រង់ទិសបៃតង ឌីជីថល ឆ្លាតវៃ ដែលជាប់ទាក់ទងនឹងកំណែទម្រង់ស្ថាប័ន និងការសម្របសម្រួលក្នុងតំបន់។ ជាមួយនឹងទីតាំងយុទ្ធសាស្ត្ររបស់ខ្លួន ខេត្ត Dong Nai អាចក្លាយជាស្នូលនៃគំរូតំបន់ពាណិជ្ជកម្មសេរីភាគអាគ្នេយ៍ (SEFZ) ដែលកំពុងត្រូវបានស្រាវជ្រាវ និងស្នើឱ្យក្លាយជាគំរូតំបន់សេដ្ឋកិច្ចរួមបញ្ចូលគ្នាដំបូងគេនៅក្នុងប្រទេសវៀតណាម។ លោក Truong Minh Huy Vu បានចាត់ទុកថា៖ «អាកាសយានដ្ឋាន Long Thanh មានទីតាំងនៅខេត្ត Dong Nai ប៉ុន្តែមិនមែនគ្រាន់តែជាអាកាសយានដ្ឋានរបស់ Dong Nai នោះទេ។ ប្រសិនបើយើងក្រឡេកមើលកម្លាំងចលករសម្រាប់ការអភិវឌ្ឍនៃតំបន់ភាគអាគ្នេយ៍ ជាទូទៅ កម្លាំងចលករដ៏សំខាន់បំផុតនៅតែជាអាកាសយានដ្ឋាន Long Thanh – Tan Son Nhat និងក្រុមកំពង់ផែ Cai Mep – Can Gio។»

សម្រាប់ខេត្ត Dong Nai ការអភិវឌ្ឍ FTZ នឹងនាំមកនូវអត្ថប្រយោជន៍យ៉ាងធំធេងដល់ការអភិវឌ្ឍសេដ្ឋកិច្ចក្នុងស្រុក ទាក់ទាញការវិនិយោគក្នុងស្រុក និងបរទេសយ៉ាងខ្លាំង និងបង្កើនសកម្មភាពនាំចូល-នាំចេញ។ ដូច្នេះហើយ ការអនុវត្ត FTZ ជាប្រព័ន្ធ និងមានប្រសិទ្ធភាព នឹងប្រែក្លាយខេត្ត Dong Nai ទៅជាមជ្ឈមណ្ឌលឡូជីស្ទិក និងអាកាសចរណ៍អន្តរជាតិ ដែលរួមចំណែកដល់ការបង្កើតសន្ទុះសម្រាប់វៀតណាម ក្នុងការធ្វើសមាហរណកម្មកាន់តែស៊ីជម្រៅទៅក្នុងខ្សែសង្វាក់តម្លៃសកល៕