(vovworld) - ຕອນເຊົ້າ, ວັນທີ 4/11, ຢູ່ບ້ານອານທ໋າຍ, ຕາແສງອານມີ໋, ເມືອງບິ່ງລຸກ, ແຂວງຮ່ານາມ, ໄດ້ດຳເນີນວັນບຸນສາມັກຄີປວງຊົນ. ກ່າວຄຳເຫັນທີ່ພິທີ, ທ່ານປະທານປະເທດ ເຈືອງເຕີ້ນຊາງ ຢັ້ງຢືນວ່າ: “ວັນບຸນສາມັກຄີທົ່ວປວງຊົນຢູ່ເຂດຊຸມຊົນ” ໄດ້ເປັນເວທີປາໄສປະຊາທິປະໄຕ, ເປັນບ່ອນເຕົ້າໂຮມກຳລັງແຮງຂອງແຕ່ລະຄົນ, ແຕ່ລະຄອບຄົວໃນເຂດຊຸມຊົນຢ່າງແທ້ຈິງ. ທ່ານປະທານປະເທດຖືວ່າ: ກິດຈະການປ່ຽນໃໝ່ປະເທດຊາດ ບັນລຸໄດ້ຜົນງານອັນໃຫຍ່ຫຼວງຫຼາຍຢ່າງ, ແຕ່ປະເທດກຳລັງປະເຊີນໜ້າກັບບັນດາສິ່ງທ້າທາຍຢ່າງຮ້າຍແຮງຄື: ເສດຖະກິດໂລກ ແລະ ພາຍໃນປະເທດຊຸດໂຊມ, ບັນຫາສິ່ງແວດລ້ອມ, ໄພສັງຄົມ, ການສໍ້ລາດບັງຫຼວງ, ການຟຸມເຟືອຍ... ດ້ວຍເຫດນັ້ນ, ຮຽກຮ້ອງໃຫ້ທົ່ວປວງຊົນຕ້ອງເສີມຂະຫຍາຍໝາກຜົນທີ່ບັນລຸໄດ້, ສາມັກຄີກັນຜ່ານຜ່າຄວາມຫຍຸ້ງຍາກສ້າງສາປະເທດໃຫ້ນັບມື້ນັບພັດທະນາ:
“ ຂ້າພະເຈົ້າສະເໜີໃຫ້ແນວໂຮມປະເທດຊາດບັນດາແຂວງ, ນະຄອນໃນທົ່ວປະເທດ ແລະ ແນວໂຮມປະເທດຊາດຫວຽດນາມ ສືບຕໍ່ຍູ້ແຮງການປ່ຽນໃໝ່ເນື້ອໃນ, ວິທີການເຄື່ອນໄຫວ; ຍູ້ແຮງບັນດາບັ້ນຂົນຂວາຍຂະບວນການແຂ່ງຂັນຮັກຊາດ. ຜ່ານບັ້ນຂົນຂວາຍ “ທົ່ວປວງຊົນສາມັກຄີສ້າງຊີວິດວັດທະນະທຳຢູ່ເຂດຊຸມຊົນ” ສືບຕໍ່ພັດທະນາບັນດາຮູບແບບປະຊາຊົນຄຸ້ມຄອງເອງ, ຕອບສະໜອງຄວາມຕ້ອງການຂອງປະຊາຊົນໃນການກໍ່ສ້າງຊົນນະບົດໃໝ່, ຕົວເມືອງສີວິໄລ. ແນວໂຮມປະເທດຊາດ ຫວຽດນາມ ຕ້ອງແມ່ນອົງການຮັບຟັງ ແລະ ເຕົ້າໂຮມຄຳເຫັນຂອງປະຊາຊົນ ເພື່ອສ່ອງແສງເຖິງບັນດາອົງການຂອງພັກ ແລະ ລັດ, ສົມທົບກັບອຳນາດການປົກຄອງ ແລະ ບັນດາອົງການສະມາຊິກ ປະຕິບັດວຽກງານຕິດຕາມກວດກາ, ໄຈ້ແຍກຕີລາຄາໃຫ້ມີປະສິດທິຜົນສູງ. ເສີມຂະຫຍາຍບົດບາດ, ລັກສະນະເປັນເຈົ້າການ, ມີຫົວຄິດປະດິດສ້າງຂອງບັນດາອົງການສະມາຊິກໃນການຈັດຕັ້ງການເຄື່ອນໄຫວ, ບັນດາການເຄື່ອນໄຫວ ແລະ ຂະບວນການແຂ່ງຂັນ, ສືບຕໍ່ເອົາໃຈໃສ່ເຖິງແກ່ການເຄື່ອນໄຫວຂອງແນວໂຮມ ແລະ ພະນັກງານແນວໂຮມຂັ້ນເມືອງ, ຕາແສງ ແລະ ເຂດຊຸມຊົນ.”