(vovworld) – ໂດຍໄດ້ຮັບຄຳເຊີນຂອງທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູ້ງ, ທ່ານນາຍົກລັດຖະມົນຕີ ອີຕາລີ Matteo Renzi ເດີນທາງມາຢ້ຽມຢາມ ຫວຽດນາມ ຢ່າງເປັນທາງການແຕ່ວັນທີ 9 – 10/6/2014. ນີ້ແມ່ນການຢ້ຽມຢາມຄັ້ງທຳອິດຂອງນາຍົກລັດຖະມົນຕີ ອີຕາລີ ຜູ້ໜຶ່ງນັບແຕ່ເມື່ອ 2 ປະເທດສ້າງຕັ້ງສາຍພົວພັນທາງການທູດ ເມື່ອປີ 1973.
ພາຍຫຼັງພິທີຕ້ອນຮັບທ່ານນາຍົກລັດຖະມົນຕີ Matteo Renzi ແລະ ພັນລະຍາທີ່ຖືກຈັດຕັ້ງຢ່າງສົມກຽດໃນຕອນບ່າຍວັນທີ 9/6 ຢູ່ ຮ່າໂນ້ຍ, ນາຍົກລັດຖະມົນຕີ ທັງ 2 ທ່ານໄດ້ເນີນການເຈລະຈາພ້ອມກັນແລກປ່ຽນຢ່າງເລິກເຊິ່ງ ແລະ ກ້ວາງຂວາງການກຳນົດທິດ ແລະ ເປັນເອກະພາບຫຼາຍມາດຕະການລະອຽດເພື່ອແນໃສ່ຊຸກຍູ້ການພົວພັນຄູ່ຮ່ວມມືຍຸດທະສາດ ຫວຽດນາມ - ອີຕາລີ. ນາຍົກລັດຖະມົນຕີທັງ 2 ທ່ານເຫັນດີເປັນເອກະສັນວ່າ: 2 ຝ່າຍສືບຕໍ່ເພີ່ມທະວີການແລກປ່ຽນຄະນະຜູ້ແທນຂັ້ນສູງ ແລະ ທຸກຂັ້ນ, ຍູ້ແຮງການຮ່ວມມືໃນຂົງເຂດການເມືອງ, ການທູດ, ເສດຖະກິດ, ວັດທະນະທຳ, ການສຶກສາ. 2 ຝ່າຍກໍ່ເປັນເອກະສັນໃນການປັບປຸງກົນໄກຮ່ວມມືໃນປະຈຸບັນ ແລະ ຍົກວົງເງິນການຄ້າ 2 ຝ່າຍຂຶ້ນ 5 ຕື້ USD.
ໃນການປະຊຸມຂ່າວພາຍຫຼັງການເຈລະຈາ, ທ່ານນາຍົກລັດຖະມົນຕີໃຫ້ຮູ້ວ່າ: ລັດຖະບານ 2 ປະເທດຈະສ້າງເງື່ອນໄຂອຳນວຍຄວາມສະດວກໃຫ້ບັນດາວິສາຫະກິດ 2 ປະເທດຍູ້ແຮງການຮ່ວມມືລົງທຶນໃນບັນດາຂົງເຂດທີ່ມີຄວາມສາມາດບົ່ມຊ້ອນ ແລະ ທ່າແຮງຂອງແຕ່ລະຝ່າຍ.
ແລະກໍ່ໃນຕອນບ່າຍວັນທີ 9/6, ທ່ານເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ໄດ້ໃຫ້ການຕ້ອນຮັບທ່ານນາຍົກລັດຖະມົນຕີ Matteo Renzi. ທ່ານນາຍົກລັດຖະມົນຕີ Matteo Renzi ເນັ້ນໜັກວ່າ: ອີຕາລີ ຖືເປັນສຳຄັນການພັດທະນາການພົວພັນມິດຕະພາບ ແລະ ການຮ່ວມມືກັບ ຫວຽດນາມ, ຢືນຢັນຄວາມມານະພະຍາຍາມຊຸກຍູ້ການຫັນບັນດາຂໍ້ຕົກລົງທີ່ບັນລຸໄດ້ໃນການຢ້ຽມຢາມຄັ້ງນີ້ໃຫ້ປະກົດຜົນເປັນຈິງ, ພິເສດແມ່ນກ່ຽວກັບດ້ານ ການຄ້າ, ການລົງທຶນ, ເຮັດໃຫ້ການພົວພັນຄູ່ຮ່ວມມືຍຸດທະສາດ ອີຕາລີ - ຫວຽດນາມ ເລິກເຊິ່ງກ່ວາອີກ.
ທ່ານເລຂາທິການໃຫຍ່ ຫງວຽນຟູ໋ຈ້ອງ ແລະ ທ່ານນາຍົກລັດຖະມົນຕີ Matteo Renzi
(ພາບ: Trí Dũng/TTXVN)
ທ່ານເລຂາທິການໃຫຍ່ ຫງວຽນຟູ໋ຈ້ອງ ຫວັງວ່າ: 2 ຝ່າຍເສີມຂະຫຍາຍຄວາມສາມາດບົ່ມຊ້ອນທີ່ອຸດົມສົມບູນ, ຊຸກຍູ້ການພົວພັນ 2 ປະເທດຂຶ້ນສູ່ລະດັບສູງໃໝ່ ດ້ວຍບັນດາບາດກ້າວບຸກທະລຸແມ່ນໃນຂົງເຂດການລົງທຶນ, ການຄ້າ, ການສຶກສາ ແລະ ບຳລຸງສ້າງ. ທ່ານເລຂາທິການໃຫຍ່ ຫງວຽນຟູ໋ຈ້ອງ ແລະ ທ່ານນາຍົກລັດຖະມົນຕີ Matteo Renzi ກໍ່ໄດ້ແລກປ່ຽນກ່ຽວກັບບາງບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົມໃຈ. ທ່ານເລຂາທິການໃຫຍ່ ຫງວຽນຟູ໋ຈ້ອງ ເນັ້ນໜັກວ່າ: ໃນການປະຕິບັດນະໂຍບາຍການຕ່າງປະເທດຂອງຕົນ, ຫວຽດນາມ ຍາມໃດກໍ່ຖືການພົວພັນກັບບັນດາປະເທດເພື່ອນມິດທີ່ເປັນມູນເຊື້ອເປັນສຳຄັນ, ໃນນັ້ນມີ ອີຕາລີ.
ຫວຽດນາມ - ອີຕາລີຊຸກຍູ້ການພົວພັນເສດຖະກິດ - ການຄ້າ ແລະ ການລົງທຶນ
ຕອນບ່າຍວັນທີ 9/6, ທ່ານປະທານປະເທດ ຫວຽດນາມ ເຈືອງເຕີນຊາງ ໄດ້ໃຫ້ການຕ້ອນຮັບ ທ່ານນາຍົກລັດຖະມົນຕີ Matteo Renzi. ທ່ານປະທານປະເທດ ເຈືອງເຕີນຊາງ ເຊື່ອໝັ້ນວ່າ: ທ້າຍປີ 2014 ນີ້, ເມື່ອ 2 ປະເທດເຈລະຈາສັນຍາການຄ້າເສລີ ຫວຽດນາມ - ອີຢູ (FTA) ສຳເລັດຜົນ, ມີແງ່ຫວັງ ແລະ ກາລະໂອກາດຮ່ວມມືໃໝ່ຫຼາຍຢ່າງ ຈະສືບຕໍ່ໄດ້ຮັບການເປີດກ້ວາງ. ທ່ານປະທານປະເທດ ສະເໜີວ່າ: ໃນໄລຍະຈະມາເຖິງ, 2 ຝ່າຍສືບຕໍ່ຮັກສາ ແລະ ແລກປ່ຽນຄະນະຜູ້ແທນທຸກຂັ້ນ, ຊຸກຍູ້ການພົວພັນເສດຖະກິດ - ການຄ້າ ແລະ ການລົງທຶນ, ພິເສດແມ່ນໃນບັນດາຂົງເຂດເຊິ່ງ ຫວຽດນາມ ມີທ່າແຮງ ແລະ ຫວຽດນາມ ມີຄວາມຕ້ອງການ, ຢືນຢັນ ຫວຽດນາມ ຈະສ້າງເງື່ອນໄຂອຳນວຍຄວາມສະດວກເພື່ອໃຫ້ບັນດາວິສາຫະກິດ ອີຕາລີ ດຳເນີນທຸລະກິດຍາວນານຢູ່ຫວຽດນາມ. ທ່ານປະທານປະເທດ ເຈືອງເຕີນຊາງ ສະເໜີໃຫ້ 2 ຝ່າຍເພີ່ມທະວີການຮ່ວມມືຢູ່ບັນດາເວທີປາໄສຫຼາຍຝ່າຍ, ສ້າງຕັ້ງ ແລະ ຈັດຕັ້ງກອງປະຊຸມຄະນະກຳມະການລະຫວ່າງລັດຖະບານກ່ຽວກັບການຮ່ວມມືເສດຖະກິດກໍ່ຄືບັນດາກົນໄກຮ່ວມມືກ່ຽວກັບດ້ານການທູດ, ການປ້ອງກັນຊາດ - ປ້ອງກັນຄວາມສະຫງົບ, ວັດທະນະທຳ - ການສຶກສາ ແລະ ວິທະຍາສາດເຕັກໂນໂລຢີ. ຫວຽດນາມ ພ້ອມແລ້ວເປັນຂົວຕໍ່ເພື່ອໃຫ້ ອີຕາລີ ເພີ່ມທະວີການພົວພັນກັບບັນດາປະເທດ ອາຊຽນ.
ທ່ານນາຍົກລັດຖະມົນຕີ Matteo Renzi ຢືນຢັນ: ອີຕາລີ ຖືເປັນສຳຄັນ ແລະ ປາດຖະໜາຢາກຊຸກຍູ້ການພົວພັນຄູ່ຮ່ວມມືຍຸດທະສາດກັບ ຫວຽດນາມ, ພິເສດແມ່ນກ່ຽວກັບການຄ້າ - ການລົງທຶນ, ປາດຖະໜາຍົກວົງເງິນການຄ້າ 2 ປະເທດຂຶ້ນສູ່ລະດັບ 5 ຕື້ USD, ໃຫ້ຄຳໝັ້ນສັນຍາເປັນຂົວເຊື່ອມຕໍ່ຊຸກຍູ້ການພົວພັນຮອບດ້ານລະຫວ່າງ ຫວຽດນາມ ແລະ ສະຫະພາບ ເອີລົບ (ERU). ທ່ານນາຍົກລັດຖະມົນຕີ ອີຕາລີ ແບ່ງປັນຄວາມວິຕົກວັງວົນກ່ຽວກັບບັນດາການຜັນແປມໍ່ໆມານີ້ຢູ່ທະເລຕາເວັນອອກ ແລະ ປາດຖະໜາບັນດາຝ່າຍກ່ຽວຂ້ອງຕ້ອງແກ້ໄຂຄວາມເຄັ່ງຕຶງບົນພື້ນຖານເຄົາລົບກົດໝາຍສາກົນ.