(ທ່ານເລຂາທິການໃຫຍ່ອາຊຽນ ເລເລືອງມິງ)
(vovworld) – “ກຳນົດທິດກໍ່ສ້າງປະຊາຄົມອາຊຽນ ພາຍຫຼັງປີ 2015: ທັດສະນະຂອງບັນດາປະເທດອາຊຽນ ແລະ ຫວຽດນາມ” ແມ່ນຫົວຂໍ້ຂອງກອງປະຊຸມສຳມະນາເຊິ່ງດຳເນີນໄປໃນຕອນເຊົ້າວັນທີ 03/12, ຢູ່ຮ່າໂນ້ຍ. ກ່າວຄຳເຫັນຢູ່ທີ່ນີ້, ທ່ານເລຂາທິການໃຫຍ່ອາຊຽນ ເລເລືອງມິງ ໄດ້ຕີລາຄາສູງບັນດາການປະກອບສ່ວນຂອງຫວຽດນາມ ນັບແຕ່ເຂົ້າເປັນສະມາຊິກຂອງອາຊຽນ ເມື່ອປີ 1995. ຕາມທ່ານເລຂາທິການໃຫຍ່ອາຊຽນ ເລເລືອງມິງ ແລ້ວ, ຫວຽດນາມ ສາມາດສືບຕໍ່ບົດບາດຕັ້ງໜ້າ ແລະ ເປັນເຈົ້າການກວ່າອີກໃນໂຄງການດຳເນີນງານຂອງອາຊຽນ ພາຍຫຼັງປີ 2015.
“ກອນອື່ນໝົດ, ສຸມໃສ່ເຂົ້າໃນການສຶກສາ, ການສຶກສາແມ່ນຈຸດສຸມໃນຍຸດທະສາດພັດທະນາຂອງຫວຽດນາມ ຍ້ອນການສຶກສາໄດ້ສວມບົດບາດສຳຄັນໃນເລື່ອງຮັດແຄບຊ່ອງວາງລະຫວ່າງບັນດາປະເທດອາຊຽນ ແລະ ລະຫວ່າງອາຊຽນ ກັບບັນດາປະເທດຄູ່ຮ່ວມມື. ສິ່ງມີຄວາມສຳຄັນທີ 2 ນັ້ນແມ່ນ ຫວຽດນາມຄວນເພີ່ມທະວີຍົກສູງສະຕິຄວາມຮັບຮູ້ຂອງປະຊາຊົນ, ພິເສດແມ່ນຊາວໜຸ່ມ, ນັກສຶກສາ ແລະ ນັກຮຽນກ່ຽວກັບປະຊາຄົມອາຊຽນ.”
ໃນເວລາ 2 ວັນທີ່ດຳເນີນກອງປະຊຸມສຳມະນາ, ບັນດານັກຄົ້ນຄວ້າຢູ່ພາຍໃນ ແລະ ຕ່າງປະເທດ ຈະປຶກສາຫາລືບັນດາຫົວຂໍ້ຄື: ວິວັດການກໍ່ສ້າງປະຊາຄົມອາຊຽນ ແລະ ທິດທາງໃຫຍ່ພາຍຫຼັງປີ 2015; ປະຊາຄົມເສດຖະກິດອາຊຽນ - ສະພາບຕົວຈິງ ແລະ ແງ່ຫວັງພາຍຫຼັງປີ 2015; ປະຊາຄົມວັດທະນະທຳ - ສັງຄົມອາຊຽນ ແລະ ຈຸດໝາຍປະຊາຄົມອາຊຽນ ມຸ່ງໄປສູ່ປະຊາຊົນ ແລະ ສຸດທ້າຍແມ່ນປະຊາຄົມການເມືອງ - ຄວາມໝັ້ໜຄົງ ອາຊຽນ ແລະ ທິດທາງພັດທະນາພາຍຫຼັງປີ 2015.