ທ່ານຮອງນາຍົກລັດຖະມົນຕີ ເຈິ່ນຮົ່ງຮ່າ ແລະ ທ່ານປະທານາທິບໍດີ ແຟງລັງ Alexander Stubb (ພາບ: TTXVN)

        ແຕ່ວັນທີ 27 – 28 ພະຈິກ, ທ່ານຮອງນາຍົກລັດຖະມົນຕີ ຫວຽດນາມ ເຈິ່ນຮົ່ງຮ່າ ໄດ້ໄປຢ້ຽມຢາມ, ເຮັດວຽກຢູ່ ສ.ແຟງລັງ. ຢູ່ທີ່ນີ້, ທ່ານຮອງນາຍົກລັດຖະມົນຕີໄດ້ພົບປະສົນທະນາກັບທ່ານປະທານາທິບໍດີ ແຟງລັງ Alexander Stubb, ດຳເນີນການໂອ້ລົມສົນທະນາກັບທ່ານຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ແຟງລັງ ນາງ Rikka Purra.

        ເມື່ອແລກປ່ຽນກັບທ່ານຮອງນາຍົກລັດຖະມົນຕີ ເຈິ່ນຮົ່ງຮ່າ, ທ່ານປະທານາທິບໍດີ Alexander Stubb, ສະເໜີໃຫ້ລັດຖະບານ 2 ປະເທດ ມີບັນດາມາດຕະການຊຸກຍູ້ການຮ່ວມມືຢ່າງແຮງກວ່າ ເພື່ອໃຫ້ສອດຄ່ອງກັບຄວາມສາມາດບົ່ມຊ້ອນ ແລະ ຄວາມຕ້ອງການຂອງ 2 ຝ່າຍ; ໃນນັ້ນ, ຕ້ອງສືບຕໍ່ເປີດກວ້າງການຮ່ວມມືໃນທຸກຂົງເຂດ, ໃນນັ້ນ, ໃຫ້ບຸລິມະສິດໃນບັນດາຂົງເຂດເຊິ່ງ ແຟງລັງ ມີທ່າແຮງ ແລະ ຫວຽດນາມ ມີຄວາມຕ້ອງການ.

        ສ່ວນທ່ານຮອງນາຍົກລັດຖະມົນຕີ ເຈິ່ນຮົ່ງຮ່າ ປາດຖະໜາວ່າ, 2 ປະເທດຈະເພີ່ມທະວີການຮ່ວມມືໃນຂົງເຂດພັດທະນາແບບຍືນຍົງ, ຫັນເປັນສີຂຽວ, ເສດຖະກິດໝູນວຽນ. ທ່ານຢືນຢັນວ່າ, ຫວຽດນາມ ສະໜັບສະໜູນ ແຟງລັງ ເພີ່ມທະວີການຮ່ວມມືກັບ ອາຊຽນ.

        ໃນການໂອ້ລົມສົນທະນາກັບທ່ານຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ແຟງລັງ ນາງ Rikka Purra, ທ່ານຮອງນາຍົກລັດຖະມົນຕີ ເຈິ່ນຮົ່ງຮ່າ ສະເໜີໃຫ້ລັດຖະບານ ແຟງລັງ ເອົາໃຈໃສ່, ສົ່ງເສີມບັນດາວິສາຫະກິດຂອງ ແຟງລັງ ລົງທຶນເຂົ້າ ຫວຽດນາມ ໃນບັນດາຂົງເຂດ, ຄື: ສິ່ງແວດລ້ອມ, ພະລັງງານທົດແທນ, ຕົວເມືອງອັດສະລິຍະ, ແກ້ໄຂສິ່ງເສດເຫຼືອອຸດສາຫະກຳ, ຂໍ້ມູນຂ່າວສານ… ທ່ານກໍ່ສະເໜີໃຫ້ ແຟງລັງ ສືບຕໍ່ມີສຽງເວົ້າເພື່ອໃຫ້ບັນດາປະເທດທີ່ຍັງເຫຼືອໃນ ອີຢູ ໃຫ້ສັດຕະຍາບັນສັນຍາອາລັກຂາການລົງທຶນ ຫວຽດນາມ - ອີຢູ (EVIPA) ໂດຍໄວ.