(vovworld) - ເມື່ອມາຢ້ຽມຢາມຟູ໋ອຽນ,ເຊິ່ງແມ່ນແຂວງໜຶ່ງຢູ່ແຄມທະເລທາງທິດໃຕ້ຂອງພາກກາງ, ນັກທ່ອງທ່ຽວຜູ້ໃດກໍ່ຢາກໄດ້ຮັບຊົມແສງອະລຸນຢູ່ແຫຼມດ້າຍແລ້ງ, ເຊິ່ງແມ່ນທັດສະນີຍະພາບທີ່ສວຍງາມ ແລະ ເປັນເອກະລັກສະເພາະ. ເມື່ອຢືນຢູ່ຕໍ່ໜ້າເຂດທະເລທີ່ກວ້າງໃຫຍ່ໄພສານ ແລະຊົມເບິ່ງຂອບຟ້າໃນຍາມອະລຸນນັ້ນ, ຫຼາຍຄົນທັງຫຼາຍຈະຮູ້ສຶກວ່າຕົນເອງໂສກດີທີ່ໄດ້ເຫັນປະຈັກຕາຈຸດເວລາມະຫັດສະຈັນນີ້.
ແຫຼມດ້າຍແລ້ງຢູ່ແຂວງຟູ໋ອຽນ
(ພາບອິນເຕີແນດ)
ແຫຼມດ້າຍແລ້ງ, ຂຶ້ນກັບຕາແສງຮ່ວາເຕິມ, ເມືອງເຕິມຮ່ວາ ໂດຍນາຍທະຫານຄົນຝລັ່ງ ຄົ້ນເຫັນນັບແຕ່ຊຸມປີທ້າຍຂອງສະຕະວັດທີ 19. ປີ 1890, ຊາວຝລັ່ງ ໄດ້ໃຫ້ກໍ່ສ້າງສະຖານີໂຄມໄຟທະເລຢູ່ທີ່ນີ້. ຮອດຍາມກາງຄືນ, ຊາວປະມົງຫາປາຢູ່ນອກຝັ່ງທະເລຍາມໃດກໍ່ຊົມເຫັນແສງໄຟຟ້າຈາກສະຖານີໂຄມໄຟທະເລດັ່ງກ່າວ, ຍ້ອນເຫດນັ້ນປະຊາຊົນຈຶ່ງເອີ້ນແຫຼມນີ້ວ່າແຫຼມດ້ຽນ (ໄຟຟ້າ). ນີ້ແມ່ນໜຶ່ງໃນຈຳນວນສະຖານີໂຄມໄຟທະເລ 8 ແຫ່ງ ທີ່ໄດ້ຮັບການກໍ່ສ້າງຢູ່ຫວຽດນາມ ມາເປັນເວລາກວ່າ 100 ປີ.
ໂຄມໄຟທະເລຢູ່ແຫຼມດ້າຍແລ້ງ
(ພາບອິນເຕີແນດ)
ແຫຼມດ້າຍແລ້ງ ຫ່າງຈາກນະຄອນຕູຍຮ່ວາ ໄປທາງທິດໃຕ້ປະມານ 40 ກມ. ເພື່ອໄດ້ສູບອາກາດທີ່ປອດໂປ່ງໃນຍາມຮຸ່ງເຊົ້າ ແລະ ຕ້ອນຮັບແສງອະລຸນທຳອິດຢູ່ແຫຼມດ້ຽນ, ນັກທ່ອງທ່ຽວຫຼາຍຄົນ ໄດ້ນອນກາງຄືນຢູ່ທີ່ນີ້, ແທນທີຈະຕ້ອງຕື່ນນອນແຕ່ 3 ໂມງເຊົ້າເພື່ອເດີນທາງຈາກນະຄອນຕູຍຮ່ວາ ມາແຫ່ງນີ້. ທາງໄປແຫຼມດ້າຍແລ້ງ ເປົ່າປ່ຽວອ້າງວ້າງ, ມີບາງຕອນຄົດລ້ຽວ ປຽບເໝືອນຜ້າໄໝອ່ອນນວນພາດກ່າຍເນີນພູ, ເບື້ອງໜຶ່ງແມ່ນພູ, ເບື້ອງໜຶ່ງແມ່ນທະເລ, ເຖິງວ່າຕ້ອງຂ້າມເສັ້ນທາງຍາວໄກກໍ່ຕາມ, ແຕ່ດົນໆຈຶ່ງປະກົດເຫັນຄົນໄປຜ່ານ. ສິ່ງດັ່ງກ່າວເຮັດໃຫ້ຜູ້ຄົນທັງຫຼາຍຮູ້ສຶກວ່າຕົນເອງນ້ອຍທີ່ສຸດທ່າມກາງບໍລິເວນທີ່ກວ້າງໃຫຍ່ມະໂຫຖານນີ້,. ອ້າຍຫງວຽນວັນທື, ນັກທ່ອງທ່ຽວມາຈາກຮ່າໂນ້ຍ, ໃຫ້ຮູ້ວ່າ:
“ປະຈຸບັນ, ເສັ້ນທາງຈາກຕູຍຮ່ວາ ໄປຍັງແຫຼມດ້ຽນ ແມ່ນສະດວກສະບາຍກວ່າກ່ອນນີ້ຫຼາຍ, ທັດສະນີຍະພາບຢູ່ລຽບຕາມສອງພາກທາງງາມຄືດັ່ງພາບແຕ້ມ. ໄປຕາມເສັ້ນທາງກວ້າງຂວາງ, ໄດ້ສູບອາກາດປອດໂປ່ງ ແລະ ຊົມແສງອະລຸນຢູ່ແຫຼມດ້ຽນ ທ່ານຈະຮູ້ສຶກຄວາມງາມທັງໝົດຂອງເຂດດິນແຫ່ງນີ້ໄດ້ ”.
ຫາດຊາຍທະເລຢູ່ແຫຼມດ້າຍແລ້ງ
(ພາບອິນເຕີແນດ) ຄວາມຮູ້ສຶກທຳອິດເມື່ອມາຢາມແຫຼມດ້າຍແລ້ງ ນັ້ນແມ່ນຄວາມງາມແບບຮົກເຮື້ອວ່າງເປົ່າໂດຍທຳມະຊາດບັນດານໃຫ້. ນັກທ່ອງທ່ຽວສາມາດຍ່າງຂຶ້ນສະຖານີໂຄມໄຟທະເລ ແລະ ນອນກາງຄືນຢູ່ນັ້ນໄດ້. ແຕ່ນັກທ່ອງທ່ຽວສ່ວນຫຼາຍມັກຕັ້ງຕູບຜ້າຢູ່ບ້າຍມົນ ເພື່ອພັກຜ່ອນ, ຂີ້ຊາຍຢູ່ທີ່ນີ້ກ້ຽງສະເໝີ. ລົມພັດຈາກທະເລເຂົ້າຝັ່ງໄດ້ສ້າງເປັນບັນດາໂພນຂີ້ຊາຍທີ່ເຄື່ອນຍ້າຍຕະຫຼອດເມື່ອລົມພັດແຮງ. ນັກທ່ອງທ່ຽວມາຢ້ຽມຢາມບ້າຍມົນ ຕ່າງກໍ່ຮູ້ສຶກຕົກສະເງີ້ຕໍ່ຄວາມງາມແບບທຳມະຊາດຂອງຫາດຊາຍທະເລແຫ່ງນີ້.
ຫາດຊາຍທະເລບ້າຍມົນ ຮາບພຽງ ແລະ ກວ້າງຂວາງ, ບໍ່ມີປະຊາຊົນດຳລົງຊີວິດຢູ່ທີ່ນີ້ ແລະ ກໍ່ບໍ່ແມ່ນບ່ອນຈອດເຮືອ, ກ່ຳປັ່ນອີກ, ດັ່ງນັ້ນເຂດທະເລຈຶ່ງຮັກສາຄວາມງາມແບບທຳມະຊາດໄດ້. ມາຢ້ຽມຢາມບ້າຍມົນ ນັກທ່ອງທ່ຽວສາມາດຮັບຮູ້ຄວາມງາມທັງໝົດຂອງທະເລ. ບັນດາຕູບຜ້າຕັ້ງເທິງຫາດຊາຍທະເລຂາວປຽບເໝືອນຕົ້ນເຫັດທີ່ໃຫຍ່ໂຕ, ອັນໄດ້ສ້າງຄວາມງາມຕື່ມອີກໃຫ້ທະເລແຫ່ງນີ້. ເອື້ອຍ ແທງເຮືອງ, ຊາວນະຄອນຕູຍຮ່ວາ, ໃຫ້ຮູ້ວ່າ:
“ພວກຂ້າພະເຈົ້າໃກ້ຈະໄດ້ເຫັນປະຈັກຕາພູມພາບສວຍງາມທຳອິດຢູ່ທະເລ ແລະ ນີ້ກໍ່ແມ່ນບ່ອນຕ້ອນຮັບແສງອະລຸນທຳອິດຢູ່ເຂດດິນຕໍ່ແຜ່ນ, ດັ່ງນັ້ນພວກຂ້າພະເຈົ້າຈຶ່ງຮູ້ສຶກຕື້ນຕັນໃຈຫຼາຍ, ບໍ່ຮູ້ວ່າມັນຈະຄືແນວໃດ”.
ບ້າຍມົນ ທີ່ງາມແບບທຳມະຊາດ
(ພາບອິນເຕີແນດ)
ເວລາ 5 ໂມງເຊົ້າ, ແສງອະລຸນທຳອິດເລີ່ມປະກົດອອກປຽບເໝືອນເສັ້ນໄໝຄຳເຫຼື້ອມແວວວາວ. ອ້າຍທື ຮູ້ສຶກປະທັບໃຈທີ່ສຸດເມື່ອເຫັນທັດສະນີຍະພາບທີ່ສວຍງາມຄືແນວນັ້ນ, ອ້າຍ ທື, ແບ່ງປັນວ່າ:
“ສຳລັບຊີວິດແຕ່ລະຄົນ, ເພື່ອໄດ້ຮັບຊົມທັດສະນີຍະພາບທີ່ສວຍງາມຄືແນວນັ້ນກໍ່ບໍ່ແມ່ນເລື່ອງງ່າຍ. ດັ່ງນັ້ນຂ້າພະເຈົ້າບໍ່ຫຼັບຕາຕະຫຼອດຄືນເພື່ອລໍຖ້າແສງອະລຸນທຳອິດ. ບັນຍາກາດປອດໂປ່ງໃນຍາມເຊົ້າ, ແລະ ຮູບພາບທຳມະຊາດທີ່ສວຍງາມ ໄດ້ເຮັດໃຫ້ຜູ້ຄົນທັງຫຼາຍຮູ້ສຶກສະຫວາດສະເຫວີຍ”.
ຍາມຮຸ່ງເຊົ້າແມ່ນຈຸດເວລາທີ່ສ້າງຄວາມດູດດື່ມທີ່ສຸດ. ເພາະເວລານັ້ນທະເລງາມຫຼາຍ, ທັງທ້ອງຟ້າແດງສົດໄສກ່ອນທີ່ແຈ້ງສະຫວ່າງ. ນີ້ແມ່ນຈຸດເວລາທີ່ບັນດານັກຖ່າຍຮູບລໍຖ້າ ເພື່ອມີບັນດາຮູບຖ່າຍງາມທີ່ສຸດ. ພາຍຫຼັງໄດ້ຮັບຊົມພູມພາບທີ່ສວຍງາມໃນຍາມເຊົ້າແລ້ວ, ນັກທ່ອງທ່ຽວຈະກະກຽມໄປຢາມສະຖານີໂຄມໄຟທະເລ. ເຖິງວ່າຕ້ອງຜ່ານເສັ້ນທາງຫີນທີ່ຄົດລ້ຽວລຽບຕາມເນີນພູກໍ່ຕາມ, ແຕ່ຄວາມອິດເມື່ອທັງໝົດກໍ່ຖືກຫາຍໄປໝົດກ້ຽງ, ເມື່ອໄດ້ຢືນເທິງສະຖານີໂຄມໄຟທະເລຊົມເບິ່ງທັດສະນີຍະພາບທີ່ງົດງາມຢູ່ທີ່ນີ້.