ການປະຊຸມຂ່າວນັດສາມັນຂອງກະຊວງການຕ່າງປະເທດຫວຽດນາມ
ໂຄສົກກະຊວງການຕ່າງປະເທດຫວຽດນາມ ທ່ານ Luong Thanh Nghi
|
Vovworld- ທີ່ການປະຊຸມຂ່າວນັດສາມັນຂອງກະຊວງການຕ່າງປະເທດຫວຽດນາມທີ່ຈັດຂຶ້ນຢູ່ຮ່າໂນ້ຍເມື່ອຕອນບ່າຍ ວັນທີ 24/5, ໂຄສົກກະຊວງການຕ່າງປະເທດຫວຽດນາມ ທ່ານ Luong Thanh Nghi ໃຫ້ຮູ້ວ່າ ເຮືອຫາປາໝາຍເລກ QNg 5003TS ພ້ອມກັບຊາວປະມົງຫວຽດນາມ 14 ຄົນທີ່ຖືກຈີນຈັບຕົວເມື່ອວັນທີ 16/5/2012 ໄດ້ກັບຄືນປະເທດຢ່າງປອດໄພໃນວັນທີ 23/5 ແລ້ວ. ແຕ່ທາງຝ່າຍຈີນຍັງຢຶດເອົາ ເຮືອຫາປາໝາຍເລກ QNg 5003TS ພ້ອມກັບສິນທະເລທັງໝົດໃນເຮືອ. ຕອບສຳພາດກ່ຽວກັບປະຕິກິລີຍາຂອງຫວຽດນາມຕໍ່ໜ້າການກະທຳດັ່ງກ່າວຂອງຈີນ, ໂຄສົກ ກະຊວງການຕ່າງປະເທດຫວຽດນາມ ທ່ານ Luong Thanh Nghi ຢືນຢັນວ່າ :
“ ພາຍຫຼັງທີ່ຮັບການປະກາດຈາກຝ່າຍຈີນ, ຜູ້ຕາງໜ້າ ກະຊວງການຕ່າງປະເທດຫວຽດນາມໄດ້ພົບປະ ແລະ ມອບສານໃຫ້ແກ່ຜູ້ຕາງໜ້າສະຖານທູດຈີນປະຈຳຫວຽດນາມ. ເນື້ອໃນຂອງສານໄດ້ຊີ້ແຈ້ງວ່າ ເລື່ອງຈີນຂັດຂວາງ ແລະຈັບຕົວຊາວປະມົງ ແລະ ຢຶດເອົາ ເຮືອຫາປາທີ່ພວມເຄື່ອນໄຫວປະກອບອາຊີບຢ່າງຖືກຕ້ອງຕາມກົດໝາຍຢູ່ເຂດທະເລທີ່ຂຶ້ນກັບໝູ່ເກາະຮ່ວາງຊາຂອງຫວຽດນາມ ແມ່ນໄດ້ລະເມີດອະທິປະໄຕ, ສິດມີອະທິປະໄຕ, ສິດນຳສະເໜີພິຈາລະນາຕັດສິນຄວາມຖືກຕ້ອງຂອງຫວຽດນາມ. ຫວຽດນາມເດັດດຽວຄັດຄ້ານ ແລະ ສະເໜີທາງຝ່າຍຈີນຈົ່ງສົ່ງມອບເຮືອຫາປາພ້ອມກັບສິນທະເລທັງໝົດທີ່ຝ່າຍຈີນໄດ້ຢຶດເອົາເມື່ອວັນທີ 16/5 ແລະ ສົ່ງມອບເຮືອຫາປາ ໝາຍເລກ QNg 66101 ທີ່ຝ່າຍຈີນກໍໄດ້ຢຶດເອົາເມື່ອວັນທີ 4/3/2012, ພ້ອມທັງຕ້ອງຢຸດຕິບັນດາການກະທຳເຊັ່ນດຽວກັນ ”